جياڭسۋدىڭ چاڭشۋ قالاسىنداعى ءورت اپاتىندا 22 ادام ءولىپ، 3 ادام جارالاندى، ءورت قويعان كۇماندى قولعا الىندى
كەلۋقاينارى: |جاۋاپتى رەداكتور: | جاڭالانعان ۋاقىت:2017-07-17 10:20:00

ء

    وز حابارىمىز: شىلدەنىڭ 16 ـ كۇنى تاڭ سارىدە جياڭسۋ ولكەسىنىڭ چاڭشۋ قالاسىنداعى ءبىر جەردەگى تۇرعىندار بيناسىندا ءورت كەتىپ 22 ادام ءولىپ، 3 ادام جەڭىل جارالاندى، ءبىر ادامنىڭ دەرەگى تابىلمادى. قوعام حاۋىپسىزدىك مىنىسترلىگى، مەملەكەتتىك ءوندىرىس حاۋىپسىزدىگىن باقىلاپ باسقارۋ باس مەكەمەسى ءبۇل ءىستى تەكسەرۋگە كىرىسىپ، دەلونى قىلمىستى ىستەر دەلوسى دەپ تۇراقتاندىردى، قىلمىس كۇماندىسى قولعا الىندى.

 

شىلدەنىڭ 16 ـ كۇنى تاڭعى ساعات 4 تەن 29 مينۇت وتكەندە چاڭشۋ قالاسى يۇيشان قالاشىعى ساۋجيڭ جاڭا قىستاعى 2 ـ رايونىنداعى 74 ـ نومەرلى تۇرعىندار بيناسىنا ءورت كەتتى. قۇرىلىس كولەمى 200 شارشى مەتىر كەلەتىن، تاس كەرپىشتەن سالىنعان وسى ەكى قابات بينا سول جەردەگى ءبىر اسحانانىڭ قىزمەتكەرلەرى مايعا الىپ جاتقان جاتاقحانا بولىپ، ءورت كەتكەن كەزدە جاتاقتا 29 ادام بار بولاتىن.

 

ءورت كەتكەن بينانىڭ جانىنداعى 73 ـ نومەرلى بيناداعى ديڭ مىرزا كورگەندەرىن بىلاي باياندادى : مەن ەرتە تۇرىپ سىرتقا كوز سالسام قاسىمىزداعى بينانىڭ استىڭعى قاباتىنان بۇرقىلداپ ءتۇتىن شىعىپ جاتىر ەكەن، دەرەۋ جۇگىرە باسىپ سىرتقا شىقتىم، سىرتتا 4~5 جىگىت جۇگىرىپ ءجۇر، ولار ۇيدەن ەندى عانا قاشىپ شىققان ۇقسايدى، بارلىعىنىڭ سىمدارى عانا بار، كەۋدەلەرى جالاڭاش ەكەن، ولاردىڭ ەش قايىسىسىندا قول تەلەفوندا جوق بولىپ شىقتى، مەن دەرەۋ ءوزىمنىڭ قول تەلەفونىمەن 119 نومەرگە حابارلادىم. بۇل كەزدە ءورت لاۋلاپ جانىپ جاتىر ەدى.

 

ءورت ءوشىرۋ تاراۋلارى حابار الا سالا ءورت وشىرەتىن 14 اۆتوموبىل، 71 كوماندىر ـ جاۋىنگەردى ءورت مايدانعا دەرەۋ اتتاندىردى. ءبىر ساعاتتان سوڭ الاپات ءورت ءوشىرىلدى. شىلدەنىڭ 16 ـ كۇنى ساعات 10 مولشەرىندە ءورت مايدانى ءبىر جايلى ەتىلىپ بولدى.

 

چاڭشۋ قالالىق ساياسي زاڭ كوميتەتىنىڭ شۋجيى ۋ جۇن بىلاي دەدى: ءورت مايدانىن كوپ قايتالاي تەكسەرۋ ارقىلى 22 ادام انىقتالدى، بۇدان سىرت 6 ادام قۇتقارىلدى، بۇلاردىڭ ىشىندە 3 ادام جەڭىل جارالانعان، 3 ادام جارالانباعان ەكەن، ەندى ءبىر ادامنىڭ دەرەگى تابىلمادى.

 

قوعام حاۋىپسىزدىك مىنىسترلىگىندەگىلەر، مەملەكەتتىك ءوندىرىس حاۋىپسىزدىگىن باقىلاپ باسقارۋ باس مەكەمەسىندەگىلەر جانە جياڭسۋ ولكەسىنىڭ باسشىلارى ناق مايدانعا بارىپ ورتتەن قۇتقارۋعا جانە ءبىر جايلى ەتۋگە جەتەكشىلىك ەتتى. قوعام حاۋىپسىزدىك تاراۋلارىنىڭ بارلاۋى ارقىلى بۇل دەلونىڭ قاساقانا ءورت قويۋ دەلوسى بولىپ، ۋاقيعاداعى دەرەگى تابىلماعان وسى اسحانانىڭ جياڭ فاميليالى قىزمەتكەرىنىڭ دەلو تۋدىرۋ كۇمانى وتە زور ەكەندىگى تۇراقتاندى.شىلدەنىڭ 16 ـ كۇنى تۇستەن كەيىنگى ساعات 3 جارىم بولعاندا قىلمىس كۇماندىسى تاياۋ ماڭداعى ءبىر بينانىڭ توبەسىندەگى سۋ سكلات ءۇيدىڭ ىشىنەن ۇستالدى. قازىر دايىندىق تەرگەۋ جانە ورتتەن كەيىنگى ىستەردى ءبىر جايلى ەتۋ قىزمەتتەرى ءتارتىپتى ىستەلۋدە.

 

چاڭشۋ قالاسىنىڭ باستىعى جوۋ شيندي بىلاي دەيدى: شۇعىل ءبىر جايلى ەتۋ باسشىلىق گرۇپپاسىن قۇرىپ، ناق مايداندا ىزدەستىرۋ، ەمدەپ قۇتقارۋ، سوڭعى ءبىر جايلى ەتۋ قاتارلى قىزمەت گرۇپپالار بويىنشا ورنالاستىرۋمەن بىرگە، ادىليا، حالىق ىستەر، الەۋمەتتىك رايون، پسيحيكالىق جەتەكتەۋ ارناۋلى قىزمەتكەرلەرى قاتارلى 24 گرۇپپادان قۇرالعان سوڭعى ىستەردى ءبىر جايلى ەتۋ قىزمەت گرۇپپاسىن دا قۇردىق. ولگەندەر مەن جارالانعانداردىڭ سەمياسىنداعىلاردى قابىلداپ جۇباتۋعا جەكە ـ جەكە ادام ورنالاستىردىق.

 

اۋدارعان: قاناتبەك جۇماباي ۇلى