تاماشا ساياحات بايلىعىنىڭ جەبەۋىندە، تيانشاننىڭ بوكتەرىندەگى ەگىنشى-مالشىلاردىڭ تۇرمىسى جاقسارا باستادى
كەلۋقاينارى:جۇڭگو قازاق راديو تورابى |جاۋاپتى رەداكتور: | جاڭالانعان ۋاقىت:2018-07-12 16:27:00

 

    شينحۋا اگەنتتىگىنىڭ حابارى: تيانشان تاۋىنىڭ شىعىس بوكتەرىنە ورنالاسقان شينجياڭ باركول قازاق اۆتونوميالى اۋدانى كەزىندە شەكاراداعى كەدەي اۋدانداردىڭ ٴبىرى بولاتىن. تاياۋ جىلداردان بەرى، باركول اۋدانى دامۋ بارىسىندا ەكولوگيالىق ورتاعا ايىرىقشا ٴمان بەرىپ، ساياحات ىستەرى ارقىلى كەدەيلىكتەن قۇتىلۋدى نەگىزگى ٴتۇيىن ەتىپ، اۋىل-قىستاق ساياحات ىستەرى ارقىلى اۋىل-قىستاقتى كوركەيتۋدەي كەدەيلىكتەن قۇتىلدىرۋدىڭ جاڭا جولىن قاراستىردى.


    باركول كولى شينجياڭداعى تانىمالى جاراتىلىستىق كورىنىس رايونى بولىپ، كورىنىس رايونىنا جاعالاي ورنالاسقان كولبويى اۋىلىنا قاراستى ٴۇش كەدەي قىستاقتىڭ كەدەيلىكتەن قۇتىلدىرۋ ماسەلەسى باس قاتىراتىن قيىن تۇيىندەردىڭ ٴبىرى ەدى. جەرلىك تۇرعىندار ىرىستى مەكەندە كەدەيلىكتىڭ تاقسىرەتىن تارتىپ كەلگەن بولاتىن، كولبويى اۋىلدىق پارتكومنىڭ شۋجيى ليۋ جۇنحۇي ٴۇشىن الىپ ايتقاندا بۇل قيىن وتكەلدەردىڭ ٴبىرى ەدى، ول كوپ ويلانا كەلە قىستاق تۇرعىندارىن باستاپ اۋىل-قىستاق ساياحاتىن دامىتۋعا بەكىدى.


    ٴۇش جىلدان بەرى، جەرلىك ۇكىمەت باركول كولى ساياحاتىن اشىپ، ىلگەرىندى-كەيىندى كولدى بويلاپ تاس جول سالىپ، قالقىما كوپىر مەن اۆتوموبيل توقتاتۋ الاڭىن قۇرىپ، ساياحات وڭىرىندە ٴۇي سالىپ كەدەي سەميالارعا شارۋالار ساياجايىن اقىسىز اشۋعا تيىمدىلىك جاراتىپ، ات اربا، تۇيەگە ٴمىنۋ، ساياتشىلىق قاتارلى ساياحات نىساندارىن ەنگىزدى.


    كازىحۋ قىستاعىنىڭ تۇرعىنى داۋلەتقان بايتان ۇلى باركول كولى ساياحات وڭىرىندە ورتا تازالىعى جۇمىسىمەن شۇعىلدانادى. ول سىرتقا شاپقىلاماي-اق ٴبىر ايدا مىڭ يۋان تاباتىندىعىن، ٴارى وتباسىنداعى قارتتار مەن بالالارعا قاريلاسۋعا مۇمكىندىك تۋىلىپ، كوڭىلىنىڭ ٴجاي تاپقاندىعىن ايتتى.


    بۇرىن سىرتتا جۇمىس ىستەيتىن ماۋلەت اسانشارىپ ۇلى ايەلىمەن بىرگە اۋىلعا قايتىپ، وتباسى ساياجايى مەيمانحاناسىن اشتى. تۇتىنۋشىلار كۇندىز اسحانادا تاماقتانسا، تۇندە مەيمانحانادا قونىپ قالۋىنا بولادى. ماۋلەت بىلاي دەدى: جازداي تاپقان پايدامىز بۇرىنعى جۇبايىم ەكەۋىمىزدىڭ ٴبىر جىلداعى تاپقان كىرىسىمىزدەن دە الدە قايدا ارتىق.


    سارماي، ايران، قۇرت، كەستە قاتارلى ونىمدەردىڭ بازارى اشىلدى، باعاسى دا كوپ جوعارى. قۇرتتىڭ بازارداعى باعاسى 2016-جىلداعى ٴار كيلوگرام 40 يۋاننان قازىرگى 90 يۋانعا جوعارىلادى. قىستاقتاعى تالاي تۇرعىنداردىڭ تۇرمىسى جاقسارىپ، اۋەلى كەيبىرەۋلەرى ادام جالداپ ىستەتىپ، قوجايىنعا اينالا باستادى. ساياحات، ٴتۇرلى تاعام، ۇلتتىق ەرەكشەلىككە يە ونىمدەردىڭ ساتىلۋى قىستاعى تۇرعىنداردىڭ كىرىسىن ارتتىرىپ، اۋقاتتانۋعا باستادى.


اۋدارعان: ماقپال كومۇنيسقان قىزى