«ماريا» اتتى تايفىڭ داۋىلىنىڭ كۇشەمەلىلىگى، كولەمى باسەيدى، فۋجيان، جىجياڭ، جياڭشي قاتارلى جەرلەر اپاتتان كەيىنگى قايتا قۇرۋدى جەدەلدەتتى
كەلۋقاينارى:جۇڭگو قازاق راديو تورابى |جاۋاپتى رەداكتور: | جاڭالانعان ۋاقىت:2018-07-13 10:38:00

 

    ٴوز حابارىمىز: بيىلعى 8-ٴنومىرلى «ماريا» اتتى تايفىڭ داۋىلىنىڭ كۇشەمەلىلىگى، كولەمى كورنەكتى باسەيدى، فۋجيان، جىجياڭ، جياڭشي قاتارلى جەرلەر اپاتتان كەيىنگى قايتا قۇرۋ قادامىن جەدەلدەتتى.


    «ماريا» تايفىڭ داۋىلىنان تۋىنداعان دۇلەي تولقىن مەن قالىڭ نوسەردىڭ ىقپالىنان، فۋجياننىڭ نيڭدى قالاسىنىڭ تەڭىز جاعالاۋىنداعى باسىم كوپ وڭىرلەر اپاتقا ۇشىراپ، قىسقىش كولشىگى، بالىقشىلىق سالى، ەگىس اتىزى، تۇرعىن ٴۇي قاتارلىلار تۇرلىشە دارەجەدە ٴبۇلىنىپ، كوپتەگەن تەڭىز كەمەرىنەن قاتەرلى جاعداي بايقالدى. فۋديڭ قالاسىنىڭ حۋچي تەڭىز كەمەرىندەگى 400 مەتر شاماسىنداعى تولقىننان ساقتانۋ قورعانى ويراندالىپ، جەرلىك ورىن شۇعىل قۇتقارۋعا كىرىستى. تايفىڭ داۋىلىنان فۋجوۋ قالا رايونىندا نەشە مىڭ ٴتۇپ تەرەك قوپارىلىپ، بارلىق جەر جاپىراق پەن بۇتاققا تولىپ قالدى. كەشە تۇستەن كەيىنگە دەيىن، فۋجوۋ قالالىق ورتا قورعاۋ جۇمىسشىلارى تايفىڭ داۋىلىنان كەيىنگى 1800 توننا قوقسىقتى تازالادى.


    جىجياڭدا، ۋىنجۋدىڭ ساڭنان اۋدانىندا ٴىشىنارا نەگىزدىك اتىز قۇرىلعىلارى ٴبۇلىنىپ، اۋىل شارۋاشىلىق داقىلدارى سۋدا، لايدا جاپىرىلىپ قالدى، ٴۇي قۇستارى مەن مالداردىڭ اپاتقا ۇشىراۋ مولشەرى دە اۋىر بولدى، قازىر جەرلىك پارتيا مۇشەلەرى مەن بۇقارا ٴوندىرىستى قالپىنا كەلتىرۋگە كىرىسىپ، ارىقتاردى تازالادى، اۋىل شارۋاشىلىق تاراۋلارى التى قىزمەت اتىرەتىندەگى 30 اۋىل شارۋاشىلىق تەحنيكا مامانىن ۇيىمداستىرىپ، ليڭشي، چياۋدۇن، ماجان، جيڭشي قاتارلى اۋىل شارۋاشىلىعىنداعى ٴتۇيىندى اۋىل-قالاشىقتاردا اپاتتان كەيىنگى جەتەكشىلىك ەتۋدى جانە قىزمەت وتەۋدى ورىستەتىپ، بازاردىڭ قامداۋىنا كەپىلدىك ەتتى.


    جياڭشي ولكەسى جيشۇي اۋدانىنىڭ ۋىنفىڭ قالاشىعىندا 10 كيلوۆاتتىق ەلەكتر جولىندا كىنارات تۋىلعاننان كەيىن توكپەن قامداۋ ٴۇزىلىپ، 6 قىستاقتاعى 2500 دەن استام تۇرعىننىڭ توگى توقتادى. توكپەن قامداۋ تاراۋلارى كىنارات تۋىلعان 11 جەردى شۇعىل جوندەدى.

اۋدارعان: گۇلنۇر قابىلقاق قىزى