شي جينپيڭ حالقارالىق پروكۋرورلار بىرلەستىگىنىڭ 22 ـ كەزەكتى جىلدىق جينالىسى مەن مۇشە ۋاكىلكدەر قۇرىلتايى اشىلعاندىعىن حات جولداپ قۇتتىقتادى
كەلۋقاينارى: |جاۋاپتى رەداكتور: | جاڭالانعان ۋاقىت:2017-09-12 09:47:00

 

    شينحۋا اگەنتتىگىنىڭ حابارى: حالقارالىق پروكۋرورلار بىرلەستىگىنىڭ 22 ـ كەزەكتى جىلدىق جينالىسى جانە مۇشە ەلدەر ۋاكىلكدەر قۇرىلتايى قىركۇيەكتىڭ 11 ـ كۇنى بەيجيڭدە اشىلدى. مەملەكەت ءتوراعاسى شي جينپيڭ ءماجىلىستىڭ اشىلعاندىعىن حات جولداپ قۇتتىقتادى.

 

شي جينپيڭ مىنالاردى ناقتاپ ايتتى: پروكۋرورلار الەۋمەتتىك مۇدەنى قورعاۋشىلاردىڭ ۋاكىلى رەتىندە ماڭىزدى جاۋاپكەرشىلىك ارقالايدى. حالقارالىق پروكۋرورلار بىرلەستىگىنىڭ وسى كەزەك جىلدىق جينالىسىندا الەۋمەتتىك مۇدەنى قورعايتىن پروكۋرور بولۋ تاقىرىپ ەتىلىپ، تىنىش، ءادىل، جاراسىمدى زاڭ ـ تۇزىمدىك قوعام قۇرۋ توڭىرەكتەلىپ، پروكۋرورلاردىڭ الەۋمەتتىك مۇدەنى قالاي قورعاۋ ماسەلەسى ىشكەرىلەي تالقىلانۋى ءار ەلدىڭ زاڭ ـ ءتۇزىم قۇرىلىسىن جەبەۋ جونىنەن ماڭىزدى مانگە يە.

 

شي جينپيڭ مىنالاردى باسا ايتتى: جۇڭگو ۇكىمەتى مەملەكەتتى جالپى بەتتىك زاڭمەن باسقارۋعا وسكەلەڭ ءمان بەرەدى، زاڭدى عىلمي جولمەن شىعارۋدى، قاتاڭ اتقارۋدى، ادىليالىق ادىلدىكتى، زاڭعا جالپى بەتتىك باعىنۋدى جالعاستى جەبەيدى، مەملەكەتتى زاڭمەن باسقارۋعا، زاڭ بويىنشا بيلىك جۇرگىزۋگە، زاڭ بويىنشا اكىمشىلىك جۇرگىزۋگە تاباندى بولادى، زاڭمەن باسقارىلاتىن مەملەكەتتى، ۇكىمەتتى جانە قوعامدى ءبىر تۇلعالاندىرۋدان اۋىتقىماي، جۇڭگوشا ەرەكشەلىككە يە زاڭ ـ ءتۇزىمدىك جۇيە، سوتسيالىستىك زاڭ ـ تۇزىمدىك مەملەكەت قۇرۋعا قۇلشىنا بەرەدى. جۇڭگونىڭ پروكۋراتۋرا قۇرىلىمى ـ مەملەكەتتىڭ زاڭدىق باقىلاۋ قۇرىلىمى، ول قىلمىستاردى جازالاۋ جانە قىلمىس وتكىزۋدىڭ الدىن الۋ، ارىز ـ شاعىم ىستەرىنە باقىلاۋشىلىق ەتۋ قاتارلى فونكىتسيالاردى ارقالاعان مەملەكەت مۇدەسىن جانە قوعامدىق الەۋمەتتىك مۇدەنى قورعايتىن ماڭىزدى كۇش. جۇڭگو پروكۋرورلاردىڭ الەۋمەتتىك مۇدەنى قورعاۋ رولىن ساۋلەلەندىرىپ، زاڭ ـ ءتۇزىم قۇرىلىسىن جەبەۋدە كوپتەگەن تاجىريبەلەر توپتادى ءارى دۇنيەدەگى زاڭ ـ ءتۇزىم مادەنيەتىندىك تابىستاردان تاجىريبە قابىلداۋدى قالايدى.ءار ەل پروكۋرورلارىنىڭ وسى كەزەك ءماجىلىستى وراي ەتىپ، الەۋمەتتىك مۇدەنى قورعاۋ، زاڭ ـ ءتۇزىم قۇرىلىسىن ىلگەرىلەتۋ جاعىنداعى تاجىريبەلەردەن ورتاق يگىلىكتەنىپ، ادىليالىق سەلبەستىك اۋىس ـ كۇيىستى تەرەڭدەتىپ، ادامزاتتىڭ بەيبىتشىلىك جانە دامۋداي قاستەرلى ءىسىن ورتاق جەبەۋگە تىڭ ۇلەستەر قوسۋىن ءۇمىت ەتەمىن.

 

اۋدارعان: قاناتبەك جۇماباي ۇلى