شي جينپيڭ ج ك پ مەن دۇنيە جۇزىندەگى ساياسي پارتيالاردىڭ جوعارى دارەجەلىلەر كەڭەسىنە قاتىناستى
0
2017-12-04 09:13:00
|
كەلۋقاينارى:جۇڭگو قازاق راديو تورابى
|
جاۋاپتى رەداكتور :

شي جينپيڭ جۇڭگو كوممۋنيستىك پارتياسى مەن دۇنيە جۇزىندەگى ساياسي پارتيالاردىڭ جوعارى دارەجەلىلەر كەڭەسىنىڭ اشىلۋ راسىمىنە قاتىناستى جانە ارقاۋ ءسوز سويلەدى


ۋاڭ حۋنيڭ اشىلۋ راسىمىنە جانە ءبىرىنشى رەتكى جالپى ماجىلىسكە قاتىناستى


ج ك پ ورتالىق كوميتەتىنىڭ باس شۋجيى، مەملەكەت ءتوراعاسى شي جينپيڭ 1 - جەلتوقساندا حالىق سارايىندا جۇڭگو كوممۋنيستىك پارتياسى مەن دۇنيە جۇزىندەگى ساياسي پارتيالاردىڭ جوعارى دارەجەلىلەر كەڭەسىنىڭ اشىلۋ راسىمىنە قاتىناستى، سونداي - اق «قول ۇستاسىپ، اناعۇرلىم كوركەم الەم قۇرايىق» دەگەن تاقىرىپتا ارقاۋ ءسوز سويلەدى. سۋرەتتى شينحۋا اگەنتتىگىنىڭ ءتىلشىسى ليۋ ۋيبيڭ تۇسىرگەن


    شينحۋا اگەنتتىگىنىڭ 1 - جەلتوقساندا بەيجيڭنەن بەرگەن حابارى (تىلشىلەر سۇي ۋىن - ي، شۇي كى). ج ك پ ورتالىق كوميتەتىنىڭ باس شۋجيى، مەملەكەت ءتوراعاسى شي جينپيڭ 1 - جەلتوقساندا حالىق سارايىندا جۇڭگو كوممۋنيستىك پارتياسى مەن دۇنيە جۇزىندەگى ساياسي پارتيالاردىڭ جوعارى دارەجەلىلەر كەڭەسىنىڭ اشىلۋ راسىمىنە قاتىناستى، سونداي - اق «قول ۇستاسىپ، اناعۇرلىم كوركەم الەم قۇرايىق» دەگەن تاقىرىپتا ارقاۋ ءسوز سويلەپ، ساياسي پارتيالاردىڭ ءداۋىر اعىمىنا بەيىمدەلىپ، ادامزاتتىڭ العا باسۋ بەتالىسىن يگەرىپ، حالىقتىڭ ورتاق تىلەگىنە ۇيلەسۋىن، وسكەلەڭ مۇراتقا تالپىنىپ، جاۋاپكەرلىكتى باتىل ۇستىنە الىپ، ءداۋىر بورىشىن سانالى تۇردە ارقالاۋى كەرەكتىگىن، جۇڭگو كوممۋنيستىك پارتياسىنىڭ دۇنيە ءجۇزىنىڭ بەيبىتشىلىگى مەن تىنىشتىعى، بىرگە دامۋى، وركەنيەتتەردىڭ اۋىس - كۇيىسى مەن ءوزارا ۇلگى الۋى ءۇشىن بۇرىنعىداي ۇلەس قوساتىنىن باسا دارىپتەدى.


    شي جينپيڭ مىنالاردى اتاپ كورسەتتى: ج ك پ 19 - قۇرىلتايى جۇڭگونىڭ قازىردەن وسى عاسىردىڭ ورتاسىنا دەيىنگى دامۋ جوباسىن كەسكىندەپ، جۇڭگونىڭ ءار جاقپەن بىرلەسىپ، ادامزاتتىڭ تاعدىرلاس ورتاق تۇلعاسىن قۇرۋدى ىلگەرىلەتەتىن شىنايى تىلەگىن ايگىلەدى. ساياسي پارتيالار مەملەكەتتىڭ ساياسي ومىرىندە ماڭىزدى رول اتقارادى، ولار ادامزات وركەنيەتىنىڭ العا باسۋىن ىلگەرىلەتەتىن ماڭىزدى كۇش. جىل سوڭىنا الا الەمنىڭ ءار ەلىندەگى 300گە تارتا ساياسي پارتيا مەن ساياسي ۇيىمنىڭ باسشىلارىنىڭ بەيجيڭدە باس قوسىپ، ىنتىماقتاستىق ۇلى جوباسىن بىرگە اقىلداسۋى كوپشىلىكتىڭ ادامزاتتىڭ دامۋى مەن الەمنىڭ بولاشاعىنا كوڭىل بولەتىنىن تولىق ايگىلەدى. 


    شي جينپيڭ مىنالاردى اتاپ كورسەتتى: بۇگىنگى تاڭدا، ادامزات ءومىرى بۇرىن بولماعان دەڭگەيدە ءوزارا ىلىكتەسىپ، بايلانىستى، سونىمەن بىرگە، ادامزات بۇرىن بولماعان جاھاندىق ماسەلەلەرگە ءدوپ كەلدى. الەمدەگى ءار ەل حالقىنىڭ بولاشاعى مەن تاعدىرى بارعان سايىن تىعىز بايلانىسۋدا. الەمدەگى ءار ەل حالقى «جەر الەم − ءبىر شاڭىراق» ۇستانىمى بويىنشا، ءبىرىن - ءبىرى ءتۇسىنۋى، ايىرماشىلىقتى قايىرا تۇرىپ، ورتاقتىققا ۇمتىلۋى، ادامزاتتىڭ تاعدىرلاس ورتاق تۇلعاسىن قۇرۋ ءۇشىن بىرگە قۇلشىنۋى ءتيىس. مەنىڭ «ءبىر بەلدەۋ، ءبىر جول» باستاماسىن ورتاعا قويۋداعى ماقساتىم − ادامزاتتىڭ تاعدىرلاس ورتاق تۇلعاسى ۇستانىمىن جۇزەگە اسىرۋ. 4 جىلدان بەرى، «ءبىر بەلدەۋ، ءبىر جولدى» بىرگە قۇرۋ قاتىستى ەلدەردىڭ بىرگە دامۋدى جۇزەگە اسىراتىن ايرىقشا اۋقىمدى ىنتىماقتاستىق تۇعىرىنا اينالدى. 


    شي جينپيڭ مىنالاردى باسا دارىپتەدى: ءبىز ۇرەيدەن اۋلاق، جاپپاي حاۋىپسىز الەم قۇرۋعا قۇلشىنىپ، ورتاق، كەشەندى، سەلبەسكەن، باياندى جاڭا حاۋىپسىزدىك تانىمىنا تاباندى بولىپ، ءادىل دە ادىلەتتى، بىرگە قۇرىپ، بىرگە يگىلىككە كەنەلەتىن حاۋىپسىزدىك جاعدايىن قالىپتاستىرۋىمىز؛ كەدەيلىكتەن اۋلاق، بىرگە گۇلدەنەتىن الەم قۇرىپ، «ءسىز دە جاقسى، ءبىز دە جاقسى، ءبارىمىز جاقسى بولايىق» دەگەن ۇستانىمعا تاباندى بولىپ، دامۋ جەمىستەرىنىڭ الەمنىڭ ءار ەلىنە تيىمدىلىك جاساۋىنا، اركىمنىڭ مولشىلىق پەن تىنىش، الاڭسىز ومىردەن يگىلىكتەنۋىنە مۇمكىندىك جاساۋىمىز؛ جابىقتىقتان اۋلاق، اشىق، قامتىمدى الەم قۇرۋعا قۇلشىنىپ، الەمنىڭ سان الۋاندىعى، وركەنيەتتەردىڭ كوپ تۇرلىلىگى ۇستانىمىنا تاباندى بولىپ، ءتۇرلى وركەنيەتتەردىڭ جاراسىمدى قاتار ءومىر سۇرۋىنە مۇمكىندىك جاساۋىمىز؛ تاۋى جاسىل، سۋى تۇنىق، تازا دا كورىكتى الەم قۇرىپ، ادام مەن تابيعاتتىڭ قاتار ءومىر ءسۇرۋى ۇستانىمىنا تاباندى بولىپ، جاراسىمدى، ءومىر سۇرۋگە جايلى ادامزات مەكەنىن بىرگە قالىپتاستىرۋىمىز كەرەك. 


    شي جينپيڭ مىنالاردى اتاپ كورسەتتى: قازىر الەمدىك جاعداي وزگەرۋدە، دامۋ اۋقىمى دا وزگەرۋدە، ساياسي پارتيالار تۇگەلدەي ءداۋىردىڭ دامۋ اعىمىنا بەيىمدەلىپ، ءوزىنىڭ دامۋىن مەملەكەتتىڭ، ۇلتتىڭ، ادامزاتتىڭ دامۋىمەن تىعىز بايلانىستىرۋى كەرەك. تۇرلىشە مەملەكەتتەردەگى ساياسي پارتيالار ءوزارا سەنىمدى نىعايتىپ، پىكىر اۋىسۋدى كۇشەيتىپ، تىعىز سايكەسۋى، جاڭاشا حالىقارالىق قارىم - قاتىناستار نەگىزىندە ايىرماشىلىقتاردى قايىرا تۇرىپ، ورتاقتىققا ۇمتىلاتىن، ءوزارا قۇرمەتتەيتىن، ءبىر - بىرىنەن ۇيرەنەتىن، ۇلگى الاتىن جاڭاشا ساياسي پارتيالار قاتىناسى جونىندە ىزدەنىس جاساپ، ساياسي پارتيالار اۋىس - كۇيىسى مەن ىنتىماقتاستىعىنىڭ ءتۇرلى فورماداعى، ءتۇرلى جىكتەگى حالىقارالىق جەلىسىن ورناتىپ، ادامزاتتىڭ تاعدىرلاس ورتاق تۇلعاسىن قۇراتىن قۋاتتى كۇش توپتاۋ كەرەك. 


    شي جينپيڭ مىنالاردى اتاپ كورسەتتى: جۇڭگو كوممۋنيستىك پارتياسى جۇڭگو حالقىنىڭ باقىتىن كوزدەگەن پارتيا، سونداي - اق ادامزاتتىڭ العا باسۋ ءىسى ءۇشىن كۇرەسەتىن پارتيا. ءبىز ءوز ءىسىمىزدى جاقسى ىستەۋىمىز كەرەك، وسىنىڭ ءوزى ادامزاتتىڭ تاعدىرلاس ورتاق تۇلعاسىن قۇرۋعا قوسقان ۇلەس. سونىمەن بىرگە، ءبىز جۇڭگونىڭ دامۋىن ىلگەرىلەتۋ ارقىلى الەمگە اناعۇرلىم كوپ وراي ازىرلەۋىمىز كەرەك. ءبىز شەتەلدىڭ ۇلگىسىن «يمپورت ەتپەيمىز»، جۇڭگونىڭ ۇلگىسىن دە شەتەلگە «ەكسپورت ەتپەيمىز»، باسقا مەملەكەتتەن جۇڭگونىڭ ءادىسىن «كوشىرىپ الۋدى» دا تالاپ ەتپەيمىز. 


    ج ك پ ورتالىق كوميتەتىنىڭ باس شۋجيى، مەملەكەت ءتوراعاسى شي جينپيڭ 1 - جەلتوقساندا حالىق سارايىندا جۇڭگو كوممۋنيستىك پارتياسى مەن دۇنيە جۇزىندەگى ساياسي پارتيالاردىڭ جوعارى دارەجەلىلەر كەڭەسىنىڭ اشىلۋ راسىمىنە قاتىناستى، سونداي - اق «قول ۇستاسىپ، اناعۇرلىم كوركەم الەم قۇرايىق» دەگەن تاقىرىپتا ارقاۋ ءسوز سويلەدى. سۋرەتتە: اشىلۋ راسىمىنەن بۇرىن، شي جينپيڭ شەتەلدىك نەگىزگى سيلى قوناقتارمەن قول الىسىپ امانداستى جانە ەستەلىك سۋرەتكە ءتۇستى. سۋرەتتى شينحۋا اگەنتتىگىنىڭ ءتىلشىسى ديڭ لين تۇسىرگەن 


    ءبىرىنشى، جۇڭگو كوممۋنيستىك پارتياسى الەمنىڭ بەيبىتشىلىگى مەن تىنىشتىعى ءۇشىن بۇرىنعىداي ۇلەس قوسا بەرەدى. جۇڭگو بەيبىتشىلىك، دامۋ، ىنتىماقتاستىق، تەڭ يگىلىككە كەنەلۋ تۋىن بيىك ۇستاپ، ءارقاشان بەيبىت دامۋ جولىنان جازباي، جاھاندىق سەرىكتەستىك قاتىناس قۇرىلىسىن بەلسەنە ىلگەرىلەتىپ، حالىقارالىق قولامتالار مەن قيىن ماسەلەلەردى ساياسي جولمەن شەشۋ ۇردىسىنە بەلسەنە ارالاسادى. جۇڭگو جاھاندىق جونگە سالۋ جۇيەسى رەفورماسى مەن قۇرىلىسىنا بەلسەنە ات سالىسىپ، حالىقارالىق ساياسي، ەكونوميكالىق ءتارتىپتىڭ اناعۇرلىم ءادىل، ۇيلەسىمدى بەتالىسقا قاراي دامۋىن ىلگەرىلەتەدى. جۇڭگو دامىپ قاي دەڭگەيگە جەتسەدە، ماڭگى زورەكەر بولمايدى، ماڭگى ىرگە كەڭەيتپەيدى. ءبىز الەمنىڭ ءار ەلىندەگى ساياسي پارتيالاردى بىزبەن بىرگە الەم بەيبىتشىلىگىنىڭ قۇرۋشىلارىنان، جاھاندىق دامۋعا ۇلەس قوسۋشىلاردان، حالىقارالىق ءتارتىپتى ساقتاۋشىلاردان بولۋعا ۇندەيمىز. 


    ەكىنشى، جۇڭگو كوممۋنيستىك پارتياسى الەمنىڭ بىرگە دامۋى ءۇشىن بۇرىنعىداي ۇلەس قوسا بەرەدى. جۇڭگو كوممۋنيستىك پارتياسى ەجەلدەن تەرەڭ حالىقتىق سۇيىسپەنشىلىككە يە، ول جۇڭگو حالقىن باقىتقا كەنەلتۋگە ىنتالى بولىپ قالماستان، الەمدەگى ءار ەل حالقىن دا باقىتقا كەنەلتۋدى قالايدى. ج ك پ 19 - قۇرىلتايىنىڭ ورنالاستىرۋى بويىنشا، 2020 - جىلعا بارعاندا جۇڭگو جاپپاي دوڭگەلەك داۋلەتتى قوعام ورناتادى، 2035 - جىلى جۇڭگو سوتسياليستىك وسىزامانداندىرۋدى نەگىزىنەن جۇزەگە اسىرىپ، وسى عاسىردىڭ ورتاسىنا بارعاندا، باي، دەموكراتيالى، وركەنيەتتى، جاراسىمدى، كورىكتى، سوتسياليستىك وسىزاماندانعان قۇدىرەتتى ەل قۇرىپ شىعادى. بۇل جۇڭگو حالقى ءۇشىن باقىت، الەمدەگى ءار ەل حالقى ءۇشىن دە باقىت بولىپ تابىلادى. ءبىز الەمنىڭ ءار ەلىندەگى ساياسي پارتيالاردى بىزبەن بىرگە، الەم ءۇشىن اناعۇرلىم كوپ ىنتىماقتاستىق ورايىن ازىرلەۋگە، الەمدەگى ءار ەل حالقىنىڭ بىرگە دامۋىن، گۇلدەنۋىن ىلگەرىلەتۋگە قۇلشىنۋعا ۇندەيمىز. 


    ءۇشىنشى، جۇڭگو كوممۋنيستىك پارتياسى الەمدەگى وركەنيەتتەردىڭ اۋىس - كۇيىسى، ءوزارا ۇلگى الۋى ءۇشىن بۇرىنعىداي ۇلەس قوسا بەرەدى. جۇڭگو كوممۋنيستىك پارتياسى ەجەلدەن الەمدىك كوز ايا ورناتۋدى دارىپتەپ، الەمدەگى ءار ەل حالقى جاراتقان وركەنيەت جەتىستىكتەرىنەن بەلسەنە ۇيرەنىپ، ۇلگى الىپ، جانە ونى جۇڭگونىڭ ءىس جۇزىندىك جاعدايىمەن بىرلەستىرە وتىرىپ قولدانىپ كەلەدى. جۇڭگو كوممۋنيستىك پارتياسى الەمدەگى ءار ەل حالقىنىڭ وركەنيەت جاسامپازدىعىنا اشىق كوز ايامەن، داڭعىل كوكىرەكپەن مامىلە جاساپ، الەمدەگى ءار ەل حالقىمەن جانە ءار ەلدىڭ ساياسي پارتيالارىمەن كەڭەس جانە اۋىس - كۇيىس، ىنتىماقتاستىق ورىستەتۋدى قالايدى، ءار ەل حالقىمەن گۋمانيتارلىق بارىس - كەلىستى جانە حالىقتار ارا دوستىقتى كۇشەيتۋدى قولدايدى. الداعى 5 جىلدا، جۇڭگو كوممۋنيستىك پارتياسى دۇنيە جۇزىندەگى ءار ەلدىڭ ساياسي پارتيالارىنان 15 مىڭ ادامعا جۇڭگوعا تاجىريبە اۋىسۋعا كەلەتىن وراي بەرەدى. ءبىز جۇڭگو كوممۋنيستىك پارتياسى مەن دۇنيە جۇزىندەگى ساياسي پارتيالاردىڭ جوعارى دارەجەلىلەر كەڭەسىن مەحانيزمدەندىرۋگە، ونى كەڭ ۋاكىلدىك سيپاتقا جانە حالىقارالىق ىقپالعا يە جوعارى دەڭگەيلى ساياسي سۇحبات تۇعىرىنا اينالدىرۋعا ۇندەيمىز. 


    شي جينپيڭ مىنالاردى باسا دارىپتەدى: بولاشاقتى بەتكە العان جۇڭگو كوممۋنيستىك پارتياسى دۇنيە جۇزىندەگى ءار ەلدىڭ ساياسي پارتيالارىمەن بارىس - كەلىستى كۇشەيتىپ، پارتيانى جونگە سالۋ، مەملەكەتتى جونگە سالۋ تاجىريبەلەرىن ءوزارا اۋىسۋدى، وركەنيەتتەردىڭ اۋىس - كۇيىسى مەن ديالوگىن ورىستەتۋدى، ءوزارا ستراتەگيالىق سەنىمدىلىكتى نىعايتۋدى، ادامزاتتىڭ تاعدىرلاس ورتاق تۇلعاسىن قۇرۋدى ىلگەرىلەتۋدى، قول ۇستاسىپ، اناعۇرلىم كورىكتى الەم قۇرۋدى قالايدى. 


    اشىلۋ راسىمىنەن بۇرىن، شي جينپيڭ شەتەلدىك نەگىزگى سيلى قوناقتارمەن قول الىسىپ امانداستى جانە ەستەلىك سۋرەتكە ءتۇستى. 


    اشىلۋ راسىمىنەن كەيىن، جوعارى دارەجەلىلەر كەڭەسى ءبىرىنشى رەتكى جالپى ءماجىلىسىن وتكىزدى. كامبودجا حالىق پارتياسىنىڭ ءتوراعاسى، ۇكىمەتتىڭ باس ءۋازىرى حۇڭسىن، بيرمانىڭ مەملەكەت كەڭەسشىسى اڭشان سۋجي، رەسەيدىڭ «ءبىر تۇتاس رەسەي» پارتياسى باس كوميتەتى ءتوراعالار القاسىنىڭ ورىنباسار حاتشىسى جەلەزنياك، ا ق ش رەسپۋبليكاشىلدار پارتياسى مەملەكەتتىك كوميتەتىنىڭ قازىناشىسى توني پاركەر، ەفيوپيا حالىقتىق توڭكەرىس - دەموكراتيا شەبىنىڭ ورىنباسار ءتوراعاسى، ۇكىمەتتىڭ ورىنباسار زۇڭليى دەمەكە جالپى ماجىلىستە جەكە - جەكە ارناۋ ءسوز سويلەپ، شي جينپيڭنىڭ ادامزاتتىڭ تاعدىرلاس ورتاق تۇلعاسىن قۇرىپ، قول ۇستاسىپ، اناعۇرلىم كورىكتى الەم قۇرۋ جونىندەگى دارىپتەمەسىن جوعارى باعالاپ، جۇڭگو كوممۋنيستىك پارتياسىمەن بىرگە، باياندى، بەيبىت، جاپپاي حاۋىپسىز، بىرگە گۇلدەنەتىن، اشىق، قامتىمالى، تازا، كورىكتى الەمدى بىرگە قۇرۋدى قالايتىندىقتارىن ءبىلدىردى. 
    ج ك پ ورتالىق كوميتەتى ساياسي بيۋروسىنىڭ تۇراقتى مۇشەسى، ورتالىق كوميتەت شۋجيچۋىنىڭ شۋجيى ۋاڭ حۋنيڭ اشىلۋ راسىمىنە جانە ءبىرىنشى جالپى ماجىلىسكە قاتىناستى. 


    ديڭ شۋەشياڭ، ياڭ جيەچى، ياڭ شياۋدۋ، چىن شي، حۋاڭ كۇنميڭ، ساي چي، ت.ب قاتىستى قيمىلدارعا قاتىناستى. 


    جۇڭگو كوممۋنيستىك پارتياسى مەن دۇنيە جۇزىندەگى ساياسي پارتيالاردىڭ جوعارى دارەجەلىلەر كەڭەسى «ادامزاتتىڭ تاعدىرلاس ورتاق تۇلعاسىن قالىپتاستىرىپ، كورىكتى الەمدى بىرگە قۇرۋ: ساياسي پارتيالاردىڭ جاۋاپكەرشىلىگى» دەگەن تاقىرىپپەن وتەدى، وعان 120 نەشە ەلدەگى 300گە جۋىق ساياسي پارتيانىڭ جانە ساياسي ۇيىمنىڭ باسشىلارىن قامتىعان جۇڭگو مەن شەتەلدىڭ 600دەن استام ۋاكىلى قاتىناسادى.

未标题-1.jpg
شي جينپيڭ ج ك پ مەن دۇنيە جۇزىندەگى ساياسي پارتيالاردىڭ جوعارى دارەجەلىلەر كەڭەسىنە قاتىناستى
5555.jpg
00.jpg
00.jpg
00.jpg