ولاردى اجالمەن بەتپە-بەت سايىسۋشىلار دەۋگە تاتيدى
0
2019-06-12 11:18:00
|
كەلۋقاينارى:
|
جاۋاپتى رەداكتور :

 

    ولار كەزىندە كۇندى تۇنگە جالعاپ اداسىپ كەتكەن ىستۋدەنتتى ىزدەدى، تۇندە يەن تاۋدا كيىمشەڭ ۇيىقتادى؛ ولار كەزىندە تايبايشان شوقىسىنداعى قارعا تۇسكەن اياق ءىزىن قۋالاپ قاتەردە قالعان توپتىڭ دەرەگىن قاراستىردى؛ چينليڭ قۇتقارۋ جاردەم بەرۋ اترەتىندەگىلەر مەن «حۋاڭما» وتكەن ءبىرقانشا جىلدا دالا سەرۋەنىندە حاۋىپتە قالعان 200دەن ارتىق ادامدى اجال اۋىزىنان الىپ قالدى...

 

شي-ءاننان وڭتۇستىككە قاراي چينليڭ تاۋى كولبەي كوسىلىپ جاتىر. جاعراپيالىق تۇرعىدا بۇل جەر جۇڭگونىڭ وڭتۇستىگى مەن سولتۇستىگىنىڭ شەگارا تاۋ سىلەمى. سانسىزداعان دالا ساياحاتشىلارىنىڭ سەرۋەندەۋدى اڭسايتىن ورنى.

 

2013-جىلدىڭ الدى-ارتىندا چينليڭ تاۋىنا ساياحاتتايتىن، شەگارا تاۋ سىلەمىنەن ارى كوكتەي وتەتىن ادامدار بىرتىندەپ مولايدى. شي-اندە جىل سايىن 500 مىڭنان ارتىق دالا ساياحاتشىلارى تاۋعا شىعاتىندىقتان اداسىپ كەتەتىندەر مەن حاۋىپتە قالاتىنداردىڭ سانى بۇرىنعىدان ارتا تۇسكەن.

 

حاۋىپكە ۇشىراپ قاتەرگە تاپ بولاتىن دالا سەرۋەنشىلەرىنە قارايلاسۋعا قوعام حاۋىپسىزدىگى ورگانى ۇلگىرە المايدى. شانشي ولكەسى دالا سەرۋەنىنە قاتىناساتىنداردىڭ توبىندا كەيبىر جاناشىر جاندار دالا ساياحاتى بارىسىندا تۋىلعان وقىس ۋاقيعالارعا كومەك كورسەتەدى. ولار دالا سەرۋەنىندەگى مول تاجىريبەلەرىنە سۇيەنىپ بەيتانىس ادامداردى اجالدان اراشالايدى.

 

شانشي چينليڭ قۇتقارۋ جاردەم بەرۋ اترەتى (تولىق اتاۋى شانشي چينليڭ شۇعىل جاعدايدا قۇتقارۋ جاردەم بەرۋ اترەتى) وسىنداي جاعدايدا قۇرىلعان. «حۋاڭما» چينليڭ قۇتقارۋ جاردەم بەرۋ اترەتىنىڭ تۇڭعىش كەزەكتى باستىعى.

 

2017-جىلى 12-ايدىڭ 5-كۇنى «حۋاڭما» قۇتقارۋ جاردەم بەرۋ اترەتىن سوڭعى رەت قيمىلعا ۇيىمداستىردى.

 

12-ايدىڭ 3-كۇنى چاڭ-ءان رايونىنداعى 58 جاسقا كەلگەن ءبىر قارت ءيتىن جەتەكتەپ حۋيۇي رايونى زىگى اڭعارىنان چينليڭعا كىرگەن سوڭ حابارسىز كەتەدى. سوڭىنان سەميا ادامدارى ساقشى بولىمشەسىنە دەلو مالىمدەيدى. 12-ايدىڭ 5-كۇنى ساقشى جاعى ىزدەۋدەن دەرەك تاپپاي، چينليڭ قۇتقارۋ كومەك بەرۋ اترەتىنەن جاردەم سۇرايدى. «حۋاڭما» چينليڭ قۇتقارۋ جاردەم بەرۋ اترەتى مۇشەلەرىن باستاپ حۋيۇي رايونىندا قۇتقارۋ قىزمەتىنە كىرىسەدى.

 

قىس ماۋسىمىندا تاۋلى ءوڭىردىڭ جاراتىلىستىق ورتاسى سۇركەي بولادى. جولدى اعاش جاپىراقتارى قىمتاپ، مۇزدى تايعاق جەردى انىق كورسەتپەيدى. «حۋاڭما» ءۇش اداممەن زىگى شوقىسىنا جەتەدى. ەكى شوقىدان وتسەدە جوعالعان ادامنىڭ دەرەگى تابىلمايدى. تورتەۋى ەكى گرۋپپاعا ءبولىنىپ، ءبىر گرۋپپا تاۋ جوتاسىمەن، ءبىر گرۋپپا ساي ەتەگىمەن ىزدەيدى.

 

تۇستەن كەيىن ساعات 3 جارىمدا كوپشىلىكتىڭ حاۋىپسىزدىگىن ەسكەرگەن «حۋاڭما» تەرەڭ شاتقالعا جالعىز بەتتەيدى. جيىرما-وتىز مەتر جىلجىعاندا اترەت مۇشەلەرىنە جولدىڭ اسا تايعاق ەكەنىن ەسكەرتەدى. ارادا بىرەر مينۋت وتپەستەن ول 50 مەترلىك بيىكتەن شاتقالعا قۇلاپ تۇسەدى.

 

اترەت مۇشەلەرى شاتقال تۇبىنە جەتكەندە ونىڭ تىنىسى توقتاعان ەدى. سونىمەن «حۋاڭما» 49 جاسىندا كوز جۇمادى. سۋىق حابار تاۋ ەتەگىنە بارعاندا ونىڭ ايەلى جاۋ فاڭليڭ قايعىدان كوكىرەگى قارس ايىرىلادى.

 

«حۋاڭمانىڭ» شىنايى اتى-ءجونى حۋاڭ جۇڭۋىن، 20 جىلدىڭ الدىندا جاۋ فاڭليڭ ەكەۋى وزگەلەر ارقىلى تانىسقان. العاش تانىسقاندا جاۋ فاڭليڭدى ونىڭ ەر مىنەزى باۋراپ الادى.

 

«حۋاڭما» حۋاڭ جۇڭۋىننىڭ لاقام اتى. «حۋاڭما» شىدەرلەۋگە كونبەيتىن جىلقى ءتارىزدى جان. ول دالا اۆتوموبيلىن ۇناتادى. دوستارمەن دالا سەرۋەنىنە شىعادى. اشىق-جارقىن بولعاندىقتان ەلمەن دوستاسۋدى قالايدى. حاۋىپتە قالعاندارعا قارايلاسۋعا ىنتالى...

 

سوناۋ جىلى شيزاڭدا تيەپ ءتۇسىرۋ ماشيناسى جول جيەگىندەگى سايعا قۇلاعالى قالعاندا «حۋاڭما» الىپ جۇرگەن تەمىر شىعىرى بۇزىلعانىنا قاراماستان تيەپ ءتۇسىرۋ ماشيناسىن جول ورتاسىنا سۇيرەپ جەتكىزەدى...

 

 

قۇتقارۋ جاردەم بەرۋ اترەتى قۇرىلعان سوڭ حۋاڭما قولى بوساعاندا تاۋداعى قيىن ورىندارعا بەلگى قوياتىن. تاۋداعى قاتەرلى قالتارىس ورىندار ونىڭ ميىندا جاتتاۋلى ەدى. ساقشى بولىمشەسى تەلەفون سوقسا بولعانى ول بارار جولدى تۋرا تاباتىن.

 

حۋاڭمانىڭ ايەلى جاۋ فاڭليڭ قۇتقارۋ جاردەم بەرۋ اترەتىنىڭ ارتقى شەپ جاۋاپتىسى ەدى. اترەت جابدىقتارىنىڭ جوقتان بىرتىندەپ قۇرالۋىنا ول كۋاگەر. العاشقى از ادامنان دامىپ 2015-جىلى اترەت مۇشەلەرى 40 قا، قازىر 500 ادامعا جەتتى. اترەت مۇشەلەرىنىڭ دەنى كەزىندە قاتەردەن قۇتقارىلعاندار مەن ولاردىڭ دوس-جاراندارى. ولاردىڭ سالاۋاتى الۋان ءتۇرلى. ولار ۇقساماعان كاسىپ سالاسى مەن وڭىرلەردەن جينالعاندار.

 

قۇتقارۋ جاردەم بەرۋ جۇمىسى قوعامدىق الەۋمەتتىك يگىلىك سيپاتىنا يە. قۇتقارۋ جاردەم بەرۋگە قاراجاتتى اترەت مۇشەلەرى وزدەرى شەشىمدەيدى. ادەتتەگى مەجە بويىنشا، ءبىر اترەت مۇشەسىنە كۇنىنە كەم دەگەندە 50 يۋان جۇمسالادى. بۇعان اترەت مۇشەلەرىنىڭ تاماق اقىسى، كەرەكتى زاتتار، شۇعىل قۇتقارۋداعى جابدىقتار قامتىلادى. ءبىر رەتتە جۇزدەن اسا اترەت مۇشەسى تاۋ اڭعارىن تىنتە قاراپ اداسقاندارعا ىزدەۋ جۇرگىزسە، كەم دەگەندە 5000 يۋاننان ارتىق قاراجات جۇمسالادى. بۇل اقشانى قۇتقارۋ جاردەم بەرۋ قيمىلىنا قاتىناسقان اترەت مۇشەلەرى ەرىكتى توپتايدى. ەڭ جاقىن ارالىقتاعى ورىنعا جۇمسالعان قاراجات 50 يۋان مولشەرىندە بولسا، ارالىق قاشىقتاعان سايىن بۇل قاراجات ادام باسىنا 200-300 يۋانعا دەيىن كوبەيەدى.

 

قاراجاتتى قالتالارىنان شىعارعاندى بىلاي قويعاندا، قۇتقارۋ جاردەم بەرۋ اترەتىندەگىلەر جانىن قاتەرگە تىگىپ، حاۋىپتە قالعانداردى قۇتقارۋعا بارىن سالادى. ولار حاۋىپتى ەلەڭ عۇرلى كورمەي قىسپاقتا قالعان ساياحاتشىلاردى اجالدان اراشالاعاندا كەيبىرەۋلەر العىس ايىتقاننىڭ ورنىنا ءلام دەمەستەن تايىپ تۇرادى...

 

«حۋاڭما» ومىردەن وتكەن ءۇشىنشى كۇنى بەلگىلى قۇرىلىم قۇتقارۋ كومەك بەرۋ اترەتىنە الەۋمەتتىك يگىلىك سيلىق قاراجاتىن بەرەدى. سيلىق قاراجاتىنا جاۋ فاڭليڭ قۇتقارۋ جاردەم بەرۋ اسپاپتارىن ساتىپ الادى. جاۋ فاڭليڭ قازىر قۇتقارۋ كومەك بەرۋ اترەتىنىڭ جاۋاپتىسى. اترەت مۇشەلەرى ونىڭ اماندىعىنان الاڭداپ، وعان قۇتقارۋ كومەك بەرۋ قيىمىلىنا ارالاسپاۋىن وتىنسەدە، ول كۇيەۋىمنىڭ ارۋاعى مەنى قولدايدى دەيدى.

 

قۇتقارۋ كومەك بەرۋ اترەتىندەگىلەردە كۇنى بۇگىنگە دەيىن تۇراقتى كەڭسە جوق. دەسەدە، جاۋ فاڭليڭنىڭ جەتەكشىلىگىندە قۇتقارۋ جاردەم بەرۋ اترەتى قاتەردە قالعانداردى قۇتقارۋ قىزمەتىن ەرىكتى ۇيىمداستىرىپ، قوعامدىق الەۋمەتتىك يگىلىك ىستەرىنە بەلسەنە ۇلەس قوسۋدا.

 

شينحۋا اگەنتتىگى ۋيچات تۇعىرىنان

اۋدارعان: قۋات جۇماش ۇلى (تورابىمىزدىڭ ۇسىنىس ەتىلگەن ءتىلشىسى)

企业微信截图_20190612113358.jpg
企业微信截图_20190612115126.jpg
02.jpg
ولاردى اجالمەن بەتپە-بەت سايىسۋشىلار دەۋگە تاتيدى
921286e2aed04b1b85d385f9c1de80e4_th.jpg
0b28a41a-8a7e-41a0-8684-9ecaf5d70dc1.gif