ايەلىن ٴولتىرىپ، مۇردەنى جاسىرعان قاندىقول ولىمگە ۇكىم ەتىلدى
0
2019-07-07 18:26:00
|
كەلۋقاينارى:جۇڭگو قازاق راديو تورابى
|
جاۋاپتى رەداكتور :


    ايەلىن ٴولتىرىپ، مۇردەنى مۇزداتقىشقا جاسىرعان قاندىقولعا ەكىنشى سوت ۇكىمى جاريالانىپ، اۋەلگى سوت ۇكىمىندەگىٴولىم جازاسى كۇشكە يە ەتىلدى


    2019-جىلى 7-ايدىڭ 5-كۇنى تۇستەن بۇرىن ساعات 10 دا، شاڭحاي قالالىق جوعارى دارەجەلى حالىق سوتى مەكەمەسى ايىپكەر جۋ شياۋدۇڭنىڭ قاساقانا كىسى ٴولتىرۋ شاعىم ارىز دەلوسىنىڭ كەسىمىن زاڭ بويىنشا اشىق جاريالادى، ايىپكەردىڭ شاعىم ارىزى تويتارىلىپ، اۋەلگى سوتتىڭ جۋ شياۋدۇڭ ۇستىنەن شىعارعان قاساقانا كىسى ٴولتىرۋ قىلمىسى بويىنشا ٴولىم جازاسى بەرىپ، ساياسي ۇقىعىنان ومىرلىك ماقۇرىم ەتۋ ۇكىمىن كۇشكە يە ەتۋ ٴارى ەڭ جوعارى حالىق سوتىنىڭ تەكسەرىپ بەكىتۋىنە جولداۋدى ۇيعاردى.


    شاڭحاي قالالىق جوعارى دارەجەلى حالىق سوتى مەكەمەسى بىلاي دەپ قارادى: جۋ شياۋدۇڭ قاساقانا ٴبىر ادامدى ولتىرگەن، ونىڭ ارەكەتى قاساقانا كىسى ٴولتىرۋ قىلمىسىنا جاتادى، زاڭ بويىنشا جازالانۋى ٴتيىس. جۋ شياۋدۇڭ ٴوزىن مالىمدەگەنىمەن، ٴبىراق ٴوزىنىڭ الدىنالا قاستىق سايلاپ كىسى ولتىرگەنىن باستان-اياق مويىنداماعان ٴارى قىلمىسىن شىنايى تانىماعان، رايىنان قايتپاعان. ٴوزىن مالىمدەۋ جاعدايى بولعانىمەن، ٴبىراق جەڭىلدەتىپ جازالاۋعا بولمايدى. اۋەلگى سوتتىڭ جۋ شياۋدۇڭنىڭ قاساقانا كىسى ٴولتىرۋ قىلمىسىن تۇراقتاندىرعان فاكىت انىق، دالەل-سىپات تولىق، زاڭ قولدانۋى تۋرا، جازا ولشەۋى ۇيلەسىمدى، سوتتا تەرگەۋ ٴتارتىبى زاڭدى بولعان. جۋ شياۋدۇڭ جانە ونىڭ اقتاۋشىسى تالاپ ەتكەن جەڭىلدەتىپ جازالاۋ پىكىرىن قابىلداۋعا بولمايدى؛ پروكۋراتۋرا ورگانى، ارىز-شاعىم جوقشىسى ۇسىنىس ەتكەن ايىپكەردىڭ ارىزىن تويتارىپ، اۋەلگى سوت ۇكىمىن كۇشكە يە ەتۋ پىكىرىن قولداۋعا بولادى. «جۇڭحۋا حالىق رەسپۋبليكاسى قىلمىستىق ىستەر ارىز-شاعىم زاڭىنىڭ» 236-تارماعىنىڭ 1-تارماقشاسى، 246-تارماعىنداعى بەلگىلەمەگە ساي جوعارىداعى كەسىمدى شىعاردى. 

    ياڭ گانليان قىزى ياڭ ليپيڭنىڭ سۋرەتىن تاقتا كوميۋتەرگە ساقتاپ قويعان


    دەلو جاعدايىنا قايتالاي شولۋ


    ايەلىن ٴولتىرىپ، مۇردەنى ٴۇش ايدان استام ۋاقىت مۇزداتقىشقا جاسىرعان سوڭ ٴوزىن مالىمدەۋ


    جۇرتتىڭ نارازىلىعىن قوزعاعان بۇل دەلو 2016-جىلى 10ايدىڭ 17-كۇنى تۋىلعان.


    ٴبىرىنشى سوت ۇكىم قاعازىندا كورسەتىلۋىنشە، سول كۇنى جۋ شياۋدۇڭ ايەلى ياڭ ليپيڭنىڭ موينىنان قىلقىندىرىپ، ونىڭ مەحانيكالىق تۇنشىعىپ ٴولۋىن تۋدىرعان. سونان كەيىن، ياڭ ليپيڭنىڭ مۇدەسىن ۇيىندەگى مۇزداتقىشقا جاسىرىپ، 2017-جىلى 2-ايدىڭ 1-كۇنىنە كەلگەندە عانا اكە-شەشەسىنە ايتقان ٴارى اكە-شەشەسىمەن بىرگە قوعام حاۋىپسىزدىگى ورگانىنا بارىپ ٴوزىن مالىمدەگەن. دەلو تۋدىرۋ سەبەبى جونىندە، ٴبىرىنشى سوت ۇكىمىندە: وتباسى قايشىلىعىنان تۋىلعان، دەپ تانىستىرىلعان.


    دەلو تۋىلعالى 33 اي ٴوتتى، قىزىن كۇيەۋ بالاسىنىڭ ولتىرگەن فاكىتى جونىندە، ياڭ گانليان كۇنى بۇگىنگە دەيىن قابىلداي الماعانىن ايتتى.


    ياڭ گانلياننىڭ ەسكە الۋىنشا، ياڭ ليپيڭ مەن جۋ شياۋدۇڭ 2015-جىلى 12-ايدىڭ 31-كۇنى ۇيلەنۋ كۋالىگىن الىپتى. ەكى جاس وتىراتىن ٴۇيدى اشەكەيلەۋ اقشاسىن تابا الماعاندا، ياڭ گانليان 100 مىڭ يۋان شىعارىپ كومەكتەسىپتى. سونىمەن ەكەۋى 2016-جىلى 5-ايدىڭ 28-كۇنى توي سالتىن وتكىزىپتى.


    دەسەدە، توي جاساعاننان كەيىن ەكەۋىنىڭ تۇرمىسى تاتۋ-ٴتاتتى وتپەگەن. ياڭ گانلياننىڭ تانىستىرۋىنشا، توي جاساپ ٴبىر اي وتكەننەن كەيىن، قىزى ياڭ ليپيڭ كۇيەۋىنىڭ سۋىق ٴجۇرىسىن ٴارى بىرەۋمەن بارىس-كەلىس جاساعالى جارىم جىل بولعانىن بايقاعان. وسى ىستەن كەيىن، جۋ شياۋدۇڭ قايتالاي قاتەلىك وتكىزبەۋگە ۋادە بەرگەن ٴارى كەپىلدىك قاعازىن جازىپ بەرگەن.


    الايدا ٴىس بۇنىمەن تىندىم بولماعان. ٴبىرىنشى سوت ۇكىم قاعازىندا كورسەتىلۋىنشە، جۋ شياۋدۇڭ سوت تەرگەۋىندە، 2016-جىلى 8-ايدا باسقالارمەن تاعى دا قالىپسىز قاتىناستا بولعانىن مويىنداعان.


    ياڭ گانليان بىلاي دەدى: «ٴىس جۇزىندە ول ەكەۋىنىڭ بۇرىننان قايشىلىعى بار، مىنە بۇلار جۋ شياۋدۇڭنىڭ ادام ٴولتىرۋ نيەتىن قابىندىرعان.» جۋ شياۋدۇڭ سوتتا بىلاي دەپ مويىنداعان: دەلو تۋىلعان سول كۇنى تاڭەرتەڭ، ياڭ ليپيڭ ەكەۋى سوزگە كەلىسىپ، ىلە-شالا ونى قىلقىندىرىپ ولتىرگەن ٴارى مۇردەنى توسەك جاپقىشپەن وراپ ۇيدەگى مۇزداتقىشقا جاسىرىپ قويعان.


    ياڭ ليپيڭ ولتىرىلگەن سوڭ، ونىڭ مۇردەسى مۇزداتقىشتا 3 ايدان استام ۋاقىت جاسىرىپ قويىلعان. ياڭ گانلياننىڭ تانىستىرۋىنشا، وتباسىنداعىلاردىڭ باستاپتا قىزىنىڭ قاستاندىققا ۇشىراعانىن سەزبەۋىندەگى سەبەپ، ياڭ ليپيڭ ولتىرىلگەننەن كەيىنگى ٴۇش ايدان استام ۋاقىت ىشىندە، جۋ شياۋدۇڭ ياڭ ليپيڭنىڭ سالاۋاتىنا ەنىپ، ۋيچاتتا ۇيىندەگىلەر جانە دوستارىمەن بايلانىس جاساپ تۇرعان. بۇدان سىرت، زيانكەستىككە ۇشىراۋشى ياڭ ليپيڭ جاقتىڭ جوقشى ادۆوكاتى فان يۇڭنىڭ تانىستىرۋىنشا، وسى مەزگىلدە جۋ شياۋدۇڭ ياڭ ليپيڭنىڭ نەشە ون مىڭ يۋان جەكەلىك مال-مۇلكىن جاسىرىن جوتكەگەن ٴارى بىرنەشە امانات كارتوچكاسىن تۇتىنعان.


    ٴبىرىنشى سوت ۇكىم قاعازىندا تانىستىرىلۋىنشا، جۋ شياۋدۇڭ دەلو تۋدىرعان سوڭ، زيانكەستىككە ۇشىراۋشىنىڭ اقشاسى، ازاماتتىق كۋالىگىمەن كوپ جەرگە بارىپ ساياحاتتاعان، بوگدە جىنىستاعىلارمەن جاتاق اشتىرىپ جولىققان، راحاتقۇمۇرلىققا مەيىلىنشە سالىنىپ، رايىنان قايتۋ بەينەسى بولماعان. 

    2017-جىلى 2-ايدىڭ 1-كۇنىنە كەلگەندە، ياڭ گانلياننىڭ 60 جاسقا تولۋ تۋىلعان كۇنىن قۇتتىقتاۋ بايلانىسىمەن ەكەۋىن ۇلكەن ۇيگە باس قوسۋعا شاقىرعاندا، جۋ شياۋدۇڭ بۇل ٴىستى جاسىرۋعا كەلمەيتىنىن سەزىپ، اكە-شەشەسىنە ٴوزىنىڭ قاندىقولدىق ىستەگەن فاكىتىن قاز-قالپىندا ايتىپ بەرگەن.


    2018-جىلى 12-ايدىڭ 13-كۇنى، زيانكەستىككە ۇشىراۋشىنىڭ اكەسى ياڭ گانليان ەكىنشى سوت اشىلۋدان بۇرىن تىلشىلىكتى قابىلداۋدا 

    ٴبىرىنشى سوت ٴولىم جازاسى بەرگەن سوڭ، جۋ شياۋدۇڭ سوت مەكەمەسى ٴوزىن مالىمدەۋ جاعدايىنا ەلەپ-ەسكەرمەدى دەپ قاراعان 

    2017-جىلى 8-ايدىڭ 3-كۇنى، شاڭحاي قالالىق حالىق پروكۋراتۋراسىنىڭ 2-بولىمشە مەكەمەسى قاساقانا كىسى ٴولتىرۋ كۇمانىمەن جۋ شياۋدۇڭدى زاڭ بويىنشا الەۋمەتتىك ايىپتاعان. سول جىلى 11-ايدىڭ 29-كۇنى، شاڭحاي قالالىق 2- ورتا دارەجەلى حالىق سوتى مەكەمەسى وسى دەلونى سوت اشىپ قاراعان. 2018-جىلى 8-ايدىڭ 23-كۇنىنە كەلگەندە، بۇل دەلونىڭ ٴبىرىنشى سوت ۇكىمى جاريالانعان.


    ٴبىرىنشى سوت ۇكىم قاعازىندا كورسەتىلۋىنشە، شاڭحاي قالالىق 2-ورتا دارەجەلى حالىق سوتى مەكەمەسى بىلاي دەپ قاراعان: ايىپكەر جۋ شياۋدۇڭ قاساقانا ٴبىر ادامدى ولتىرگەن، ونىڭ ارەكەتى قاساقانا كىسى ٴولتىرۋ قىلمىسىنا جاتادى، زاڭ بويىنشا جازالانۋى ٴتيىس. وسى دەلو ۇيلەنۋ، وتباسى قايشىلىعىنان تۋىنداعان ٴارى جۋ شياۋدۇڭ ٴوزىن مالىمدەگەنىمەن، الايدا جۋ شياۋدۇڭ دەلو تۋدىرعان سوڭ زيانكەستىككە ۇشىراۋشىنىڭ مۇردەسىن ۇزاق ۋاقىت مۇزداتقىشتا جاسىرعان، قىلمىسىنىڭ سيپاتى جيرەنىشتى.


    سول سەبەپتى، شاڭحاي قالالىق 2-ورتا دارەجەلى حالىق سوتى مەكەمەسى جۋ شياۋدۇڭنىڭ قىلمىسىنىڭ قوعامدا تۋدىرعان ىقپالى توتەنشە ناشار، قىلمىسى وتە اۋىر، سوندىقتان جۋ شياۋدۇڭنىڭ جازاسىن زاڭ بويىنشا جەڭىلدەتۋگە بولمايدى دەپ قاراعان ٴارى «جۇڭحۋا حالىق رەسپۋبليكاسى قىلمىستىق ىستەر زاڭىنىڭ » 232-، 57 –تارماعىنىڭ 1-تارماقشاسىنداعى بەلگىلەمەگە ساي، جۋ شياۋدۇڭعا ٴولىم جازاسىن بەرىپ، ساياسي ۇقىعىنان ومىرلىك ماقۇرىم ەتۋدى بۇيىرعان. 

    الايدا، ٴولىم جازاسى ناتيجەسى جونىندە، ادۆوكات فان يۇڭنىڭ ەسكە الۋىنشا، ايىپكەر جۋ شياۋدۇڭ سوت مەكەمەسى ٴوزىنىڭ ٴوزىن مالىمدەگەنىن ەلەپ-ەسكەرمەگەن دەپ قاراپ، ٴارى ۇكىم قاعازىن جاريالاعان كۇنى تۇستەن كەيىن جوعارىلاپ ارىزدانۋ ٴوتىنىشىن ورتاعا قويعان. 

    زيانكەستىككە ۇشىراۋشىنىڭ اكەسى ياڭ گانليان شاڭحاي قالالىق جوعارى دارەجەلى حالىق سوت مەكەمەسىنىڭ ەكىنشى سوت تەرگەۋىنە قاتىناستى 

    ەكىنشى سوت اشىلعاندا، جۋ شياۋدۇڭنىڭ اقتاۋشىسى: ايىپكەر ٴوزىن مالىمدەۋگە جاتادى دەپ قاراپ، جەڭىلدەتىپ جازالاۋدى ۇسىنىس ەتتى 

    2018-جىلى 12-ايدىڭ 13-كۇنى تۇستەن بۇرىن، شاڭحاي قالالىق جوعارى دارەجەلى حالىق سوتى مەكەمەسى وسى دەلونىڭ ەكىنشى سوتىن اشتى. سوتتا قاراۋ بارىسىندا، جۋ شياۋدۇڭ ٴوزىنىڭ الدىنالا قاستاندىق سايلاپ ايەلىن ولتىرمەگەنىن، ٴوزىن مالىمدەۋگە جاتاتىنىن، ەكىنشى سوت مەكەمەسىنىڭ وزىن جەڭىلدەتىپ جازالاۋىن ٴوتىندى.


    جۋ شياۋدۇڭ ورتاعا قويعان ٴوزىن مالىمدەۋ جونىندە، فان يۇڭ بىلاي دەپ ٴتۇسىندىردى: ٴبىرىنشى سوت ۇكىم قاعازىنان قاراعاندا، شاڭحاي قالالىق 2-ورتا دارەجەلى سوت مەكەمەسى جازا ولشەگەن كەزدە ٴوزىن مالىمدەۋ جاعدايىن ويلاستىرعان، ٴبىراق جۋ شياۋدۇڭنىڭ قىلمىس سيپاتى جيەرنىشتى، دەلو تۋدىرعان سوڭ مۇردەنى ۇزاق ۋاقىت جاسىرۋ سياقتى ارەكەتتەرى بولعاندىعى سەبەپتى، وعان ٴولىم جازاسىن كەستى. 

    ال ادام ٴولتىرۋدىڭ جوسپارسىز بولعان-بولماعاندىعى جونىندە فان يۇڭ بىلاي دەپ قارادى: جۋ شياۋدۇڭ دەلو تۋدىرۋدان بۇرىن «ٴولتىرىپ بورشالاۋ تاقتايى» اتتى كىتاپتى ساتىپ العان ٴارى دەلو تۋىلعان كۇنى كامەرا سياقتىلاردى ساتىپ العان، بۇل ارەكەتتەر ونىڭ الدىنالا قاستاندىق سايلاپ ادام ولتىرگەندىگىن دالەلدەيدى.


    بۇدان تىس، اقپارات قۇرالدارىنىڭ حابارىنا قاراعاندا، ەكىنشى سوت ناق مايدانىندا، جۋ شياۋدۇڭنىڭ اقتاۋشىسى ياڭ ليپيڭنىڭ ميكرو بلوگىن جاڭا دالەل-سىپات رەتىندە تاپسىرعان. اقتاۋشى: بۇل دەلو وتباسى قايشىلىعىنان تۋىلعان كەزدەيسوق قىلمىس، ونىڭ ۇستىنە بىرگە تۇرمىس كەشىرۋ بارىسىندا ياڭ ليپيڭدە وقتا-تەكتە ومىردەن تورىعۋ سياقتى اسىرە كوڭىل-كۇي بولعان. جۋ شياۋپيڭ ٴوزىن مالىمدەۋگە جاتادى، قىلمىسىن تانىپ، رايىنان قايتقان، جەڭىلدەتىپ جازالاۋ ٴتيىس، دەپ قاراعان.


    وسى جونىندە، سوت تەرگەۋى بارىسىندا پروكۋراتۋرا ورگانى جاۋاپ بەرىپ، اقتاۋشى جەتكىزگەن جاڭا دالەل-سىپاتتارمەن بۇل دەلونىڭ فاكىتى اراسىنداعى بايلانىس جەتكىلىكسىز، ونىڭ ۇستىنە بىرنەشە ميكرو بلوگ ارقىلى ياڭ ليپيڭنىڭ ارەكەتىن جورامالداۋدا دا وبيەكتيۆتىك دالەل-سىپات كەمشىل. اۋەلگى سوت ۇكىمىندە تۇراقتاندىرىلعان فاكىت ايقىن، دالەل-سىپات شىنايى ٴارى تولىق، زاڭدى قولدانۋى تۋرا، ەكىنشى سوت مەكەمەسىنىڭ شاعىم ارىزدى تويتارىپ، اۋەلگى سوت ۇكىمىن كۇشكە يە ەتۋدى ۇسىنىس ەتتى.


    زيانكەستىككە ۇشىراۋشى ياڭ ليپيڭ ٴتىرى كەزىندە تۇرعان جاتىن بولمە


    وقيعانىڭ ۋاقىت جەلىسى 

    2015-جىلى 12-ايدىڭ 10-كۇنى


    جۋ شياۋدۇڭ مەن زيانكەستىككە ۇشىراۋشى ياڭ ليپيڭ توي جاساۋعا تىزمدەلىپ، شاڭحاي حۇڭكوۋدە بىرگە تۇرعان. 

    2016-جىلدىڭ ورتاسىندا


    ياڭ ليپيڭ كۇيەۋى جۋ شياۋدۇڭنىڭ باسقا ايەلمەن بارىس-كەلىس جاساعانىن بايقاپ، ەكەۋى قاتتى رەنجىسكەن. 

    2016-جىلى 8-ايدىڭ 25-كۇنى


    جۋ شياۋدۇڭ مەن ياڭ ليپيڭ اجىراسپاقشى بولىپ حالىق ىستەرى مەكەمەسىنە بارعان. جۋ شياۋدۇڭنىڭ ايتۋىنشا، ياڭ ليپيڭ حالىق ىستەرى مەكەمەسىندە «ولەمىن دەپ قىسىم جاساپ»، اجىراسۋ رەسميەتىن بىتىرە الماعان. 

    2016-جىلى 8-ايدىڭ 28-كۇنى


    جۋ شياۋدۇڭ توراپتان ٴبىر توپ كىتاپ ساتىپ العان مۇنىڭ ىشىندە «ٴولتىرىپ بورشالاۋ تاقتايى» اتتى كىتاپ بار. بۇل كىتاپتا مۇزداتقىشقا مۇردەنى جاسىرۋ جازىلعان بولىپ، ونىڭ كەيىنگى مۇردە جاسىرۋ تاسىلىمەن توتەنشە ۇقسايدى. 

    2016-جىلى 10-ايدىڭ 15-كۇنى


    ەكەۋى حاڭجوۋعا ساياحاتتاي بارىپ، كوڭىلدەگىدەي قوناق جايعا جاتا الماعاندىقتان، ياڭ ليڭپيڭ ىشتەي رەنجىگەن؛ قايتقان ۋاقىتتا، جۋ شياۋدۇڭ جوعارى قارقىندى پويەزدىڭ بەلەتىن ساتىپ الالماي، ەكەۋى ەكىنشى رەت رەنجىسكەن. 

    2016-جىلى 10-ايدىڭ 17-كۇنى


    جۋ شياۋدۇڭ ۇيىندە ايەلى ياڭ ليپيڭمەن سوزگە كەلىسىپ، ەكى قولىمەن ياڭ ليپيڭنىڭ موينىنان قىلقىندىرىپ، ونىڭ مەحانيكالىق تۇنشىعىپ ٴولۋىن تۋدىرعان. وسىدان كەيىن، جۋ شياۋدۇڭ قىزىل رەڭدى توسەك جاپقىشپەن ياڭ ليپيڭنىڭ مۇردەسىن وراپ، ۇيدەگى مۇزداتقىشقا سالىپ قويعان. سول كۇنى تۇندە ول كامەرا ساتىپ الىپ، مۇزداتقىشتىڭ قارسى جاعىنا ورناتىپ قويعان. 

    وسىدان كەيىنگى 105 كۇندە


    جۋ شياۋدۇڭ ٴوزى ەكى ادامنىڭ رولىن الىپ، ياڭ ليپيڭنىڭ سوزىنە ۇقساتىپ دوس شەڭبەرىندە، ۋيچاتتا ياڭ ليپيڭنىڭ دوستارىمەن بايلانىس جاساعان. ول تاعى ياڭ ليپيڭنىڭ امانات كارتوچكاسىن پايدالانىپ كوپ جەردە ساياحاتتاپ، بوگدە جىنىستىلارمەن جولىققان. 


    2017-جىلى 2-ايدىڭ 1-كۇنى


    جۋ شياۋدۇڭ ايەلى ياڭ ليپيڭدى ولتىرگەن ٴىستى اكە-شەشەسىنە ايتقان ٴارى اكە-شەشەسىمەن بىرگە قوعام حاۋىپسىزدىگى مەكەمەسىنە ٴوزىن مالىمدەگەن. 

    2017-جىلى 8-ايدىڭ 3-كۇنى


    وسى دەلو شاڭحاي قالالىق 2-ورتا دارەجەلى حالىق سوتى مەكەمەسىندە ٴبىرىنشى سوتتا قارالعان. ايىپكەر جۋ شياۋدۇڭ سوت ۇستىندە ايەلىن ولتىرگەنىن مويىنداعان. 

    2018-جىلى 8-ايدىڭ 23-كۇنى


    شاڭحايداعى «ايەلىن ٴولتىرىپ، مۇردەنى جاسىرۋ دەلوسىنىڭ» ۇكىمى جاريالانىپ، شاڭحاي قالالىق 2-ورتا دارەجەلى حالىق سوتى مەكەمەسى قاساقانا كىسى ٴولتىرۋ قىلمىسى بويىنشا ايىپكەر جۋ شياۋدۇڭعا ٴولىم جازاسى كەسىپ، ساياسي ۇقىعىنان ومىرلىك ماقۇرىم ەتۋگە بۇيرعان. سول كۇنى تۇستەن كەيىن، جۋ شياۋدۇڭ جوعارىلاپ ارىز بەرۋ ٴوتىنىشىن ورتاعا قويعان ٴارى مىندەتتەگەن ادۆوكاتىن الماستىرعان. 

    2018-جىلى 10-ايدىڭ 24-كۇنى


    ياڭ ليپيڭنىڭ اكەسى ادۆوكاتتىڭ ۇقتىرۋىن تاپسىرىپ العان. جۋ شياۋدۇڭ جاق جاڭا دالەل-سىپات جەتكىزگەندىكتەن 10-ايدىڭ 29-كۇنى اشىلاتىن ەكىنشى سوت كەشىكتىرىلگەن. 

    2018-جىلى 12-ايدىڭ 13-كۇنى


    بۇل دەلونىڭ ەكىنشى سوتى شاڭحاي قالالىق جوعارى دارەجەلى حالىق سوتى مەكەمەسىندە اشىلىپ، سوت ۇستىندە ۇكىم جاريالانباعان. 

    2019-جىلى 7-ايدىڭ 5-كۇنى


    شاڭحايداعى ايەلىن ٴولتىرىپ، مۇردەنى مۇزداتقىشقا جاسىرۋ دەلوسىنىڭ ەكىنشى سوت ۇكىمى جاريالاندى.


    اۋدارعان: قادىر ماقان ۇلى

00.jpg
00.jpg
00.jpg
QQ浏览器截图20190706152627.jpg
未标题-2.jpg