دىمكاس اكە، دانا شەشە، دەگدار ۇل، دارقان حالىق
0
2019-08-08 00:00:00
|
كەلۋقاينارى:جۇڭگو قازاق راديو تورابى
|
جاۋاپتى رەداكتور :

 

    بۇل ەشقانداي اسەرلى اڭگىمە ەمەس، ءجاي جازبا عانا، ءبىراق وسىنداعى اكە مەن شەشەنىڭ ازاپتى ومىرمەن كۇرەسكەن قايسارلىعى، بالانىڭ اكەسىنىڭ ايىقپاس اۋرۋىن سەزىپ قالسا دا، قان جىلاعان جۇرەگىن سابىرعا شاقىرىپ تالماي ۇيرەنگەنى، ىنتاشىل كەدەي بالاسىنا قالتاسىنداعىسىن قاعىپ بەرگەن قامقورشى جانداردىڭ ىزگى كوڭىلى.. ءبارى ءبارى بىزگە كوپ دۇنيەنى ۇيىرەتكەندەي، وقۋعا جارارلىق جولداما دەپ ءبىلىڭىز.

    اكە، مەن چيڭحۋا داشۋەسىنە ءوتتىم

    تاياۋدا جياڭسۋ ولكەسىنىڭ نانتۇڭ قالاسىندا تۇراتىن جوۋ پىڭۇي 421 نومىرلىك جوعارى ناتيجەمەن (جياڭسۋ ولكەسىنىڭ جوعارى مەكتەپ ەمتيحانىنىڭ تولىق ءنومىرى 480 ) ەلىمىزدىڭ تانىمالى داشۋەسى چيڭحۋا داشۋەسىنە قابىلداندى. ءبىراق وسى ءبىر قاستەرلى شاقىرتۋدىڭ ارتىندا قاجىرلى اكە-شەشەنىڭ ەشكىمگە ايتپاعان قىمباتتى قۇپياسى جاتىر ەدى.

    جوۋ پىڭۇي نانتۇڭ قالاسىنىڭ رۋگاۋ ورتا مەكتەبىنىڭ وقۋشىسى، بيىل جوعارى مەكتەپ ەمتيحانىندا اعالاپ العا شىعىپ، چيڭحۋا داشۋەسىنىڭ مەحانيكا عارىش كەڭىستىگى جانە قوزعاۋشى كۇش كاسىبىنە قابىلداندى. جوۋ وتباسى ۇلىنىڭ اشتى ەڭبەگىنىڭ ءتاتتى جەمىسىن كورگەنىنە قاباعات قۋاندى، ولار وسى ءبىر قۋانىشتى مينۋتتى قانشاما سارىلا كۇتتى دەسەڭىزشى!

    «جىلقى جىلىڭ الدىڭدا دەگەندەي، بىلتىرعى جىل ءبىز ءۇشىن وڭايعا سوققان جوق، شاشىم ءبىر كۇندە اعارىپ كەتتى، مىنە قازىر ۇلىمنىڭ جوعارى ناتيجەسىن كورىپ، قۋانىشتان جۇرەگىم جارىلارداي بولىپ تۇر»،-دەدى جوۋ پىڭۇيدىڭ شەشەسى چىن حۇيشان.

    2018-جىلى 7-ايدا جوۋ پىڭۇيدىڭ اكەسى جوۋ جيانجۇڭ ناۋقاستانىپ توسەك تارتىپ جاتىپ قالدى. ولكەلىك شيپاحاناعا اپارىپ تەكسەرتىپ كورىپ ەدى، ءبىر ءۇيدىڭ باس قالقاسىنا اينالىپ وتىرعان جوۋ جيانجۇڭنىڭ باۋىر راگىنا دۋشار بولعانى انىقتالدى، ول كەزدە جوۋ پىڭۇي ورتا مەكتەپتىڭ ەندى عانا ءۇشىنشى جىلدىعىن اتتاعان كەزى ەدى.ەگەر اكەسىنىڭ سالماقتى ناۋقاسقا دۋشار بولعانىن ەستىسە بالاسىنىڭ وقۋى مەن توقۋى نە بولماق؟

    قام كوڭىل اكە-شەشە ەندى جالعىز ۇلىنىڭ جارىم كوڭىل حالدە جىلاپ ءجۇرىپ وقىعانىن قالامادى. ەكەۋى تاس ءتۇيىن ءبىر بەكىمگە ات باسىن تىرەدى. «اكە، ءجۇزىڭ نەگە سىنىق»،-دەگەن ۇلىنا اكەسى: باياعى سول شارشاعاننىڭ كەسىرى ەكەن، شيپاحاناعا ازداپ كورىنسەم تاۋىرلەنىپ كەتەمىن، سەن بىزگە قارايلاماي وقۋىڭدى جاقسى وقى،-دەدى اكەسى جىميىپ. جوۋ جيانجۇڭ ءاسىلى ءبىر كرپىش زاۆودىنىڭ جۇمىسشىسى-تۇعىن، اۋرۋى جانىنا باتقاسىن شاڭحاي سىندى ۇلكەن قالاعا كەلىپ ەمدەلۋگە تۋرا كەلدى.

    وتاعاسى دەنساۋلىعىنان ايىرىلدى دەگەن ءسوز قارا ناردىڭ بەلى كەتتى دەگەن ءسوز ەمەس پە، وسىنداي قيىن-قىستاۋ كەزەڭدە ۇيدەگى وت اناسى چىن حۇيشان بارلىق اۋرىرتپاشىلىقتى مويىنىنا الىپ، بايگەگە قوسىلعالى تۇرعان ۇلىنىڭ قاباعىنا مۇڭ ۇيالاتپاي، قيىنشىلىق تارتقىزباي جاقسى وقىتۋعا قۇلشىندى.

    «كۇندىز كۇيەۋىمدى قارايمىن، كەشتەتىپ ۇيگە جەتەمىن، بالام تۇستە مەكتەپتەن تۇستەنەدى، كەشتە ساعات 10 دا مەكتەپتەن قايتادى، كەشكى اسىن دايىنداپ بولعاسىن، تاڭعى اسىن دا ازىرلەپ قويامىن، تاڭعى استان سوڭ ۇلىمدى مەكتەپكە اتتاندىرىپ سالامىن دا شيپاحاناعا قاراي ۇشامىن، وسى ءبىر قانشا جىلداردان بەرى مەنىڭ ءومىرىم شيپاحانا مەن ءۇيىمنىڭ اراسىندا عانا ءوتتى»،-دەيدى ۇلى مەن كۇيەۋى ءۇشىن كۇيبەڭدەپ جۇرگەن عازيز انا. ءۇي مەن شيپاحانانى ارالىعى 30 كيلومەتر، چىن حۇيشان كۇندە تاڭەرتەڭ توك موتوسيكىلىنە ءمىنىپ الىپ 3 ساعات دەگەندە شيپاحاناعا جەتەدى. سودان كەش باتا قايتادان ۇيگە تارتادى.

    ءبىر كۇنى جوۋ پىڭۇي شەشەسىنىڭ تەلەفونىن شۇقىلاپ وتىرىپ، اكەسىنىڭ دياگنوز قاعازىنىڭ سۋرەتكە تارتىلعان نۇسقاسىن كورىپ قالادى. كورگەن زامان توبەسىنە ءجاي تۇسكەندەي مەڭىرەيىپ قالادى.

    ول ەڭىرەپ جىلادى. ءبىراق اكەسى مەن شەشەسىنىڭ ءبىر ءومىر تارتقان ازابىن ويلاپ: كوز جاسىمدى كول قىلعانىممەن كىم كومەكتەسەدى ماعان، بۇيتسەم اكە-شەشەمدى قيناعاننان باسقا تۇك تە بىتىرمەيمىن. تەك قۇلشىنا ۇيرەنۋدەن باسقا جول قالماعان ەكەن،-دەپ ول ەسىن جيدى.

    سول قۇلشىنىس تەككە كەتپەدى. جوۋ پىڭۇيعا مىنە اتاعى الاتاۋداي داشۋەدەن شاقىرتۋ كەلدى.

    ايتسە دە جوققا جۇيىرىك جەتكەن بە، شىڭعىرعان شىندىق تاعى دا كەدەي وتباسىنىڭ ەسىگىنەن سىعالادى: جوۋ جيانجۇڭنىڭ ەمدەلۋ قاراجاتى 200 مىڭنان اسىپتى، وتباسى قارىزعا بۋىلىپتى.

    جوۋ پىڭۇيدىڭ داشۋە وقۋ ارمانى تالقىعا ءتۇستى.

    قالا بويىنشا اعالاپ العا شىققان ۇزدىك وقۋشىنىڭ چيڭحۋا داشۋەگە ءوتىپ تۇرسا دا بارا المايتىنىن ەستىگەندە حالىقتىڭ قابىرعاسى قايىستى. قالاداعى مەيىربان جاندار قاراپ تۇرمادى، ءبىر ءتۇننىڭ ىشىندە جوۋ پىڭۇيعا 50 مىڭ يۋان جىلۋ اتادى.

    قالا تۇرعىنى ۋاڭ ۋيپيڭ بىلاي دەدى: ءبىز اعالاپ العا شىققان بالامىزدى قولتىعىنان دەمەمەسەك نەسىنە ەلمىز. قولىمىزدان كەلگەن كومەكتى جاساۋعا قۇلشىندىق. بولاشاقتا ول ءبىزدىڭ ماقتانىشىمىزعا اينالاتىنىنا سەنىمىمىز كامىل.

    جوۋ پىڭۇي قالا تۇرعىندارىنىڭ وزىنە ءدال مىناداي انالىق مەيىرمەن ارقاسىنان قاعىپ، الاقانىنا الپەشتەيدى،-دەپ ويلاپ كورمەسە كەرەك، تولقىعان كوڭىلى كوز توستاعانىنا ريزاشىلىق پەن بورىشكەرلىكتىڭ قوس تامشىسىن ۇيالاتتى.

    ول ءوزىن قوس قولداپ دەمەگەن ەسىل جۇرتىنىڭ اق تىلەگى مەن ۇمىتىنە قارىزدار ەكەنىن انىق سەزەدى.

    «اكەم مەنى اۋىرعانشا باعىپ-قاقتى، ەندى مىنە بار اۋىرتپاشىلىق ەڭبەكقور اناما ءتۇستى، اكەمنىڭ ەمدەلۋ اقىسىنىڭ ءوزىن ارەڭ تاپسىرىپ وتىرمىز. شاقىرتۋ قاعازى قولىمىزعا تيگەندە وتباسىمىزبەن بوركىمىزدى اسپانعا اتتىق. ءبىراق قولدىڭ قىسقالىعى تاعى دا بۇيىردەن قىستى. وسىنداي كەزدە اينالاداعى اق ەدىل جانداردىڭ ارقاسىندا ارقامداعى ايازداي باتقان اۋىر جۇكتەن ارىلعانداي بولدىم، تالاپشىل، ورگە ۇمتىلعان ادامعا جول اشىق ەكەن»،-دەيدى جوۋ پىڭۇي ريزا پىشىنمەن.

00.jpg
00.jpg
00.jpg
企业微信截图_20190806172935.jpg
middle_17f6a6a8a08661d7f0486835f5c3e41a.jpg