شي جينپيڭ فيليپپيننىڭ پرەزيدەنتى دۋتەرتپەن كەزدەستى
0
2019-08-30 09:59:00
|
كەلۋقاينارى:جۇڭگو قازاق راديو تورابى
|
جاۋاپتى رەداكتور :


    ٴوز حابارىمىز: مەملەكەت ٴتوراعاسى شي جينپيڭ 8-ايدىڭ 29-كۇنى كەشتە دياۋيۇيتاي مەملەكەتتىك قوناقتار سارايىندا فيليپپيننىڭ پرەزيدەنتى دۋتەرتپەن كەزدەستى.


    شي جينپيڭ پرەزيدەنت دۋتەرتتىڭ ساپارلاي كەلگەندىگىن جانە 2019-جىلعى حالىقارالىق باسكەتبول بىرلەستىگىنىڭ باسكەتبول دۇنيە ساۋىتىنا تالاسۋ جارىسىن تاماشالاۋىن قارسى الاتىندىعىن ٴبىلدىردى. شي جينپيڭ بىلاي دەدى: ٴسىز بيلىك جۇرگىزگەن 3 جىلدان بەرى، ەكى جاقتىڭ ورتاق قۇلشىنۋىندا، جۇڭگو مەن فيليپپين قاتىناسى جاقسارىپ، بەكەمدەلىپ، جوعارىلاپ، ۇزدىكسىز تىڭ ناتيجەلەرگە قول جەتكىزدى. قازىر حالىقارالىق جانە وڭىرلىك جاعدايدا تەرەڭ دە كۇردەلى وزگەرىستەر تۋىلۋدا، ٴبىراق بەيبىتشىلىك، دامۋ، سەلبەستىك، ورتاق يگىلىكتەنۋ ٴالى دە بوگەۋ بەرمەس ٴداۋىر اعىمى بولىپ وتىر. مەن سىزبەن بىرگە وراي مەن اۋقىمدى ستراتەگيالىق جانە ۇزاق بولاشاقتىق تۇرعىدان مىقتى يگەرۋدى قالايمىن، بۇل ەكى ەل مەن ەكى ەل حالقىنا ٴتيىمدى بولىپ قالماستان، ٴوڭىردىڭ بەيبىتشىلىگى مەن ورنىقتىلىعىنا دا وڭ ەنەرگيا قوسادى.


    شي جينپيڭ مىنالاردى باسا دارىپتەدى: «ٴبىر بەلدەۋ، ٴبىر جول» دارىپتەمەسىن فيليپپيننىڭ «جاپپاي قۇرۋ، ەرەكشە قۇرۋ» جوباسىمەن ۇشتاستىرىپ، نەگىزدىك قۇرىلعى قۇرىلىسى، ونەركاسىپ باقشا رايونى، تەلەگراف، ەنەرگيا قاتارلى سالالارداعى كەلەلى سەلبەستىك نىساندارىن ويداعىداي اتقارۋ كەرەك. جۇڭگو فيليپپيننىڭ اناعۇرلىم كوپ ساپالى جەمىس-جيدەك جانە اۋىل شارۋاشىلىق ونىمدەرىن يمپورت ەتىپ، مامانداردى فيلليپپينگە اۋىل شارۋاشىلىق، بالىقشىلىق تەحنيكاسىن ۇيرەتۋگە جىبەرۋدى قالايدى. كىسىلىك ۇقىق سياقتى ماسەلەلەردە جۇڭگو فيليپپيننىڭ مەملەكەتتىڭ يەلىك ۇقىعىن قورعاۋ، سىرتقى كيلىگۋگە قارسى تۇرۋ قۇلشىنىسىن ۇزدىكسىز باتىل قولدايدى.


    شي جينپيڭ مىنالاردى اتاپ كورسەتتى: جۇڭگو مەن فيليپپين نانحاي تەڭىزى ماسەلەسى جونىندە ٴونىمدى پىكىرلەسىپ كەلدى. ەكى جاق داۋ-شاردى قويا تۇرىپ، سىرتتان كەلگەن كەدەرگىلەردى الاستاپ، زەيىن-زەردەنى شوعىرلاندىرا وتىرىپ سەلبەستىك جاساپ، ناقتى ىستەر ىستەپ، دامۋعا ۇمتىلۋى كەرەك. ەكى جاق وسى ماسەلەنى ۇيلەسىمدى شەشسە بولعانى، جۇڭگو-فيليپپين قاتىناسىنىڭ جاعدايى جاقسى، نەگىزى ورنىقتى بولادى، ٴوڭىردىڭ بەيبىتشىلىگى مەن ورنىقتىلىعى دا ماڭىزدى كەپىلدىككە يە بولادى. ەكى جاق تەڭىزدەگى مۇناي، تابيعي گازدى بىرگە اشۋ جاعىندا ارشىندى قادام تاستاي الادى. «نانحاي تەڭىزى ارەكەت ولشەمى» نانحاي تەڭىزى ىستەرىندە ەرەجە-ٴتۇزىم ورناتۋدىڭ باستاماسى، ەكى جاق «ولشەمدى» ەرتەرەك جاساۋعا كۇش سالىپ، جۇڭگو مەن فيليپپيننىڭ ٴوڭىردىڭ باياندى تىنىشتىعىن بىرگە قورعاۋداعى بەرىك تۇرعىسى مەن بەلسەندى بەينەسىن ايگىلەۋى كەرەك.


    دۋتەرت جۇڭحۋا حالىق رەسپۋبليكاسى قۇرىلعاندىعىنىڭ 70 جىلدىعىن قۇتتىقتاپ، جۇڭگونىڭ ٴساتتى دامۋ تاجىريبەسى فيليپپيننىڭ ۇيرەنۋىنە، ۇلگى الۋىنا تاتيدى دەدى. ول بىلاي دەدى: مەن ٴتوراعا شي جينپيڭمەن ەتەنە دوستىقتى قاستەرلەيمىن. جۇڭگو فيليپپين جونىنەن وتە ماڭىزدى، فيليپپين ـ جۇڭگو قاتىناسى عاسىرلىق ۇلى جوسپار. مەن ٴتوراعا شي جينپيڭمەن ۇنەمى كەزدەسىپ، سويلەسۋدى كۇشەيتىپ، ەكى ەلدىڭ جالپى بەتتىك ستراتەگيالىق سەلبەستىك قاتىناسىنىڭ ٴۇرتىس، پارمەندى دامۋىن بىرگە ىلگەرىلەتىپ، ٴوزارا پايدا جەتكىزىپ، تەڭ يگىلىككە كەنەلۋدى جۇزەگە اسىرۋدى قالايمىن. فيليپپين جۇڭگونىڭ فيليپپين ەكونوميكاسىنىڭ دامۋى مەن نەگىزدىك قۇرىلعى قۇرىلىسىنا ۇزدىكسىز دەم بەرۋىن ٴۇمىت ەتەدى، جۇڭگونىڭ فيليپپيننىڭ كىسىلىك ۇقىق ىستەرى، جەر سىلكىنىسى اپاتى تۋىلعان رايوندى قايتا قۇرۋ، لاڭكەستىككە قارسى تۇرۋ، ەسىرتكىگە تيىم سالۋ قاتارلى جاقتاردا قولداۋ كورسەتكەندىگىنە العىس ايتادى. اماليات جۇڭگونىڭ فيليپپيننىڭ ادال دوسى ەكەنىن دالەلدەدى. شياڭگاڭ ماسەلەسىندە فيليپپين جۇڭگونىڭ زاڭدارىنا جانە زاڭمەن باسقارۋدى زاڭ بويىنشا قورعاۋ ۇقىعىنا بۇكىلدەي قۇرمەت ەتەدى.


    دۋتەرت بىلاي دەدى: مەن نانحاي تەڭىزى تالاس-تارتىسىن قارسىلاسۋ جولىمەن ەمەس، قايتا سەلبەسۋ جولىمەن بەيبىت شەشۋدى، وڭىرلىك دوستىق-سەلبەستىك، بەيبىتشىلىك، ورنىقتىلىق جالپى جاعدايىن قورعاۋدى قۋاتتايمىن، بۇل وسى وڭىردەگى ٴار جاقتىڭ مۇددەسىنە ۇيلەسەدى. فيليپپين جۇڭگومەن تەڭىزدەگى مۇناي، تابيعي گازدى بىرگە اشۋدى قالايدى. فيليپپين قازىرگى شىعىس وڭتۇستىك ازيا ەلدەرى وداعى مەن جۇڭگونىڭ قاتىناسىن سايكەستىرۋشى ەل رەتىندە، ٴار جاقتىڭ «نانحاي تەڭىزى ارەكەت ولشەمىنە» ەرتەرەك قول قويۋىن ىلگەرىلەتۋگە كۇش سالادى.


    كەزدەسۋدەن كەيىن، ەكى ەل باسشىلارى ەكى جاقتى سەلبەستىك حۇجاتتارىن اۋىستىرۋ سالتىنا بىرگە كۋا بولدى. ەكى جاق مۇناي، تابيعي گاز سەلبەستىگى ۇكىمەت ارا بىرلەسكەن جەتەكشىلىك كوميتەتى مەن كاسىپورىندار ارا قىزمەت گرۋپپاسىن قۇرىپ، بىرگە اشۋدى جەبەۋدە ماندىك ىلگەرىلەۋشىلىككە قول جەتكىزەتىندىگىن جاريالادى.


    ياڭ جيەچى، ۋاڭ ي، حى ليفىڭ قاتارلىلار كەزدەسۋگە قاتىناستى.

اۋدارعان: گۇلنۇر قابىلقاق قىزى

00.jpg
00.jpg
00.jpg
00.jpg
00.jpg