ٴوز حابارىمىز. مەملەكەتتىك حالىق قۇرىلتايى تۇراقتى كوميتەتىنىڭ باستىعى لي جانشۋ 1-ايدىڭ 18-كۇنى حالىق سارايىندا مەملەكەتتىك حالىق قۇرىلتايى مەن كامبودجا پارلامەنتىنىڭ پىكىر الماستىرۋ بەينەكەسكىن قيمىلىنىڭ اشىلۋ سالتىنا قاتىناستى. لي جانشۋ بىلاي دەپ باسا دارىپتەدى: جۇڭگو مەن كامبودجا اينىماس دوس جانە تاعدىرلاس ورتاق تۇلعا. ەكى جاق ٴبىر ـ ٴبىرىنىڭ وزەكتى مۇددەسىنە ساياتىن ماسەلەلەردە ٴبىرىن ـ ٴبىرى باتىل قولدايدى. جۇڭگو كامبودجا حالقىنىڭ ادىلەتتى ىستەرىن تاباندىلىقپەن قولداپ، كامبودجانىڭ مەملەكەت قۇرىلىسىنا شاماسىنىڭ كەلىسىنشە قولداۋ كورسەتەدى. جۇڭگو كامبودجامەن ۆاكسينا سەلبەستىگىن بەلسەنە ورىستەتۋدى قالايدى. بىلتىر جۇڭگو مەن كامبودجانىڭ ەكى جاقتى ەركىن ساۋدا كەلىسىمىنە جانە وڭىرلىك جان ـ جاقتى ەكونوميكالىق سەرىكتەستىك قاتىناس كەلىسىمىنە ىلگەرىندى ـ كەيىندى قول قويىلدى، ەكى جاقتىڭ وسىنى وراي ەتىپ، ەكونوميكا ـ ساۋدا سەلبەستىگىنىڭ كومەسكى كۇشىن ىشكەرىلەي اشۋىن ٴۇمىت ەتەمىن. كامبودجانىڭ جۇڭگونىڭ دامۋ جاڭا ورايىن يگەرىپ، جۇڭگومەن سەلبەستىكتى بەلسەنە تەرەڭدەتۋىن قارسى الامىز.

    لي جانشۋ بىلاي دەدى: زاڭ شىعارۋ قۇرىلىمدارىنىڭ بارىس ـ كەلىسى _ جۇڭگو ـ كامبودجا قاتىناسىنىڭ ماڭىزدى قۇرامداس بولەگى. ەكى ەلدىڭ زاڭ شىعارۋ قۇرىلىمدارى ەكى ەل باسشىلارى كەلىسكەن ماڭىزدى ورتاق تانىمنىڭ تياناقتانۋىن بەلسەنە ىلگەرىلەتىپ، ٴبىر بەلدەۋ، ٴبىر جولدى ورتاق قۇرۋ سەلبەستىگىنىڭ تەرەڭدەۋىنە، ناقتىلانۋىنا زاڭدىق جانە ساياساتتىق قولداۋ كورسەتتى. زاڭ شىعارۋ قۇرىلىمدارى ۋاكىلدەرىنىڭ بۇقارامەن تىعىز بايلانىس جاساۋ ابزالدىلىعىن ساۋلەلەندىرىپ، جۇڭگو مەن كامبودجانىڭ ۇرپاقتان ـ ۇرپاققا جالعاسقان دوستىعىنا مۇراگەرلىك ەتىپ، مەملەكەت قاتىناسىنىڭ دامۋىنا دەم بەرۋ ٴتيىس. 

    كامبودجا پارلامەنتىنىڭ ٴتوراعاسى حان سانلين بىلاي دەدى: كامبودجا مەن جۇڭگونىڭ دوستىعى ارىدان باستاۋ الادى. ەكى ەل ىندەتكە ىنتىماقتاسا سوققى بەرىپ، كامبودجا مەن جۇڭگونىڭ تاعدىرلاس ورتاق تۇلعاسى قۇرىلىسىندا ۇزدىكسىز تىڭ ىلگەرىلەۋشىلىككە قول جەتكىزدى. كامبودجا پارلامەنتى رولىن بەلسەنە ساۋلەلەندىرىپ، جۇڭگو مەملەكەتتىك حالىق قۇرىلتايىمەن اۋىس ـ كۇيىس، سەلبەستىكتى كۇشەيتىپ، ٴار سالاداعى ناقتى سەلبەستىكتى ىلگەرىلەتۋگە جانە ەكى ەل قاتىناسىنىڭ دامۋىن جەبەۋگە ۇلەس قوسۋدى قالايدى.


اۋدارعان: شالقار قازەز ۇلى