ٴوز حابارىمىز. 5-ايدىڭ 15-كۇنى مەملەكەتتىك 32-رەتكى مۇگەدەكتەرگە كومەكتەسۋ كۇنى. بيىل مۇگەدەكتەردى جۇمىسقا ورنالاستىرۋعا ۇگىتتەۋ جىلى، «مۇگەدەكتەردىڭ جۇمىسقا ورنالاسۋىن جەبەۋدەگى 3 جىلدىق ارەكەت جوباسىن» تياناقتاندىرۋدىڭ تۇڭعىش جىلى، جەر-جەردەگى ٴار دارەجەلى مۇگەدەكتەر بىرلەستىگى ادام كۇشى بايلىعى جانە قوعامدىق قامتاماسىزداندىرۋ، باجى سياقتى قاتىستى تاراۋلارمەن ٴوز ابزالدىلىقتارىن ساۋلەلەندىرىپ، «مۇگەدەكتەردىڭ جۇمىسقا ورنالاسۋىن جەبەپ، مۇگەدەكتەردىڭ ۇقىق-مۇددەسىن قامتاماسىزداندىرۋدى» ٴتۇيىن ەتە وتىرىپ، مۇگەدەكتەردى ٴتۇرلى فورمادا سۇيەمەلدەۋ، ولارعا قامقورلىق جاساۋ قيمىلدارىن ورىستەتەدى.

نانچاڭ قالاسى دۇڭحۋ رايونىنداعى مۇگەدەكتەردىڭ كاسىپ جاراتۋىنا، جۇمىستانۋىنا قىزمەت وتەۋ بازاسىندا 30 نەشە مۇگەدەك ادام ولكە دارەجەلى بەيزاتتىق مادەني مۇرا نىسانى بولعان «يۇيجاڭ كەستەشىلىگىن» تەگىن ۇيرەندى، مۇگەدەك ۋاڭ مىرزا كەستە بۇيىمدارىن جاساۋ ارقىلى جۇمىسقا ورنالاستى. ول بىلاي دەدى: مۇگەدەكتەر بىرلەستىگى زاۆودپەن بايلانىس جاسايدى، ٴبىز تىككەن كەستەلەرىمىزدى زاۆودقا تىكەلەي ساتىپ بەرەمىز. جۇمىسىم ماردىمدى بولسا ٴبىر ايدا 4 تە 5 پارشا كەستە تىگىپ شىعا الامىن، بىرەۋىن 1000 يۋاننىڭ ۇستىندە ساتۋعا بولادى.

مەملەكەتتىك كەڭەس كەڭسەسى بيىل 4-ايدا «مۇگەدەكتەردى كاسىپتەندىرۋدىڭ 2022-جىلدان 2024-جىلعا دەيىنگى 3 جىلدىق ارەكەت جوباسىن» باسىپ تاراتىپ، بۇدان بىلايعى 3 جىلدا ەلىمىزدىڭ قالا-اۋىلدارىنداعى مۇگەدەكتەردەن 1 ميلليون ادامدى تىڭنان كاسىپتەندىرۋ نىساناسىنا جەتۋدى ورتاعا قويدى. اقىل-ويىندا اقاۋى بار ادامداردىڭ كاسىپتەنۋ قيىنشىلىعىن شەشۋ ٴۇشىن كوپتەگەن جەر بەلسەنە ىزدەنىستەر جاسادى.

جىجياڭ ولكەسىنىڭ حاينيڭ قالاسىنداعى بايليسى مۇگەدەكتەرگە كومەكتەسىپ كاسىپتەندىرۋ ورتالىعىنىڭ تىكە تاراتۋ بولمەسىندە 95-جىلداردان كەيىن دۇنيە ەسىگىن اشقان اقىل-ويىندا اقاۋى بار جۇرگىزۋشى شياۋ جين توراپتا ٴتۇرلى بايپاقتاردى ساتۋدا. جۇمىستاندىرۋ ورتالىعىنىڭ جاۋاپتىسى لين فىڭ بىلاي دەدى: كەيبىر قولونەر ٴتاسىلى ارقىلى ولاردىڭ مي جۇمساۋ قابىلەتىن ارتتىرۋىنا دەم بەردىك، ۇكىمەتتىڭ تەكشەسى، كاسىپورىنداردىڭ بايلىعى ارقىلى دەنساۋلىعىندا اقاۋى بار ادامداردى ٴوز كۇشىنە سۇيەنىپ تابىس تابۋعا جەتەلەپ، ولاردىڭ وتباسىنداعىلاردىڭ اۋىرتپالىعىن جەڭىلدەتتىك.

مۇگەدەكتەرگە كومەكتەسۋ-سۇيەمەلدەۋ ساياساتىندا قازىر سالىستىرمالى تۇردە جۇمىسقا ورنالاستىرۋ، مەكەمە-ورىندارعا جۇمىسقا ورنالاستىرۋ، يكەمدىلىكپەن جۇمىسقا ورنالاستىرۋ، دەربەس كاسىپ جاراتۋ سياقتى جۇمىسقا ورنالاستىرۋداعى تۇرلىشە فورمالار جاپپاي قامتىلىپ، قازىنا، فينانس، باجى، قارجى قوسىمشا قاراجاتى سياقتى ٴتۇرلى ساياساتتىق قۇرالدار جان-جاقتىلى پايدالانىلدى. جۇڭگو مۇگەدەكتەر بىرلەستىگى كاسىپتەندىرۋ ورتالىعى كاسىپتەندىرۋ باسقارماسىنىڭ باستىعى تۋ چياڭگىن تانىستىرىپ بىلاي دەدى: كەلەسى قادامدا ەڭبەككۇش بازارىنىڭ قاجەتىن باعدار ەتىپ، اناعۇرلىم ٴونىمدى، ٴتىپتى دە كەڭ ساياساتتىق بىرىككەن كۇش قالىپتاستىرامىز.


اۋدارعان:امانتاي مۇسايىپ ۇلى