لي چياڭ بىلاي دەدى: تاياۋ جىلداردان بەرى، ٴتوراعا شي جينپيڭ مەن زۇڭتۇڭ پۋتيننىڭ ستراتەگيالىق جەتەكشىلىگىندە، جۇڭگو مەن رەسەيدىڭ جاڭا داۋىردەگى جالپى بەتتىك ستراتەگيالىق سەلبەستىك سەرىكتەستىك قاتىناسى باستان ـ اياق جوعارى دەڭگەيدە جۇرگىزىلىپ كەلدى. جۇڭگو مەن رەسەيدىڭ ناقتى سەلبەستىگىنىڭ سەرپىنى كۇشتى، كومەسكى كۇشى زور، ارناسى كەڭ. جۇڭگو رەسەيمەن بىرگە جۇڭگو ـ رەسەي زۇڭليلارىنىڭ مەرزىمدى كەڭەس مەحانيزمىنىڭ نەگىزگى ارنالىق رولىن تولىق ساۋلەلەندىرىپ، ەكى ەل باسشىلارى كەلىسكەن ماڭىزدى ورتاق تانىمدى ويداعىداي تياناقتاندىرىپ، ەكى جاقتى ناقتى سەلبەستىكتىڭ ورنىقتى، باياندى دامۋىن جەبەۋدى قالايدى.

    لي چياڭ بىلاي دەپ اتاپ كورسەتتى: جۇڭگو رەسەيمەن ساۋدا قۇرىلىمىن ساپالاندىرىپ، ساۋدا تۇرلەرىن ونان ارى بايىتىپ، اۋىل شارۋاشىلىعى، قىزمەت وتەۋ ساۋداسى، سيفرلى ەكونوميكا، جاسىل دامۋ سياقتى سالالارداعى سەلبەستىك ارناسىن كەڭەيتىپ، ەكونوميكا ـ ساۋدا سەلبەستىگىن ساپا جانە سان جاعىنان دامىتۋدى قالايدى. ساۋدا ارناسىن ىركىلىسسىزدەندىرىپ، كەدەننەن ٴوتۋ ٴتارتىبىن ساپالاندىرىپ، كەدەننەن ٴوتۋ ونىمدىلىگىن جوعارىلاتادى، سەلبەستىك كومەسكى كۇشىن ىشكەرىلەي اشىپ، جەرگىلىكتى ورىندار مەن كاسىپورىنداردى ەكى ەلدىڭ ناقتى سەلبەستىگىنە كوبىرەك ات سالىسۋعا جۇمىلدىرادى. گۋمانيتارلىق اۋىس ـ كۇيىستى جيىلەتىپ، وقۋ ـ اعارتۋ، عىلىم ـ تەحنيكا، مادەنيەت، ساياحات، دەنە تاربيە، دەنساۋلىق ساقتاۋ سياقتى سالالارداعى سەلبەستىكتى كەڭەيتىپ، دەنە تاربيە اۋىس ـ كۇيىسى جىلىنىڭ سوڭعى جۇمىستارىن ۇزدىكسىز تىندىرىمدى ىستەپ، ەكى ەلدىڭ ٴوزارا وقۋشى جىبەرۋ مولشەرىن ارتتىرۋدى قولدايدى.

    لي چياڭ بىلاي دەپ باسا دارىپتەدى: بيىل ٴتوراعا شي جينپيڭنىڭ ”ٴبىر بەلدەۋ، ٴبىر جول“-دى بىرگە قۇرۋ دارىپتەمەسىن العا قويعاندىعىنىڭ 10 جىلدىعى. جۇڭگو رەسەي سياقتى ەۆروپا ـ ازيا ەكونوميكا وداعىنا مۇشە ەلدەرمەن بىرگە «ٴبىر بەلدەۋ، ٴبىر جول» قۇرىلىسىن ەۆروپا ـ ازيا ەكونوميكا وداعىمەن ۇشتاستىرۋ سەلبەستىگىن كۇشەيتىپ، ساۋدانىڭ ەركىندەنۋىن-قولايلىلانۋىن جەبەۋگە پەيىل.

    ميشۋستين بىلاي دەدى: رەسەي مەن جۇڭگونىڭ دوستىعى ارىدان جالعاسقان، ەكى جاق سەلبەستىگىنىڭ تابىستارى سۇبەلى، رەسەي مەن جۇڭگونىڭ قاتىناسى حالىقارالىق قارىم - قاتىناستا وزگەشە ۇلگىلىك مانگە يە. حالىقارالىق جاعداي اۋمالى - توكپەلى بولىپ تۇرعاندا رەسەي جۇڭگومەن بىرگە ەكى ەل باسشىلارى كەلىسكەن ماڭىزدى ورتاق تانىمدى ويداعىداي تياناقتاندىرىپ، ءتۇرلى سالاداعى سەلبەستىكتى اناعۇرلىم تەرەڭدەتىپ، ەكى ەل ءدوپ كەلگەن جاڭا سىن - سايىستارعا ءونىمدى توتەپ بەرۋدى قالايدى. ەكى جاق سەلبەستىك كومەسكى كۇشىن تولىق اشىپ، ونەركاسىپ ـ ساۋدا سالاسىنداعىلاردىڭ بايلانىسىن كۇشەيتىپ، ەكونوميكا ـ ساۋدا، ەنەرگيا، اۋىل شارۋاشىلىعى، عىلىم ـ تەحنيكا، نەگىزدىك قۇرىلعى قۇرىلىسى سياقتى سالالارداعى سەلبەستىكتى ىلگەرىلەتىپ، ”ٴبىر بەلدەۋ، ٴبىر جول“دى بىرگە قۇرۋلارى كەرەك. رەسەي جۇڭگومەن گۋمانيتارلىق جانە جەرگىلىكتى ورىندار اۋىس ـ كۇيىسىن قويۋلاتۋدى قالايدى.

    كەڭەستەن كەيىن، ەكى ەل زۇڭليلارى ەكى جاقتى سەلبەستىك حۇجاتىنا قول قويۋ بارىسىنا بىرلىكتە كۋا بولدى.

    كەڭەستەن بۇرىن، لي چياڭ حالىق سارايىنىڭ شىعىس قاقپاسى سىرتىنداعى الاڭدا ميشۋستيندى قارسى الۋ سالتىن وتكىزدى.

    حى ليفىڭ، چين گاڭ قاتارلىلار جوعارىداعى قيمىلدارعا قاتىناستى.

سول كۇنى تۇستەن كەيىن، ميشۋستين حالىق قاھارماندارى ەسكەرتكىشىنە گۇل شەڭبەر قويدى.

اۋدارعان: امانتاي مۇسايىپ ۇلى