شانشي ولكەسى «چينچۋاڭيۋان» فىڭدۇڭ وزىق جاساۋ كاسىبى باقشاسىندا بۇكىلدەي اۆتوماتتى لازەر نۇرىمەن تەڭشەۋ ماشيناسى جەدەل جۇمىس جۇرگىزۋدە. 2 ميلليمەتر قالىڭدىقتاعى جارعاق، پلاتينا ەلەكتر كەدەرگىلى جەتكىزگىش چيپ تارتىپپەن وندىرىلۋدە، ول عارىش جۇيەسى، اۆتوموبيل ونەركاسىبى، بيولوگيالىق ەمدەۋ سياقتى سالالاردا كەڭىنەن قولدانىلۋدا. شي ـ ان قالاسىنداعى بەلگىلى عىلىم ـ تەحنيكا شەكتى سەرىكتىگىنىڭ ورىنباسار باس ديرەكتورى جين شينحاڭ بىلاي دەدى: بۇل ەل ىشىندەگى تۇڭعىش قالىپتى تەمپەراتۋرادا، ەرەكشە تومەن تەمپەراتۋرادا جانە اسا جوعارى تەمپەراتۋرادا جۇمىس جۇرگىزە الاتىن جۇقا جارعاق چيپىن اۆتوماتتاندىرىپ ٴوندىرۋ لەنياسى بولىپ، شەتەلدىڭ 30 جىلعا جۋىق مونوپولياسىن تالقاندادى.

    ەلىمىز ٴار جىلى وسىنداي جەتكىزگىش چيپتەن 800 ميلليونىن قاجەت ەتەدى، كەزىندە 20 ميلليارد يۋاندىق بازاردى شەتەل كاسىپورىندارى شەڭگەلدەگەن بولاتىن. 2021 - جىلى باتىس سولتۇستىك ونەركاسىپ داشۋەسىنىڭ ماشينا - ەلەكتر شۋەيۋانى ”جۇقا جارعاقتىڭ تەمپەراتۋراسى جانە قىسىم سەنزورى“ نىسانىنا قاتىستى عىلمي زەرتتەۋ جەتىستىكتەرىن قولعا كەلتىرىپ، ورتا-جوعارى دەڭگەيلى زەردەلى سەنزور چيپىن مانەرلەۋ، جاساۋ جاعىنداعى تەحنيكالىق قيىن تۇيىندەردى شەشتى. وسى عىلمي تاقىرىپتىڭ جاۋاپتىسى بولعان باتىس سولتۇستىك ونەركاسىپ داشۋەسى ماشينا - ەلەكتر شۋەيۋانىنىڭ دوتسەنتى لو جيان بىلاي دەپ تانىستىردى: عىلمي زەرتتەۋ جەتىستىكتەرىنەن ٴوندىرىس جەلىسىنە دەيىن ٴبىر جىلعا جەتپەيتىن ۋاقىتتا تامامدادىق.

    شانشي ولكەسى ٴتۇيىندى كاسىپتەردە شۇعىل شەشۋدى قاجەت ەتەتىن تەحنيكالىق قيىن تۇيىندەرگە قاداعالاي نازار اۋدارىپ، كەلەلى عىلىم ـ تەحنيكا ارناۋلى نىساندارىن ورنالاستىرىپ، اتقارىپ، ”حابارلاندىرۋ شىعارىپ جەتەكشىلىك ەتۋ“، تاپسىرىس بەرۋ ۇلگىسىندەگى زەرتتەۋ ـ اشۋ سياقتى ۇلگىلەردى قولداندى. شانشي ولكەلىك عىلىم ـ تەحنيكا مەڭگەرمەسىنىڭ ورىنباسار باستىعى ۋاڭ جۇن بىلاي دەدى: عىلىم ـ تەحنيكادا جاڭالىق اشۋ جاعدايىن ۇزدىكسىز جاقسارتۋ ارقىلى شانشيدىڭ جوعارى ساپالى دامۋىنىڭ جاڭالىق اشۋ ومىرشەڭدىك كۇشى جەدەل قالىپتاسۋدا.

اۋدارعان: امانتاي مۇسايىپ ۇلى