ناچار ئۇچۇرلارنى پاش قىلىش: mzjubao@cnr.cn

وزەكتى ماقالالار

ورىنسىز جومارتتىق وكىنىش ارقالاتادى

来源:央广网     |责编:达吾力别克|     发布日期: 2019-10-06 11:01

ورىنسىز جومارتتىق وكىنىش ارقالاتادى

 

 

 

 

ديكتور: گۇلجان زارقىنبەك قىزى

 

 

 

اۆتورى: ماقسات قيزات ۇلى

 

 

ءمۇبادا، جاقسىلىقتىڭ قارىمجىسى جاقسىلىق بولماي قالسا قايتەر ەدىڭىز؟ 

 

ارينە، «جاقسىلىقتى جونىمەن، جومارتتىقتى جوسىنىمەن ۇنەمدەپ، تالعاپ جۇمساماعانىما وكىنەمىن»،-دەپ بارماعىڭىزدى شاينارسىز. 

 

ءجونسىز جومارتتىقتان اۋىزى كۇيگەن ادامدار بىلاي دەيدى: 

 

ارتىق اق كوڭىلدىلىكتىڭ ەكى زيانى بار، اۋەلى:« ارتىعىمەن بەرىپ ەدىم، نەگە جاقسىلىعىمدى ۇقپايدى»،-دەپ ءوز ىشىڭنەن ءوزىڭ تۋلاپ كوڭىلسىز كۇي كەشەسىڭ. 

 

ەكىنشىسى، قايتالاي كىسىگە قايىرىم قىلۋدان قورىناتىن بولاسىڭ، ادامنىڭ ءبارى جاقسىلىعىڭدى ۇقپايتىنداي كورىنەدى. بىلىنبەي بەز بۇيىرەكتەنە باستايسىڭ، ىشتەي: بۇعان بەرىپ جامان اتتى بولعانشا، بەرمەي جامان اتتى بولايىن،-دەپ بەكىنەسىڭ.

 

كوڭىلدىڭ سۋىنعانى جامان عوي، بۇل وي وزگە شىنايى قامقورعا ءزارۋ بولعان ادامداردىڭ جولىن توسادى. سول ءۇشىن دە قايىرىمدىلىقتىڭ قازانىن شىمىرلاتىپ قايناتۋ كەرەك ەكەن.

 

 اق كوڭىلدىلىكتى دە استا، استالاپ اتقا قوندىرعان ءجون ەكەن.

 

 بۇل تاعىلىم سوناۋ ۋنيۆەرسيتەت وقىپ جۇرگەن كەزدەگى مىنا ءبىر ۋاقيعانى ەسىمە ءتۇسىردى. 

 

كورشى جاتاقتا كىم-كورىنگەن جۇمساسا، سونىڭ قاسىنان قالبالاقتاپ تابىلاتىن ءبىر ەلگەزەك جىگىت بار ەدى. ءبىر كۇنى جاتاعىنا بارسام، ءوڭى ءورت سوندىرگەندەي كۇرەڭىتىپ كەتىپتى. 

 

«نە بولدى؟»،-دەگەنىم سول ەدى، ارجاعىنان رەنىشتىڭ مۇز بۇيىرەگى بۇلىك ەتە ءتۇستى. 

 

-بىرەۋگە ارتىق ىستەگەن جاقسىلىعىڭ قۇرىسىن، ءوزىڭ كورىپ ءجۇرسىڭ، وسىلاردىڭ كوڭىلىن قالدىرعان جەرىم بارما؟

 

قاشان كورسەڭ قايناق سۋدى تەرموسپەن تاسىپ جۇرگەن مەن؛ جاتاقتى ەرتەلى-كەش سىپىرىپ، تازالاپ جۇرگەن مەن؛ تاماقتارىن كۇن قۇرعاتپاي تاسىپ جۇرگەن مەن. 

 

سودان نە مارقادام تاپتىم مەن؟

 

ەندى قاراشى، بۇگىن تىماۋراتىپ زىقىم كەتىپ ەدى، كوڭىلىمدى اۋلاعاننىڭ ورنىنان شەتتەرىنەن شەرتيەدى.

 

باسقاسى ەمەس استىڭعى توسەكتەگى جاقىن تارتىپ جۇرگەن جاتاقتاسىمنىڭ: ءۇي، ناس باستى ما؟ تۇرساڭشى، ناعىپ جاتىرسىڭ، باسىمدى جۋايىن،-دەسەم، جىلى سۋ قالماپتى، اكەل، بار جۇگىر،-دەپ بۇيىرىمنەن نۇقىپ باسىنعانى باتتى.

 

سويتسەم بۇلار مەنى اراسىنان قىل وتپەس اعايىنداي ەمەس، قىر كەزدىرىپ، قي ارقالاتاتىن مالايىنداي كورىپ ءجۇرىپتى.

مەن وعان جاناشىر كەيىپپەن مۇڭايا قاراپ قالدىم. 

 

سودان ول قولىن شوشايتىپ: ‹بىلە-بىلسە مەن بۇل بوداۋسىز ەلپەكتىكتى ولاردان قورىققانىمنان ەمەس، قۇرمەتتەگەنىمنەن ىستەدىم›،-دەدى تۇتىگىپ.

 

مەن از-كەم ويلانىپ تۇردىم دا: «ولاردى جامان ۇيىرەتكەن ءوزىڭ ەكەنسىڭ عوي»،-دەدىم.

 

 ول: دۇرىس،-دەدى دە توسەگىنە جانتايا كەتتى. 

 

كوز كورىپ جۇرگەن ءبىر اقيقات: اق كوڭىلدىلىك ارتىعىمەن كەتسە اقىماقتىقا اپارىپ سوعادى ەكەن دە، جاقسىلىق شاراناسىنان اقتارىلسا، شاراسىزدىققا ۇلاسادى ەكەن.

 

بۇل ومىردە ارتىلتىپ بەرگەنىڭدى ارزان كورەتىندەر جوق ەمەس، وندايلار بۇل ومىردە مىڭداپ تابىلادى. سەمىزدىكتى قوي كوتەردى، قويدان باسقا نە كوتەردى،-دەگەننىڭ استارىنا ءالى دە تەرەڭىرەك ۇڭىلۋ كەرەك سياقتى. جوندانا قالسا، جاقسىلىعىڭدى جۋىپ جىبەرەتىن جان از با؟

 

 ......

 

«باعدات حيكايالارىنان» مىناداي ءبىر اڭگىمەنى وقىعانىم بار ەدى:

 

ەرتەدە، ىزعارلى كۇزدىڭ ءبىر سۋىق كەشىندە، جولاۋشىلاپ كەلە جاتقان اق كوڭىل ساۋداگەر قۇمدى ءشولدىڭ جيەگىنە كەلىپ، تۇيەسىن شوگەرىپ، قوسىن تىگىپتى. 

 

كەش باتا كۇن قاتتى سۋىتىپتى، قۇم جيەگىنىڭ قارا سۋىعىنا توزبەگەن قىر ارقاسى جاۋىر بولعان قارا اتان شاراسىزدىقتان ورنىنان تۇرىپ، يەسى جاتقان قوستىڭ اۋىزىنان بارىپ، باسىن قىلتيتىپتى. 

 

بۇعان تاڭ-تاماشا بولعان ساۋداگەر: ساعان نە بولدى،-دەپتى تۇيەگە.

 

 سوندا تۇيە: يەم-اۋ، توڭىپ ولەتىن بولدىم، باسقا جەرىمدى قويشى، باسىمنان ىزعار ءوتىپ شىداتپاي بارادى، تىم قۇرىسا ىرگەڭە باسىمدى سۇعىپ جاتايىنشى،-دەپتى بوزداعان بەتى. 

 

-جارايدى ، باسىڭدى سۇعىپ جاتا بەر،-دەپتى ساۋداگەر. 

 

ازدان سوڭ تۇيە قايتادان ءتىل قاتىپ: قوسىڭ كەڭ ەكەن عوي، مويىنىمدى كىرگىزەيىنشى، مويىنىم جىلىنسا، باسقا دەنەم تۇك ەتپەس،-دەپتى كوزى مولدىرەپ. 

 

 -مەيلىڭ، كىرگىزە بەر،-دەپتى يەسى باسىن يزەپ. 

 

سونىمەن جىلى قوستىڭ ىشىنە مويىنى كىرىپ جىلىنعان تۇيە ءسۇت پىسىرىم ۋاقىت وتكەن سوڭ: اينالايىن، اق كوڭىل يەم، مىنا قۇساپ جاتقانىم قولايسىز ەكەن، الدىڭعى وركەشىمدى كىرگىزەيىنشى، سوندا راحاتتانىپ جاتاتىندايمىن،-دەپتى ءوتىنىپ. 

-جارايدى، وركەشىڭدى دە كىرگىز،-دەپتى ساۋداگەر تورگە قاراي سىرىلىپ.

 

تۇيە الدىڭعى وركەشىن قوسقا كىرگىزگەنى سول ەدى، قوستىڭ ءىشى قۋىقتاي بولىپ تارىلىپ قالىپتى. 

 

ەت پىسىرىم ۋاقىت وتكەن سوڭ تۇيە: قادىرلى يەم، مىنا قۇساپ جارىم وركەشىم سىرتتا قالعان جامان ەكەن، نە بولسا دا، ىشكە بىراق كىرىپ جاتايىنشى،-دەپتى ءوتىنىپ. 

 

-كوڭىل سيسا، كورپەدە سيادى عوي، كىرە بەر،-دەپتى ساۋداگەر ءوزىنىڭ ەكى اياعىن باۋىرىنا جيناپ. 

 

تۇيە قوسقا كىرگەن كەزدە، ءۇيدىڭ ءىشى مۇلدەم تارىلىپ كەتكەن ەدى. بۇنى بايقاعان تۇيە: مىناۋ ءوزى ءبىر تۇيەلىك قانا قوس ەكەن عوي، سەن ەڭ ءابىزالى سىرتقا شىعىپ جاتساڭ ءجون بولاتىنداي، بار، سىرتقا شىق،-دەپ جىنىن شاشىپ باقىرىپتى. 

 

مومىن ساۋداگەر اشۋلى تۇيەدەن ىعىپ، قوستىڭ ىرگەسىن پانالاپتى. 

 

 بۇل مىسال اڭگىمە بولسا دا، استارىندا عيبىرات قىلارلىق مول ونەگە جاتىر. 

 

اۋىلدا قولى جومارت، ۇزاق جاساعان ءبىر كىسى بار ەدى، ءبىر كەزدە كوسىلە اڭگىمە شەرتىپ وتىرىپ: ومىردە ءبىر نارسەنى انىق ءبىلدىم، جاقسىلىق جاسايمىن،-دەپ جۇرتتىڭ بارىنە ءجايىلىپ جاستىق، ءيىلىپ توسەك بولۋعا بولمايدى ەكەن.

ءبىز ارتىلتىپ بەرەمىز،-دەپ اقىماق بولعانىمىزدى بىلمەي قالادى ەكەنبىز. سۋ سۇراسا، ءسۇت بەرەدى ەكەنبىز، ءسۇت سۇراسا، ءشۇبات بەرەدى ەكەنبىز. 

 

جاقسىلىعىڭدى تۇسىنەتىندەر جوق ەمەس، ءبىراق كوبىسى كەلە-كەلە جومارتتىعىڭدى جونسىزدىككە بالايدى دا، وڭىنا كەلسە، قولىڭداعىڭا ەمەس، اۋىزىڭداعىڭا اۋىز سالعىسى كەلەدى›،-دەپ ەدى كۇرسىنىپ. 

 

كوپتى كورگەن كىسىنىڭ بۇل كۇرسىنىسىندە كوپتەگەن ءمان بار ەدى، قالاي بولعان كۇندە دە، ادامعا جاقسىلىق ىستەگەن جاقسى عوي، ءبىراق ونىڭ دا شەگى بولادى، ورىنسىز جومارتتىق وكىنىش ارقالاتادى.

 

ارتىعىمەن العانداردىڭ كوبىسى العىس ايتا بىلمەيدى. 

 

جاقسىلىق جاساۋدان تارتىنبا، ايتسە دە نە بەرسەڭ دە ولشەپ بەر، ولشەۋسىز دۇنيەنىڭ قادىرى بولمايدى، جاقسىلىق تا، جومارتتىق دا جونىمەن بولعانى جاقسى عوي. 

 

وزگەدە مازمۇندار

 

 

 

ەكىلىكتى باسىپ قوسىلىڭىز

中央广播电视总台 央广网 版权所有