ينفورماتسيا اشكەرەلەۋ: mzjubao@cnr.cn

وزەكتى ماقالالار

تۇيەنىڭ تابىنى ارتتى، مالشىنىڭ باعىن اشتى

来源:央广网     |责编:达吾力别克|     发布日期: 2020-01-08 19:37

 

تورابىمىز ۇسىنىس ەتكەن ءتىلشى ساعىنبەك رابات ۇلى مەن ەرىكتى ءتىلشى دۋ پىڭفي التايدان حابارلايدى. 1-ايدىڭ 2-كۇنى بۋرىلتوعاي اۋدانىندا اشىلعان شينجياڭ ۋاڭيۋان بيوعىلىم-تەحنيكا توبىنىڭ 5-رەتكى تۇيەشىلەردى ماداقتاۋ-سيلاۋ جينالىسىندا، قاراماعاي قالاشىعى تاڭبالى قىستاعىنىڭ مالشىسى ورلەۋ توقتارعازى ۇلىنىڭ قۋانعاندا ەكى ەزۋى قۇلاعىنا جەتتى، ول باسقا 5 تۇيەشىمەن بىرگە قۇنى 100 مىڭ يۋاننان اساتىن جەڭىل اۆتوكولىكتى سيلىققا الدى.

 

ورلەۋ تىلشىگە بىلاي دەدى: «2019-جىلى وتباسىمىزدىڭ جىلدىق كىرىسى 150 مىڭ يۋاننان استى، ماداقتاۋ-سيلاۋ جينالىسىندا سيلىق اقشا مەن جەڭىل اۆتوكولىك الدىم، بۇل جاڭا جىلدىق تارتۋ وتە كەرەمەت بولدى». 

 

شينجياڭ ۋاڭيۋان بيوعىلىم-تەحنيكا توبىنىڭ وسى رەتكى ماداقتاۋ-سيلاۋ جينالىسىنا جەرگىلىكتى ورىنداعى 175 تۇيەشى قاتىناستى، جينالىستا اقاۋسىز تۇيە باعۋ، سەنىمدى سەلبەستىك جاساۋ سياقتى جاقتاردا بەلسەندى ۇلەس قوسقان قادىلەت مىسىرقان ۇلى قاتارلى 71 تۇيەشىنى ماداقتاپ-سيلادى، سيلىق اقشا مەن سيلىق بۇيىمنىڭ قۇنى ءبىر ميلليون يۋاننان استى. «اقاۋسىز تۇيە باعىپ، ءسۇت بەرەتىن ءىرى وتباسى» سيلىعىندا 6 تۇيەشىنىڭ ءاربىرى بىردەن جەڭىل اۆتوكولىكپەن سيلاندى، ورلەۋ سولاردىڭ ءبىرى. ءتىلشىنىڭ ۇعىسۋىنشا، 3 جىلدىڭ الدىندا ورلەۋ ارحيۆ تۇرعىزىلىپ كارتچكا بەرىلگەن كەدەي وتباسى بولىپ، تاۋدا مال باعىپ كۇنەلتىپ كەلگەن-دى. 3 جىل باعىمشىلىقتى دامىتۋ ارقىلى قازىر ول 30 نەشە تۇيە باعىپ، كۇنىنە 50 كيلوگرامنان استام ءسۇت بەرىپ، ايلىق كىرىسىن 30 مىڭ يۋاننان اسىرىپ، تۇرمىسى بارعان سايىن جاقساردى.

 

ۇعىسۋعا قاراعاندا، 2016-جىلى بۋرىلتوعاي اۋداندىق اۋىل-قىستاق سەنىمدى امانات-قارىز كووپەراتيۆى شينجياڭ ۋاڭيۋان بيوعىلىم-تەحنيكا توبىنىڭ تۇيە كاسىبىنە سۇيەنىپ، «اۋىل-قىستاق سەنىمدى امانات-قارىز كووپەراتيۆى + كاسىپورىن + باقتاشىلىق بازاسى + كاسىپتىك سەلبەستىك كووپەراتيۆى + باقتاشى وتباسى» سىندى كاسىپ تىزبەگىندەگى فينانس ارقىلى كەدەيلەردى سۇيەمەلدەۋ ۇلگىسىن قولدانىپ، بۋرىلتوعاي اۋدانىنداعى تۇيە نىسانى ابزال بايلىعىن تەز ارادا كەدەي ەگىنشى-مالشىلاردى اۋقاتتانۋعا جەتەلەيتىن تىرەكتى كاسىپكە اينالدىرعان. وسى ۇلگىنى بۇرىنعى اۋىل شارۋاشىلىق مينيسترلىگى جۇڭگو مال شارۋاشىلىق قوعامى «بۋرىلتوعاي ۇلگىسى جۇڭگونىڭ مال شارۋاشىلىق كاسىبى ارقىلى كەدەيلەردى سۇيەمەلدەۋىنىڭ تاڭداۋلى ۇلگىسى» دەپ القادى.

 

ماداقتاۋ-سيلاۋ جينالىسىندا «اقاۋسىز تۇيە باعىپ، ءسۇت بەرەتىن ءىرى وتباسى» سيلىعىنىڭ اعا جۇلدەگەرى ويقورا قىستاعىنىڭ تۇرعىنى ومىربەك مىسىرقان ۇلى بولدى. 2015-جىلى جەرگىلىكتى ۇكىمەتتىڭ ۇگىت-تاربيەسىندە ول تۇيە باعۋدى باستاعان، قازىر ونىڭ 100 دەن استام تۇيەسى بار، جىلدىق كىرىسى 800 مىڭ يۋاننان استى. «تۇيە ءسۇتىن ساتۋدان باسقا، ءار جىلعى ماداقتاۋ-سيلاۋ جينالىسىندا ىلعي سيلانامىن، بىلتىر 80 مىڭ يۋانمەن سيلانعام، ال بيىل سيلىققا 90 مىڭ يۋان اقشا جانە ءبىر جەڭىل اۆتوكولىك الدىم»- دەدى ومىربەك مىسىرقان ۇلى. 

 

«وسى بىرنەشە جىلدان بەرى، كاسىپورنىمىز كەدەي وتباسىلارىنا كەپىل بولۋمەن، اۋىل-قىستاق سەنىمدى امانات-قارىز كووپەراتيۆى وسىمدە تيىمدىلىك جاساۋ ارقىلى ءاربىر وتباسىنا كەم دەگەندە 100 مىڭ يۋاننان تۇيە باعۋ قارىزىن تاراتتى. تۇيە ءسۇت بەرگەننەن كەيىن، كاسىپورىن تاپسىرىس بويىنشا بازار باعاسىنان تومەن بولماعان قورعاۋ باعاسى بويىنشا تولىمدى ءسۇتتى تۇگەل ساتىپ الادى، كەدەي وتباسىلارى تۇيە سۇتىنەن تۇسكەن اقشامەن قارىزىن قايتارادى. سونىمەن بىرگە باقتاشى ءىرى وتباسىلارىنىڭ باقتاشىلىق بازاسى مەن باقتاشىلىق كووپەراتيۆىن قۇرۋىنا قولداۋ كورسەتتىك. بۇل ۇلگى 2016-جىلى اتقارىلعاننان بەرى، 642 كەدەي وتباسىنا 80 ميلليون يۋاننان استام كەپىل قارىز اقشا تاراتىلدى، ولاردان قازىرگە دەيىن قارىز قايتارا الماۋ قۇبىلىسى تۋىلمادى»- دەدى شينجياڭ ۋاڭيۋان بيوعىلىم-تەحنيكا توبىنىڭ باس جوراسى، جۇڭگو مال شارۋاشىلىق قوعامى تۇيە بولىمشە قوعامىنىڭ باستىعى چىن گاڭلياڭ.

 

 2018-جىلدان قازىرگە دەيىن بۋرىلتوعاي اۋدانى 4 باقتاشىلىق كووپەراتيۆى ارقىلى جەرگىلىكتى ورىنداعى مالشىدان 108 ادامدى جۇمىسقا قابىلدادى جانە ورنالاستىردى، ادام باسىنا ورتا ەسەپپەن جىلىنا 50 مىڭ يۋاننان استام كىرىس كىرگىزىپ، 1315 ارتىق ەڭبەككۇشتى باسقا سالاعا ويىستىردى. 

 

 «1-ايدىڭ 7-كۇنى، بەيجيڭ حالىق سارايىندا ‹جۇڭگو تۇيە كاسىبى بويىنشا كەدەيلەردى سۇيەمەلدەۋ جەتىستىكتەرى كورمەسى جانە سيلىق تاراتۋ ءماجىلىسى› وتكىزىلەدى، سول كەزدە بۋرىلتوعاي اۋدانىنداعى 36 تۇيەشى ۋاكىل رەتىندە ماجىلىسكە قاتىناسادى»- دەدى چىن گاڭلياڭ.

 

2020-جىل ـــ جاپپاي دوڭگەلەك داۋلەتتى قوعام قۇرىپ شىعۋداعى سىرگە جيار جىل. چىن گاڭلياڭ بىلاي دەدى: «‹مەملەكەتتىك اۋىل شارۋاشىلىعىن كاسىپ سالالاندىرۋداعى كوشباسشى كاسىپورىننىڭ› جەتەكشىلىك رولىن تولىق ساۋلەلەندىرىپ، جەرگىلىكتى ورىننىڭ كەدەيلىكتەن ارىلۋدان قامال الۋ قىزمەتىنىڭ سەرپىنىن ۇزدىكسىز ارتتىرىپ، 3 جىلدا 80 ميلليون يۋان قارجى قوسىپ، 800 ەگىنشى-مالشىنىڭ اۋقاتتانۋىنا كومەكتەسۋدى، سونداي-اق تۇيە سۇتىنەن بەزەنۋ بۇيىمدارى، ءتۇبىت توقىما بۇيىمدارى، بيولوگيالىق ينسۋلين سياقتى ونىمدەردى اشۋ ارقىلى اناعۇرلىم كوپ ەگىنشى-مالشىنى كاسىپ تىزبەگىنە سۇيەنىپ اۋقاتتانۋعا باستاۋدى جوسپارلادىق». 

 

تۇيە ــــ ەستى جانۋار، دەنە تۇرقى ءىرى، كۇشى مىعىم، جۋاس، جەتەكتەۋگە، جۇك ارتۋعا كونىمدى كەلەدى. ول ءشول دالادا جانە ساحارادا تىرشىلىك ەتەتىن ادامداردىڭ تابيعاتپەن كۇرەسۋدەگى قاتىناس قۇرالى ءارى ەڭبەككۇشى بولىپ، مالشىلاردى نەگىزگى تۇرمىس ماتەريالىمەن قامداپ قالماستان، ەكونوميكالىق كىرىس كوزى ەسەپتەلەدى. تۇيەنىڭ تۇلا بويى تۇنعان اسىل. ونىڭ ءجۇن، ەت، ءسۇت، تەرى جانە سۇيەك سياقتى مال ونىمدەرىمەن قامداۋ سياقتى كوپ ءتۇرلى پايداسى بار.

 

تۇيە ءسۇتىنىڭ قورەكتىك قۇنى اسا جوعارى بولىپ، شولەيت وڭىرلەردەگى مالشىلاردىڭ ءداستۇرلى تاعامدارىنىڭ ءبىرى ەسەپتەلەدى. تۇيە ءسۇتىنىڭ ماي، بەلوك، قۇرعاق زات قۇرامى سيىر سۇتىنە قارايلاس نەمەسە ودان جوعارى. الايدا، ءسۇت قانتى ازىراق بولادى. تۇيە ءسۇتىن ءسۇتتى شايعا پايدالانۋعا، سارى ماي الۋعا، ىرىمشىك جانە شۇبات اشىتۋعا بولادى. تۇيە ءسۇتى وڭاي قورىتىلادى ءارى جاقسى سىمىرىلەتىندىكتەن سابيلەر ءۇشىن اسا تاماشا ازىق سانالادى. تۇيە ءسۇتىنىڭ قۇرامىندا ادام دەنەسىنە قاجەتتى 18 ءتۇرلى امين قىشقىلى بار. مۇنان سىرت، ۆيتامين، قانىقپاعان ماي قىشقىلىنىڭ قۇرامى دا مول. تۇيە ءسۇتىنىڭ قورەكتىك قۇنى سيىر ءسۇتىنىڭ 200 ەسەسىنە بارابار. ونداعى ينسۋلين (ۇيقى بەزىنەن تۇزىلەتىن گورمون) قانتتى نەسەپ اۋىرۋىن ەمدەۋگە كومەكتەسەدى ءارى جوعارى قان قىسىم، باۋىر، بۇيرەك راگى سياقتى اۋىرۋلاردى باسەيتەدى. تۇيە قانىندا البۋمين (بەلوكتىك زات) مول بولىپ، ادام دەنەسىنىڭ اۋىر مەتالداردى سىمىرۋىنەن بولاتىن ۋلانۋدىڭ الدىن الادى ءارى گورمون جانە دارىلىك رول اتقارادى. 

 

ۇعىسۋعا قاراعاندا، قازىرگە دەيىن بۋرىلتوعاي اۋدانىنداعى تۇيە باعاتىن وتباسى 2200 گە جەتىپ، تۇيە سانى 20 مىڭنان اسقان.

 

سۋرەتتە: سول كۇنگى سيلاۋ قيمىلىنان بىرنەشە كورىنىس.

سۋرەتتى تۇسىرگەن:دۋ پىڭفي

 

中央广播电视总台 央广网 版权所有

تۇيەنىڭ تابىنى ارتتى، مالشىنىڭ باعىن اشتى

تۇيەنىڭ تابىنى ارتتى، مالشىنىڭ باعىن اشتى