ينفورماتسيا اشكەرەلەۋ: mzjubao@cnr.cn

وزەكتى ماقالالار

وتكەن ءومىرىڭدى ويلاي بەرگەنشە، قالعان ءومىرىڭدى قادىرلەي ءبىل

来源:央广网     |责编:阿依娜|     发布日期: 2020-01-14 15:33

 

 

اۋدارعان: اناربەك ٴابىلماجىن ۇلى

ديكتور: ٴرادىل جاۋدات ۇلى 

 

وتكەن كۇندە بەلگى جوق دەيدى حالىق، ۋاقىت دەگەن ايالسىز كەرۋەن جۇرىسىنەن ءبىر تانبايدى، سول كەرۋەنمەن بىرگە، كۇن ارتىنان كۇن ءوتىپ، اي ارتىنان اي اۋناپ، جىل ارتىنان جىل جاڭالانىپ، كەلتە ءومىر دە مۇجىلىپ، كەمىپ، تاۋسىلىپ جاتادى. ايالسىز ۋاقىت-اققان سۋ، قايتىپ قايىرىلمايدى. 

وتكەن كۇندى ەسكە الساڭ، ول-ساعىنىش، ال كەلەر كۇندى ويلاساڭ، ول-بەلگىسىز. ادام كەيدە اقىل تاپپاي داعدارىپ، قايدا بارارىن، نە ىستەرىن بىلمەي، سۋعا كەتكەن سالىندىداي كۇي كەشەتىن كەزى بولادى. وندايدا ويى ونعا ءبولىنىپ، باعىدارىنان جازىپ، بوز تۇماننىڭ ىشىندە جۇرگەندەي سەزىنەدى. 

ونداي كەزدە، فىڭ زىكايدىڭ «الاڭسىز ءومىر» دەگەن شىعارماسىندا جازعانداي «سانامەن سارعايعانشا، بەلىڭدى بەكەم بۋا ءبىل، وتكەندى ويلاپ وتىرعانشا، ەرتەڭنىڭ قامىن جە».

ىستەگەن ءىسىم وڭىنا باسسىن دەسەڭ، ومىردەگى مىنا ءۇش اقيقاتتى ەستەن شىعارما.

 

ءبىرىنشى اقيقات: وتكەن ءىستى ويلاي بەرمە.

جيىرماعا كەلگەندە، جالاڭ اياق جۇگىرگەن، ءاي بالالىق-اي دەگىزگەن، اساۋ تايداي الىسقان، شىبىق ءمىنىپ جارىسقان، قامسىز، رياسىز، بالعىن بالالىعىمىزدى اڭسايمىز.

وتىزعا كەلگەندە، ەشتەمەدەن قايتپايتىن، ءورت مىنەز، ءور كوڭىل، جالىنداعان جيىرمانى اڭسايمىز.

قىرىق جاسقا كەلگەندە، جاستىقتىڭ جالىنى قايتا قويماعان، وڭ–مەن سولىن ويلاعان، كەمەلىنە كەلىپ، ءومىردىڭ اۋىر جۇگىن كوتەرگەن، وتىز جاسىمىزدى ەسكە الامىز. 

انە ءسويتىپ، بۇگىن ءۇشىن كەشەگىمىز ارمان، ويلايمىز، ساعىنامىز، سارعايامىز. 

وتكەنىن ويلامايتىن ادام ءسىرا دا جوق شىعار. ءبىراق وتكەن قايتىپ ورالمايدى، ءومىر ەكى كەلمەيدى، بۇگىن ءۇشىن كەشەڭ وتكەن كۇن. وتكەندى ارا-تۇرا ەسكە الۋ، ساعىنۋ ورىندى-اق، ايتكەنمەن وتكەندى عانا ويلاپ، وتكەن كۇننىڭ قۋانىشىن اڭساۋمەن، وكىنىشىنە وپىق جەۋمەن عانا بولىپ، العا قاراي اتتاعىڭ كەلمەسە، بولماسا وتكەنگە قايىرىلامىن دەسەڭ، بولاشاققا قالاي جەتەسىڭ، ەندىگى ارمانىڭ قالاي ورىندالادى؟ 

وتكەن كۇنىڭ بۇگىنگى كۇنىڭنىڭ بەلگىسى بولسىن دەگەن ءسوز وتە دۇرىس ايتىلعان.

وتكەن ۋاقىت قايتىپ بەتىن بۇرمايدى، ءومىر قايتالانبايدى. وتكەن كۇندەر سىزگە قۋانىش، الدە، مۇڭ سيلاسىن، ول باسىڭىزدا ماڭگى تۇرا بەرمەيدى، ەندى بۇگىنگى كۇنىڭنىڭ قادىرىنە جەتىپ، ەرتەڭىڭنىڭ قامىن جە، وتكەن كۇننىڭ كولەڭكەسىنەن شىعا الماساڭ، ەرتەڭگە اپارار جولىڭدى قالاي تابا الاسىڭ؟

ەكىنشى اقيقات: ەرتەڭىڭ ءۇشىن ارتىق الاڭ بولما

بولاشاققا بولجام جاساپ، ەرتەڭگە كەسىم ايتۋ كىمنىڭ قولىنان كەلەر دەيسىڭ، سوسىن دا، ەرتەڭىنە ءار كىمدەر الاڭدايتىنى شىندىق، ءبىراق، نەگە ەرتەڭگە ۇمىتپەن قاراپ، اتار تاڭدى سەنىممەن قارسى المايمىز؟ ارتىق الاڭداۋشىلىق اياعىمىزعا تۇساۋ بولىپ، ومىرىمىزگە قيىندىق اكەلىپ جۇرگەن جوق پا؟ 

مىناداي ءبىر اڭگىمەنى ايتا كەتەيىن. ءبىر رەتكى باۋ-باقشا ساباعىندا، ءبىر قىز وقۋشى گۇلدىڭ ۇرىعىن كوپكە دەيىن ەكپەي تۇرىپ قالادى. مۇعالىمى نەگە بۇيتەتىنىن سۇراعاندا، ول ‹‹گۇلدىڭ سولىپ قالۋىنان الاڭدايمىن›› دەپ جاۋاپ بەرەدى. 

سوندا مۇعالىم تۇرىپ ‹‹سەن گۇل ەككەندە گۇلدىڭ سولىپ قالۋىنان قورىققاندىعىڭ دۇرىس بولعانىمەن، ءبىراق بۇل ءىستىڭ سوڭعى ناتيجەسى قالاي بولار ەكەن دەپ، بارلىق ٴىستى توقتاتىپ تاستاعاندىق قوي›› دەيدى. 

ءبىز كۇندەلىكتى تۇرمىسىمىزدا ءبىر ءىستى باستاماي تۇرىپ، ءىستىڭ سوڭعى ناتيجەسى قالاي بولار ەكەن دەپ ەكى ويلى بولامىز، قول سالۋعا باتىلدىق ەتە المايمىز. سول سەبەپتەن كوپتەگەن ىستەر ىستەلمەي قالىپ جاتادى، ءىستىڭ سوڭعى ناتيجەسى مەيلى جاقسى بولسىن، مەيلى جامان بولسىن بارلىعى دا ءبىزدىڭ ويلاعانىمىزداي بولا بەرمەيدى، كەيدە تاۋەكەلگە كەلۋ كەرەك، ساتسىزدىككە ۇشراساڭ دا قۇندى تاجىريبە ساباق بولادى. 

وزگەرىس پەن كوز جەتكىزە الماۋشىلىق، ءبىزدىڭ ءومىر سۇرىپ جاتقاندىعىمىزدىڭ ەڭ ايقىن بەلگىسى، باستان وتكەن كەشىرمە مەيلى جاقسى بولسىن، مەيلى جامان بولسىن، بارلىعى دا ءومىردىڭ ءبىر بولشەگى، ءار قايسىسىنىڭ وزىندىك ءمانى بار. 

ءجۇرىپ وتكەن جولىمىز، تارتقان جاپامىز، كورگەن راقاتىمىز، اۋىر مۇڭىمىز، جۇرەك جاردى قۋانىشىمىز، ءبارى جيىلىپ كەلىپ ءومىرىمىزدى قۇرايدى. 

وتە تاماشا ايتىلعان مىناداي ءبىر اۋىز ءسوز بار: ءبىر ءىستى باستاۋدىڭ ەڭ ورايلى ءساتى قانشا ەرتە بولسا سونشا جاقسى، ەڭ كەمىندە قازىر بولسىن. 

ءومىر جولى بۇرالاڭ، ەشكىمنىڭ دە ەرتەڭ نە بولارىنا كوزى جەتپەيدى، ءومىر سەنىڭ ەركىڭە كونبەيدى، ءبىراق، بالاپان قۇرت قابىرشاقتى جارىپ شىقپاسا كوبەلەككە اينالا الماعانى سياقتى، سارى ۋايىمعا سالىنعانشا، ىسكە جۇرەكتىلىكپەن كىرىسكەن ابىزال. كەلەر كۇنگە كۇلە قاراساڭ، ومىردەن الار نەسىبەڭ بار.

ءۇشىنشى اقيقات: قالعان ءومىرىڭدى قاستەرلە 

ءومىر جولى-سوڭى شىڭىراۋ ساپار، ءومىر جولى تىم قىسقا، ونى قاستەرلەپ، قادىرىنە جەتۋ-ءومىر سۇرۋدىڭ شىنايى ءمانى. 

تىعىرىققا تىرەلسەڭ، جۇرىپ كەلە جاتقان جولىڭا قايتادان باجايلاپ قارا، كوڭىل-كۇيىڭدى ورنىقتىرىپ، وزىڭە ىلايىق كەلەتىن تۇرمىس پەن تالعامدى قايتادان تاڭداپ ال، ءومىر وزىڭدىكى بولعان سوڭ، ءوز جۇرەگىڭە سەن. 

ءومىر ساپارىندا جازا باسقان قادامىڭ ءۇشىن، بولماسا قول جەتپەگەن ارمانىڭ ءۇشىن، ءومىردى قايتادان باستاۋعا كەلمەيدى، قولدا باردا التىننىڭ قادىرىنە جەتىپ، ءوزىڭدى، قالعان ءومىرىڭدى قاستەرلە. 

وتكەن كۇنىڭ قانشا كوركەم بولسا دا، ول ەندى كەلمەسكە كەتتى، ەرتەڭىڭ قانشا قيىن بولسا دا، ءومىردى جالعاستىرماي بولمايدى.

قانشا ۋاقىتىڭ كەتتى، قانشا ءومىرىڭ ءوتتى، ءبارى دە ايقىن، ال، ەندى قانشا ۋاقىتىڭ بار، قانشا ءومىرىڭ قالدى؟ بارلىعى بەيمالىم. ەندەشە، وتكەندى ويلاي بەرمە، ەرتەڭىڭدى ويلا، قالعان ءومىرىڭدى قادىرلە. 

 

中央广播电视总台 央广网 版权所有

وتكەن ءومىرىڭدى ويلاي بەرگەنشە، قالعان ءومىرىڭدى قادىرلەي ءبىل

وتكەن كۇندە بەلگى جوق دەيدى حالىق، ۋاقىت دەگەن ايالسىز كەرۋەن جۇرىسىنەن ءبىر تانبايدى، سول كەرۋەنمەن بىرگە، كۇن ارتىنان كۇن ءوتىپ، اي ارتىنان اي اۋناپ، جىل ارتىنان جىل جاڭالانىپ، كەلتە ءومىر دە مۇجىلىپ، كەمىپ، تاۋسىلىپ جاتادى. ايالسىز ۋاقىت-اققان سۋ، قايتىپ قايىرىلمايدى.