ينفورماتسيا اشكەرەلەۋ: mzjubao@cnr.cn

وزەكتى ماقالالار

ىزدەگەندە تابىلاتىن قاسىڭنان

来源:جۇڭگو قازاق راديو تورابى     |责编:古丽美热·霍孜汗|     发布日期: 2020-05-22 22:19

ىزدەگەندە تابىلاتىن قاسىڭنان

 

 

 

 

 

اۋدارعان: قاۋسىلقان  قاسىمقان ۇلى

 

 

ديكتور: ٴرادىل جاۋدات ۇلى

您的浏览器不支持 audio标签

1

سەندە  مىناداي تۇيسىك بولعان با ەدى: «ٷنحاتىڭ مەن تەلەفون داپتەرى تىزىمدىگىڭدەگى ادامداردىڭ سانى مول، جەكەلىك پاراقشاڭا بىردەمە جولداساڭ، تالاي ادام بارماق باسىپ، لەبىز قالتىرادى. ولاردىڭ باسىن قىلتيتىپ، بارماق باسقانىنا ٴتانتىسىڭ. بىراق، ٴوزىڭ شۇعىل ٴبىر كومەككە ٴزارۋ بولعان شاعىڭدا، جاڭاعى قاپتاعان قالىڭ ادامنىڭ اراسىنان ٴارى-ٴسارى بولماي-اق حابارلاساتىن ادام تاپپاي دال بولاسىڭ.»

 

«اقىماقتىڭ اعايىنى كوپ» دەمەكشى، تانىس ادامىمىز كوپ بولعانىمەن، دەسە دە، قاجەتىڭ تۇسكەندە ارقا سۇيەنىش بولاتىن ادام از. ەندەشە، قالاعان ۋاقىتتا مازالاي الاتىن، ىزدەگەندە  قاسىڭنان تابىلاتىن ادامىڭ كىم بولعانى؟ 

جۋىردا ٴبىر فيلم كوردىم، مۇنداعى كەيبىر كورىنىس پەن وقيعالاردى ٴوز جاعدايىما ۇقساتتىم. سۇلۋ بويجەتكەن ناۋقاستانىپ قالىپ شيپاحاناعا بارىپ اسپا ۋكل سالدىرادى. سالدەن سوڭ ٴبىر قولىمەن ۋكل قۇمىراسىن كوتەرىپ، تازالىق ۇيىنە بارعاندا سىمىن تۇسىرە الماي، دارەت قىسىپ، قينالىپ تۇرعاندا، تازالىق ۇيگە كىرگەن ٴبىر ايەل كومەكتەسەدى. 

 

اقشا شۇعىل قاجەت بولعاندا، ٷمىت كۇتكەن تانىس-بىلىستەرىڭدى قاتارعا ٴتىزىپ، تەلەفون شالعانىڭدا، ٴاربىرى قاي-قايداعى سىلتاۋ ايتىپ، تۇمسىعىڭنىڭ تاسقا تيگەن جەرى، «بەيناۋا دوس، وپاسىز اعايىن دەگەن وسى ەكەن» دەپ اداۋ تارتقان رەنىشىڭدى ىشىڭە بۇگىپ، سىلدىر سىپايىلىق، اداسقاق كۇي، جىلارمان بەينەدە ٴتىسىڭدى كورسەتىپ، ٴتىلىڭدى جاسىرىپ، جاساندى كۇلىپ جۇرگەن كەزدەرىڭ بولعان شىعار. «كىسىدەگىنىڭ كىلتى اسپاندا»، «اعايىننىڭ ازارى بولسا دا، بەزەرى جوق» دەگەن وسى. جوپەلدەمەدە ٴبىر جۇمىسقا بولا جاقىننان جاردەم بەرەتىن ادام ىزدەپ، قول تەلەفونىڭداعى ەسىم تىزىمدىگىن اقتارعان شاعىڭدا، ادەپكىدە كىمگە قوڭىراۋ شالارىڭدى بىلمەي اڭگىرىپ، ٴارى-ٴسارى كۇي كەشكەن كەزىڭ دە بولعان شىعار؟

 

امالياتتا، كەيبىرەۋلەر ٴوز قوتىرىن ٴوزى قاسىپ، ٴتىسىن-تىسىنە باسىپ، قارا تۇياعىنان حال كەتكەنشە اۋىرتپالىعىن ٷنسىز كوتەرىپ، باسقالاردى اۋرە-سارساڭعا سالۋدان قاعىس قالىپ جاتادى، بۇل استە، ونىڭ دوس-جارانسىز ەكەندىگىنەن، ٴوزىن قيسىنسىز قيناپ جۇرگەندىگىنەن ەمەس، باسقالاردىڭ كۇي-جايىمەن ەسەپتەسىپ، ٴار كىمنىڭ باسىندا ٴار وي بار ەكەنىن بىلگەندىگىنەن، سانالىلىعىنان.

 

قيت ەتسە بولدى باسقالاردى اۋرەلەمەي، جاي-جاپسارىن ايتقىزباي ٴبىلۋ-ەسەيۋدەگى مىندەتتى ساباق.

2

بىرەۋلەر: «قازىرگى ادامدار ارا قارىم-قاتىناس وتە كۇيرەۋىك كۇيگە وتكەن، ەلدىڭ كوبىنىڭ جۇيكەسى جۇقارعان، شىبىق تيمەس شڭق ەتەر. كەي شاقتا، ٴسوزىڭنىڭ ارتىن توسپاي بالدەنىپ، <سەنى جەلكەمنىڭ شۇڭقىرى كورسىن> دەپ كوك ەسەككە تەرىس ٴمىنىپ كەتە باراتىندار كوپ» دەگەندى ايتادى. راس-اۋ، اۋىز جالاسىپ جۇرگەن اعايىندار كەيدە ٴتۇرلى سەبەپتەرمەن ٷن-ٴتۇنسىز عانا ٴبىر-بىرلەرىنەن جىراقتاپ، ىستىق ىقىلاس، اراداعى سيلاستىق ٴبار-ٴبارى قۇرىدىمعا كەتىپ جاتادى. «اي كورمەسەڭ اعايىن جات» دەمەكشى، قانشا جاقىن بولساڭ دا، حات-حابار الىسۋىڭ، تىلدەسىپ تۇرۋىڭ سيرەگەن سايىن، سۇيىسپەنشىلىك شالاڭداپ، كۇندەردىڭ كۇنى، وتىرىك ىرجياتىن ٴتۇس تانىس عانا جاندارعا اينالاسىڭ.

 

ول قالايشا الىستاپ كەتتى قاسىڭنان؟ ىستىق پەيىلىڭە نەگە سۋىق سۋ شاشىلدى؟ بۇل قارىم-قاتىناستىڭ مەزگىلسىز اقىرلاسۋىنا مۇمكىن سەن دە، ول دا كىنالى ەمەس شىعار، كەيبىر قارىم-قاتىناستىڭ سوڭعى ناتيجەسىنىڭ وسىلاي بولارى ٴاۋ باستا-اق ماڭدايىڭا جازىلعان. 

 

ەلىمىزدە مىناداي ٴتامسىل بار:

«مۇددە ٷشىن ارالاسقان، ماقساتىنا جەتسە كەتەدى،

 پايدالانعىسى كەلگەندەر سەنى، كوپىر ەتىپ وتەدى. 

ٴمانساپ ٷشىن دوستاسقاندار، ۇقىقتان قالساڭ جىراقتار،

 شىن نيەتپەن قۇرىلعان دوستىق، قورعاسىنداي تۇراقتار.»

قارىم-قاتىناستى قالاي ورناتساڭ، سولاي اقىرلاسادى. مۇددە ٷشىن قۇرىلعان بولسا، ماقساتقا جەتكەن نەمەسە جەتۋدەن ٷمىت ۇزىلگەن كۇنى كەرەكسىز دۇنيەگە وزگەرەدى. ەگەر، شىن جۇرەك، تەرەڭ سۇيىسپەنشىلىكتى ارقاۋ ەتكەن بولسا، قاستەرلى دۇنيەگە اينالادى. 

 

اراسىنان جەل وتپەيتىن، ناعىز تاماشا قاتىناستاردىڭ مۇددەدەن اۋلاق، جالعاندىقتان جىراق، كولگىرسۋدەن شالعاي، «سەپتىگى جوق» ارالاستىق ەكەنىن بايقايسىڭ. 

 

«سەپتىگى جوق» قاتىناس- شىنايى ٴارى تۇراقتى قاتىناس. جاعىمسۋ، كولگىرسۋدەن اۋلاق تابيعي ارالاستىق ادامدى شارشاتپايدى، سىرت كوزگە دە وعاش كورىنبەيدى، عۇمىرى دا كەلتە بولمايدى.

3

ماڭايىڭا قاراساڭ، تۇگەمەس كۇيبەڭ، تىنىمسىز تىرلىك، تيتىقتاپ جۇرگەن جاندار.

 

عالامتوردان قوعامدىق قارىم-قاتىناس جونىندەگى مىنا ٴبىر تۇسىنىكتەمەنى وقىعان ەدىم. بىلاي دەپتى: «قول ۇزسەڭ بولدى اقىرلاساتىن-قىزمەتتەگى قاتىناس؛ الىستاساڭ دا ۇزىلمەيتىن-تۋىستىق قاتىناس؛ جۇمىس بولعاندا عانا ەسكە تۇسەتىن-مۇددەلىك قاتىناس؛ جۇمىس بولماسا دا باس قوساتىن-قاتىناس؛ بوداۋىڭا قارىمجى تالاپ ەتپەيتىن-اكە-شەشە مەن ۇرپاق اراسىنداعى قاتىناس؛ قاتىقسىز قارا تاماقپەن جالعاسا بەرەتىن-ەرلى-زايىپتىلىق قاتىناس؛ ٷنحاتتا ۇنەمى كەڭەسەتىن-قويۋ قاتىناس.»

بايقادىڭ با؟ وسى ايتىلعان جەتى ٴتۇرلى قاتىناستىڭ ىشىندەگى كوڭىلدەن سەبەپسىز وشپەي، ۋاقىتتىڭ سىنىنان وتە الاتىنى «سەپتىگى جوق» قاتىناس. 

 

ارالاسۋعا جاراپ، دوستاسۋعا تاتيتىن ادام تەك سەنىڭ ەرەكشەلىگىڭدى عانا ەسكەرىپ، ارتىقشىلىعىڭا اسىلاتىن ادام ەمەس، قايتا سەنى جان-تانىمەن تۇسىنەتىن، قاسىڭنان تابىلۋدى قالايتىن ادام. 

 

بۇلتاعى كوپ بۋالدىر تىرلىكتە اتا-انا، تۋىس-تۋعانداردان سىرت، مىناداي ادامداردى ەسكە ساقتاپ، قاستەرلەۋگە ٴتيىستىمىز: ەشقانداي قارىمجى تالاپ ەتپەي، ساعان شىن نيەتىمەن كومەك قولىن سوزعان ادامدى؛ نوسەرلى جاڭبىردا قالعاندا جۇگىرىپ جانىڭا جەتىپ، باسىڭا جاڭبىرلىق ۇستاعان ادامدى؛ تۇرمىستىڭ نالا-مۇڭىنان سەنى اۋاشالاۋعا قام جاساپ، جانىڭا سايا بولعان ادامدى؛ ٴوزىڭدى جان-تانىمەن سۇيگەن ادامدى؛ جانىڭ جابىرقاعان كەزدە قاسىڭدا بولىپ، مۇڭىڭا ورتاق بولعان ادامدى؛ قاباعىڭنان قار جاۋىپ وتىرعان شاقتا، اشۋ-ىزاڭدى قۋالاپ، سەنى ەرىكسىز كۇلدىرۋگە قۇلشىنعان ادامدى؛ سەن ٷشىن ساعىنىشتان سارعايىپ جۇرگەن ادامدى؛ ٴومىرىن وزىڭمەن بولىسكىسى كەلگەن جاناشىردى؛ شىنايى سيلاپ، كوڭىل تورىنەن ورىن بەرگەن ادامدى......

 

بالكىم، وسىنداي ادامدار تىرلىگىڭە ساۋلە ٴتۇسىرىپ، ارمانىڭدى الىسقا جالعاپ، ارىندى قاداممەن العا ىلگەرلەۋىڭە سەبەپ بولار. 

 

ٴوزىڭدى باسقانىڭ كوڭىلىن شاتتاندىرىپ، باسىنا پانا، جانىنا سايا بولىپ، تۇرمىسىنا ٴسان، ومىرىنە ٴمان بەرەر تاماشا ٴبىر ساۋعا ەتۋگە قۇلشىن. ٴارى، ٴوز تىرلىگىڭدە جولىققان قۇندى ساۋعا ىسپەتتى ٴاربىر سۇيىكتى جانداردى قاستەرلەي ٴبىل.

 

قاستەرلەۋ كەتكەن جەردەن قۇرمەت، قۇرمەت كەتكەن جەردەن ۇيات تا كەتەدى.

 

 

 

来源:中央广播电视总台

 

 

翻译:哈吾斯力汗

编辑:古丽美热

 ى

中央广播电视总台 央广网 版权所有

ىزدەگەندە تابىلاتىن قاسىڭنان

قاستەرلەۋ كەتكەن جەردەن قۇرمەت، قۇرمەت كەتكەن جەردەن ۇيات تا كەتەدى