ينفورماتسيا اشكەرەلەۋ: mzjubao@cnr.cn

وزەكتى ماقالالار

ءىرىپ-شىرىگەن قوعام حاۋىپسىزدىگى مەكەمەسى باستىعىنىڭ سۇرقيالىعى

来源:央广网     |责编:达吾力别克|     发布日期: 2020-06-29 20:21

قوعام حاۋىپسىزدىگى مەكەمەسىنىڭ باسشىسى قارا قوعام اتامانىنا اينالعان، مەملەكەتتىك قارا كۇشتەردى الاستاۋ كەڭسەسى باقىلاپ اتقارىلاتىن دەلولار جونىندە جالپى حابارلاندىرۋ جاريالادى

«كەزەكتە مەملەكەتتىك قارا كۇشتەردى الاستاۋ كەڭسەسى بەلگى سالىپ قۋزاعان 111 دەلودان، 23 دەلو اياقتاعان، 25 دەلو ءالى دە بارلاۋ ۇستىندە، ايىپتاۋ تۇرعىسىنان تەكسەرىلۋ ۇستىندەگى دەلو 22، تەرگەۋ ساتىسىندا تۇرعان دەلو 41؛ نىسانا ەتىلگەن 46 قاشقىننان 18 ادام قولعا الىندى؛ ۇستالعان قىلمىس كۇدىكتىسى 8671 ادام، پەشەتتەلگەن، ۇستاپ قالىنعان، مۇزداتىلعان دەلوعا ساياتىن قاراجات 108 ميلليارد 800 ميلليون يۋاننان اسادى، قارا، سۇرقيا كۇشتەرگە ساياتىن شىرىكتەسكەن جانە قىلمىستىلاردى قانات استىنا العان 3341 ادامعا دەلو تۇرعىزىلىپ، ءبىرجاقتى ەتىلدى.» 6-ايدىڭ 28-كۇنى تۇستەن بۇرىن، مەملەكەتتىك قارا كۇشتەردى الاستاۋ كەڭسەسى اقپارات جاريالاۋ ماجىلىسىندە، ورتالىق ساياسي-زاڭ كوميتەتىنىڭ باس حاتشىسى، مەملەكەتتىك قارا كۇشتەردى الاستاۋ كەڭسەسىنىڭ مەڭگەرۋشىسى چىن يشيننىڭ تانىستىرۋىنشا، مەملەكەتتىك قارا كۇشتەردى الاستاۋ كەڭسەسى ءبىتىرىلۋ ۇستىندەگى بەلگى سالىنعان 88 دەلونى قاداعالاي باقىلاۋدى، جەر-جەردىڭ بەلگى سالىنىپ قۋزالاتىن دەلولاردى ولشەم ەتىپ، قارا، سۇرقيا كۇشتەرگە ساياتىن ءارقايسى دەلونى تۇگەل اۋدارىلعىسىز دەلو ەتىپ، ارناۋلى كۇرەستىڭ تابىسپەن اياقتاۋىنا كەپىلدىك ەتۋىن تالاپ ەتتى.

 

اقپارات جاريالاۋ ماجىلىسىندە، مەملەكەتتىك قارا كۇشتەردى الاستاۋ كەڭسەسى قازىرگە دەيىن ءبىتىرىلىپ بولعان، مەملەكەتتىك قارا كۇشتەردى الاستاۋ كەڭسەسى بەلگى سالىپ قۋزاعان 4 دەلونى جاريالادى. وسى تيپتەردەن «سۇرقيا كۇشتەردى الاستاپ، تۇبەگەيلى جويۋداي» باتىل پوزيتسيا مەن «جاسىرىن دەلولاردى دا ايپاراداي اشىپ، سىلەيتە سوققى بەرۋدەي» قورشاپ جويۋ اۋقىمى اڭعارىلادى.

 

سىچۋانداعى راۋ شىيۋان دەلوسى: ۇستاپ قالىنعان، مۇزداتىلعان قارجى 300 ميلليون يۋان، قىلمىستىلاردى قانات استىنا العان 22 ادام ءبىرجاقتىلى ەتىلدى

 

2020-جىلى 5-ايدىڭ 29-كۇنى، سىچۋان ولكەلىك جوعارى حالىق سوت مەكەمەسى سوڭعى تەرگەۋ ۇكىمىن جاريالاپ، راۋ شىيۋان، راۋ مىڭيۋان قاتارلى 2 ۇيىمداستىرۋشى مەن باسشىلىق ەتۋشىنى جەكە-جەكە 25 جىلدىق مەرزىمدى قاماۋ جازاسىنا ۇكىم ەتىپ، وعان قوسا جەكەلىك مال-مۇلكىن تۇگەل ءمۇسادىرالادى. قالعان 30 جاۋاپكەر 2 جىلدان 19 جىل 6 ايعا دەيىن ۇقسامايتىن مەرزىمدى قاماۋ جازاسىنا ۇكىم ەتىلدى.

 

سىچۋان ولكەلىك پارتكومنىڭ تۇراقتى مۇشەسى، ساياسي-زاڭ كوميتەتىنىڭ شۋجيى، ولكەلىك قارا-سۇرقيا كۇشتەردى الاستاۋ ارناۋلى كۇرەسىنە باسشىلىق ەتۋ گرۋپپاسىنىڭ باستىعى دىڭ يۇڭنىڭ تانىستىرۋىنشا، بۇل دەلو مەملەكەتتىك قارا كۇشتەردى الاستاۋ كەڭسەسى ەڭ العاشقى توپتا بەكىتكەن، بەلگى سالىپ قۋزالاتىن، قارا كۇشتەرگە ساياتىن ءىرى دەلو ەكەن. راۋ شىيۋان قاتارلىلار الدىڭعى عاسىردىڭ 90-جىلدارىنان باستاپ، يبين قالاسىندا قۇمارحانا اشىپ، ليۋ يۇڭ، جاڭ گۋاڭحۋا قاتارلى تىرەكتى مۇشەلەردى توپتاپ، بىرتىندەپ دامىپ 30 نەشە ادامنان قۇرالعان قارا قوعام ۇيىمىنا اينالادى. بۇل ۇيىم پارا بەرىپ سايلانۋ، داۋىس جيناۋ قاتارلى تاسىلدەر ارقىلى قىستاق كوميتەتىنىڭ باسقارۋىن مەڭگەرىپ ، قىستاق اشقان كاسىپورىنداردى زورلىقپەن يەمدەنۋمەن بىرگە، زاڭسىز تاسىلدەر ارقىلى سول جەردەگى سەمونت، كومىر كەن، تورسىلداق جاساۋ، قورا-جاي قاتارلى كاسىپتەرگە دەيىن كيلىگىپ، كوپ رەت جازا مەرزىمى تولىپ اباقتىدان قايتقانداردى ۇيىمداستىرىپ، قاساقانا زاقىمداۋ، الباتى سوقتىعۋ، قۇقاي كورسەتىپ تارتىپ الۋ، زورلىقتى ساۋدا قاتارلى ىستەرمەن شۇعىلدانادى. بۇل دەلودا قىلمىستىلاردى قانات استىنا العان 22 ادام تەكسەرىپ ءبىرجاقتىلى ەتىلدى، زىگۇڭ قالاسىنىڭ بۇرىنعى ورىنباسار قالا باستىعى زىڭ ميڭچۋان دەلوعا شاتىلعان، تۇتاس دەلودا دەلوعا ساياتىن 300 ميلليون 200 مىڭ يۋان قارجى زاڭ بويىنشا ۇستاپ قالىندى.

 

انحۇيداعى «ليۋ فاميليالى اعايىندىلار» دەلوسى: زاڭسىز كەن اشقان اقشاسى 2 ميلليارد يۋانعا جەتكەن، قىلمىستىلاردى قانات استىنا العان 60 ادام تەكسەرىپ ءبىرجاقتىلى ەتىلدى

 

انحۇي ولكەلىك ساياسي كەڭەس ءتوراعاسىنىڭ ورىنباسارى، ولكەلىك كوميتەت ساياسي-زاڭ كوميتەتىنىڭ شۋجيى، ولكەلىك قارا-سۇرقيا كۇشتەردى الاستاۋ ارناۋلى كۇرەسىنە باسشىلىق ەتۋ گرۋپپاسىنىڭ باستىعى ياۋ يۇيجوۋدىڭ تانىسىتىرۋىنشا، بۇل دەلو ورتالىق ءتارتىپ تەكسەرۋ كوميتەتى، مەملەكەتتىك قارا كۇشتەردى الاستاۋ كەڭسەسى، ەڭ جوعارى حالىق پروكۋراتۋراسى، قوعام حاۋىپسىزدىگى مينيسترلىگى بەلگى سالىپ قۋزاعان دەلو ەكەن. بىڭبۋ قالاسى گاۋشين رايونى تيانحى الەۋمەتتىك اۋماعى شينچىڭكوۋ قىستاعىنىڭ بۇرىنعى قىستاق پارتيا ياچەيكا شۋجيى ليۋ جاۋبىن قاتارلى اعايىندى تورتەۋى جەرگىلىكتى ورىندى 20 نەشە جىل شەڭگەلىندە ۇستاپ، نەگىزگى ساتى اكىمياتىن مەڭگەرىپ، زاڭدى تيجاراتتى جەلەۋ ەتىپ، شارۋاشىلىقتارى 63 سەرىكتەستىككە، جول جوندەۋ، قۇرىلىس سالۋ سياقتى سالالارعا دەيىن سايادى. كوپتەگەن كاسىپورىنعا جارنا قوسىپ، سەلبەستىك ورناتىپ، مال-مۇلكى ەل ىشىنە جانە شەكارا سىرتىنا دەيىن بايلانىسىپ جاتادى. تەك زاڭسىز كەن اشۋدان تاپقان اقشاسىنىڭ ءوزى 2 ميلليارد يۋانعا جەتەدى. قوعام حاۋىپسىزدىگى ورگانى وسى قىلمىستى توپ تۋدىرعان قىلمىستى ىستەر دەلوسىنان جيىنى 122 دەلو اشكەرەلەپ، 105 ادامدى تۇتقىنداپ، دەلوعا ساياتىن قارجىدان 1 ميلليارد 633 ميلليون يۋاندى ۇستاپ قالعان.

 

مۇنان تىس، بۇل ۇيىم سەرىكتەستىك اينالىمىندا، قارا كۇشتەردى ساۋدا ارقىلى سۇيەمەلدەپ، وزدەرىنە پانا بولاتىن تىرەك ىزدەۋ ءۇشىن، ليۋ فاميليالىلار ارناۋلى تۇردە «قوعام حاۋىپسىزدىگى قارجى قورىن» قۇرىپ، پارتيا، ۇكىمەت ورگاندارىنىڭ باسشىلارىن، ءبىرىنشى شەپتە زاڭ اتقاراتىن قىزمەتكەرلەردى  شىرعالاپ، شىرىكتەستىرگەن. بىڭبۋ قالالىق پارتكوم ساياسي-زاڭ كوميتەتىنىڭ بۇرىنعى شۋجيى، قالالىق قوعام حاۋىپسىزدىگى مەكەمەسىنىڭ بۇرىنعى باستىعى ۋ شيپيڭ وسىلاردىڭ ىشىندە.

 

2019-جىلى 12-ايدىڭ 16-كۇنى، بىڭبۋ قالالىق ورتا دارەجەلى حالىق سوت مەكەمەسى سوڭعى سوت ۇكىمىن جاريالاپ، ليۋ فاميليالى اعايىندىلار قارا قوعام سيپاتتى ۇيىم قۇرۋ، باسشىلىق ەتۋ قىلمىسىن، زاڭسىز كەن اشۋ قىلمىسىن، جارىلعىش زاتتاردى زاڭسىز ساقتاۋ قىلمىسىن، توپتاسىپ توبەلەسۋ قىلمىسىن، توپتاسىپ قوعام ءتارتىبىن بىلىقتىرۋ قىلمىسىن وتكىزدى دەپ قاراپ، جەكە-جەكە 20 جىلدان 25 جىلعا دەيىن مەرزىمدى قاماۋ جازاسىنا ۇكىم ەتىپ، جەكە مال-مۇلىكتەرىن تۇگەل ءمۇسادىرالادى. مۇنان سىرت، وسى دەلودا قارا، سۇرقيا كۇشتەرگە ساياتىن، قىلمىستىلاردى قانات استىنا العان، شىرىكتەسكەن 60 ادام زاڭ-ءتارتىپ بويىنشا تەكسەرىپ ءبىر جاقتى ەتىلدى.

 

جياڭشي ولكەسى يحۋاڭ اۋدانىنداعى چىن حۇيمين دەلوسى: قىلمىستىلار 120 دان استام ادامعا، دەلوعا ساياتىن مىلتىق سانى 24 داناعا جەتەدى

 

جياڭشي ولكەلىك پارتكومنىڭ تۇراقتى مۇشەسى، ساياسي-زاڭ كوميتەتىنىڭ شۋجيى، ولكەلىك قارا-سۇرقيا كۇشتەردى الاستاۋ ارناۋلى كۇرەسىنە باسشىلىق ەتۋ گرۋپپاسىنىڭ باستىعى ين جيانيەنىڭ تانىستىرۋىنشا، يحۋاڭ «7.12» چىن حۇيمين قارا قوعام سيپاتتى ۇيىمى دەلوسى ـ جاڭا جۇڭگو قۇرىلعاننان بەرى قاراي جياڭشي وللكەسىندە تۋىلعان ەڭ ءىرى قارا قوعام سيپاتىن العان ۇيىمدىق دەلو.

 

2000-جىلدان بەرى، چىن حۇيمين، چىن حۇيفالار كوپتەگەن جازا مەرزىمى تولىپ بوساتىلعانداردى فۋجوۋ قالاسى يحۋاڭ اۋدانىنا توپتاپ،  بۇقارانى باسىنىپ، ىستەمەگەن جاماندىقتارى قالماعان، سارى الاپات، قۇمار ويناۋ، ەسىرتكى تۇتىنۋ تيجاراتىمەن شۇعىلدانىپ، زاڭسىز ەكونوميكالىق پايداعا كەنەلىپ، ىقپالى توتەنشە ناشار بولادى. بۇل قارا كۇشتەرگە ساياتىن ۇيىمنىڭ «ۇشتە كوپ، بىردە ۇزاق» بولۋداي ەرەكشەلىگى بار ەكەن: ادام سانى كوپ، مۇشەلەر سانى 120 دان اسادى؛ مىلتىعى كوپ، دەلوعا ساياتىن مىلتىق سانى 24؛ قىلمىس ءتۇرى كوپ، 107 رەت زاڭسىز قىلمىس وتكىزىپ، 6 ادامنىڭ ولۋىنە سەبەپشى بولعان، 20 قىلمىس تۇرىنە سايادى؛ ۋاقىتى ۇزاق، يحۋاڭدا تابانى كۇرەكتەي 14 جىل داۋرەندەگەن. مۇنان تىس، بۇل قىلمىستى ۇيىم نەگىزگى ساتى ۇيىمىنىڭ بيلىگىن ۇزاق ۋاقىت ازدىرىپ، قورقىتۋ جانە شىرعالاۋ، زورلىقتى كۇش پەن پاراقورلىق ۇشتاستىرىلعان تاسىلدەرمەن اۋىل-قىستاق نەگىزگى ساتى «ەكى كوميتەتىنىڭ» سايلامىن شەڭگەلدەپ، ۇيىم مۇشەلەرىن نەمەسە ۋاكىلەتتىك ەتۋشىلەردى قىستاق «ەكى كوميتەتىنىڭ» جاۋاپتىلارى ەتىپ سىنالاپ وتىرعان.

 

تانىستىرۋعا قاراعاندا، چىن حۇيمين، چىن حۇيفالار قىلمىسپەن تاپقان اقشالارىنىڭ ءبىر ءبولىمىن شاعىن قارىز اقشا سەرىكتىگىن قۇرۋعا ىستەتىپتى، مۇنداعى ماقساتتارى ۇكىمەت قىزمەتكەرلەرىن شىرعالاپ شىرىكتەستىرۋ ەكەن. مەملەكەت قىزمەتكەرىنەن 10 ادام وسى قارا كۇشتەرگە ساياتىن ۇيىمدى قانات استىنا العاندىعى سەبەپتى جازا كەسىلگەن، 45 پارتيالى كادرگە پارتيا ءتارتىبى جازاسى، اكىمشىلىك جازا بەرىلگەن.

 

2020-جىلى 6-ايدىڭ 5-كۇنى، جياڭشي ولكەلىك جوعارى حالىق سوتى مەكەمەسى ەكىنشى سوتتا ۇكىم جاريالاپ، چىن حۇيمين قارا قوعام سيپاتىندىق ۇيىم قۇرۋ قىلمىسى، قاساقانا كىسى ءولتىرۋ قىلمىسى قاتارلى 20 ءتۇرلى قىلمىس وتكىزگەندىكتەن، ءولىم جازاسىنا ۇكىم ەتىپ، ساياسي ۇقىعىنان ومىرلىك ماحرۇم ەتىپ، بارلىق جەكەلىك مال-مۇلكىن ءمۇسادىرالادى. بۇل قارا كۇشتەرگە ساياتىن جەلىلەس دەلولارداعى باسقا 103 قىلمىستىعا تۇگەلدەي سايكەستى جازا كەسىلدى.

 

شينجياڭ ءوندىرىس-قۇرىلىس بيڭتۋانىنداعى باي بو دەلوسى: قوعام حاۋىپسىزدىگى مەكەمەسىنىڭ باستىعى قىلمىستىلاردىڭ پاناسى عانا ەمەس، قارا قوعام اتامانى ەكەن

 

شينجياڭ ءوندىرىس-قۇرىلىس بيڭتۋانى پارتكومىنىڭ تۇراقتى مۇشەسى، ورىنباسار ساياسي كوميسسارى، ساياس-زاڭ كوميتەتىنىڭ شۋجيى، بيڭتۋان قارا-سۇرقيا كۇشتەردى الاستاۋ ارناۋلى كۇرەسىنە باسشىلىق ەتۋ گرۋپپاسىنىڭ باستىعى جاڭ ۋىنچۋاننىڭ تانىستىرۋىنا قاراعاندا، باي بو قارا قوعام سيپاتتى ۇيىم دەلوسى بيڭتۋان تاريحىندا سيرەك كەزدەسەتىن، سيپاتى وتە ناشار، ىقپالى توتەنشە زور بولعان، قوعام حاۋىپسىزدىگى ورگانىنىڭ باسشى كادرى قارا كۇشتەرگە شاتىلىپ، قىلمىس وتكىزگەن دەلو.

 

ۇعىسۋعا قاراعاندا، باي بو ءارى شينجياڭ ءوندىرىس-قۇرىلىس بيڭتۋانى قوعام حاۋىپسىزدىگى مەكەمەسىنىڭ باسشىسى، ءارى اتى زاتىنا ساي «قارا قوعام اتامانى». ول قولىنداعى ۇقىعىن بەتالدى پايدالانىپ، تىرەكتى مۇشەلەردى ماڭىنا توپتاپ، بۇكىل قىلمىستىق توپتى مەڭگەرىپ، ۇيىم مۇشەلەرىنىڭ قىلمىس وتكىزۋىنە باسقالقا بولىپ، جەرگىلىكتى ورىننىڭ اماندىعىنا اۋىر زيان جەتكىزىپ، قوعام حاۋىپسىزدىگى ورگاندارىنىڭ زاڭ اتقارۋ الەۋمەتتىك سەنىمدىلىگىنە اۋىر زالال كەلتىردى. كوپ جىلداردان بەرى، باي بو مەملەكەت قىزمەتكەرىندىك سالاۋاتى مەن قولىنداعى ۇقىعىنان پايدالانىپ، قوعامداعى ساندالبايلاردى، ەسىرتكىگە ساياتىن زاڭعا قايشى قىلمىستىلاردى توپتاپ، بىرتىندەپ دامىپ، كولەمى 50 ادامعا جۋىق قارا قوعام سيپاتتى ۇيىم قۇرىپ، قاساقانا زاقىمداۋ ارقىلى كىسى ءولتىرۋ، قاساقانا كىسى ءولتىرۋ (ماقساتىنا جەتە الماعان)، ەسىرتكى تاسىپ-ساتۋ، قۇمارحانا اشۋ، باسقالاردى زاڭسىز قاماۋ قاتارلى 62 قىلمىس وتكىزىپ، 2 زيانكەستىككە ۇشىراۋشىنىڭ ولىمىنە، كوپتەگەن زيانكەستىككە ۇشىراۋشىنىڭ اۋىر جارالانۋىنا سەبەپشى بولعان، قوعامعا جەتكىزگەن زيانى اسا اۋىر.

 

بۇل دەلوعا 2020-جىلى 4-ايدىڭ 17-كۇنى ەكىنشى سوتتا ۇكىم جاريالانىپ، باس قىلمىستى باي بونى قارا قوعام سيپاتىندىق ۇيىم قۇرۋ، باسشىلىق ەتۋ قىلمىسى، قاساقانا زاقىمداۋ قىلمىسى قاتارلى 14 ءتۇرلى قىلمىسپەن، زاڭ بويىنشا 25 جىلدىق مەرزىمدى قاماۋ جازاسىنا ۇكىم ەتتى، تىرەكتى مۇشە جاڭ لەي قاتارلى 12 قىلمىستىنى 20 جىلدان 10 جىلعا دەيىن ۇقساس بولماعان مەرزىمدى قاماۋ جازاسىنا ۇكىم ەتتى، جوۋ فىڭلەي قاتارلى 32 قىلمىستىعا 9 جىلدان 1 جىلعا دەيىن ۇقسامايتىن مەرزىمدى قاماۋ جازاسىن بەردى. جيىنى 38 ميلليون 160 مىڭ يۋان ايىپ سالىندى.

 

اۋدارعان: نۇرگۇل قۇمارقان قىزى

 

 

 

    中央广播电视总台 央广网 版权所有

    ءىرىپ-شىرىگەن قوعام حاۋىپسىزدىگى مەكەمەسى باستىعىنىڭ سۇرقيالىعى

    قوعام حاۋىپسىزدىگى مەكەمەسىنىڭ باسشىسى قارا قوعام اتامانىنا اينالعان، مەملەكەتتىك قارا كۇشتەردى الاستاۋ كەڭسەسى باقىلاپ اتقارىلاتىن دەلولار جونىندە جالپى حابارلاندىرۋ جاريالادى