قۇرمەتتى تىڭدارمان قاۋىم، بۇگىن 4-ايدىڭ 19-كۇنى دۇيسەنبى، اۋەلى ەل ٴىشى جانە حالىقارالىق حابارلار توپتاماسىن تىڭدايسىزدار، سوڭىنان حالىقارالىق قولامتالى تۇيىنگە قۇلاق تۇرىڭىزدەر.

您的浏览器不支持 audio标签

※2021-جىلعى جوعارى مەكتەپ ەمتيحانىنا 50 كۇن ۋاقىت قالدى، تاياۋدا بەيجيڭ ۋنيۆەرسيتەتى، چيڭحۋا ۋنيۆەرسيتەتى قاتارلى 36 جوعارى مەكتەپ نەگىزدىك وقىتۋدى كۇشەيتۋ جوسپارى بويىنشا وقۋشى قابىلداۋ قىسقاشا ەرەجەسىن ىركەس-تىركەس جاريالادى. وسى مەكتەپتەردىڭ بيىلعى وقۋشى قابىلداۋ جوسپارىنا رەتتەۋ جۇرگىزىلدى، تىزىمدەلۋ 4-ايدىڭ سوڭىنا دەيىن جالعاسادى. جوعارى مەكتەپ ەمتيحانىنان كەيىن ٴنومىر شىعۋدان بۇرىن، جوعارى مەكتەپتەر ۇزدىكتەردى الدىمەن قابىلداۋعا قاتىناسقان «ەمتيحان بەرۋشىلەردىڭ ٴوزىن تۇراقتاندىرۋ» بۋىندارىن جاپپاي كوبەيتەدى.

※بو-اۋ ازيا تالقى مىنبەسىنىڭ 2021-جىلعى جىلدىق ٴماجىلىسى 4-ايدىڭ 18-كۇنى حاينان ولكەسىنىڭ ايگىلى مادەنيەت قالاشىعى بو-اۋدا اشىلدى. سول كۇنى وتكىزىلگەن تۇڭعىش اقپارات جاريالاۋ ماجىلىسىندە ەكى ىقپالدى بايانداما جاريالاندى. باياندامادا بيىل ازيا ەكونوميكاسىندا قالپىنا كەلۋ سيپاتتى ارتۋ جارىققا شىعىپ، ەكونوميكانىڭ ارتۋ قارقىنى %6.5 تەن جوعارى بولۋى مۇمكىندىگى ايتىلدى.

※سىرتقى ىستەر مينيسترىنىڭ ورىنباسارى لى يۇيچىڭ 4-ايدىڭ 16-كۇنى ا ق ش بىرلەسكەن اگەنتتىگىنىڭ ارناۋلى سۇحباتىن قابىلداپ، جۇڭگو-ا ق ش قاتىناسى، شينجياڭعا، شياڭگاڭعا، تايۋانعا ساياتىن ماسەلەلەر جونىندە جۇڭگونىڭ مايدانىن بايىمدادى ٴارى جۇڭگونى قارالاعان شىندىققا جاناسپايتىن ايتىلىمدارعا پارمەندى تويتارىس جاسادى.

※ا ق ش، انگليا، ەۆروپا وداعىنداعى كەيبىر ساياساتكەرلەردىڭ شياڭگاڭ ەرەكشە رايوندىق سوت مەكەمەسىنىڭ لي جىيىڭ، لي جۋميڭ قاتارلىلاردى زاڭ بويىنشا جازالاعانىن جات نيەتپەن قارالاعانىنا قاراتا، سىرتقى ىستەر مينيسترلىگىنىڭ شياڭگاڭدا تۇراتىن مەكەمەسىنىڭ مالىمدەمەشىسى 4-ايدىڭ 18-كۇنى، بۇل ەرەكشە رايوننىڭ زاڭمەن باسقارۋىن جانە حالىقارالىق زاڭمەن باسقارۋدى قورلاعاندىق سونداي-اق اياق استى ەتكەندىك دەپ قاتاڭ اتاپ كورسەتتى.

※جۇڭگونىڭ كليمات وزگەرىسى ىستەرىنىڭ ەرەكشە ەلشىسى شيە جىنحۋا تاياۋدا ا ق ش پرەزيدەنتى كليمات ماسەلەسىنىڭ ەرەكشە ەلشىسى كەريمەن كەڭەس وتكىزدى، ەكى جاق كليمات داعدارىسىنا توتەپ بەرۋگە قاتىستى بىرلەسكەن مالىمدەمەگە قول قويدى.

※جاپونيانىڭ يادرولىق جاراقسىز سۋدى تەڭىزگە اعىزۋ ىسىنە قاراتا، ەكولوگيالىق ورتا مينيسترلىگى جۋىردا اڭىس قايتارىپ بىلاي دەدى: جۇڭگو جاعدايدىڭ دامۋىنا قاداعالاي نازار اۋدارىپ، تەڭىز-مۇحيت ەكولوگيالىق ورتاسىنا جاسايتىن ىقپالىن مۇقيات باعالايدى، جاپونيانىڭ حالىقارالىق قوعامعا جاۋاپتى بولۋىن ءۇمىت ەتەمىز.

※چينحۋاڭداۋ تەڭىز ىستەرى مەكەمەسى كەمە قاتىناۋ ەسكەرتۋىن جاريالاپ، 4-ايدىڭ 19-كۇنى ساعات 8 دەن 4-ايدىڭ 30-كۇنى ساعات 18 گە دەيىن بوحاي تەڭىزىنىڭ ٴىشىنارا تەڭىز ايدىندارىندا اسكەري مىندەت اتقارىپ، ٴارقانداي كەمە مەن ادامداردىڭ كىرۋىنە تيىم سالاتىندىعىن ايتتى. 

※4-ايدىڭ 17-كۇنىنە دەيىن، بۇكىل ەلدىڭ جەر-جەرىندە جاڭا تيپتى ايدارشا ۆيرۋس ۆاكسيناسى 189 ميلليون 809 مىڭ رەت قويىلدى.

※گۋاڭشيدەگى گۇيلين ساقشى جاعىنىڭ حابارلاندىرۋىنا قاراعاندا، گۇيلين قالاسىندا 4-ايدىڭ 17-كۇنى ٴبىر ۇلكەن جولاۋشىلار اۆتوموبيلى بيىك بوگەت باعاناسىنا سوعىلىپ، كولىكتە وتىرعان ٴبىر ادام ٴولىپ، 6 ادام جارالانعان. قازىر جولاۋشىلار اۆتوموبيل شوفەرى ساقشى جاقتىڭ مەڭگەرۋىندە.

※جىجياڭ ولكەسىنىڭ تەڭىزدە ىزدەۋ-قۇتقارۋ ورتالىعى حۋناننىڭ ٴبىر جۇك كەمەسىنىڭ تايجوۋ قالاسىنىڭ ماڭىنداعى تەڭىز ايدىنىندا داۋىل سوعىپ سۋعا باتىپ كەتكەن مالىمەتىن تاپسىرىپ الدى. 4-ايدىڭ 18-كۇنى ساعات 10 عا دەيىن، ٴبىر ادام قۇتقارىلىپ، 5 ادام دەرەكسىز كەتتى، قۇتقارۋ قىزمەتى ٴالى جالعاسۋدا.

※4-ايدىڭ 18-كۇنى ساعات 16 عا دەيىن، جۇڭگو كينو بازارىنىڭ 2021-جىلعى جالپى بەلەت كىرىسى 20 ميلليارد يۋاننان استى. «سالەمەتسىز بە، لي حۋانيىڭ»، «تاڭرىنجيە كوشەسىندەگى بارلاۋ دەلوسى 3»، «ساعان ٴبىر شوق گۇل ۇسىنايىن» دەگەن ٴۇش كينونىڭ كورىلىم سانى قارا ۇزىپ الدا تۇر.

※4-ايدىڭ 18-كۇنى ساعات 22 دەن 11 مينۋت وتكەندە تايۋاننىڭ حۋاليان اۋدانىندا ىلگەرىندى-كەيىندى 5.6 بال جانە 6.1 بال جەر سىلكىندى. فۋجياننىڭ كوپ جەرىنە سىلكىنىس اسەر ەتتى.

※ورتالىق اۋا رايى ستانسياسىنىڭ مەجەلەۋىنشە، 4-ايدىڭ 18-كۇنى ساعات 20 دان 4-ايدىڭ 19-كۇنى ساعات 20 عا دەيىن شينجياڭ، چيڭحاي-شيزاڭ ٴۇستىرتىنىڭ سولتۇستىگى مەن شىعىس بولەگى قاتارلى جەرلەردىڭ ٴىشىنارا وڭىرلەرىندە از ياعني ورتاشا قار جاۋادى نەمەسە قار ارالاس جاڭبىر جاۋادى. گۋاڭدۇڭ، حۋنان، حاينان، گۇيجوۋ، شيزاڭ قاتارلى جەرلەردىڭ ٴىشىنارا رايوندارىندا نوسەر جاۋدى.

※ينديادا جاڭا تيپتى ايدارشا ۆيرۋسپەن جۇعىمدالعان وكپە قابىنۋ اۋرۋىنا شالدىققاندار وتكەن 24 ساعاتتا جاڭادان 260 مىڭنان استام ادام كوبەيىپ، تاعى دا تىڭ دەڭگەيگە جەتكەن. قازىرگە دەيىن ينديادا 15 ميلليونعا جۋىق ناۋقاستىڭ دياگنوزى تۇراقتانعان.

※رەسەي مەن ۋكراينا 4-ايدىڭ 17-كۇنى، قارسى جاقتىڭ ٴبىر سىرتقى ىستەر ٴمانساپتىسىنان شەكتى مەرزىم ىشىندە شەكارادان كەتۋدى تالاپ ەتكەندىگىن ىلگەرىندى-كەيىندى جاريالادى. چەحيا سول كۇنى رەسەيدىڭ 18 ديپلوماتىنان شەكتى مەرزىم ىشىندە شەكارادان شىعۋدى تالاپ ەتتى، رەسەي بۇعان قاراتا ٴسوز جوق، قارسى شارا قولداناتىندىعىن ايتتى.

※رەسەي مەدياسىنىڭ حابارىنا قاراعاندا، رەسەيدىڭ ورىنباسار زۇڭليىى بوليسۋيچ بىلاي دەدى: حالىقارالىق كەڭىستىك ايالداماسىنىڭ ەسكىرگەنى ەسكەرىلگەندىكتەن، كەڭىستىك ايالداماسىنىڭ اينالىم كەلىسىم ۋاقىتى 2024-جىلى تولادى، رەسەي 2025-جىلدان باستاپ وسى نىساننان شەگىنىپ، وزىنە ٴتان كەڭىستىك ايالداماسىن قۇرۋدى جوسپارلاپ وتىر.

※تايلاند جۇقپالى اۋرۋعا قارسى پارمەندى شارا قولداندى، تايلاندتىڭ قاتىستى تاراۋلارى تايلاندتاعى بارلىق جوعارى مەكتەپتەردەن وقىتۋدى توقتاتىپ، بارلىعىن توراپ جەلىسىندە وقىتۋعا وزگەرتىپ، بۇنى 4-ايدىڭ 18-كۇنىنەن باستاپ اتقارۋدى تالاپ ەتتى.

您的浏览器不支持 audio标签

 جاپونيا بۇل سۋدى ەڭ الدىمەن ٴوزىڭ ٴىشىپ كور

جاپونيا ۇكىمەتى تاياۋدا فۋكۋسيما ارالىنداعى 1-يادرو ەلەكتر ستانسياسىنداعى ميلليون توننالىق يادرولىق جاراقسىز سۋدى تەڭىزگە توگۋدى ۇيعاردى. جاپونيانىڭ ٴىشىنارا ٴمانساپتىلارى: يادرو ەنەرگياسى جايىلعان سۋدى ىشسەڭ دە ەشتەڭە ەتپەيسىڭ دەستى بەتتەرى بۇلىك ەتپەي. بۇل سوندا قانداي ساندىراق،بۇل بارىپ تۇرعان وزىمشىدىلىك ەمەي نەمەنە!

فۋكۋسيما ارالىنداعى يادرو شىرعالاڭى قازىرگە دەيىن بۇكىل جەر شارىندا تۋىلعان ەڭ اۋىر يادرو شىرعالاڭدارىنىڭ ٴبىرى بولىپ، قىرۋار راديواكتيۆتىك زاتتار تەڭىزگە قۇيىلىپ، تەڭىز-مۇحيت ورتاسىنا، ازىق-تۇلىك حاۋىپسىزدىگىنە جانە ادامزاتتىڭ دەنساۋلىعىنا تەرەڭ ىقپال جاسادى. جاپونيا ۇكىمەتى مىنە وسى رەتتەدە تەڭىزگە شىعارۋدى ۇيعارعان يادرولىق جاراقسىز سۋدىڭ قۇرامىنداعى راديواكتيۆتىك زاتتار توتەنشە كۇردەلى بولىپ ونى بۇكىل جەر شارىنداعى يادرو ەلەكتر ستانسيالارىنىڭ قالىپتى جۇمىس جۇرگىزۋ بارىسىندا ىعىستىرىلعان اسقىن اۋىر سۋتەگىمەن تەڭ قويۋعا بولمايدى. الايدا جاپونيا جاق باستان-اياق ۇعىمدى شاتاستىرىپ، ماسەلەنىڭ مانىنەن قاشقالاقتادى، ٴتىپتى اسقىن اۋىر سۋتەگى جاراقسىز سۋىن تەڭىزگە ىعسىترۋ بۇكىل جەر شارىندىق داعدى دەپ سوقتى. ادامزاتتىڭ ىرىس- باقىتىنا ساياتىن وسىنداي ەرەكشە ماڭىزدى ىستە جاپونيا جاق شىندىقتان جالتارىپ، جۇرتتى الجاستىرماق بولدى.

جاپونيا فۋكۋسيما ارالىنداعى يادرولىق لاس سۋدى تەڭىزگە قۇيۋدان بۇرىن، ٴارقايسى مۇددەلى ەلدەرمەن جانە قاتىستى قۇرىلىمدارمەن تولىق كەڭەسپەدى ٴارى ٴبىر اۋىزدىلىققا كەلمەدى. «ب م ۇ تەڭىز-مۇحيت زاڭى شارتى»، «يادرو شىرعالاڭىن ەرتەرەك حابارلاۋ شارتى»، «يادرو حاۋىپسىزدىگى شارتى» قاتارلى حالىقارالىق زاڭدارعا ساي، جاپونيا ورتانى باعالاۋ، باقىلاۋ، الدىن الۋ شارالارىن قولدانىپ، حاۋىپ-قاتەردى ەڭ تومەنگى شەككە تۇسىرۋگە كەپىلدىك ەتۋ، ينفورماتسيانىڭ جاريالىلىعىن قامتاماسىزداندىرۋ سياقتى حالىقارالىق بورىشتاردى ارقالاۋى كەرەك. «بىرلەسكەن مەملەكەتتەر ۇيىمىنىڭ تەڭىز-مۇحيت زاڭى شارتىندا» تاعى بىلاي دەپ بەلگىلەنگەن: ٴار ەل بارلىق قاجەتتى شارالاردى قولدانىپ، ٴوز قاراماعىنداعى نەمەسە تىزگىندەۋ كولەمىندەگى ۋاقيعالار مەن قيمىلداردان تۋىلعان لاستانۋدى يەلىك ۇقىعىن جۇرگىزەتىن وڭىردەن تىس كەڭەيتپەۋگە كەپىلدىك ەتۋ قاجەت. مۇحيت اعىسى، ولشەم دارەجەسى، كوشكەن بالىق تۇرلەرى سياقتى فاكتورلار سەبەبىنەن جاپونيانىڭ يادرولىق لاس سۋ شىعارۋى شەكارا اتتايتىندىقتان ىقپال تۋدىرماي قويمايدى. شارت جاساسۋشى جاق رەتىندە، جاپونيانىڭ اۋىر يادرو شىرعالاڭىن ٴبىر جاقتىلى ەتكەننەن كەيىنگى جاراقسىز سۋدى تەڭىز-مۇحيتقا اعىزۋداي كوپكە زيان جەتكىزۋ ٴتۇبى ٴوزىن كۇيرەتۋمەن تىنادى. 

جاپونيا جاق: لاس زاتتاردى تەڭىزگە اعىزۋدى ۇيعارۋداعى ٴبىر ۇلكەن سەبەپ، سۋ كۇبىسىنىڭ جەتىسپەي قالۋى بولدى، ونىڭ ۇستىنە فۋكۋسيما ارالىنداعى 1-يادرو ەلەكتر ستانسياسىنىڭ زاۆود رايونىندا بوس جەر قالماعاندىقتان ۇستەمەلەنگەن سۋ كۇبىسىن قويۋ مۇمكىندىگى شەكتەلدى دەپ جالتاردى، ال شىندىققا جۇگىنسەك، قازىر فۋكۋسيما يادرو ەلەكتر ستانسياسىنىڭ ماڭايى قاڭىراپ بوس جاتىر، جەر ساتىپ الۋعا مۇمكىندىكتەرى دە، قۋاتى دا قاپتال جەتەدى. جاپونيا جاق يادرولىق جاراقسىز سۋدى تەڭىزگە شىعارۋ «وزىندىك قۇنى ەڭ تومەن، ەڭ وڭاي مەڭگەرىلەتىن» جوبا دەپ ايتقان بولاتىن. بۇل ٴىشىنارا كاسىپتەردىڭ، ٴىشىنارا كاسىپورىنداردىڭ قىسقا مەرزىمدىك مۇددەسىن ٴوز ەلى بۇقاراسىنىڭ، توڭىرەكتەگى ەلدەر حالقىنىڭ ٴتول مۇددەسى مەن حالىقارالىق الەۋمەتتىك دەنساۋلىق حاۋىپسىزدىگىنەن جوعارى قويعاندىق بولىپ تابىلادى.

جاپونيا ۇكىمەتى مەن توكيو ەلەكتر سەرىكتىگىنىڭ يادرو شىرعالاڭىن ٴبىر جاقتىلى ەتۋىنە جۇرت سەنىمىسزدىك تانىتىپ كۇمانمەن قاراۋدا. فۋكۋسيما ارالىنداعى يادرو شىرعالاڭىنىڭ العاشقى مەزگىلىندە جاپونيا ۇكىمەتى ٴبىر مەزەت «شىرعالاڭنىڭ ىقپالى شەكتى»، «سوڭعى جۇمىستاردى ىڭعايلاستىرۋ ٴساتتى بولدى» دەپ دۇيىم جۇرتقا جار سالدى، ٴبىراق فاكت ناتيجەنىڭ كەرىسىنشە بولعانىن بىردەن دالەلدەدى. شىعىس ەلەكتر سەرىكتىگى شىرعالاڭ تۋىلعان العاشقى مەزگىلدە ۇيمە وزەكتىڭ بالقىپ كەتكەنىن بىلسەدە، ونى قارا ورمانداي قالىڭ حالىقتان جاسىرۋعا قارمانىپ باقتى. ٴبىراق جاۋىردى جابا توقىعانىمەن، جارانىڭ جازىلماۋى انىق. قياناتتىڭ ارتىنداعى قىلتىڭداعان قورقىنشتان ەكى ۇشتى سويلەدى، جاپونيا ەل ٴىشى-سىرتىنداعى الاڭداۋشىلىققا باستان-اياق كوڭىل كونشىتەرلىك جاۋاپ قايتارمادى. وزگەلەردىڭ تولىسىن توگىپ، ورتاسىن شايقاعان ارەكەتتەرى جاپونيانىڭ ادال بولماعاندىعىن مەنمۇندالاتتى.

ال بۇگىن جاپونياداعى ٴىشىنارا ٴمانساپتىلاردىڭ «يادور ەنەرگياسى جايىلعان سۋدى ىشكەن كۇننىڭ وزىندە دە ەشتەڭە ەتپەيسىڭ» دەگەن شاتپاعىنان جۇرت دۇرلىگىپ ەل ۇرىكتى.

جاپونيانىڭ يادرولىق جاراقسىز سۋدى تەڭىزگە شىعارۋدى بەلگىلەۋى ەل ٴىشى-سىرتىنىڭ نازارىن جاپپاي اۋداردى. ورتانى قورعايتىن 300 دەن استام ۇيىم جاپونياعا باتىل قارسى تۇراتىندىعىن ٴبىلدىردى. حانگونىڭ پريزدەنتى ۋىن زاييىن قاتىستى تاراۋلاردان جاپونيانىڭ «لاس زاتتاردى تەڭىزگە اعىزۋ» ٴىسىن حالىقارالىق سوتقا تاپسىرۋدى تالاپ ەتتى. ەل ٴىشى-سىرتىنداعى كۇمان مەن الاڭداۋشىلىققا مۇقيات جاۋاپ قايتارۋ، وتەۋگە ٴتيىستى جاۋاپكەرشىلىكتى شىنايى پوزيتسيامەن ادا ەتۋ جاپونيا بيلەۋشىلەرىنىڭ نارقىن ارزانداتپاي، ابىرويىن تاپتاتپاۋداعى بىردەن-ٴبىر دۇرىس تالعام بولماق.

来源：中央广播电视总台

播音：热德力、古丽江

微信制作：古丽美热