ينفورماتسيا اشكەرەلەۋ: mzjubao@cnr.cn

وزەكتى ماقالالار

مەرەكە مەرەيىنە بولەنگەن مەدالدى ازامات

来源:央广网     |责编:达吾力别克|     发布日期: 2021-07-17 12:25

مەرەكە مەرەيىنە بولەنگەن مەدالدى ازامات

باس  شۋجي شي جينپيڭنىڭ ءسوزىن تيان-انمىن الاڭىندا تۇرىپ، ەت قۇلاعىمەن ەستىگەن حالقىمىزدىڭ ماقتانىشىنا اينالعان مەملەكەتتىك ۇلتتار ىنتىماعى العا باسارلىعىنداعى ۇلگىلى جەكە، ۇگىت-نازاريا  شەبىندەگى مەملەكەتتىك ۇزدىك جەكە، كوكتوعاي اۋداندىق كەلەشەك ۇرپاقتارعا كوڭىل ءبولۋ  كوميتەتىنىڭ ورىنباسار مەڭگەرۋشىسى ماتىنبەك مۇراتقان ۇلىمەن وتكىزىلگەن سۇحبات

 

 

سەرىك راقىم  ۇلى: جۇڭگو كوممۋنيستىك پارتياسى قۇرىلعاندىعىنىڭ 100 جىلدىق مەرەي تويىن قۇتتىقتاۋ-پارتيا مەن مەملەكەتتىڭ ساياسي ومىرىندەگى زور ءىس. بۇل ۇلاعاتتى توي ءبىز كوممۋنيستەرگە ۇمتىلماس رۋح، قاجىماس قايرات بەرىپ، اسقاق ارمان ارقالاتىپ، جاڭا داۋىردە ۇدەرە العا تارتۋىمىزعا جەتەكشىلىك ەتەتىن باعدارشامدى ايقىندادى. ءسىز استانامىز بەيجيڭگە ارنايى كەلىپ، باس شۋجي شي جينپيڭنىڭ ماڭىزدى ءسوزىن ناق مايداندا ەستۋ باقىتىنا يە بولدىڭىز، قاشاندا قۋانىشىڭىزعا ورتاقپىز، ەندەشە سول ەستەن كەتپەس مەرەيلى ساتتەردەن سىر شەرتە وتىرساڭىز؟

 

ماتىنبەك مۇراتقان ۇلى: 2021-جىل بۇكىل ەلىمىزدەگى ءار ۇلت حالقى جونىنەن العاندا، ايتىپ تاۋىسقىسىز ايتا قالسىن ەستەن كەتپەس ەرەكشە ەسىل جىل بولىپ، ۇلى دا داڭقتى، ءدانىشپان جۇڭگو كوممۋنيستىك پارتيامىز قۇرىلعاندىعىنىڭ 100 جىلدىق مەرەي تويى تويلاندى. بۇل ەلىمىزدەگى 56 ۇلتتان قۇرام تاپقان ءبىر ميلليارد  400 ميلليون جۇڭگو حالقىنىڭ ساياسي ومىرىندەگى ەڭ زور ماقتانىشى بولىپ، بارلىعىمىزدى شاتتىق شالقارىنا بولەۋدە؛ مەن وسى ورايدا التاي ايماعىنداعى جانە اۆتونوميالى رايونداعى  ءار ۇلت حالقىنىڭ جۇرەك جاردى قۋانىشىمەن تىلەگىن ارقالاپ، استانامىز بەيجيڭدەگى پارتيامىز قۇرىلعاندىعىنىڭ 100 جىلدىق مەرەي تويىنا قاتىناستىم. بۇل مەن سياقتى ءبىر مالشىنىڭ بالاسى جانە باجى سالاسىندا 30 جىل قىزمەت ىستەپ پەنسياعا شىققان، 38 جىلدىق  پارتيالىق ستاجى بار ءبىر قارت پارتيا مۇشەسى جونىنەن الىپ ايتقاندا، توتەنشە قۋانارلىق ءىس بولىپ، قۋانىشىمىزدا شەك جوق. ويتكەنى، بۇل بارلىق ادامداردىڭ باسىنا كەلە بەرمەيتىن ءماندى دە ماعىنالى ۇمتىلماس ءبىر كۇن بولدى. 100 جىلدىق مەرەي تويدى  ناق مايداندا وتىرىپ قۇتتىقتاۋ، مەنى ىشىنە العان بارلىق جۇڭگو حالقىنىڭ ساياسي ومىرىندەگى ەڭ زور قۋانىش. ءارى بۇل ءبىزدىڭ ومىرىمىزدە ەكى اينالىپ كەلمەيتىن اسا ءماندى دە ماعىنالى، قۇندى دا قۋانىشتى، ۇلاعاتتى، مەرەيلى كۇندەرىمىز بولدى ءارى ءبىز كوممۋنيستەرگە ۇمتىلماس رۋح، قاجىماس قايرات، شالقىعان شابىت، ەرەكشە ەرلىك جىگەر مەن اسقاق ارمان ارقالاتىپ، جاڭا داۋىردەگى جۇرەر جولىمىزدى نۇرلاندىرا ءتۇستى. وسى 100 جىلدا مەملەكەتىمىز ەڭسە كوتەردى، بايىدى جانە قۇدىرەتتەنىپ، جاڭا داۋىرگە قادام تاستادى. ەندى ەكىنشى 100 جىلدىق كۇرەس نىساناسىن ورىنداۋ ءۇشىن، ءبىز جۇڭگو كوممۋنىستەرى ءسوزجوق، ورتاق كۇش سالۋىمىز كەرەك. مەنىڭ وسى ءبىر ۇلاعاتتى تويعا قاتىناسۋىم ءوزىمنىڭ ءبىر تولىمدى كوممۋنيست بولعاندىعىمنان، جۇڭگولىق ءارى جۇڭگو ازاماتى بولعاندىعىمنان دەرەك بەرەدى، ءوزىمدى ماقتانىش سانايمىن. پارتيامىزدىڭ بۇل مەرەي تويى توتەنشە قۋانىشتى، توتەنشە سالتاناتتى بولدى.

ءبىز 6-ايدىڭ 27-كۇنى ۇشاقپەن استانامىز بەيجيڭگە بارىپ،    28-كۇنى كەشتە قۇس ۇياسى مەملەكەتتىك دەنە-تاربيە سارايىندا پارتيا جانە مەملەكەت باسشىلارىمەن بىرگە، كونسەرتتى تاماشالادىق. كونسەرت 1840-جىلعى اپيىن سوعىسىنان باستاپ، پارتيامىزدىڭ 100 جىلدان بەرگى باسىپ وتكەن جالپى بارىسىن ءتۇرلى ويىن نومىرلەرىمەن بەينە ەكران ارقىلى جان-جاقتىلى تولىق بەينەلەگەن ەرەكشە ءماندى، ماعىنالى كونسەرت بولىپ، 20 مىڭنان استام كورەرمەن قاتىناسىپ، ماڭىزى اسا جوعارى بولدى.

 

ەكىنشى ەكىسكۋرسيالاعانىمىز مەملەكەتتىك پارتيا تاريحى مۇراجايى بولىپ، پارتيامىزدىڭ اعا بۋىن قايراتكەرلەرى مەن قاھارماندارى  قان توگىپ، قۇربان بەرىپ قول جەتكىزگەن كەلەلى تابىستارى كورسەتىلىپ، بۇگىنگى كۇندەرىمىزدىڭ وڭاي-وسپاق قولعا كەلمەگەندىگى، قول جەتكىزگەن بارلىق تابىستارى، پارتيامىزدىڭ حالىقتى باستاپ باي-باقىتتى بۇگىنگى كۇنگە جەتكىزگەندىگىن تولىق ءتۇسىنىپ جەتىپ، ەرەكشە اسەرلەنىپ، ۇمتىلماس شابىت الدىق.  بۇل مەنىڭ ومىرىمدەگى ەڭ قۋانىشتى، ەڭ اسەرلى كۇندەر بولدى.

 

7-ايدىڭ 1-كۇنى ساعات 00: 7 دە تيان-انمىن الاڭىنا كەلىپ ورنالاسقان ءار ۇلت ۋاكىلدەرى 70 مىڭنان اسىپ، ەرەكشە سالتاناتى باس قوسۋ بولدى. وتىرعان ورنىمىزدان اسپان كەڭىستىگىنە كوز جىبەرگەنىمىزدە 100 فورماسىندا كوپ ۇشاق ۇشىپ ءوتىپ، ىلە-شالا 7-ايدىڭ 1-كۇنى فورماسىندا قاز-قاتار ۇشاق ۇشىپ ءوتتى. سوڭىنان ۇلى جۇڭگو كوممۋنيستىك پارتياسى جاساسىن! ۇلى جۇڭگو حالقى جاساسىن! ۇلى جۇڭحۋا حالىق رەسپۋبليكاسى جاساسىن! بۇكىل ەلىمىزدەگى ءار ۇلت حالقىنىڭ ۇلى ىنتىماعى جاساسىن! دەگەن ۇراندار جازىلعان ۇشاقتار ۇشىپ، كورەرمەن كوپتى ەرەكشە جەلپىندىردى. جاستار مەن پيونەرلەر سەرت بەرىپ، وتانىمىزدىڭ بولاشاق ۇرپاقتارىنىڭ باتىل سەنىمىن ايگىلەدى.

 

ساعات 8 دە پارتيامىزدىڭ 100 جىلدىق مەرەي تويىن قۇتتىقتاۋ جينالىسى باستالىپ، لي كىچياڭ زۇڭلي جينالىستى باسقاردى. باس شۋجي شي جينپيڭ تيان-انمىن مىنبەرىنە كوتەرىلگەندە، بۇكىل الاڭدى قۋانىش شاتتىعى كەرنەپ، شاتىرلاعان شاپالاق ءۇنى ۇزاققا دەيىن تولاستامادى. باس شۋجي وتە ءبىر مەيىرلى كوزبەن جۇرتقا كوز تاستاپ "جولداستار، دوستار"-دەپ  ءسوز باستاعاندا بۇكىل الاڭ اپ-ساتتە تىنىشتالىپ، ماڭىزدى ءسوزدىڭ مايەگىنە مارقايىپ، ءالسىن-ءالى شاپالاق سوعىپ قۇرمەت ءبىلدىرىپ، وزدەرىنىڭ قۋانىشى مەن سەنىمىن شاپالاق داۋىسى ارقىلى ءبىلدىردى.

 

ءبىز باس شۋجيدىڭ ءسوزىن ەت قۇلاعىمىزبەن ەستىپ، شىن جۇرەگىمىزبەن تەبىرەنىپ، كوكەيىمىزگە ساقتاپ، بۇدان كەيىنگى ەكىنشى 100 جىلدىق كۇرەس نىساناسىن ىسكە اسىرۋ جولىندا ءتۇرلى قيىنشىلىقتاردى جەڭە وتىرىپ، بۇدان دا بيىك بەلەستەرگە جەتۋگە قۇلشىنىپ، بۇگىنگى باقىتتى كۇندەرىمىزدى قادىرلەۋگە بەل بايلادىق.

 

باس شۋجي مىنالاردى سالتاناتپەن جاريالادى!

 

«بۇكىل پارتيا، بۇكىل ەل حالقى ۇزدىكسىز كۇرەس جاساپ، ءبىرىنشى 100 جىلدىق كۇرەس نىساناسىن جۇزەگە اسىردى. جۇڭحۋا توپىراعىندا جالپى بەتتىك دوڭگەلەك داۋلەتتى قوعام ورنادى. كەدەيلىككە قوش ايتتىق. قازىر ءبىز سوتسياليستىك وسىزاماندانعان قۇدىرەتتى ەل قۇرۋدىڭ ەكىنشى 100 جىلدىق كۇرەس نىساناسىن جۇزەگە اسىرۋدىڭ ۇلى جورىعىنا قادام تاستادىق»-دەپ جاريالادى. مىنە بۇل جۇڭگو حالقى ەڭسە كوتەرىپ، جۇڭحۋا ۇلتىنىڭ كەلەمەجگە ۇشىراعان كەشەگى كۇندەرىنىڭ كەلمەسكە كەتكەندىگىن تۇسىندىرەدى. جۇڭگو حالقى كونە دۇنيەنى قيراتا بىلۋمەن بىرگە، جاڭا دۇنيەنى جاراتا دا ءبىلدى. سوتسياليزم عانا جۇڭگونى قۇتقارا الادى، سوتسياليزم جولىمەن جۇرگەندە عانا دامۋعا قول جەتكىزە الاتىندىعىمىزدى ايقىنداي ءتۇستى. رەفورما جاساپ، ەسىكتى ايقارا اشۋ، وسىزاماندانعان جۇڭگونىڭ العا باسۋىنىڭ تاماشا تالعامى بولدى. جۇڭگو الىپ ءبىر ەلگە اينالدى. جۇڭحۋا ۇلتى ەڭسە كوتەرىپ، بايلىققا كەنەلىپ، وسكەلەڭ قۇرمەتكە يە بولدى.

 

سەرىك راقىم ۇلى: ال، ماتىنبەك اعا ەندى نەگىزگى ساتىنىڭ ۋاكىلى رەتىندە، وتكەنىمىز بەن بۇگىنگى باياشاتتى، باقىتتى كۇنىمىزدى سالىستىرا وتىرىپ، پارتيامىزدىڭ 100 جىلدىق شۇعىلالى ساپارىنا از-كەم ايالداساڭىز؟

ماتىنبەك مۇراتقان ۇلى: مەن پارتيامىزدىڭ نەگىزگى ساتى ۋاكىلى رەتىندە، پارتيامىزدىڭ 100 جىلدىق شۇعىلالى دا ومىرشەڭ، وسكەلەڭ ءومىر ساپارىنا ۇڭىلە كوز جىبەرگەنىمدە، پارتيامىز قاشاندا حالىقتىڭ قامىن ويلاپ، قوعامدىق توڭكەرىستى ىلگەرىلەتۋمەن بىرگە، باستان-اقىر وزىندىك توڭكەرىسكە دە ايرىقشا ءمان بەرىپ، وزىنە-ءوزى ۇزدىكسىز قاتاڭ دا اۋىر تالاپتار قويىپ، العان بەتتەن قايتپاي، كىرشىكسىزدىگى مەن ومىرشەڭدىگىن ساقتاپ، پارتيا ىشىندە ءوز-وزىنە قاتاڭ سىن ايتىپ، ءوزىن-ءوزى بورشالاۋدى ۇزدىكسىز ورىستەتىپ، «اۋرۋدى ەمدەپ، ادامدى قۇتقارىپ» بۇكىل پارتيانىڭ يدەيالىق لۋشيانى مەن ساياسي لۋشيانىن دۇرىستاپ تورەشىلدىكتى، جىكشىلدىكتى جانە قۇر قيالدى تاستاپ، اقيقاتتىڭ ولشەمىن امالياتتان ىزدەپ، ۇزدىكسىز العا ىلگەرىلەۋدىڭ باعىت-باعدارىن ايقىندادى. اقيقاتتا باستان-اياق تاباندى بولىپ، قاتەلىكتەردى دەر كەزىندە تۇزەتىپ، قيىنشىلىقتاردى جەڭۋگە باتىل بولدى. تاريحي تاجىريبە ساباقتاردى دۇرىس قورىتىندىلاپ، پارتيا قۇرىلىسىندا كەزىككەن ماسەلەلەردى ءوز ۋاعىندا دۇرىس شەشىپ، توڭكەرىس بارىسىندا العاباسارلىق رولىن ايگىلەپ، باسشىلىق ەتۋ ورەسى مەن بيلىك جۇرگىزۋ ورەسىن ۇزدىكسىز جەتىلدىردى. حالقارالىق قاتىناستاعى بەس پرينسيپتەن اۋىتقىماي جانە وعان تاباندى بولىپ، بەيبىت قاتار تۇرۋدى ۇزدىكسىز دارىپتەپ، امالياتتان وتكىزۋ ارقىلى دۇنيە ءجۇزى حالىقتارىنىڭ بەرىك سەنىمى مەن جالپى بەتتىك قولداۋىنا يە بولدى. جۇڭگوشا سوتسياليزم جولىندا تاباندى بولۋ مەن دامىتۋدىڭ تاريحي بارىسىندا باستان-اقىر حالىقتى ۇيىمداستىرىپ جانە باستاپ قۇدىرەتتى باسشىلىق ۇيتقىسىنا اينالدى. مىنە وسىنداي بەرىك سەنىم، قاتاڭ ءتارتىپ، قاجىماس رۋح بولعاندىقتان، پارتيامىزدىڭ العاشقى الاۋىن جاققان توڭكەرىس ارداگەرلەرى وتاندى قۇتقارۋ، مەملەكەتتى گۇلدەندىرۋ، مەملەكەتتى قۇدىرەتتەندىرۋدەي قاسيەتتى بورىشتى ارقالاپ، توڭكەرىس بارىسىندا كەز كەلگەن قيىندىقتاردى ەلەڭ قۇرلى كورمەي، قيىننان قيسىندى جول تاۋىپ، وزدەرىن ارناپ، جۇڭگو حالقىن وياتىپ، فەوداليزم، يمپەرياليزم، بيۋروكرات كاپيتاليزم سىندى جۇڭگو حالقىنىڭ جەلكەسىنەن باسىپ كەلگەن ءۇش ۇلكەن تاۋدى قۇلاتىپ، ەلىمىزدى جارتىلاي وتار، جارتىلاي فەۆەداليزمنەن قۇتقاردى. شەتەل شاپقىنشىلارى مەن كەرى توڭكەرىسشىلەرگە ۇزاق ۋاقىت ايانباي سىلەيتە سوققى بەرىپ، ەلىمىز ازاتتىعىنا دەيىنگى 28 جىلدا از بولماعان بوداۋلار بەرىپ، قاندى شايقاس جۇرگىزىپ، جۇڭگو حالقىن ازات ەتىپ، وتانىمىزدى قۇتقارىپ، ۇلى جۇڭحۋا حالىق رەسپۋبليكاسىن قۇرىپ، ءتوراعا ماۋزىدۇڭ ۋاكىلدىك ەتكەن پارتيا ورتالىعىنىڭ كۇللى الەمدى جاڭعىرتا جاريالاعان ۇندەۋىمەن دۇنيەنىڭ شىعىسىنان اسقاق بوي كوتەردى. سوندىقتان ءبىز كوممۋنيستەر پارتيا تاريحىن مۇقيات ۇيرەنىپ، ونىڭ ىشكى ءمانىن تەرەڭدەي ءتۇسىنىپ، وڭاي-وسپاق قولعا كەلمەگەن بالدان ءتاتتى باقىتتى بۇگىنگى كۇندەرىمىزدى قادىرلەپ، ەكىنشى 100 جىلدىق كۇرەس نىساناسىن ىسكە اسىرۋ جولىندا جۇدىرىقتاي جۇمىلىپ، ءار ادام قاراپايىم قىزمەت ورنىندا ءوز مىندەتىن ايتارلىقتاي ادا ەتىپ، وتانعا وشپەس ۇلەس قوسىپ، ءتىپتى دە بيىك بەلەستەردى باعىندىرۋعا تىنباي قۇلشىنىپ، ۇيرەنۋ بارىسىندا العا ىلگەرىلەۋىمىز جانە شىنىعىپ، شىڭدالۋىمىز كەرەك.

 

ءبىز وتكەنىمىزگە كوز جىبەرىپ قازىرگىمىزبەن سالىستىرار بولساق، پارىق جەرمەن-كوكتەي دەپ ايتۋىمىزعا ابدەن بولادى.

بۇرىن ءبىزدىڭ وتباسىمىز مال شارۋاشىلىعىمەن شۇعىلدانعان بولىپ، تاۋ ساعالاپ، وزەن جاعالاپ، ءار جىلى وڭتۇستىك وتار مەن ءتور جايلاۋ ارالىعىنا تۇيە نەمەسە وگىزبەن اتتى-جاياۋ تياناق تاپپاي كوشىپ-قونىپ، ادام باسىنا ايىنا «نورما» دەپ تاراتىلاتىن  5 تە 10 جىڭ ۇن مەن كوللەكتيۆتىڭ قويىن ساۋىپ ازىقتانۋمەن بىرگە، سودان قىستىق اۋجال ەتەرلىك ازىق-تۇلىگىن ايىرىپ الىپ، قىستىڭ قارلى-بوران، قاقاعان ايازدارىندا قار جامىلىپ، مۇز توسەنىپ كيگىز ءۇيدى پانالاپ، كورەر تاڭدى كوزىمەن اتىرىپ، كوللەكتيۆتىڭ مالىن كوز قاراشىعىمىزداي قورعاپ، قيىندىقتاردى ەلەڭ قۇرلى كورمەي، ادالدىقپەن ەرەن ەڭبەك ەتىپ كەلگەن ەدى.

 

ول كەزدە قازىرگىدەي ىرعىن تۇرمىس قايدان بولسىن!

 

باستاۋىش مەكتەپتى قىستا ۇلىڭگىر وزەنى بويىنداعى قىستاپ قالعان تۋىس-تۋعانداردىڭ ۇيىندە  جاتىپ وقىساق،    جازدا ورتا جايلاۋدى ورتالىق ەتكەن جەردەگى تانىس-بىلىستەردىڭ ۇيىندە جاتىپ وقيتىنبىز. ول جەردە ارناۋلى سالىنعان مەكتەپ بولماعاندىقتان، مۇعالىمدەرىمىز ءبىر كەزەك ءوز ۇيلەرىندە وقىتسا، ءبىر كەزەك سامىرسىن-قاراعايدىڭ كولەڭكەسىندە دوڭبەكتى ورىندىق، تىزەمىزدى پارتا ەتىپ جازۋ جازىپ وقيتىنبىز.

 

حات-قاتىناس كەمشىل جوقتىڭ قاسى بولعاندىقتان، كەيبىر بالالار ۋاعىندا مەكتەپكە كەلىپ وقي دا المايتىن، ءتىپتى شەت-شالعاي وڭىرلەردەگى اۋىرعان ادامداردا ۋاعىندا داۋالانا الماي دا قالاتىن.  كوپ ساندى ادامداردا وتىرار ءۇي، ەلەكتر شامى بولماعاندىقتان "قاڭىلتىر شامنىڭ ورنىنا ەلەكتر جايناپ جانساشى-اي"  دەپ انگە قوسىپ ارمانداعان زاماندار بولعان.

 

پارتيا 11-كەزەكتى ورتالىق كوميتەتىنىڭ 3-جالپى ماجىلىسىنەن كەيىن، پارتيامىز تاريحىندا كەلەلى وزگەرىس بولىپ، سەكىرمەلى دامۋعا قادام تاستالدى. اتاپ ايتقاندا، رەفورما جاساپ، ەسىك اشىپ سوتسياليستىك بازار شارۋاشىلىعىمەن شۇعىلدانىپ، ەگىستىك جەرلەر مەن مالدى جاپپاي كوتەرمەگە بەرىپ، حالىقتىڭ قاجەتىن قاناعاتتاندىرىپ، تەز قارقىنمەن دامۋعا بەت الدى. سودان باستاپ ەلىمىز  عىلىم-تەحنيكادا ەگەي جاسامپازدىقتار جاراتىپ، دۇنيەنىڭ الدىڭعى لەگىنە ءوتىپ، بايتاق الەمدى جالت قاراتتى. اسىرەسە، پارتيا 18-قۇرىلتايىنان بەرى شي جينپيڭنىڭ جاڭا ءداۋىر جۇڭگوشا ەرەكشەلىككە يە سوتسياليزم يدەياسىنىڭ جەتەكشىلىگىندە، ەلىمىزدىڭ ءار سالاداعى قىزمەتتەرى تەز قارقىنمەن دامىپ قۇدىرەتتەنىپ، باسقا ەلدەر ىستەي الماعان كەسەك جەتىستىكتەرگە قول جەتكىزىپ، ايدىڭ ارعى بەتىنە جورىق جاساپ، 10 مىڭ مەتردەي  تەڭىز تۇبىنە سۇڭگىپ زەرتتەۋ جۇرگىزىپ، اسكەري جاقتاعى قۋاتىمىز بەن باسقا دا سالاداعى ءتول زەرتتەۋ جەتىستىكتەرىمىز كۇللى دۇنيەنى جالت قاراتىپ، توسىن تۋىلعان جاڭا تيپتى ايدارشا ۋيرۆس وكپە قابىنۋ اۋرۋىن تەز ارادا تىزگىندەپ، حالىقتىڭ ءومىرىن بارىنەن جوعارى قويدى.

 

قالا مەن اۋىلدىڭ پارقى جويىلىپ ايقاسقان اسفاليت جولدار قالا مەن اۋىل-قىستاقتى تۇتاستىرىپ، ديقان-مالشىلاردىڭ ەسىگىنىڭ الدىنا دەيىن باردى. اۋىلىمىز ورتالىعىنان ۇشاق ۇشىپ، ىرگەمىزدەن تەمىر جولدار سالىنىپ پويەز قاتىنادى. قاز-قاتار تىزىلگەن زاماناۋي بەيقۇت ۇيلەر بوي كوتەرىپ، سۋ قۇبىرلارى جەتكىزىلىپ، كۇللى دۇنيەنىڭ حابارلارى مەن قيمىل ارەكەتتەرىن وتباسىمىزدا وتىرىپ-اق كورىپ ءبىلىپ وتىراتىن تاماشا جاعداي جارىققا شىقتى.

 

ەگىنشى-مالشىلارىمىز تاۋداعى تاس ۇيلەر مەن جەر كەپەلەردەن قۇتىلىپ، كەدەيلىك قالپاعىن لاقتىرىپ تاستاپ، ۇرپاقتارىن تەگىن وقۋمەن تەگىن تاماقتاناتىن بالالار باقشاسىنا وقۋعا بەرىپ، ارناۋلى اۆتوبۋزبەن اپارىپ-اكەلىپ تۇراتىن قولايلىلىقتار جاراتىلىپ، ەگىنشى-مالشىلاردى الاڭسىز ەتتى.

سەرىك راقىم ۇلى: ماتىنبەك اعا، ەندى ءوزىڭىزدىڭ ءتول كەشىرمەڭىزبەن بىرلەستىرە وتىرىپ، پارتيانىڭ ماپەلەۋىندە ەسەيىپ-ەرجەتكەن ءومىر جولدارىڭىزعا قايرىلا قاراپ، ۇرپاققا ونەگە بولار تۇستارىن اڭگىمەلەي وتىرساڭىز؟

ماتىنبەك مۇراتقان ۇلى: مەن ءوزىمنىڭ پارتيانىڭ ماپەلەۋىندە تۋىلىپ، پارتيانىڭ تاربيەلەۋىندە ەسەيىپ-ەرجەتكەن ءومىر جولدارىما ۇڭىلە قاراپ ەسكە الار بولسام: مەن 1962-جىلى كوكتوعاي اۋدانى قاراتۇڭكە اۋىلى كىشى كومىركەن قىستاعىندا مالشى وتباسىندا دۇنيە ەسىگىن اشىپ، باستاۋىش، ورتالاۋ، ورتا تەحنيكۋم مەكتەپتەرىنەن وقۋ تاۋىسىپ، 1982-جىلى قوعامدىق قىزمەتكە قاتىناسىپ،    سىرتتاي وقىپ-ۇيرەنىپ، جوعارى مەكتەپتىڭ تولىق كۋرىس ماعۇلىماتىنا يە بولۋمەن بىرگە، مەملەكەتتە ورتاق قولدانىلاتىن ءتىل-جازۋىن وزدىگىمنەن وقىپ يگەرىپ سويلەي دە، جازا دا الاتىن قابىلەتكە يە بولدىم.  1983-جىلى داڭقپەن جۇڭگو كوممۋنيستىك پارتياسىنا مۇشە بولىپ، مەملەكەتتىك باجى سالاسىندا كادر، ءبولىم دارەجەلى باسشى بولىپ، پارتيا ۇيىمى مەن ۇكىمەت تاپسىرعان قىزمەت مىندەتتەرىن ۇزدىك ناتيجەمەن ورىنداپ، ۇيىمنىڭ سەنىمىنە، حالىقتىڭ قۇرمەتىنە بولەنىپ، كوكتوعاي، شىڭگىل اراسىندا تابانى كۇرەكتەي 30 جىل باجى سالاسىندا قىزمەت ىستەپ، بارعان جەرىمە تامىر تارتىپ، باسقان جەرىمە ءىز قالتىرىپ، 2012 – جىلىدىڭ اقىرىندا داڭقپەن پەنسياعا شىققان بولسامدا، يدەيالىق جاقتان جانە ۇيىمدىق جاقتان پەنسياعا شىقپاعاندىعىم سەبەپتى قازىرگە دەيىن كوپتەگەن مىندەتتەردى ارقالاپ كەلەمىن. ماسەلەن: «كوكتوعاي اۋداندىق كەلەشەك ۇرپاقتارعا كوڭىل ءبولۋ » كوميتەتىنىڭ ورىنباسار مەڭگەرۋشىسى، «ماتىنبەك مەيىر باعىشتاۋ قور قوعامىنىڭ» جاۋاپتىسى، «ماتىنبەك ۇلتتار ىنتىماعى تاربيە بازاسىنىڭ» جاۋاپتىسى قاتارلىلار…

 

سەرىك راقىم ۇلى: ءسىزدىڭ كەشىرمەلەرىڭىزگە كوز سالا وتىرىپ، « اكە كورگەن وق جونار، شەشە كورگەن تون پىشەر» دەگەن حالىق دانالىعى كوكەيىمە ورالىپ وتىر، ويتكەنى، اياۋلى اكەڭىزدىڭ كەزىندە سىچۋانبەكتى باعىپ العان حيكاياسى بۇل كۇندەرى اۋىزدان-اۋىزعا اڭىز بولىپ تاراۋدا، وسى ورايدا وسى ۇرپاققا ونەگە بولار يگى باستامانىڭ جالپى بارىسىن تولىقتاي اڭگىمەلەپ بەرسەڭىز؟

ماتىنبەك مۇراتقان ۇلى: كەيىنگى اكەم ەلەش ىسقاق ۇلى، كوكتوعاي اۋدانى قارا بۇلعىن اۋىلى جەبەتى قىستاعىنىڭ تۇرعىنى بولىپ، تالدىساي، دولانالى دەگەن شەت-شالعاي جەردى مەكەن ەتكەن 20 جىلدا ەش ءبىر جاناشىر جاقىنى جوق پاناسىز قالعان، حۇيزۋ ازاماتى شياۋمانى 3 جىل باعىپ، 1990-جىلى التاي قالاسىنان پانالاۋعا كەلگەن 50 جاسار شاماسىنداعى ورىس قاندى ازامات قابدىلدى (قازاقشا اتى) 5 جىل باعىپ، ءار قايسىسى ءوز مەكەندەرىنە قايتقاننان كەيىن، 1992-جىلى 11-ايدىڭ 29-كۇنى اۋدانعا جۇمىس بابىمەن كەلە جاتىپ، كۇزدىڭ قارا سۋىعىندا بارار  جەر، باسار تاۋى بولماعان سوڭ اشتىقتان بۇرالىپ، شيدىڭ اراسىن پانالاپ ەسەڭگىرەپ ەس-تۇسسىز جاتقان، 14 تە 15 جاسار ۋاڭ يۇڭ-دى تاۋىپ الىپ، قازاعىمىزدىڭ سالت-ءداستۇرى بويىنشا، كورشى-قولاڭدارىن جيناپ، اقسارباسىن سويىپ، ات قويۋ جانە باعىپ الۋ راسىمياتتارىن وتەپ، سىچۋاندىق بولعاندىقتان، ەلمەن-جەرىن ۇمىتپاۋ ءۇشىن سىچۋانبەك دەپ ات قويىپ، توي جاساپ 7 جىل ءوز بالاسىنان ارتىق كورىپ اسىرادى. سىچۋانبەك تە قىر قازاق تۇرمىس-تىرشىلىگىنە كوندىگىپ، قازاق ءتىلىن تەز ارادا يگەرىپ، وتباسى شارۋالارىن وزدىگىنەن ىستەپ، اكە-شەشەمىزگە كومەكتەسىپ، وتباسىمىزدىڭ ايرىلماس ءبىر مۇشەسىنە اينالىپ، ەش ۋايىمسىز كۇندەرىن وتكىزىپ جاتتى. 1999-جىلى اكەمىز ەلەش قاتتى ناۋقاستانىپ،    كوز جۇمار الدىندا مەنى قاسىنا شاقىرىپ الىپ، «بالام ماتىنبەك  مىنالاردى ەسىڭدە بەرىك ساقتا، بىرىنشىدەن، مەن سىچۋانبەك بالامدى ۇيلەندىرىپ قازاق ساحاراسىن دۇبىرلەتىپ ات شاپتىرىپ، توي جاساپ بەرسەم-دەپ ويلاعان ەدىم، قازىرگى اۋرۋ جاعدايىم بولسا مىناۋ..... ەكىنشىدەن، قالاي دەگەنمەن سىچۋانبەك كەڭ ساحارادا مال باعىپ، دەربەس كوشىپ-قونعانعا قيىنشىلىق تارتىپ قالادى، سول ءۇشىن قالادان، ءبىر جان باعارلىق كاسىپ تاۋىپ ورنالاستىر. ۇشىنشىدەن، ول جاس كەزىنەن باستاپ اتا-انا مەيىرىن كورە الماي، زاڭسىز التىن-كەن قازۋشى الدامكوستەر جاعىنان الدانىپ، وسى جاققا كەلگەن. سول ءۇشىن ونىڭ تۋعان اكە-شەشەسىن سۇراستىرىپ تاۋىپ بەرسەڭ، سوندا عانا مەن و دۇنيەلىك بولسامدا الاڭسىز بولار ەدىم»،-دەپ بىزگە دەگەن سەنىمىن ءبىلدىرىپ، قيماستىقپەن ومىردەن وتكەن ەدى.

 

1999-جىلى اكەمىز قايتىس بولعاننان كەيىن، وتباسىنداعى اعا-باۋىر، قارىنداستار بولىپ، اكەگە دەگەن ساعىنىشىمىزدى باسا الماي جىلاستىق، وسى كەزدە ۇزاق ۋاقىت بالاسى بولىپ، تۋماسا دا تۋعانداي بولىپ كەتكەن سىچۋانبەك ءىنىمىز دە بىزدەن ارمان ەگىلىپ جىلاپ، ەرەكشە اۋىر قايعىعا باتىپ، اكەمىزدىڭ رامكاعا سالىنعان راسىمىن ۇنەمى قولىنا الىپ كوز جاسىن كولدەتىپ قاراپ وتىراتىن بولدى.  مەن اكەمىزدىڭ سوڭعى جۇمىستارىن ءداستۇرلى سالتىمىز بويىنشا ىڭعايلاعاننان كەيىن، اكەمنىڭ وسيەتى بويىنشا سىچۋانبەككە قارايلاسا باستادىم، ءارى قاتىستى ورىندارمەن سويلەسۋ ارقىلى ونى اۋداندىق مەيمانحانانىڭ پار قازان جاعۋ قىزمەتىنە ورنالاستىرىپ، اكەمىزدىڭ تاپسىرعان وسيەتىن ءبىر-بىرلەپ ورىنداي باستادىم. ول وسى قىزمەتتى ىستەۋ بارىسىندا قىزمەتكە كوندىگە الماي مەنى قاتتى الاڭداتتى، ويتكەنى، ول 7 جىلدان استام ۋاقىتتان بەرى ساحارا تۇرمىسىنا كوندىگىپ كەتكەندىكتەن، قالا تۇرمىسىنا كوندىگە المادى.  ءسۇتتى شاي ىشپەسە باسى اۋىراتىن، ايران-ءسۇت ىشپەسە باسقانى تاماق ىشكەن قۇرلى كورمەيتىن ادەتتەرى دە بايقالدى…

 

ءسويتىپ مەن اكەمنىڭ ءۇشىنشى وسيەتىن ورىنداۋ  ءۇشىن، سول كەزدەگى اۋداندىق مەيمانحانا باستىعى ۇي گۇيليىڭ-دى ىزدەپ بارىپ، سىچۋانبەكتىڭ جالپى جاعدايىن تانىستىرۋ ارقىلى، ونىڭ تۋعان جەرىنە ادام ىزدەۋ قۇلاقتاندىرۋىن جازىپ جاريالادىق.  سول ارقىلى 20 نەشە كۇننەن كەيىن سىچۋانبەكتىڭ شەشەسى حابارلاسىپ، كوپ وتپەي ءبىزدىڭ وتباسىمىزعا كەلىپ، بەت كورىستى. قيۋادان تابىسقان شەشەلى-بالالى ەكەۋى ەڭىرەگەندە ەتەگى جاسقا تولىپ، قۇشاقتارى جازىلماي، ۇزاق ۋاقىتقا دەيىن ساعىنىش جاستارىن تيا الماي، قايتا-قايتا بىزگە باستارىن ءيىپ قۇرمەت ءبىلدىردى. ولاردىڭ جاعدايىنا قايمىققان ءبىزدىڭ دە كوڭىلىمىز بوساپ كوزىمىزدەن ىستىق جاس تامشىلارى مونشاقتادى. سونىمەن شايىمىزدى ءىشىپ، تاماققا جايعاسقاننان كەيىن شەشەسى، "ۋاڭ يۇڭنىڭ ناعاشى اپاسى سىچۋانبەك جوعالعاننان باستاپ جىلاي-جىلاي كوز جانارىنان ايرىلعاندىعىن ايتىپ" ءارى بىزگە دەگەن شىن ىقىلاستى راقىمەتىن ءبىلدىرىپ، رازى قوشتىعىمىزدى الىپ، وسى جولى ناعاشى اپاسىنىڭ ساعىنىشىن باسۋ ءۇشىن سىچۋانبەكتى ەرتىپ اۋىلىنا جول الدى، مەندە تۋىستىق قيماستىعىمدى ءبىلدىرىپ، سالتىمىز بوينشا سالەم-ساۋقىتىمدى بەرىپ جولعا سالدىم.

 

2003-جىلى «سارىس» دەگەن جۇقپالى اۋرۋ پايدا بولىپ، ەلىمىزدىڭ جەر-جەرىن كارەنتىندەۋىنە بايلانىستى سىچۋانبەك باۋىرىمىزدا كەلە الماي قالدى.  2008-جىلى سىچۋاننىڭ ۋىنچۋان اۋدانىندا قاتتى جەر سىلكىنۋ تابيعي اپاتى بولدى، مەن قاتتى دەگبىرسىزدەنىپ سىچۋانبەككە كوپ رەت تەلەفون بەرگەن بولسامدا 2 دە 3 ايعا دەيىن جالعانبادى. كەيىن سىچۋانبەك ءوزى تەلەفون بەرىپ، " اكە-شەشەسىنىڭ جەر سىلكىنىسى اپاتىندا ءىز-توزسىز جوعالعانىن، ءوزىنىڭ جەڭىل جارالانىپ امان قالعاندىعىن، ءارى ول جاقتا ەشقانداي سۇيەنىشى بولماعاندىقتان شينجياڭعا قايتىپ سىزدەرمەن بىرگە بولسام" دەگەندى ارماندايتىندىعىن ايتتى. سونىمەن مەندە ءارى-سارى بولماستان جەتەرلىك جول قاراجاتىن جىبەردىم، ءسويتىپ ءىنىمىز سىچۋانبەك 2008-جىلى 8-ايدىڭ 26-كۇنى اۋدانعا كەلىپ بىزبەن قايتالاي قاۋىشتى. سول كەزدە مەن ونىڭ الدىنان شىعىپ اۋداندىق قاتىناسىقا بارىپ قارسى الدىم، ادامدا بۇرىنعى بەينەسىنەن جۇرناق جوق، قاتتى السىرەپ قۇر سۇلدەرى عانا قالىپتى كورگەن جەردەن قاتتى تۇرشىكتىم. ويتكەنى، بۇرىنعى ساحارادا سايگۇلىك ءمىنىپ، سايران سالىپ، ات قۇلاعىمەن ويناعان قارا دومالاق ازاماتتىڭ سول كەزدەگى رۋحي بەينەسى كوز الدىما كەلىپ، العاش قۇشاقتاي العاندا تاني الماي قالدىم. سونىمەن اعا-باۋىرلار قايتادان باس قوسقاننان كەيىن، مەن وعان جەر سىلكىنىسىنەن كەيىن دۇنيەدەن قاتتى ۇمىتسىزدەنىپ، كۇدەر ءۇزىپ رۋحي جاقتان ءوزىڭدى تاستاپ قاتتى السىرەپسىڭ، ۇيدە جاتىپ بىرنەشە اي دەمالىپ، بوي جازىپ كۇتىنىپ بۇرىنعى قالپىڭا كەلگەننەن كەيىن بارىپ جۇمىس ىستەسەڭ دە بولادى، مەن باردا استە الاڭداۋشى بولما دەدىم. سونىمەن ونى جەرگىلىكتى پارتيا مەن ۇكىمەتتىڭ قامقورلىعىمەن قاراتۇڭكە مىس-نيكەل كەنىنە جۇمسشى ەتىپ قىزمەتكە ورنالاستىردىم.

 

سەرىك راقىم ۇلى: ءسىزدىڭ ءوز اتىڭىزدا «ماتىنبەك مەيىر باعىشتاۋ قور قوعامى» قۇرىلعان ەكەن، بۇل يگىلىكتى شارۋانى قالاي باستاپ،   قوعامدى قالاي قۇرعان ەدىڭىز، قازىرگە دەيىن قانداي ۇلاعاتتى شارالارعا مۇرىندىق بولىپ كەلەسىزدەر؟ قوعامنىڭ شاراپاتىن كورىپ جاتقاندار دا از ەمەس بولار؟

ماتىنبەك مۇراتقان ۇلى: تاربيە-ادام بولۋدىڭ ارناسى، ءبىلىم-دارىندى بولۋدىڭ قويماسى، قوعام-پارىقتاۋ مەن ەلىكتەۋدىڭ ايناسى. العاشقى وتباسىنىڭ ونەگەلى تاربيەسى ماعان ادەت ۇعىمىن ءسىڭىردى. ءوز اكەم مۇراتقان نە ءبارى 12 جاسىمدا قايتىس بولدى. كوزى اشىق كوكىرەگى وياۋ كوپشىل قاراپايىم مالشى ەدى. كەيىنگى اكەم ەلەش ەلگەزەك قايىرىمدى، ادام بالاسىن الالامايتىن ەڭبەكشىل، قاجىرلى دا، قاراپايىم جان ەدى. 1992-جىلى قارا ەرتىس بويىنان زاڭسىز التىن-كەن قازۋشىلاردىڭ جان ساۋعالاۋىندا اداسىپ قالىپ، كۇزگى قارا سۋىقتا شيدىڭ اراسىن پانالاپ شالا جانسار جاتقان 14 تە 15 جاسار ۋاڭ يۇڭ-دى تاۋىپ الىپ، سىچۋاندىق بولعاندىقتان، ەل مەن جەرىن  ۇمىتپاۋ ءۇشىن سىچۋانبەك دەپ ات قويىپ، توي جاساپ 7 جىل ءوز بالاسىنان ارتىق كورىپ اسىراپ، 1999-جىلى اۋرۋ سەبەبىنەن كوز جۇمار الدىندا ماعان تاپسىرىپ دۇنيەدەن وتتى. ول كىسى 1998-جىلى اۆتونوميالى رايون جاعىنان «ۇلتتار ىنتىماعىنىڭ وزاتى» بولىپ سيلاندى.

 

شەشەم اپيزا اق ەدىل، اشىق-جارقىن وتباسىن ورداعا ايلاندىرعان، ۇرپاعىن الپەشتەپ وسىرگەن، قورمال انا ەدى.

 

مەن كىشكەنتايىمنان اكەدەن ايرىلىپ، ەندى عانا 7-كىلاس تابالدىرىعىن اتتاي بەرە وتباسى اۋىرتپالىعى سەبەبىنەن، مەكتەپكە جىلىنا تاپسىرۋعا ءتيىستى 25 يۋان وقۋ قاراجاتىن تاپسىرا الماي شەشەم امالسىزدان وقۋدان شىعارىپ الۋعا ءماجبۇر بولىپ، قايتەرىن بىلمەي تارىعىپ وتىرعاندا، مۇنى ەستىگەن حانزۋ كورشى ياڭ پىڭ-ي جۇگىرىپ كەلىپ، "وقۋدا جاقسى مۇنداي بالانى شىعارىپ الۋعا بولمايدى، بۇل اقشانى مەن تولەيىن"،-دەپ اقشانى شەشەمە ۇسىندى. ءسويتىپ قايتالاي وقۋ-وقۋىما وراي جاراتىپ بەردى. وسىدان باستاپ مەنىڭ جاس جۇرەگىمدە ۇلتتار دوستىعىنىڭ وشپەس الاۋى مازداپ، كەيىن ەر جەتكەندە مەندە وسىنداي ىزگى نيەتتى جانداردىڭ كومەگىن اقتاپ، قوعامعا ءوز ۇلەسىمدى قوسسام دەگەن وسكەلەڭ سانا پايدا بولىپ، ەسىمنەن ماڭگى كوتەرىلمەدى.

 

 

1982-جىلى التاي ايماعىنان قازىنا-ساۋدا مەكتەبىن ءبىتىرىپ، كوكتوعاي اۋدانى باجى مەكەمەسىنە ورنالاسقاننان باستاپ، بۇرىنعى ايتقان سەرتىمدى ايعاقتاپ ابىرويمەن ورىنداۋ ءۇشىن، قوعامداعى جوق-جىتىككە  كومەكتەسۋدى ادەتىمە اينالدىرىپ،    قىزمەت ىستەگەن 30 جىلدا ءار ۇلت حالقىنان 112 قيىنشىلىعى بار وقۋشىعا كومەكتەسىپ، 80 مىڭ يۋاننان استام مەيىر باعىشتاۋ قاراجاتىن تاراتتىم. الايدا، «جالعىزدىڭ ءۇنى، جاياۋدىڭ شاڭى شىقپاس»، «كوپپەن كورگەن ۇلى توي» دەگەن حالىق دانالىعىنا كوزىم جەتىپ، قور قوعامىن قۇرۋ مەنىڭ ۇزاقتان كۇتكەن ارمانىم ەدى. 2013-جىلى بەس ۇلتتان قۇرام تاپقان العاشقى ءۇش ادامنان دامىپ قازىرگى ءجۇز جەتپىس التى ادامى بار «ماتىنبەك مەيىر باعىشتاۋ قور قوعامىن» قۇرىپ، قوعام قۇرىلعان 8 جىلدا 3700 دەن استام ءار ۇلت وقۋشىلارىمەن قيىنشىلىعى بار وتباستارىنا كومەكتەسىپ، اتالعان قارجى 730 مىڭ يۋاننان استى. بۇدان سىرت قۋەرتىس قالاشىعى ورتالىعىنان «ماتىنبەك مەيىر باعىشتاۋ قيمىل ورتالىعىن» اشىپ، (قازىر ماتىنبەك ۇلتتار ىنتىماعى تاربيە بازاسى بولىپ وزگەردى) جاستار مەن جاس وسپىرىمدەردى وتانشىلدىق رۋح پەن تاربيەلەپ كەلەمىن، ءارى اۋدانىمىزداعى بەس اۋىل، بەس قالاشىق پەن ۇلانقايىر ساحاراداعى مالشىلار وتباسىنا دەيىن ءوز كولىگىممەن ارالاپ بارىپ، پارتيانىڭ ساياساتىن، مەملەكەتتىڭ زاڭىن، ۇلتتاردىڭ ۇلى ىنتىماعىن ۇگىتتەپ، ۇنەمى لەكسيا سويلەپ، اۋەلگى ماقساتتى ۇمىتپاي پارتياعا تىعىز ىلەسىپ، بورىشىمدى ەستە بەرىك ساقتاپ ءارى ۇگىتشى ءارى ونەگەلىك رولىمدى باتىل جالعاستىرىپ كەلەمىن. قازىرگە دەيىن 382 مايدان لەكسيا سويلەپ، تاربيە العان جالپى ادام سانى 70 مىڭنان استى. وسى لەكسيانى تىڭداعان حالىق بۇقاراسى ءبىزدىڭ ۇگىت ۇيىرمەمىزدى ”ەكرانسىز تەلەۆيزور، سويلەسۋگە بولاتىن راديو ەكەنسىزدەر“،-دەپ جوعارى باعا بەردى.

سەرىك راقىم ۇلى: ءبىر اڭگىمەڭىزدە پارتيامەن ۇكىمەتتىڭ ماپەلەۋىندە "اتامدا كورمەگەن جاقسىلىقتى بوتامدا كوردىم دەپ قالىپ ەدىڭىز، بۇل دا بولسا اششى تەرىڭىزدىڭ بوداۋىنا كەلگەن شاراپات قوي، قازىرگە دەيىن قانشا مارتە داڭىق تورىنەن كورىندىڭىز؟ وسىناۋ داڭقتى اتاقتاردىڭ استارىنداعى ونەگەلى اڭگىمەلەرىڭىزدى ساباقتاساڭىز؟

 

ماتىنبەك مۇراتقان ۇلى: 2010-جىلى «جۇڭگوداعى ىزگى نيەتتى جاندار» تىزىمدىگىنەن ورىن الىپ «ىزگى نيەتتى جان» اتاعىن الدىم.

2012-جىلى اۆتونوميالى رايون دارەجەلى «ۇلتتار ىنتىماعىنىڭ ۇلگىسى» بولىپ التىن وردەنمەن ماراپاتتالىپ سيلاندىم.

 

2014-جىلى «شينجياڭدى اسەرلەندىرگەن ون ۇزدىك» تىڭ ءبىرى بولىپ مارپاتتالىپ سيلاندىم.

 

2014-جىلى «مەملەكەتتىك ۇلتتار ىنتىماعى العا باسارلىعىنداعى ۇلگىلى جەكە» بولىپ، التىن وردەنمەن ماراپاتتالىپ، باس شۋجي شي جينپيڭ مەن لي كىچياڭ قاتارلى پارتيا مەن مەملەكەت باسشىلارىنىڭ قابىلداۋىندا بولدىم.

 

2016-جىلى «اۆتونوميالى رايون دارەجەلى وزات پارتيا مۇشەسى» بولىپ سيلاندىم.

 

2016-جىلى مەملەكەت دارەجەلى «ۇزدىك نەگىزگى ساتى ۇگىتشىسى» اتاعىن الدىم.

 

2017-جىلى «جۇڭگو باجى سالاسىنداعى مايتالمان باسشى» اتاعىن الدىم.

 

2019-جىلى اۆتونوميالى رايون دارەجەلى «ءمورال ۇلگىسى»بولىپ ماراپاتتالدىم.

 

2019-جىلى مەملەكەتىمىز قۇرىلعاندىعىنىڭ 70 جىلدىق مەرەي تويىن قۇتتىقتاۋ بايلانىسىمەن التىن وردەن قادادىم.

 

2019-جىلى مەملەكەتىمىز قۇرىلعاندىعىنىڭ 70 جىلدىعى مەن شينجياڭنىڭ بەيبىت ازات بولعاندىعىنىڭ 70 جىلدىعىن قۇتتىقتاۋ زور جيىنى اۆتونوميالى رايوندىق حالىق سارايىندا سالتاناتپەن اشىلدى. وسى بارىستا مەن مەملەكەتتىك ۇلتتار ىنتىماعى العاباسارلىعىنداعى ۇلگىلى جەكە اتىنان سوزگە شىقتىم.

 

2020-جىلى 8-ايدا ماتىنبەك اتىنداعى ءوزىم قۇرعان قور قوعام، مەملەكەت دارەجەلى «ەڭ ۇزدىك ەرىكتىلەر ۇيىمى» اتاعىنا يە بولدى.

 

2020-جىلى 12-ايدا مەملەكەت دارەجەلى «جاس ۇرپاقتارعا كوڭىل ءبولىپ، كومەكتەسۋدەگى وزات جەكە» بولىپ التىن وردەن تاعىپ ماراپاتتالدىم.

 

2015-جىلى دامىعان وڭىرلەردە ساپاردا بولىپ، دۇنيە جۇزىلىك فاشيزمگە قارسى سوعىس جەڭىسىنىڭ 70 جىلدىعى مەن جاپون باسقىنشىلارىنا قارسى سوعىس جەڭىسىنىڭ 70 جىلدىعىن ەسكە ءتۇسىرۋ، تويلاۋ جينالىسىنىڭ استانا بەيجيڭدە وتكىزىلگەن پاراتتان ءوتۋ قيمىلىنا قاتىناسىپ، پارتيا مەن مەملەكەتتىڭ ماپەلەۋىندە " اتامدا كورمەگەن جاقسىلىقتى بوتامدا كوردىم"« قۇس ۇيادان نەنى كورسە،   ۇشقاندا سونى الادى »-دەگەندەي،   مەن اكە مۇراتىن  جالعاستىرۋشىمىن، ال، مەن ۇلتتار ىنتىماعىنىڭ جالعاۋشىسى بولسام،   مەنىڭ ۋحان قالاسى قازىنا-زاڭ ەكونوميكا ۋنيۆەرسيتەتىندە وقىعان قىز بالام مەرۋەرت سول مەكتەپتە وقىعان كەزدە اتاسىن ۇلگى ەتىپ، ءار ۇلت ساباقتاستارىنا كومەكتەسىپ، «ۇلتتار ىنتىماعىنىڭ ۇلگىسى»-دەگەن داڭقتى اتقا يە بولدى، قازىر ول  3-ۇرپاق ۇلتتار ىنتىماعىنىڭ جالعاستىرۋشىسنا اينالدى.

 

ۇلكەن جاقتان العاندا، اتا-انا، مەكتەپ جانە قوعام بولىپ، پارتيامەن ۇكىمەتتىڭ تاربيەلەۋى مەن قامقورلىعى مەنىڭ ونەگەلى ءىس ىستەۋىمە داڭعىل جول اشتى، اسىرەسە، مەن 7-كىلاس وقيتىن كەزىمدە، وقۋ قاراجاتىن تولەي الماي، شەشەم زار ەڭىرەپ وقۋدان شىعارىپ الماقشى بولعاندا، ياڭ پىڭ-ي ەسىمدى قۇتقارۋشىمنىڭ قاسىمنان تابىلىپ، جانى اشىپ جانىنان اقشا شىعارىپ، قايتالاي وقۋ ورايىنا يە ەتكەن ىزگى نيەتى، مەنى قاتتى اسەرلەندىرىپ  ءتىپتى دە كوپتەگەن قيىنشىلىعى بار جاندارعا كومەكتەسۋىمە ۇلكەن وي سالىپ، ونەگە بولۋعا باۋرادى. ونىڭ ۇستىنە پارتيا مەن ۇكىمەتتىڭ قولداۋى، حالىقتىڭ  قارسى الۋى، مەنىڭ ىزگى ىستەردى جالىقپاي جالعاستىرۋىما رۋحاني جاقتان ۇلكەن كۇش-قۋات بەردى.

 

سەرىك راقىم ۇلى: جۇڭگو توپىراعىنداعى ءار ءبىر جان  پارتيا تاريحىن مۇقيات ۇيرەنىپ، ونىڭ ىشكى ءمانىن تەرەڭدەي ءتۇسىنىپ، وڭاي-وسپاق قولعا كەلمەگەن بالدان ءتاتتى باقىتتى بۇگىنگى كۇندەرىمىزدى قادىرلەپ، ەكىنشى 100 جىلدىق كۇرەس نىساناسىن ىسكە اسىرۋ جولىندا جۇدىرىقتاي جۇمىلىپ، قاراپايىم قىزمەت ورنىندا ءوز مىندەتىن ادا ەتىپ، وتانعا ۇلەس قوسىپ، ءتىپتى دە بيىك بەلەستەردى باعىندىرۋ ءۇشىن، ءبىر نيەت، ءبىر تىلەكپەن  قۇلشىنۋى بۇل كۇندەرى كوز سالار كومبەمىزگە  اينالىپ وتىر. ال، ەندەشە الداعى قۇلشىنىس باعدارىڭىز تۋرالى دا ايالداي كەتسەڭىز؟

ماتىنبەك مۇراتقان ۇلى: مەن جۇڭگو كوممۋنيستىك پارتياسى قۇرىلعاندىعىنىڭ 100 جىلدىق مەرەيتويىن تويلاپ، قۋانىشپەن 7-ايدىڭ 4-كۇنى التاي ايماعىنا كەلگەننەن كەيىن التاي ايماعىنداعى پارتيا-ۇكىمەت باسشىلارى مەن ءار ۇلت حالىق بۇقاراسى اۋەجايدا قىزۋ قارسى الىپ، قۇشاعىمدى شوق-شوق گۇلدەرمەن تولتىرىپ، ەرەكشە ىستىق ىقىلاسپەن قۇرمەت ءبىلدىردى. وسىدان كەيىن التاي ايماعىنىڭ باسشىلارى مەن وزات ۋاكىلدەر قاتىناسقان اڭگىمە جيىنى اشىلىپ، باس شۋجي شي جينپيڭنىڭ ماڭىزدى ءسوزىن ەت قۇلاعىممەن ەستىپ، ناق مايدانداعى سالتاناتتى جاعدايدى كوزىممەن كورىپ، پارتيامىزدىڭ 100 جىلدىق مەرەيتويىنداعى داڭقتى ساتتەردىڭ كۋاگەرى بولعانداعى كورگەن-بىلگەندەرىممەن، مەرەيلى ساتتەردى كوپشىلككە باياندادىم. قايتىپ كوكتوعاي اۋدانىنا كەلگەننەن كەيىن اۋكوم مەن جەركومنىڭ قىزۋ قارسى الۋىندا بولىپ، 2021-جىلى 7-ايدىڭ 6-كۇنىنەن باستاپ، ىلگەرىندى-كەيىندى بولىپ قازىرگە دەيىن 6 دا 7 ورىنعا لەكسيا سويلەپ، پارتيانىڭ ءۇنىن قالىڭ حالىق بۇقاراسى مەن كادرلارعا جەتكىزدىم. بۇدان سىرت قازىرگى ىستەپ وتىرعان قور قوعامى سياقتى يگىلىكتى جۇمىستاردى بۇرىنعىدان دا جاقسى جالعاستىرىپ، كومەككە مۇقتاج بولىپ وتىرعان جاندارعا كومەكتەسىپ، پارتيامىزدىڭ ءۇنىن ءسوز جوق مىڭداعان-ون مىڭداعان وتباستارىنا جەتكىزىپ، پارتياعا ىلەسۋ، پارتيانىڭ ءسوزىن تىڭداۋ، پارتياعا العىس ايتۋ سياقتى يگى جۇمىستاردى بۇدان كەيىن دە تىنباي جالعاستىرىپ، ”ۇلتتار ىنتىماعى “ مەن ”جۇڭحۋا ۇلتتارى ورتاق تۇلعاسى تانىمىن“ بەكەمدەپ، ءار ۇلت حالقىن اناردىڭ دانىندەي ۇيىستىرۋعا كۇش سالىپ، باس شۋجي شي جينپيڭنىڭ جاڭا ءداۋىر جۇڭگوشا سوتسياليزم يدەياسىمەن وي-سانانى قارۋلاندىرىپ، جۇڭگو ارمانىن جۇزەگە اسىرۋ جولىندا تىنباي قۇلشىنىپ، ادامزاتتىڭ  تاعدىرلاس ورتاق تۇلعاسىن قۇرۋ جولىندا ايانباي تەر توگىپ، پارتيا مۇشەسىندىك رولىمدى تولىق ساۋلەلەندىرىپ، پارتيانىڭ ءۇنىن جالىقپاي بۇقاراعا جەتكىزەمىن.

 

سەرىك راقىم ۇلى: ماتىنبەك اعا، كەلەلى كەڭەسىڭىزگە كوپتەن-كوپ راقىمەت

 

ماتىنبەك مۇراتقان ۇلى: قىمباتتى ۋاقىتىڭدى ءبولىپ، ارنايى سۇحبات العانىڭا العىسىم شەكىسىز، بەرەرى مول سۇبەلى سۇحباتتارىڭىز جالعاسا بەرسىن!

 

 

 

 

    中央广播电视总台 央广网 版权所有

    مەرەكە مەرەيىنە بولەنگەن مەدالدى ازامات

    باس شۋجي شي جينپيڭنىڭ ءسوزىن تيان-انمىن الاڭىندا تۇرىپ، ەت قۇلاعىمەن ەستىگەن حالقىمىزدىڭ ماقتانىشىنا اينالعان مەملەكەتتىك ۇلتتار ىنتىماعى العا باسارلىعىنداعى ۇلگىلى جەكە، ۇگىت-نازاريا شەبىندەگى مەملەكەتتىك ۇزدىك جەكە، كوكتوعاي اۋداندىق كەلەشەك ۇرپاقتارعا كوڭىل ءبولۋ كوميتەتىنىڭ ورىنباسار مەڭگەرۋشىسى ماتىنبەك مۇراتقان ۇلىمەن وتكىزىلگەن سۇحبات