ول كۇرەۋىش ماشينامەن سەل اپاتىنان 70 ادامدى قۇتقاردى، ءولىم مەن ءومىر ارپالىسى...

7-ايدىڭ 20-كۇنى حىنان ولكەسى گۇڭ-ي قالاسى، ميحى قالاشىعىندا تۇتقيىل سەل اپاتى بولىپ، ەكى ۇلكەن اۆتوبوزدا 70 ادام قامالىپ قالادى. وسىنداي ءولىم مەن ءومىر ارپالىسىندا ءبىر جىگىت كۇرەۋىش ماشينامەن كەلىپ كولىكتەگى بارلىق ادامدى قۇتقارىپ قالادى. سول جاعدايدى باسىنان وتكىزگەن جولاۋشى بىلاي دەدى: «ول كورىنگەن ساتتە، قۇتقارۋشى جۇلدىزىمىز كەلگەندەي قۋاندىق!»

«اۆتوبوزدىڭ جۇرۋىنە مۇمكىن بولمادى، سەلدىڭ ورتاسىندا قالدىق»

7-ايدىڭ 20-كۇنى ساعات 8:30 مينۋت وتكەندە جىڭجوۋ اۆياتسيا ونەركاسىپ باسقارۋ شۋەيۋانىنىڭ 70 كە تارتا جاڭا وقىتۋشىلارى كاسىپتىك كۋرسىنى تامامداپ، ەكى ۇلكەن اۆتو كولىكپەن 310-ءنومىرلى مەملەكەتتىك تاسجولدى بويلاپ حىنان گۇڭ-ي قالاسى جوۋلين قالاشىعىنان جىڭجوۋدى بەتكە الىپ جولعا شىعادى. جاڭبىر تولاسسىز جاۋعاندىقتان ساعات 12:00 بولعاندا گۇڭي قالاسى ميحى قالاشىعى گاۋمياۋ قىستاعىنا جەتكەندە تاۋدان تۇسكەن سەلگە جولىعادى.

وسى جاعدايدى باسىنان وتكەرگەن رۇي يۇڭ ياۋ بىلاي دەيدى: «سول كەزدە جاڭبىر قۇيىپ تۇردى، اۆتوبوزدىڭ سىرتىندا سەل ارقىراپ اعىپ جاتتى. سەلمەن بىرگە اعىپ كەلگەن تاس قيىرشىقتارى اۆتوبوزدىڭ تەرەزەسىن شاعىپ كەتتى، الدىمىزداعى 4 اۆتو كولىكتى سەل وراپ اعىزىپ كەتكەنىن كوزىمىزبەن كوردىك. ارتىنان سەل جول ۇستىنە كوتەرىلىپ، اۆتوبوزدىڭ ارى قاراي جۇرۋىنە مۇمكىندىك بەرمەدى». 

الدىعا ىلگەرىلەگەن سايىن سۋ تەرەڭدەي بەرگەن سوڭ، ەكى اۆتوبوز كەلگەن جولىمەن كەرى قايتپاقشى بولادى. رۇي يۇڭ ياۋدىڭ ايتۋىنا قاراعاندا، ولار وتىرعان اۆتوبوز ەكى قاباتتىق بولىپ، سۋ ءبىرىنشى قاباتىنا تولا باستاعان، جولاۋشىلاردىڭ جۇكتەرى تۇگەل سۋعا مالشىنعان، اۆتوبوزدىڭ باسىن بۇرعاننان كەيىن، اۆتوبوزدان اۋىر كىنارات شىعىپ، مەڭگەرۋ مۇمكىن بولمايدى، سەل ەكى اۆتوبوزدى تەڭسەلتىپ، كەرى باعىتتا يتەرىپ، مەملەكەتتىك تاسجولدىڭ سول جاق شەتىنە اپارادى، رۇي يۇڭ باستاعان 40 تان استام ادام وتىرعان اۆتوبوزدىڭ ءبىر دوڭگەلەگى جول شەتىندەگى جەر استى سۋ قۇبىرىنا كەپتەلىپ، شىعا الماي تۇرىپ قالادى. وسىنداي شۇعىل جاعدايدا، جولاۋشىلار اۆتوبوزدىڭ تەرەزەسىن شاعىپ، اۆتوبوز سىرتىنا شىقپاقشى بولادى. «سول كەزدە ەڭگەزەردەي ءۇش وقىتۋشى اۆتوبوزدىڭ تەرەزەسىنەن سىرتىنا شىعادى. ولار ءبىر مەتر 80 سانتيمەتر كەلەتىن ەڭگەزەردەي بويلارى بولسادا، جەرگە تۇسكەندە سۋ مويىندارىنان كەلگەندىكتەن، قالعاندارى جالعاستى تەرەزەدەن تۇسۋدەن جۇرەكسىنىپ توقتاپ قالدى، مەن جولدىڭ سوناۋ شەتىندە ءبىر قىستاق تۇرعىنىنىڭ ءبىزدى قۇتقارماقشى بولعانىن كوردىم. ءبىراق ارالىق تىم الىس ەدى، ونىڭ ۇستىنە جولدىڭ بەتى كىلكىگەن سۋ بولعاندىقتان، جاقىنداۋ مۇمكىن بولمادى».

ءولىم مەن ءومىر ارپالىسىندا، جىگىت كۇرەۋىش ماشينامەن كەلىپ ەكى ساعاتتاي ءجۇرىپ بارلىعىن قۇتقارىپ شىقتى

ءولىم مەن ءومىر ارپالىسىندا اق جەيدە كيگەن جىگىت كۇرەۋىش ماشينامەن كەلەدى. ول الدىمەن جول شەتىندەگى ءبىر داۋالدى قۇلاتىپ، اۆتوبوزعا قاراي جاقىنداي ءتۇستى. اۆتوبوز ىشىندەگىلەر قۋانعانىنان الاقايلاپ كەتتى. رۇي يۇڭ ياۋدىڭ ايتۋىنشا، سول كەزدە ءبىر قىز وقىتۋشى قۋانعانىنان كوزىنەن جاس پارلاتىپ، «قۇتقارىلاتىن بولدىق، قۇتقارىلاتىن بولدىق» دەپ ايعاي سالادى.

جىگىت سول كەلگەن بويدا، كۇرەۋشتىڭ باسىن تىك كوتەرىپ، الدىمەن 11 ايلىق جاس ءسابيدى قۇتقارادى. اۆتوبوزدىڭ توبەسىندەگى اۋا الماستىرعىش تەرەزەدەن شىعىپ كۇرەۋىشتىڭ ىشىنە سالعاننان كەيىن، سوڭىنان بىرنەشە ايەل وقىتۋشىنى كۇرەۋىشتىڭ ىشىنە شىعارادى، ءار جولى ون نەشە ادامنان، الدىمەن ايەلدەردى، سوڭىنان ەرلەردى قۇتقارادى. وسى اۆتوبوزداعى 45 ادام ىلگەرىندى-كەيىندى 3 رەت ويلى-شۇڭقىرلى جولمەن شيىرلاپ ءجۇرىپ قۇتقارىپ شىعادى. سوڭىنان بۇل جىگىت كۇرەۋىش ماشيناسىنا وتىرىپ، تاعى ءبىر اۆتوبوزداعى جولاۋشىلاردى قۇتقارۋعا بارادى. ساعات 13:00 وتكەننەن باستاپ ساعات 15:00 كە دەيىن ەكى ساعات كۇرەۋىش ماشينامەن 70 تەي ادامدى قۇتقارادى. 

ۇعىسۋىمىزشا وسى جىگىتتىڭ شەشەسى جەرگىلىكتى ورىنداعى ءبىر سەرىكتىكتە قىزمەت ىستەيتىن بولىپ، سول كۇنى سەلدەن اتتاپ باسا الماي وتىرعاندا، ءبىر توپ ادامنىڭ قينالىپ قالعانىن ەستىپ، سەرىكتىكتىڭ كۇرەۋىش ماشيناسىن جۇرگىزىپ سولاي قاراي اتتانادى.

«كۇرەۋىش ماشينا ءدال سەرىكتىكتىڭ اۋلاسىندا تۇر ەكەن، جۇرگىزۋدى ءبىلىپ تۇرسام دا، كىلتى جوق بولعان سوڭ، قۇلىپتىڭ استىنداعى سىمدى شىعارىپ توتە جالعاپ وتالدىرىپ الدىم»؟

رۇي يۇڭ ياۋ بىلاي دەيدى: «ءىس بىتكەن سوڭ ەستگەنىمىز، ءبىر قىستاق تۇرعىنى بۇل جىگىتتى راسىمگە ءتۇسىرىپ الىپتى، ءبىراق، ونىڭ اتى-ءجونىن قازىرشە ەشكىم بىلمەيدى. تەلەفون سيگنالى ناشار بولعاندىقتان، ونى ىزدەپ تابۋ ءبىرشاما قيىن بولىپ تۇر. ارتىنان سۇراستىرىپ تاۋىپ، بەتپە-بەت راحىمەەت ايتاتىن بولامىز».

«قۇتقارۋ جۇمىسى اقىرلاسقاننان كەيىن، ءبىر قىستاق تۇرعىنىنىڭ تۇسىرگەن كۇرەۋىش ماشينامەن قۇتقارۋعا كەلگەن جىگىتتىڭ بەينەسى

كەزەكتە، رۇي يۇڭ ياۋ باستاعان ءبىر توبى امان-ەسەن كۋرىس اشقان ورنىنا جەتكىزىلىپ، جول اشىلعاننان كەيىن ءبىراق جولعا شىعاتىن بولدى.

حانزۋشادان اۋدارعان: جازيرا بولاتباي قىزى

来源：央视新闻

监制，审稿：叶力夏提

翻译 : 贾孜拉

微信制作：阿依娜