ينفورماتسيا اشكەرەلەۋ: mzjubao@cnr.cn

وزەكتى ماقالالار

باقىل بول، ونەردىڭ نار تۇلعاسى

来源:央广网     |责编:古丽美热·霍孜汗|     发布日期: 2021-09-15 10:20

باقىل بول، ونەردىڭ نار تۇلعاسى

 

باقىل بول، ونەردىڭ نار تۇلعاسى

2021- جىل 9- ايدىڭ 11- كۇنى بەيجيڭ ۋاقىتى ساعات 12 دە كۇي ونەرىنىڭ ايتۋلى شەبەرى، عاسىردىڭ قۇرداسى، دومبىرانىڭ سىرلاسى، ٴاشىم تانۋشى، ساڭلاق سازگەر، ساقا كوممۋنيست، ەڭبەك ەرى كامال ماقاي ۇلى 98 جاسىندا ومىردەن ٴوتىپ، قارالى حابار قابىرعامىزدى قايىستىردى. 

您的浏览器不支持 audio标签

كامال ماقاي ۇلى سانالى عۇمىرىندا حالقىمىزدىڭ بايىرعى مۋزىكالىق مۇرالارىن جيناپ، رەتتەۋ، ٴاشىم ءدۇڭشى ۇلى قاتارلى حالىق ونەرپازدارىن زەرتتەۋ، كۇيلەرىن نوتاعا ٴتۇسىرتىپ، تاسپاعا جازدىرۋ، ارناۋلى كۇي جيناقتارىن شىعارۋ، ناسيحاتتاۋ، كادەگە جاراتۋ جولىندا تىنباي ەڭبەكتەندى. تۇعىرلى تۇلعانىڭ عاسىرعا جۋىق كەشىرمەلەرى اڭىزعا بەرگىسىز اڭگىمەگە تولى. مارقۇم بۇكىل بولمىسىمەن، ونەردەگى وزگەشە ورەسىمەن بۇگىنگە دە، بولاشاققا دا ونەگە.

 

ٴبىز اسا كورنەكتى كۇيشى، تانىمال سازگەر كامال ماقاي ۇلىنىڭ وتباسىنداعىلارعا، تۋىس-تۋعاندارىنا، بارماعىن سۇيگەن بارشا شاكىرتتەرىنە، جالپى ونەرسۇيەر قاۋىمعا شىن جۇرەكتەن كوڭىل ايتامىز. قازانىڭ ارتى قايىرلى بولعاي، بارلىق تۋىس-تۋعاندارىنا سابىر تىلەيمىز! 

您的浏览器不支持 audio标签

كامال اتا قازاقتىڭ كۇي ونەرىنىڭ قارا نارى، كۇيدى زامانعا ساي ومىرشەڭدىك ورەمەن بايىتۋشى، ءاشىم ءدۇڭشى ۇلىنىڭ كۇيشىلىك مەكتەبىن بۇگىنگى كۇنگە جالعاستىرۋشى كوشەلى ونەر قايراتكەرى، ارتىنا ۇشان-تەڭىز مول مۇرا قالدىرىپ كەتكەن كوركەمونەردىڭ كوش باسشىسى ەدى. اتامىزدىڭ تەلەگەي تەڭىز ونەرى مەن بيىك ادامگەرشىلىگى، وسكەلەڭ كىلسىك مۇراتى ٴبىزدىڭ ونەگە تۇتار تۇعىرىمىز. 

كۇيشىنىڭ ونەگەلى ٴومىرى مەن ىرگەلى ىزدەنستەرىنەن سىر شەرتەتىن «كاۋسار» اتتى تاڭدامالى شىعارمالار جيناعى بيىل 5-ايدا عانا شينجياڭ حالىق باسپاسىنان جارىققا شىعىپ، ءساتىن سالسا وقىرماندارمەن جۇزدەسۋ وتكىزەيىك دەپ قامدانىپ جۇرگەندە ٴبىرتۋار تۇلعانىڭ ارامىزدان اتتانىپ، كەلمەس ساپارعا كەتە بارعانى ۇلكەن وكىنش بولدى. بويىنداعى بارىن حالقىمىزدىڭ مادەنيەت ىستەرىنىڭ مايەكتەنۋىنە ارناعان بيىك ماقسۇت- مۇراتى بۇگىنگى ونەر قۋعان ساناتتى ۇرپاقتارىنا جۇعىستى بولىپ، ٴارقاشان جەبەپ- دەمەپ جۇرسە ەكەن دەپ تىلەيمىز. 

 

ەندى، پارتيامىز قۇرىلعاندىعىنىڭ 100 جىلدىعىن قۇتتىقتاۋ بايلانىسمەن ورتالىق حالىق راديو ستانسياسىنىڭ ٴتىلىشىسى سەرىك راقىم ۇلىنىڭ كامال ماقاي ۇلىمەن وتكىزگەن «عاسىردىڭ قۇرداسى، دومبىرانىڭ سىرلاسى» دەگەن سۇحباتىنا كەزەك بەرىپ، اتامىزدىڭ ونەگەلى ٴومىرى مەن قايتالانباس ونەرىن تاعى ٴبىر مارتە ەسكە تۇسىرەلىك. 

 

ايگىلى كۇيشى، سازگەر كامال ماقاي ۇلى 1926-جىلى 11-ايدا ىرىستى ىلە القابىنداعى توعىز جولدىڭ تورابى ىسپەتتى توعىزتاراۋ اۋدانىنىڭ مۇقىر اۋىلى ەشكىلىك قىستاۋلىعىندا دۇنيە ەسىگىن اشادى. 

 

اكەسى ماقاي ٴوز ورتاسىنا تانىمال دومبىراشى عانا ەمەس، سىبىزعىنى دا كەرەمەت تارتاتىن اۋىل ونەرپازى بولىپتى؛ ال شەشەسى ٴباتيما اۋىل ورتاسىنا بەلگىلى ولەڭشى ەكەن. وسىنداي ونەرلى جاندار وتباسىندا جارىق دۇنيەگە كەلگەن كامال بەسىكتەگى كۇنىنەن باستاپ كۇمبىرى مەن ٴان الديىنە بولەنىپ، ونەردىڭ ٴنارىن جورگەكتەگى كەزىنەن جۇرەگىنە قۇيىپ ەرجەتكەن ەكەن. 

 

داۋلەسكەر كۇيشى، سارىنى بولەك سازگەر كامال 20-عاسىردىڭ 40-جىلدارىندا كوركەمونەر كوشىنە ات باسىن بۇرىپ، تۋعان ەلى، وسكەن ورتاسىن كۇيمەن تەربەپ، انمەن اۋەلەتىپ، حالىقتىڭ سۇلۋ سازعا دەگەن سارىعىن باسىپ، رۋحاني الەمىن ارلەندىردى.

 

كاكەڭ حالقىمىزدىڭ كۇي ونەرىنىڭ ۇزدىك جاناشىرى، بايىرعى مۋزىكالىق مۇراعاتتاردى جيناپ، رەتتەپ، داۋىرلىك تۇسپەن كادەگە جاراتۋدا تىنباي ەڭبەكتەنگەن، حالىق مۇراسىنىڭ مۇڭىن ەرتە سەزىنگەن تۇعىرى بولەك تۇلعا. ونىڭ باستى دالەلى— ۇستازى ٴاشىم ٴدۇڭشى ۇلىنىڭ ارتىنا قالدىرعان مول مۇرالارىن حالىققا قاز-قالپىندا جەتكىزۋ جولىنداعى قۇلشىنىسىنان كورىنىس تاپتى.

 

ايگىلى كۇيشى كامال اتا ٴاشىم تانۋشى رەتىندە «كۇي كۇمبىرى»، «التىن بارماق»، «ٴاشىم كۇيلەرىنەن تاڭدامالىلار» اتتى كىتاپتاردى باسپادان شىعارىپ، كۇي مادەنيەتىمىزدىڭ ٴارىن دە، ءنارىن دە ساقتاي وتىرىپ زامانعا ساي وركەندەتۋگە ۇلكەن ۇلەس قوستى. ٴاشىم مادەنيەتىن زەرتتەۋ قوعامىن قۇرۋ، ٴاشىم اتىندا باقشا سالدىرۋ، ٴاشىم اتىندا تۇڭعىش كەزەكتى كۇي جارىسىن وتكىزۋ سىندى سان قىرلى ساليقالى جۇمىستارعا باس-كوز بولىپ، وسى جۇمىستاردىڭ ٴار قادامىن ٴوزى قاداعالاپ، ٴبىر باسى اقىلدىڭ كەنىشى، ونەردىڭ ٴورىسى ەكەنىن سان قىرىنان ايگىلەدى. قازىنالى قارتىمىز سوڭعى تىنىسىنا دەيىن اتالعان قوعامنىڭ قۇرمەتتى ءتوراعاسى، وبلىستىق، اۆتونوميالى رايوندىق «بەيزاتتىق مادەني مۇرا ــ قازاق ۇلتى دومبىرا ونەرىنىڭ» مۇراگەرى بولىپ كەلدى.

كامال ماقاي ۇلىن العاش كۇيشى-سازگەر رەتىندە ەلگە تانىتقان— 1971-جىلى جازعان «مەنىڭ دومبىرام» اتتى كۇيى ەدى.

 

زامان ٴديدارى جاڭالانىپ، ەلدىڭ جاي-كۇيى جاقسارىپ، مامىراجاي تىرلىككە قادام تاستاعان كەزدە، كۇيشىنىڭ بۋلىققان شابىتىنان تۋعان تاعى ءبىر ويلى دا ويناقى كۇيى ــ «كوركەم تيانشان» ەل اراسىنا كەكىنەن تاراپ كەتتى...

 

ارادا قوعامىنىڭ قاجەتى بويىنشا، زاماننىڭ سۇرانسىنا ساي، ٴتۇرلى سالالاردا قىرپۋلى قىزمەت ىستەپ، 1974- جىلدىڭ كۇزىندە كۇيشى جۇڭگو قازاق كوركەمونەرىنىڭ التىن بەسىگى، ءوزىنىڭ ىستىق ۇياسى ــ وبلىستىق ءان-ءبي ۇيىرمەسىنە قايتا ورالدى. ءدال وسى كەزدەر كۇيشىنىڭ «ەردىڭ جاسى ەلۋگە» تولعان، شىعارماشىلىقتا دا تولىسىپ، كەمەلدەنگەن دەر شاعى ەدى. سول جىلدارى «سۋشى قىز»، «ىرىستى ىلە»، «قىزعالداق» سياقتى اسەم اندەرى مەن «قاپشاعاي»، «جايلاۋ دۋمانى»، «شات داۋرەن»، «قابانباي شوقىسى» سياقتى كۇيلەرى تىڭداعان جاننىڭ الپىس ەكى تامىرىن ٴيىتىپ، كوڭىل كۇيىن تەربەپ، جالپى جۇرتتىڭ جۇرەك تورىنەن ورىن الدى.

 

كاكەڭ ادەبي جاسامپازدىقپەن دە اينالىسىپ، «تويدا توعىسقاندار» اتتى دراماسى مەن ءاشىم تۋرالى «كۇي پەرىسى»، «ارمان-اي» اتتى ەكى كينو سەناريىن جازىپ، تالاي اق تاڭداقتاردىڭ ورنىن تولتىرىپ، سان قىرلى تالانت يەسى ەكەنىن اڭعارتتى.

كامال اتا ادەبيەت-كوركەمونەر سالاسىنىڭ سەركەسى جانە زەردەلى زەرتتەرمەن رەتىندە ٴومىرىنىڭ سوڭىنا دەيىن قالامىن قالعىتپاي، تىنىمسىز ەڭبەكتەندى. «ىلە قازاقتارىنىڭ كوركەمونەر تاريحىنان دەرەك»، «‹ايگولەككە› 60 جىل»، «ءاشىمنىڭ سۋرەتى»، «‹بوتامدى› بوزداتقان قايران كۇندەر»، «شەرتپە كۇي شەجىرەسى» سياقتى ەستەلىك-ەسسە، زەرتتەۋ ماقالالارى مەن «ىلە جەردىڭ ورتاسىنداي»، «بابامنىڭ مۇرا تۇتتىم دومبىراسىن»، «تۋعان جەر ساعىنىشى»، «توقساننىڭ تولعاۋى»، «ءومىر-اي»، «وتانعا سەرت»، «عاسىر كورگەن»، «وتانىم»،«اكەمنىڭ سىبىزعى كۇيى» سياقتى ءان-كۇي، تەرمە-تولعاۋلارى، انە، سونىڭ ايعاعى. 

 

كۇيشىنىڭ شىعارعان كۇيلەرى مەن سول كۇيلەر جايىنداعى اڭىز-اڭگىمەلەردى تىڭداساڭىز، وي-قيالىڭىزدى الىسقا جەتەلەپ، جانىڭىزدى شۋاققا بولەپ، كوڭىلىڭىزدى كوككە ورلەتەدى، ويتكەنى، بۇل اڭگىمەلەردىڭ كەرەمەت تەبىرەنىستەن، شالقار شابىتتان، سۇڭعىلا شەبەرلىكتەن تۋىنداعانىنا كوز جەتكىزەسىز، ٴبارى دە ادامدى باۋراپ، ەلتىپ الا جونەلەدى. ۇلى وتانىمىزدىڭ كەڭ بايتاق كورىكتى دالاسىن كۇي سارىنىمەن بىرگە سەرۋەندەگەندەي كۇي كەشەسىز، كۇيشىنىڭ حالىققا، وتانعا، ونەرگە دەگەن شەكسىز ماحابباتىن سەزىنەسىز.

 

كورنەكتى اۋدارماشى، تىلگەر ابدىبەك بايبولاتوۆ «جاسامپاز كۇيشى، اعىلەسكەر دومبىراشى» دەگەن ماقالاسىندا: «كۇي ونەرىنىڭ شەبەرلىك شىڭىنان بوي كورسەتكەن ادامدى عانا كۇي ونەرىنىڭ مايتالمانى دەۋ دۇرىس، كامال ماقاي ۇلى ٴدال سولاي بيىكتەن كورىنگەن جاسامپاز كۇيشى، اعىلەسكەر دومبىراشى، زەرتتەۋشى، كومپوزيتور...»، « ٴبىز كامال تۋىندىلارىنان جانە كۇي شەرتۋ شەبەرلىگىنەن وزىندىك مانەردى، جاپالى ماشىقتى، وزگەشە شەبەرلىك تاڭباسىن بايقاي الامىز»-دەپ باعا بەرىپ، بايلام جاساعان بولاتىن كەزىندە.

 

كامال ماقاي ۇلى كونەنىڭ كوزىندەي، تاريحتىڭ وزىندەي كونەكوز دومبىراشىىلاردىڭ كۇيلەرىن جاتتاپ-حاتتاپ بۇگىنگە جەتكىزۋ، حالىقتىق مۇرالاردى كادەگە جاراتۋ ۇردىسىندە يگى باستاما كوتەرىپ، راديو-تەلەۆيزيا ستانسيالارىنىڭ التىن قورىنا 200 دەن استام حالىقتىق كۇي مەن كۇي اڭىزدارىن ۇسىنىپ، ونەردىڭ ساباقتاستىعىنا سارا جول سالدى. ايتالىق: ءاشىمىنىڭ دە ۇستازى قوڭقاي جونىندە دە ىرگەلى ىزدەنستەر جاساپ، باسقالارمەن بىرلىكتە «قوڭقايدىڭ قوڭىر كۇيلەرى» اتتى جيناقتى شىعارعانىنىڭ ٴوزى-اق كەمەل ويلى، كەۋدەسى التىن ساندىق، ۇلكەن كىسىلىكتى كىسى ەكەنىن ايگىلەسە كەرەك. 2007- جىلى «مەنىڭ دومبىرام» اتىندا ونەر كەشىن وتكىزىپ، ونەردەن ەسەپ بەرىپ، حالقىنا بەرگەنىنەن بەرى مول ەكەنىن ايعاقتادى.

 

2008-جىلى 3-ايدا اۆتونوميالى رايون دارەجەلى، 2011-جىلى 6-ايدا وبلىس دارەجەلى «بەيزاتتىق مادەني مۇرا ــ قازاق ۇلتىنىڭ دومبىرا ونەرىنىڭ» ۋاكىلدىك مۇراگەرى بولىپ بەكىتىلىپ، جۇڭگو قازاق شەرتپە كۇي ونەرىن زەرتتەۋمەن اينالىسىپ، ٴوز باسىنان ونەگە كورسەتىپ، سوڭىنا وشپەس مۇرا قالدىردى.

حالقىمىزدىڭ كۇي مادەنيەتىن دامىتۋعا كورنەكتى ۇلەس قوسقان قوعام قايراتكەرى، ساقا كوممۋنيست، ەڭبەك ەرى، كامال اتانىڭ ەڭبەگىن پارتيا، ۇكىمەت ورىندارى مەن ونەر سۇيەر قاۋىم جوعارى باعالادى. 2013-جىلى ىلە قازاق اۆتونوميالى وبلىسىنىڭ تۇڭعىش كەزەكتى «ىلە ادەبيەت-كوركەمونەرى سيلىعىنىڭ» ۇلەس سيلىعى بەرىلدى. جاپون شاپقىنشىلارىنا قارسى سوعىس جەڭىسنىڭ 2005- جىلى 60 جىلدىعى، 2015-جىلى 70 جىلدىعى بايلانىسىمەن پارتيا ورتالىق كوميتەتى، مەملەكەتتىك كەڭەس جانە ورتالىق اسكەري ىستەر كوميتەتى جاعىنان ارناۋلى وردەندەرمەن ماراپاتتالدى. 2019- جىلى «مەملەكەت قۇرىلعاندىعىنىڭ 70 جىلدىعنا بايلانىستى» مەدال بەرىلدى. 2021- جىلى 7- ايدا پارتيا قۇرىلعاندىعىنىڭ 100 جىلدىعى قارساڭىندا «پارتياداعى 50 جىل» اتتى وردەن تابىس ەتىلدى. 2015- جىلى اۆتونوميالى رايوندىق پارتكوم جاعىنان ورىنباسار ولكە دارەجەلى ولشەممەن ەمدەلۋ قاراجاتىن ەسەپتەن كوتەرۋ مامىلەسىنە يە بولسا، 2021- جىلى ورتالىق ۇيىمداستىرۋ ءبولىمى جاعىنان ورىنباسار ولكە دارەجەلى ەمدەلۋ تيىمدىلىگى جاسالدى. «ەڭبەگى باردىڭ ونبەگى بار » دەگەن وسى بولار!

 

كامال ماقاي ۇلى جۇڭگو مۋزيكانتتار قوعامىنىڭ مۇشەسى، اۆتونوميالى رايوندىق ادەبيەت-كوركەمونەرشىلەر بىرلەستىگىنىڭ جوراسى، اۆتونوميالى رايوندىق مۋزيكانتتار قوعامىنىڭ ورىنباسار ءتوراعاسى، ىلە قازاق اۆتونوميالى وبلىستىق ساياسي كەڭەس 6-كەزەكتى كوميتەتىنىڭ مۇشەسى، ىلە قازاق اۆتونوميالى وبلىستىق ادەبيەت-كوركەمونەرشىلەر بىرلەستىگىنىڭ قۇرمەتتى جوراسى قاتارلى مىندەتتەر وتەدى. مەيلى قانداي جۇمىسقا جەگىلسە دە، ۇيىمنىڭ تاپسىرعان مىندەتىن ابىرويمەن ورىندادى. اسىرەسە، ىلە قازاق اۆتونوميالى وبلىسىنىڭ ادەبيەت-كوركەمونەر ىستەرىنىڭ مارقايۋىنا، وبلىستىق ٴان-ٴبي ۇيىرمەسىنىڭ ىرگەلى ونەر ۇجىمى بولىپ قالىپتاسۋىنا ٴبىر كىسىلىك ۇلەس قوسىپ، تالاي تۇلەكتەردى باۋلىپ، كوركەمونەردىڭ كوكجيەگىن كەڭەيتتى.

كۇي ونەرىنىڭ مايتالمان مۇراگەرى كوزى تىرىسىندە ۇستازى اشىمنەن العان ونەگەسى بويىنشا ءداستۇرلى شەرتپە كۇي ونەرىن وزىنەن كەيىنگى ونەرپاز جاستارعا ۇيرەتىپ، شاكىرت تاربيەلەپ، ونەگە مەكتەبى بولا ٴبىلدى. بۇل قاتاردا جاقسىبەك ورالبەك ۇلى، شامسيا قۋاتبەك قىزى، جۇمالىك جاقىپبەك ۇلى، ۇران اقاتاي ۇلى، قاشاتاي جۇمانالى ۇلى، اردابي ماۋلەت ۇلى، نەمەرە شاكىرتتەرى ءالميات تۇرسىن ۇلى مەن سۇيەر ءانۋارقان قىزى سياقتى شاكىرتتەرىن اتاۋعا بولادى.

 

بۇل كۇندەرى ٴاشىم اتامىزدىڭ اتى اتالسا بولعانى، اۋەلى ەسىمىزگە كامال ماقاي ۇلىنىڭ ەسىمى ورالارى ءسوزسىز. ۇستاز بەن شاكىرت ساباقتاسىتعى، ۇندەستىگى دەگەن مىنە وسى. كامال ماقاي ۇلىنىڭ ەڭبەگى ارىدان جالعاسىپ كەلگەن كۇي مادەنيەتىمىزدىڭ مايەگىن بۇزباي، مازمۇنىن بايتىپ، ۇستازى ٴاشىم كۇيلەرىنىڭ بولەك سارىنىن سول قالپىنان اينىتپاي، بۇگىنگى ۇرپاقتىڭ ساناسىنا سىڭىرە بىلگەنىمەن ايرىقشا ايشىقتالادى، راسىندا، ءارقاشان ونەردىڭ التىن ارقاۋى ۇزىلمەسىن دەپ تىلەيىك.

 

ول كىسىنىڭ ءومىر ىزدەرى مەن ەڭبەكتەرى «جۇڭگو مۋزىكانتتارى»، «جۇڭگو ماماندارى سوزدىگى»، «جۇڭگو دارىندىلارى سوزدىگى»، «جۇڭگو كوركەمونەرشىلەرى توپتاماسى» قاتارلى كىتاپتاردا ارناۋلى تانىستىرىلدى. 

كاكەڭ ورىنداعان شەرتپە كۇيلەردىڭ قوڭىر اۋەنى كەشە ٴبىزدى قالاي تەربەسە، بۇگىن دە، بولاشاقتا دا بابالار سازىنىڭ كيەلى سارىنىمەن الديلەپ، كەمەل كەلەشەككە جەتەلەي بەرەتىنى انىق.

 

كامال ماقاي ۇلىنىڭ ونەگەلى عۇمىرى مەن جارقىن ەسىمى ۇرپاق جادىندا ماڭگى ساقتالادى!

 

مارقۇمنىڭ سۇيەگىمەن قۇشتاسۋ سالتى 9-ايدىڭ 12-كۇنى بەيجيڭ ۋاقىتى ساعات 13 تە وتكىزىلدى.

 

ءبىز بۇگىن اسا قايعىلى سەزىممەن تاڭداۋلى پارتيا مۇشەسى، كورنەكتى مادەنيەت قايراتكەرى، ايگىلى كۇيشى-كومپوزيتور كامال ماقاي ۇلىنىڭ سۇيەگىمەن قوشتاسقالى تۇرمىز- دەپ ٴسوز باستاعان بەلگىلى قوعام قايراتكەرى، قالامگەر توقتار ٴالباتىر ۇلى— مارقومىنىڭ كەشەندى ٴومىر جولىنا قايرىلا قاراپ، عۇمىرناماسىنا توقتالا كەلىپ،- كامال ماقاي ۇلى ءوزىنىڭ سانالى عۇمىرىندا جۇڭگو كوممۋنيستىك پارتياسىنا شەكسىز ادال بولىپ، وتان الدىندا قالتقىسىز قىزمەت وتەدى. ول پارتيانى، سوتسياليزمدى، تۋعان حالقىن بارىنشا سۇيە ءبىلدى. ساياسي مايداندا بەرىك تۇرىپ، ۇلتتىق بولشەكتەۋشىلىككە باتىل قارسى تۇردى. ۇلتتار ىنتىماعىن قورعاپ، پارتيا ورتالىعىمەن ءبىر اۋىزدىلىقتى ساقتادى. اينالاسىنداعى قىزمەتكەرلەردى، بالا-شاعالارىن دۇرىس جولمەن تاربيەلەپ، ولاردى پارتيانى، وتاندى سۇيۋگە، پارتيانىڭ سوزىنە قۇلاق اسىپ پارتياعا ماڭگى ىلەسۋگە جەبەۋشى بولدى. ول ءوزىنىڭ بار عۇمىرىن وتانىمىزدىڭ مادەنيەت ىستەرىن كوركەيتۋگە باعىشتادى. وبلىسىمىزداعى ءار ۇلت حالقى ارداقتى اقساقالىن ماڭگى ەستەن شىعارمايدى، ساعىنا ەسكە الادى. ءومىر جولىن، ونەر جولىن بولاشاق ۇرپاق ونەگە تۇتادى، مارقۇمنىڭ توپراعى تورقا، جاتقان جەرى جايلى بولسىن! باقىل بول، عاسىر اتا — اسىل اتا!- دەپ تۇيىندەدى. 

سونان كەيىن ەل اعالارى مەن ونەر قايراتكەلەرىنىڭ، كاكەڭ شاكىرتتەرىنىڭ ٴتۇرلى جولدارمەن جولداعان قارالى كوڭىل ايتۋ تەلەگراممالارى مەن حاتتارىنا كەزەك بەرىلىپ، قىسقاشا اتاپ ٴوتىلدى. كوڭىل ايتقانداردان اۆتونوميالى رايوندىق پارتكومنىڭ شۋجيى چىن چۋانگو، اۆتونوميالى رايوندىق ساياسي كەڭەستىڭ بۇرىنعى ٴتوراعاسى اسحات كەرىمباي ۇلى باستاعان باسشىلار مەن سۇلتان جانبولاتوۆ، قادىلبەك قاقان ۇلى، ەركەش قۇرمانبەك قىزى، ساعات جايپاق ۇلى، ٴشامىس قۇمار ۇلى، ٴسالي ٴسادۋاقاس ۇلى، تۇياق ايتاقىن ۇلى، بالاپان راباتوۆ... قاتارلى ونەر قايراتكەرلەرى جانە ورتالىق راديو–تەلەۆيزيا باس ستانسياسىنىڭ قازاق ٴبولىمى، شينجياڭ قازاق مادەنيەت قوعامى... سىندى قۇزۇرلى ورىندار ول كىسىنىڭ جۇبايى امىراگۇل شەشەيگە، بالا-شاعاسى مەن بارلىق تۋىس-تۋعاندارىنا كوڭىل ايتىپ، مارقۇمنىڭ رۋحاني ٴومىرىنىڭ ەندى باستالعاندىعىن، كامال تانۋعا ەڭبەكتەنۋ قاجەتتىلىگىن دىتتەپ كورسەتتى.

 

قۇرمەتتى تىڭدارمان قاۋىم، وسىمەن بۇكىل ءومىرى ءان-كۇيگە اينالعان كۇي اتامىز، ونەردىڭ شىنايى جانكۇيەرى، ايگىلى كۇيشى كامال ماقاي ۇلىنىڭ قازاسىنا ارنالعان «باقىل بول، ونەردىڭ نار تۇلعاسى» اتتى بەرىلىمىمىز تىزگىن ىرىكتى. ءبىراق، كۇي تەڭىزى ماڭگى سارقىلماق ەمەس، ونەر ولمەيدى، كامال-قارتتىڭ ەندى ەكىنشى عۇمىرى باستالادى، ول— ونەر عۇمىرى، الدا سانداعان شاكىرتتەرى مەن زەرتتەرمەندەر ءالى تالاي زەرتتەپ-زەردەلەيدى، ارى قاراي دامىتادى، ونەگسىن ۇلىقتايدى، ونەرىن ۇمىتپايدى. كۇي-كەرۋەنى الىسقا تارتسىن، ءاماندا! 

来源:中央广播电视总台

 

 

作者:赛力克

主持:齐娜尔

微信制作:古丽美热

: , 。 视频 小程序 赞 ,轻点两下取消赞 在看 ,轻点两下取消在看

中央广播电视总台 央广网 版权所有

باقىل بول، ونەردىڭ نار تۇلعاسى

2021- جىل 9- ايدىڭ 11- كۇنى بەيجيڭ ۋاقىتى ساعات 12 دە كۇي ونەرىنىڭ ايتۋلى شەبەرى، عاسىردىڭ قۇرداسى، دومبىرانىڭ سىرلاسى، ٴاشىم تانۋشى، ساڭلاق سازگەر، ساقا كوممۋنيست، ەڭبەك ەرى كامال ماقاي ۇلى 98 جاسىندا ومىردەن ٴوتىپ، قارالى حابار قابىرعامىزدى قايىستىردى.