اراق ءىشىپ الىپ ناۋقاس ادامدى ۇرعان شيپاگەردى جازالادى

جاقىندا، توراپتا، حىبەي ولكەسى حاندان قالاسى ۋيشيان اۋداندىق جۇڭگوشا ەمدەۋ شيپاحاناسىنىڭ ءبىر شيپاگەرى اراق ءىشىپ الىپ، قىزمەتكە شىققان ءارى ناۋقاس ادامدى ۇرعان دەگەن حابار تارالدى. تاياۋدا، ۋيشيان اۋداندىق جۇڭگوشا ەمدەۋ شيپاحاناسىنىڭ الەۋمەتتىك ۋيچات نومىرىندە بىلاي دەپ حابارلاندىرۋ شىعاردى: 6-ايدىڭ 30-كۇنى، اسقازان ايناسى ءبولىمىنىڭ قىزمەتكەرى يۋان فىڭ اراق ءىشىپ العاننان كەيىن قىزمەتكە شىققان، ءارى، ناۋقاس ادامعا قول جۇمساپ، بەلگىلەمەگە اۋىر دارەجەدە قيعاشتىق جاساعان، حارەكترى ەرەكشە اۋىر. زەرتتەۋ ارقىلى، يۋان فىڭعا قىزمەتتەن دەرەۋ توقتاتىپ قاتاڭ تەكسەرۋ جۇرگىزۋ، قىزمەتتەن توقتاتقان كەزدە، ەڭبەكاقىسىن، وسى ايلىق قوسىمشا تابىسىن جانە بارلىق يگىلىكتەنۋدى كۇشىنەن قالدىرۋ؛ ەڭ جوعارى بولعاندا 2000 يۋان ايىپ سالۋ؛ وسى جىلداعى ۇزدىك قىزمەتكەر بولىپ باعالانۋ تولىمدىلىعىن الىپ تاستاۋ، كاسىپتىك دارەجەسىن ءوسىرۋ تولىمدىلىعىن الىپ تاستاۋ؛ ءتارتىپ تەكسەرۋ كوميتەتىنە، باقىلاۋ كوميتەتىنە جانە ساقشىعا مالىمدەپ، شارا كورۋگە تاپسىرىپ بەرۋدى ۇيعاردى. 

شيپاحانا جاق بىلاي دەدى: بارلىق مەديالاردىڭ جانە بۇقارانىڭ باقىلاۋىن جانە سىن ايتىپ، تۇزەتۋ جاساۋىن شىن جۇرەكپەن قابىل الامىز. وسى ءىس جونىندە، شىنايى كەشىرىم سۇرايمىز، ءىس تۋدىرۋشىعا زاڭ-ءتۇزىم بويىنشا قاتاڭ شارا كوردىك؛ بۇدان كەيىن، بۇل ىستەن اشتى ساباق الىپ، شيپاحانامىز بويىنشا، ارناۋلى وڭاۋ قيمىلىن ورىستەتىپ، تاماشا ەمدەلۋ ورتاسىن جاراتىپ، ناۋقاستارعا كوڭىلدەگىدەي ەمدەۋ قىزمەتىن وتەيمىز.

اۋدارعان: اناربەك ءابىلماجىن ۇلى