ءاندى رۇحساتسىز ايتقانى ءۇشىن 100000 يۋان تولەم بەرۋىن تالاپ ەتتى

جاقىندا، ءبىر ەلەكتروندىق ويىن جۇرگىزۋشى تىكە تاراتىلىم كەزىندە، «بار جاساي بەرگىم تاعى بەس عاسىر» دەگەن ءاندى ايتقاندىعى ءۇشىن، باسپا ۇقىعى جاعىنان شاعىم ءتۇسىپ، 100 مىڭ يۋان تولەم تالاپ ەتكەندىگى جونىندەگى ءىس، توراپتاعى قىزۋ تەمەگە اينالدى.

بۇل ىسكە شاتىلعان جۇرگىزۋشى PDD بىلاي دەدى: مەنىڭ ءان ايتۋ ارقىلى پايداعا كەنەلۋ ماقساتىم جوق، كەشىرىم سۇراۋعا، ءارى ەندىگارى بۇل ءاندى ايتپاۋعا رازىمىن. 

«بار جاساي بەرگىم تاعى بەس عاسىر» دەگەن بۇل ءاننىڭ اۆتورلىق ۇقىعىنا يە، ايگىلى كومپوزيتور جاڭ حۇڭگۋاڭ اڭىس ءبىلدىرىپ بىلاي دەدى: تولەم اقىنىڭ قانشا بولۋى ماڭىزدى ەمەس، ماڭىزدىسى وسى ءىس ارقىلى، قوعامداعى ءار سالانى مۋزيكانىڭ اۆتورلىق ۇقىعىنا باسا ءمان بەرۋگە شاقىرىپ، ءتىپتى دە كوپ مۋزيكانتتاردىڭ ماڭداي تەرىنىڭ بوداۋى وتەلىپ، اناعۇرلىم ۇزدىك تۋىندىلاردى جاراتۋىنا دەم بەرسە ەكەن دەيمىن.

ەلەكتروندىق ويىن جۇرگىزۋشىسىنىڭ كەشىرىم سۇراعان كەسكىنى. سۋرەتتىڭ كەلۋ قاينارى: كەسكىننىڭ قيما سۋرەتى

ەلەكتروندىق ويىن جۇرگىزۋشىسى ارت-ارتىنان ەكى رەت كەسكىن تاراتىپ كەشىرىم سۇرادى

6-ايدىڭ 30-كۇنى، لاقام اتى PDD دەگەن ەلەكتروندىق ويىن جۇرگىزۋشى، تىكە تاراتىلىم كەزىندە، ويلاماعان جەردەن وزىنە شاعىم تۇسكەندىگىن، مۇنىڭ سەبەبى ءان ايتقاندىعى ءۇشىن ەكەندىگىن ايتقان. 

PDD كەسكىندە بىلاي دەدى: وسىدان بۇرىن، ەلەكتروندىق ويىن تىكە تاراتىلىمى كەزىندە، اۋزىما كەلىپ قالعان «بار جاساي بەرگىم تاعى بەس عاسىر» دەگەن ءاندى ايتامىن دەپ، باسپا ۇقىعى جاعى شاعىمدانىپ، 100 مىڭ يۋان تولەم اقى تالاپ ەتتى، ءبۇل ءان وتە تاماشا جازىلعان، ون نەشە جىلدىڭ الدىندا وتە تانىمال بولعان. ول ەش بۇكپەسىز تاعى بىلاي دەدى: مەن بۇدان كەيىن كەلسە-كەلمەس ءان ايتپايمىن، سونىمەن بىرگە، كوپشىلىككە تىكە تاراتىلىم ساۋدا سالاسىنا كىرەتىندىگىن، ءان ايتۋدان بۇرىن، ءسوزسىز، اۆتورلىق ۇقىعى بار ادامنىڭ ماقۇلدىعىن الۋ كەرەك ەكەندىگىن، زاڭدا وسىلاي بەلگىلەنگەندىگىن ايتا كەتكىم كەلەدى، مەن ءدال قازىر شىنايى كەشىرىم سۇرايمىن، مەنىڭ ۇستىمنەن شاعىم ايتپاۋلارىن ءۇمىت ەتەمىن، مەنىڭ راسىندا، ءاندى ساۋداعا سالۋ ويىم جوق، ءارى ءان ايتۋ ارقىلى پايداعا كەنەلۋ ويىم دا جوق، ەگەر، تولەم تولەۋ قاجەت بولسا، بەلسەندىلىكپەن سەلبەسەمىن.

7-ايدىڭ 2-كۇنى، ءتىلشى سانفاڭ سايتىنىڭ جەكەلىك بەتىنىڭ ايىرىم حابارلاسۋ يقۋاتى ارقىلى جۇرگىزۋشى PDD دان ءمان-جاي ۇعىستى. ول تىلشىگە بىلاي دەدى: بۇل ءىس مەنىڭ كەشىرىم سۇراۋىممەن تىنعان جوق، قارسى جاق ەلەكتروندىق ويىن سايتىمەن سوت اشىلۋ الدىنداعى كەڭەس وتكىزۋ ۇستىندە.

كومپوزيتوردىڭ اڭىسى: تولەم اقىنىڭ قانشا بولۋى ماڭىزدى ەمەس

ۇعىسۋعا قاراعاندا، ەلىمىزدىڭ كەڭ بايتاق دالاسىندا، تامىلجىتا شىرقالعان «بار جاساي بەرگىم تاعى بەس عاسىر» دەگەن بۇل ءاندى حان لەي ايتقان، ءسوزىن فان شياۋبين جازعان، مۋزيكاسىن جاڭ حۇڭگۋاڭ جازعان، بۇل ءان حان لەيدىڭ 2004-جىلى 12-ايدىڭ 28-كۇنى تاراتقان جەكە ءان البومىندا دىبىسقا الىنعان. 

7-ايدىڭ 2-كۇنى، «بار جاساي بەرگىم تاعى بەس عاسىر» ءانىنىڭ اۆتورلىق ۇقىعىنا يە، ايگىلى كومپوزيتور جاڭ حۇڭگۋاڭ وقۋشىسى حۋ شىميڭ ارقىلى مىنالاردى ايتتى: بۇل ارىز-شاعىمدا تالاپ ەتكەن تولەم اقىنىڭ قانشا بولۋى ماڭىزدى ەمەس، ارىز-شاعىمىنىڭ ماقساتى، بۇكىل ەلدەگى اۆتورلىق ۇقىققا قول سۇعۋ دەلولارىنىڭ ىشىنە تاعى ءبىر ءوز ۇقىعىن قورعاۋ جونىندەگى تيپتىك دەلونى قوسۋ. ونىڭ ماڭىزى مىناداي، قوعامداعى ءار سالانى، مۋزيكانىڭ باسپا ۇقىعىنا باسا ءمان بەرۋگە شاقىرىپ، اقاۋسىز بولعان، ءبىلىم ۇقىعىنا قۇرمەت ەتكەن ەكولوگيالىق ورتانى ورتاق قۇرىپ، ءتىپتى دە كوپ مۋزيكانتتاردى ەتكەن ەڭبەگىنىڭ ءتيىستى قارىمجىسىنا يە ەتتىرۋ. وسىلاي بولعاندا عانا، ءتىپتى دە كوپ مۋزيكانتتاردى، جاسامپازدىق جاراتۋشىلاردى اناعۇرلىم كوپ ۇزدىك تۋىندىلاردى جاراتۋعا جىگەرلەندىرۋگە بولادى.

ءتىلشىنىڭ ۇعىسۋىنشا، 2021-جىلى 9-ايدىڭ 26-كۇنى، جۇڭگو راديو-تەلەۆيزيا قوعامدىق ۇيىمى بىرلەستىگى مۋزيكا كوميتەتى زاڭ ورتالىعىنىڭ ماڭدايشالىق اسۋ سالتى وتكىزىلدى. جاڭ حۇڭگۋاڭ، ءانشى حان لەي، كومپوزيتور، مۋزيكا اعارتۋشىسى گۋ جيانفىننىڭ قىزى گۋ يىڭ سالتقا قاتىناستى، ءارى مۋزيكا كوميتەتىنىڭ ماڭدايشالىعىن اشتى. حاباردا بىلاي دەلىندى: جۇڭگو راديو-تەلەۆيزيا قوعامدىق ۇيىمى بىرلەستىگى مۋزيكا كوميتەتى زاڭ ورتالىعىنىڭ قۇرىلۋى، ءوز ۇقىعىن قورعاۋدىڭ ەندىگارى قيىن ءىس بولۋدان قالعاندىعىن بىلدىرەدى، زاڭ قارۋىنىڭ قورعاۋىندا، كوركومونەر جاسامپازدىق جاراتۋشىلارى باسپا ۇقىعىنا كەپىلدىك ەتكەن تاماشا جاعدايدا، ءتىپتى دە كوپ مادەنيەت جاۋھار تۋىندىلارىن جاراتۋىنا ابدەن بولادى. 

ادۆوكاتتىڭ ەسكەرتپەسى: تىكە تاراتىلىم جۇرگىزۋشىنىڭ قايسى ءاندى ايتقىسى كەلسە سول ءاندى ايتۋى ۇقىققا قول سۇققاندىق

ەلەكتروندىق ويىن جۇرگىزۋشىسى PDD دىڭ ءان ايتامىن دەپ تولەمگە جىعىندى بولۋى تەك ءبىر عانا دەلو مىسالى ەمەس. 2021-جىلى «باقا» اتتى ءاننىڭ باسپا ۇقىعى جاعى 12 جۇرگىزۋشىنىڭ ۇقىققا قول سۇققاندىعى جونىندە شاعىمدانىپ، باسپا ۇقىعىنا يە چيلينتۇڭ سەرىكتەستىگى بىلاي دەپ قارادى، جوعارىدا ايتىلعان جۇرگىزۋشىلەر 2016-جىلدان 2019-جىلعا دەيىن، «باقا» ءانىنىڭ ايتۋ ۇقىعىن الماعان جاعدايدا، 59 رەت تىكە تاراتىلىمدا ايتىپ، اۋەسكەرلەرىنىڭ سيعا اتاعان اقشاسىن جيىپ، ەرەپايسىز مول پايدا تاپقان، بۇل اۋىر دارەجەدەگى ۇقىققا قول سۇققاندىققا جاتادى. سوڭىندا، سوت مەكەمەسى تىكە تاراتىلىم تەكشەسىن باسپا ۇقىعىنا يە جاققا 40 مىڭ يۋان تولەم بەرۋگە ۇيعارعان. 

بەيجيڭ قالاسى (چۇڭچيڭ) ادۆوكاتتار ورنىنىڭ ادۆوكاتى ليۋ يۇيجيە بىلاي دەدى: توراپ تىكە تاراتىلىمىندا، جۇرگىزۋشىنى قايسى ءاندى ايتقىسى كەلسە، سول ءاندى ايتۋى ۇقىققا قول سۇققاندىققا جاتادى. مۋزيكالىق تۋىندى ءان، سيمفونيا قاتارلى ايتاتىن نەمەسە شالاتىن، ءسوزى بار نەمەسە ءسوزى جوق تۋىندىلاردى كورسەتەدى، ول ەلىمىزدىڭ شىعارما ۇقىعى زاڭىنىڭ قورعاۋىنداعى تۋىندىلاردىڭ ءبىرى. باسقالاردىڭ تۋىندىسىن ايتقاندا، ءان ايتۋشى تۋىندى ۇقىعى بار ادامنىڭ ماقۇلدىعىن الۋى، ءارى قارىمجىسىن بەرۋى كەرەك. بىلتىر 6-ايدىڭ 1-كۇنى، جاڭا «تۋىندى ۇقىعى زاڭى» رەسمي جولعا قويىلىپ، توراپ تىكە تاراتىلىمى كەزىندە مۋزيكادان پايدالاناتىن بولسا، تۋىندى ۇقىعى بار ادامعا قارىمجى بەرۋى كەرەكتىگىن انىق بەلگىلەدى، سونىمەن بىرگە، زاڭدىق تولەم اقىنىڭ مولشەرىن جوعارىلاتتى، جازالاۋ سيپاتتى تولەم ءتۇزىمى قاتارلى تارماقتاردى كىرگىزىپ، توراپ تىكە تاراتىلىمى مۋزيكاسىنىڭ ناقتىلانۋى بىرتىندەپ ايقىندالىپ، زاڭ ارقىلى باسقارىلاتىن بولدى. 

اۋدارعان: اناربەك ءابىلماجىن ۇلى