ول اسىپ قالعان 2 ميلليون 680 مىڭ يۋاندى قايتا جىلۋعا اتادى

7 جىلدىڭ الدىندا، تولىق ورتانىڭ 3-جىلدىعىندا وقىپ جاتقان فاڭ بو، توسىننان باقىتقا قارسى اق قان اۋرۋىنا شالدىعىپ، ىزگى نيەتتى جانداردىڭ جىلۋعا اتاعان 3 ميلليون يۋاننان استام كومەگىنە يە بولدى. تاياۋدا، ول وسى سومادان اسىپ قالعان 2 ميلليون 680 مىڭ يۋاندى قايتا جىلۋعا اتاپ، ادامدار ارا سۇيىسپەنشىلىكتى بەينەلەيتىن وسى ءبىر اسەرلى حيكايا، ءتىپتى دە كوپ ادامنىڭ جۇرەگىن جىلتۋمەن جالعاسىن تاپتى. 

تولىق ورتانىڭ 3-جىلدىعىندا وقىپ جاتقان ۇل بالا توسىننان اق قان اۋرۋىنا شالدىعىپ، 5 كۇندە 3 ميلليون يۋاننان استام جىلۋ جينالدى

2014-جىلى، 17 جاستاعى ۇل بالا فاڭ بو، جىجياڭ ولكەسىنىڭ حاڭجوۋ قالاسىندا تولىق ورتانىڭ 3-جىلدىعىندا وقىپ جاتقان ەدى، كلاستا وقۋ ناتيجەسى ءبىرشاما ۇزدىك ول جوعارى مەكتەپ ەمتيحانىنا بار زەيىنىمەن دايىندالىپ، جىجياڭ داشۋەسىنە ءتۇسىپ وقۋدى ارمانداپ جۇرگەن بولاتىن.

سۋرەتتە: اۋرۋعا دۋشار بولاردان بۇرىن، فاڭ بو كلاستاعى سپورت ساڭلاقتارىنىڭ ءبىرى بولاتىن.

سول جىلى 10-ايدا، شيپاحانا فاڭ بوعا جەدەل قاراكتەرلى ليمفا كلەتكاسى اق قان اۋرۋىنا دۋشار بولعان دەپ دياگنوز قويدى، بۇل اۋرۋدى ەمدەۋدىڭ ەڭ ءونىمدى ءادىسى — سايكەس كەلەتىن جىلىك مايىن تاۋىپ كوشىرۋ. ول كەزدە، فاڭ بونىڭ اكە-شەشەسى حاڭجوۋ قالاسىندا ۇساق-تۇيەك بۇيىمدار ساتاتىن دۇكەن اشقان، ەكونوميكالىق ءال-اۋقاتى ونشا جاقسى ەمەس بولاتىن، اسا قوماقتى ەمدەۋ قاراجاتىن جيناۋ ءبىر ءۇيلى جان ءۇشىن قيىنعا تۇسكەن ەدى. 

سۋرەتتە: 2015-جىلى 1-ايدا، ناۋقاس توسەگىندە جاتقان فاڭ بو. 

فاڭ بونىڭ ناۋقاس جاعدايىنان حابار تاپقاننان كەيىن، ءار جاقتاعى مەيىر سيلايتىن كۇشتەر بىرتىندەپ توپتالىپ، ىزگى نيەتتى جاندار بەلسەندى تۇردە جىلۋ اتاپ، جينالعان جىلۋ سوماسى 5 كۇندە 3 ميلليون يۋاننان استى.

سۋرەتتە: حاڭجوۋ قالالىق 14-ورتا مەكتەبىنىڭ كاڭچياۋ مەكتەپ رايونىنداعى تولىق ورتا 3-جىلدىق 2-كلاسىنداعى ساباقتاستارى فاڭ بوعا جىگەر بەردى. 

سۋرەتتە: فاڭ بونىڭ اۋرۋدان تەز ايىعۋىن تىلەپ، جىگەر بەرىپ شابىتتاندىرعان حاتتار. 

فاڭ بونىڭ شەشەسىنىڭ ۇزاق جىل ساقتاعان كونە ۇيالى تەلەفونىندا، بەيتانىس نومىردەن كەلگەن نەشە مىڭ كەلتە حات بار، حاتتىڭ مازمۇنى نەگىزىنەن جىگەر بەرۋ جانە اق تىلەك تىلەۋ. «فاڭ بونى قۇتقارۋ اقشاسى جەتكىلىكتى بولدى، قازىرشە جىلۋ اتاماڭىزدار، راحىمەت» دەپ ءبىر ءۇيلى جان اقپارات قۇرالى ارقىلى جۇرتقا كوپ رەت العىس ايتتى.

باقىتقا جاراي، فاڭ بو مەن فاڭ جيە ەگىز ەدى، ءىنىسى فاڭ جيەنىڭ جىلىك مايى فاڭ بوعا سايكەس كەلە كەتتى. 2015-جىلى 3-ايدا، ءتورت رەت حيميالىق جولمەن ەمدەۋدەن كەيىن، فاڭ بوعا جىلىك مايىن كوشىرۋ وپەراتسياسى جاسالدى. 

2016-جىلى 9-ايدا، فاڭ بو انا مەكتەبى حاڭجوۋ قالالىق 14-ورتا مەكتەبى اۋلاسىنا قايتا ورالدى، 2017-جىلى فاڭ بو جوعارى مەكتەپكە قابىلدانىپ، ساقتىق مەديتسينا كاسىبىنە وقۋعا ءتۇستى. فاڭ بو بىلاي دەدى: ەرىكتىلىك كەستەسىن تولتىرۋدا كوپتەگەن كاسىپكە كەز بولدىم، اۋىرعان شاعىمدا مەيىرىمدى شيپاگەرلەرگە جولىقتىم، بەيتانىس مەيىر باعىشتاۋشىلاردىڭ كومەگىنە يە بولدىم، ءجۇز ويلانىپ، توقسان تولعانىپ شيپاگەر بولۋدى تاڭدادىم، ويتكەنى، شيپاگەر اۋرۋدى ەمدەپ، ادامدى قۇتقارادى عوي. 

ول وزىنە اتالعان جىلۋدان اسىپ قالعان 2 ميلليون 680 مىڭ يۋاندى قايتا جىلۋعا اتاپ، ادامدار ارا سۇيىسپەنشىلىكتى بەينەلەيتىن وسى ءبىر اسەرلى حيكايانى جالعاستىردى

وسى بىرنەشە جىلدا، فاڭ بونىڭ دەنساۋلىعى بىرتىندەپ قالپىنا كەلىپ، بيىل ماگيستر اسپيرانتتىققا قابىلداندى. فاڭ بونىڭ شەشەسى بىلاي دەدى: بيىل، شيپاگەر قايتا تەكسەرىلۋدىڭ قاجەتى جوق، فاڭ بونىڭ دەنساۋلىعى تولىق قالپىنا كەلدى، بۇدان كەيىن ءار جىلى ءبىر رەت ادەتتەگىدەي دەنساۋلىق تەكسەرتۋگە قاتىناسىپ تۇرسا بولعانى دەدى. 

ەمدەلۋ، ءدارى-دارمەك قاراجاتىن شىعارىپ تاستاعاندا، ونىڭ ۇستىنە وسى بىرنەشە جىلداعى ءوسىمدى قوسقاندا، سول جىلعى ىزگى نيەتتى جاندار اتاعان جىلۋ سوماسى 2 ميلليون يۋاننان استى. فاڭ بو «وزىمە جۇمسالۋدان اسىپ قالعان جىلۋ سومانى قايتا جىلۋعا اتاپ، قوعامعا مەيىر جەتكىزىپ، باسقا ناۋقاستانعان، اقشاعا ءزارۋ ادامدارعا كومەكتەسۋىم كەرەك» دەپ ارمانداپ كەلگەن ەدى. 

9-ايدىڭ 30-كۇنى، فاڭ بونىڭ شەشەسى فاڭ بوعا ۋاكىل بولىپ، ەمدەلۋدەن اسىپ قالعان 2 ميلليون 680 مىڭ يۋاندى جىلۋعا اتاپ، «جىجياڭ ولكەلىك قايىر-ساحابات بىرلەسكەن باس قوعامى مەيىر باعىشتاۋ جوسپارى قايىر-ساحابات قورىن» قۇردى. بۇل قور اق قان اۋرۋىنا شالدىققان ناۋقاستارعا باعىتتامالى تۇردە ەمدەلۋ كومەك قاراجاتىن بەرەدى، سونىمەن بىرگە، جىجياڭ ولكەسى حاڭجوۋ قالالىق 14-ورتا مەكتەبىندەگى وتباسىنىڭ ءال-اۋقاتى تومەن 50 وقۋشىعا باعىتتامالى تۇردە كومەك قاراجات بەرىپ تۇرادى. 

فاڭ بو بىلاي دەدى: مەن اسا باقىتتىمىن، جۇرت ەكونوميكالىق قۋاتى ونشا ءماز ەمەس بىزدەي ءبىر ءۇيلى جانعا ەكونوميكالىق جاقتان جانە رۋحاني جاقتان كوپ كومەك كورسەتتى، مەن وسى مەيىر-شاپاعاتتى جالعاي تۇسكىم كەلدى. مەيىر باعىشتاۋشىلاردىڭ قامقورلىعى مەن كومەگىنە العىس ايتامىن، بۇدان كەيىنگى كۇندەرىمدە ۇزدىكسىز قۇلشىنا ۇيرەنىپ، جاقسى تۇرمىس كەشىرىپ، ويداعىداي قىزمەت ىستەپ، اناعۇرلىم كوپ جانعا سىزدەر سياقتى كومەك كورسەتەمىن. ىزگى نيەتتى جاندارعا تاعى ءبىر رەت راحىمەت ايتامىن!

فاڭ بوعا اق تىلەك تىلەيمىز! 

اۋدارعان: ساعىنبەك رابات ۇلى

来源：央视新闻

编辑、制作：阿依娜