شينجياڭ ۇكىمەتى ەكونوميكا-ساۋدا ۋاكىلدەر ۇيىرمەسى ورتا ازياعا ساپارىن باستادى

12-ايدىڭ 13-كۇنى، جۇڭگو شينجياڭ ۇيعۇر اۆتونوميالى رايونى حالىق ۇكىمەتى ۇيىمداستىرعان ەكونوميكا-ساۋدا ۋاكىلدەر ۇيىرمەسى مەن ساۋدا سەلبەستىك قىزمەت گرۋپپاسى قازاقستانعا جەتىپ، ورتا ازيا ەلدەرىنە بولعان 10 كۇندىك ساپارىن باستادى. بۇل جولى، قازاقستان، تاجىكستان، قىرعىزستان، وزبەكستان ەلدەرىندە ساپاردا بولىپ، ءبىر قىدىرۋ ەكونوميكا-ساۋدا ىستەستىك قيمىلدارىن الىپ بارادى.

بۇل رەتكى ساپاردىڭ ءساتتى بولۋى ءۇشىن، اۆتونوميالى رايوندىق پارتكوم مەن ۇكىمەت ىندەتتىڭ ىقپالىن جەڭە وتىرىپ، 11-ايدىڭ باسىندا-اق ورنالاسترۋ جاساعان بولاتىن. ۋاكىلدەر ۇيىرمەسى اۆتونوميالى رايوننىڭ قاتىستى تاراۋلارى مەن ءتۇيىندى كاسىپورىنداردان قۇرام تاپقان بولىپ، ىندەت جاعدايى تۋىلعاننان بەرى شينجياڭنىڭ تۇڭعىش ساپارعا شىققان ەكونوميكا-ساۋدا ۇيىرمەسى ەسەپتەلەدى، نەگىزگى ماقساتى قاتىستى ەلدەردىڭ ۇكىمەت تاراۋلارىمەن جانە رايوندارىمەن، كاسىپورىندارىمەن بەلسەنە پىكىر اۋىستىرىپ، سەلبەستىك كومەسكى كۇشتەرىن ونان ارى اشۋ. 

13-كۇنى، «شينجياڭ ۇيعۇر اۆتونوميالى رايونى مەن قازاقستان جەتىسۋ وبلىسىنىڭ ساۋدا تالقى مىنبەسى» جەتىسۋ وبلىسىنىڭ تالدىقورعان قالاسىندا اشىلدى. 

اۆتونوميالى رايوندىق حالىق ۇكىمەتىنىڭ ورىنباسار ءتوراعاسى سۇن حۇڭمەي تالقى مىنبەسىندە بىلاي دەدى: ورتاق كوڭىل ءبولىپ وتىرعان ماسەلەلەر جونىندە ناقتىلى كەڭەس وتكىزدىك، كوپشىلىك ىشكەرىلەي پىكىر الماستىردى، سىندارلى پىكىرلەر ورتاعا قويىپ ءارى ورتاق پىكىرگە كەلىپ، بىلايعى جەردەگى سەلبەستىك ءۇشىن نەگىز قالادى. 

جەتىسۋ وبلىسىنىڭ جاعراپيالىق ورنى ەرەكشە، ورىن ابزالدىلىعى كورنەكتى، «قورعاس-شىعىس قاقپا» ەركىن ەكونوميكا رايونى اشىلۋ الدىندا تۇر، ەكى جاقتىڭ شەكارا تاسىمال قۋاتى مەن ەكونوميكا-ساۋدا ىستەستىگىن كەڭەيتۋ جاعىنداعى كومەسكى كۇشى وراسان زور. بۇل رەتكى كەڭەس سەلبەستىكتى كۇشەيتۋگە تىڭ ءورىس اشتى، ءبىز جەرلىك سەلبەستىك مەحانيزمىنەن ويداعىداي پايدالانىپ، جۇڭگو-قازاقستان قورعاس حالىقارالىق شەكارا سەلبەستىگى سەنترىن تياناق ەتىپ، ەكى جاقتىڭ ابزالدىلىققا يە سالالارداعى سەلبەستىگىن ونان ارى تەرەڭدەتەتىن بولامىز.

ەكى جاقتىڭ ورتاق كۋا بولۋىندا، شينجياڭ تىبيان ەلەكتر توپ سەرىكتەستىگى مەن ەلدەرىڭىزدىڭ حالىقارالىق ەنەرگيا عىلىمى ورتالىعى سەلبەستىك نىسانىنا قول قويىسىپ، مول تابىسقا قول جەتكىزدى. 

بۇل رەتكى ساپاردا، ۋاكىلدەر ۇيىرمەسى قازاقستاندا «جۇڭگو شينجياڭ-قازاقستان ەكونوميكا-ساۋدا قارجى قوسۋ سەلبەستىك تانىسترۋ ءماجىلىسىن» وتكىزىپ، ەكى جاقتىڭ قارجى قوسۋ ورتاسىن، قارجى قوسۋ نىسان جوباسى مەن ءتيىمدى ساياساتتارىن تانىستىرادى، وسى ارقىلى ەكى جاق كاسىپورىندارىنىڭ سەلبەستىگى ءۇشىن تەكشە دايارلاپ، ءبىر توپ سەلبەستىك نىساندارىنا قول قويىساتىن بولادى. 

ۇعىسۋعا قاراعاندا، ۇستەگى جىلى 1-ايدان 10-ايعا دەيىن، شينجياڭ مەن ورتا ازياداعى بەس ەلدىڭ يمپورت-ەكسپورت جالپى قۇنى 22 ميلليارد 400 ميلليون دوللار بولىپ، %60.9 ارتقان، بۇل بۇكىل شينجياڭنىڭ يمپورت-ەكسپورت جالپى قۇنىنىڭ %76.2 ءىن، بۇكىل ەلىمىزدىڭ ورتا ازياداعى بەس ەلگە بولعان يمپورت-ەكسپورت جالپى قۇنىنىڭ %45.6 ىن ۇستايدى، ەكى جاقتىڭ ەكونوميكا-ساۋدا بارىس-كەلىسى مەن سەلبەستىگىنىڭ سەرپىمدىلىگى كۇشتى، ءوزارا ءتيىمدى بولعان سەلبەستىكتىڭ كومەسكى كۇشى زور، ءورىسى كەڭ. 

جىبەك جولىنداعى تىڭ بايقاۋ مەدياسى، قازاقستان بۇگىنگى جىبەك جولى گازەتى ۋاكىلدەر ۇيىرمەسىنىڭ قازاقستانعا ساپاردا بولعان كەزدەگى ءتۇرلى تابىستارىن جان-جاقتىلى حابارلايتىن بولادى. 

اۋدارعان: جەڭىس جىكباس ۇلى

来源：新疆新闻网

翻译：金额斯

编辑、制作：阿依娜