ينفورماتسيا اشكەرەلەۋ: mzjubao@cnr.cn

وزەكتى ماقالالار

تولىق ءنومىر العان بارلىق بالانى سيلاپ جۇرگەن انا

来源:央广网     |责编:古丽美热·霍孜汗|     发布日期: 2023-03-23 10:15

 

ءجۇز ءنومىر العان بالاعا، راڭپيزى تەگىن بەرىلەدى

 

 

بارلىعىڭ 100 ءنومىر العانسىڭدار ما؟ جارايدى، سەندەرگە ءبىر-ءبىر تاباق راڭپيزىنى تەگىن بەرەمىن!

جۋىقتا ۋىنجوۋدا تۇراتىن راڭپيزى ساتۋشى اپاي توراپتاستاردىڭ تىلىنە تيەك بولىپ، القاۋعا بولەندى. ول بالاقايلاردى تىرىسىپ ۇيرەنۋگە شابىتتاندىرۋ ءۇشىن، 100 ءنومىر العان بالاعا ءبىر تاباق راڭپيزىنى تەگىن سيلايدى ەكەن.

راڭپيزى ساتۋمەن اينالىساتىن وسى ءبىر اق ەدىل اپايدىڭ ەسىم-سويى لين لىشۋاڭ بولىپ، ۋىنجوۋعا قاراستى يۋەچيڭ اۋدانى پۋچي قالاشىعىندا كىشى-گىرىم تاعام جايماسىن اشادى. «ادام سويلەسكەنشە، جىلقى كىسىنەسكەنشە» دەگەندەي، ول ءار كۇنى جايما اشۋ بارىسىندا، وسى ارادان وتكەن-كەتكەنمەن شۇيىركەلەسىپ، تاماق ىشكەلى كەلگەندەرمەن ارقا-جارقا اڭگىمەلەسىپ تۇراتىن. وتە-موتە، جايماسىنان راڭپيزى جەۋگە كەلگەن بالاقايلارعا ەرەكشە ىقىلاس تانىتىپ، ولاردى جاقسى ۇيرەنۋگە شابىتتاندىرادى. 

«بالاقايلار، جاقسى ۇيرەنىڭدەر، ەگەر ەمتيحاندا جاقسى ناتيجەگە قول جەتكىزسەڭدەر، سەندەرگە سيلىق بەرەمىن»،ـ دەيتىن كەزدەرى دە بولعان. 

مۇندايدا كەيبىر بالالار تەمىردى قىزۋىندا سوقپاق بولىپ: اپاي، قۇرعاق قاسىق اۋىز جىرتادى دەگەن عوي، نەمەن سيلايتىنىڭىزدى ايتىپ قالىڭىز، ءبىزدىڭ دە كوڭىلىمىزدە سان بولسىن،ـ دەيدى قۋلانىپ.

«جاقسى ناتيجە جاراتساڭدار بار عوي، سەندەرگە ءبىر-ءبىر تاباق رڭپيزىنى اقى-پۇلسىز تەگىن بەرەمىن»!ـ دەيدى ول دا قارىمجى قايتارىپ.

العاشىندا اق كوڭىل اپاي وسىلاي دەرىن دەپ قويسا دا، مۇنى تىم شىن كورىپ كەتپەگەن-دى. الايدا، نەشە كۇننەن سوڭ، قولىنا 100 نومىرلىك ەمتيحان قاعازىن ۇستاعان قارا دومالاقتار ونىڭ تاعام جايماسىن جاعاتتاي باستايدى. بالالاردىڭ مۇنى ۋادەگە بالاپ، سيلىق الۋعا كەلگەندىگىن كورگەن سوڭ، لين لىشۋاڭ مىناداي «دۇكەن ەرەجەسىن» بەلگىلەيدى: ەمتيحاندا 100 ءنومىر العان بالاقايدىڭ بارلىعى، ەگەر ەمتيحان قاعازىن اكەپ كورسەتە السا، ءبىر تاباق راڭپيزىنى تەگىن جەۋىنە بولادى. 

لين لىشۋاڭ بىلاي دەيدى: بالاقايلار سيلىققا تيگەن راڭپيزىنى العان قاس قاعىم ساتتە، ءسابي جۇزدەندەرىندە ماقتانىش سەزىمى تەپسىنىپ شىعا كەلەدى، ىلە-شالا ءسال-ءپال ىڭعايسىزدانعان، ۇيالعان بەينەلەرىن دە اڭعارىپ قالامىن. سابيلەردىڭ ءبىر اۋىز ءسوزىمدى جەرگە تاستاماي، بار ىنتى-شىنتىسىمەن كىرىسىپ، ۇمتىلا ۇيرەنگەنىن كورگەن سوڭ، بۇل جۇمىستى اياقسىز قالدىرماۋىم كەرەكتىگىن سەزىندىم. ەگەر، ولاردىڭ ۇيرەنۋىنە تۇرتكى بولا السا، مەن، ارينە، ۇزدىكسىز جالعاستىرامىن.

لين لىشۋاڭنىڭ تولىق ءنومىر العان بالاعا راڭپيزى سيلايتىندىعى بىردەن-بىرگە تاراپ، كوپ وتپەي بارلىق بالا ءبىلىپ الدى. سونىمەن ءار كۇنى دەرلىك، ونىڭ تاعام جايماسىنا 100 نومىرلىك ەمتيحان قاعازىن ۇستاعان بالالار كەلىپ سيلىق الىپ قايتادى. ول قازىرگە دەيىن 200 دەن استام بالاعا سيلىق بەرىپ ۇلگىرگەن. 

ءبىر كۇنى لين لىشۋاڭ جۇمىسىنا جايىراق شىعىپ قالادى. قولىنا 100 نومىرلىك ەمتيحان قاعازىن العان ءبىر بالاقاي، ونىڭ كەلۋىن ءتورت كوزبەن كۇتىپ وتىرادى. بالاقايدىڭ اتاسى ەندىگارى توسا بەرگىسى كەلمەي: بالام، باسقا جايمادان ءبىر تاباق راڭپيزى ساتىپ الىپ بەرەيىن، ەندى لين اپايىڭدى توسپاي-اق قويايىق،ـ دەيدى. الايدا، بالاقاي وعان كونە قويسىن با؟ 

بۇل جونىندە لين لىشۋاڭنىڭ تۇسىنىگى دە ەلدەن ەرەك. ول بالاقايدىڭ اتاسىنا بىلايشا ءتۇسىندىردى: نەمەرەڭىزدىڭ باسقا جايمانىڭ راڭپيزىسىن جەگىسى كەلمەۋىندەگى سەبەپ، مەنەن الاتىن راڭپيزى ونىڭ سيلىعى، بۇعان ءوزىنىڭ ۇيرەنۋ ناتيجەسى ارقىلى قول جەتكىزىپ وتىر ەمەس پە؟ بۇل باسقا جايمانىڭ راڭپيزىسىنا قالاي ۇقساسىن؟

لين لىشۋاڭ بيىل 41 جاستا، ونىڭ تاعام جايماسندا راڭپيزى، سالقىن كەسپە سياقتى 10 نەشە ءتۇرلى جەڭىل تاعام بار. ازىقتىقتىڭ جاڭا بولۋىنا كەپىلدىك ەتۋ ءۇشىن، ول ءار كۇنى قۇزعىن سارىدەن تۇرىپ، ازىقتىق ماتەريالدارىن دايىندايدى. ال، تۇستەن كەيىنگى ساعات 4:00 مولشەرىندە جايما اشقان سوڭ، جايما باسىنداعى كۇيبەڭ كەلەر كۇنگى تاڭ سارىگە دەيىن جالعاسادى. ونىڭ كۇن كورىسى دە وڭايعا تۇسپەيتىندىگىن بايقاعان كەي اتا-انا، بالالارى سيلىعىن الىپ بولعان سوڭ، ولارعا كورسەتپەي راڭپيزىنىڭ اقشاسىن لي لىشۋاڭنىڭ قولىنا ۇستاتا قويادى ەكەن.

ونىڭ بالالارعا راڭپيزىنى تەگىن سيلاۋداي جومارتتىعىن تۇسىنە الماي، پىش-پىشتاپ ءسوز ەتىپ جۇرگەن تۋىس-تۋعان، دوس-جارانى دا از ەمەس. الايدا، لين لىشۋاڭنىڭ ايتارى مۇلدە كەرىسىنشە: بوداۋ بەرە بىلسەڭ، قارىمجىسى قايتپاي قويمايدى. بالاقايلار باسقانىڭ شابىتتاندىرۋىنا مۇقتاج، مەن تولىق ءنومىر العان بالاعا اقىسىز راڭپيزى سيلاۋ قيمىلىن استە توقتاتپايمىن. وسى ارقىلى، ءتىپتى دە كوپ بالانى تولىق ءنومىر الۋعا ۇمتىلاتىن ەتەمىن. بالاقايلار سيلىق العاندا، جۇزىنەن ماقتانىش سەزىمى مەن شاتتىق ەسىپ وتەدى، ال، مەنىڭ جۇرەگىم دە بىردەن ەلجىرەپ قويا بەرەدى، بۇل كەزدەگى كوڭىلدىلىكتى ءوزىم عانا سەزە الامىن،ـ دەيدى ول.

توراپتاستار ونى تۇس-تۇستان القاپ:

نەتكەن اسەرلى ەدى، وسىنداي اق كوڭىل قوجايىندار كوبەيە بەرسىن!

اي، ونىڭ بالاقايلارعا سيلاپ جاتقانى تەك راڭپيزى عانا ەمەس-اۋ، ول بالاقايلارعا تاعى شابىت پەن سەنىم سيلاپ جاتقان جوق پا!ـ دەستى.

اۋدارعان: نۇرگۇل قۇمارقان قىزى

来源:央视新闻

 

译:努尔古丽

审稿、制作:古丽美热

  

中央广播电视总台 央广网 版权所有

تولىق ءنومىر العان بارلىق بالانى سيلاپ جۇرگەن انا

ونىڭ كۇن كورىسى دە وڭايعا تۇسپەيتىندىگىن بايقاعان كەي اتا-انا، بالالارى سيلىعىن الىپ بولعان سوڭ، ولارعا كورسەتپەي راڭپيزىنىڭ اقشاسىن لي لىشۋاڭنىڭ قولىنا ۇستاتا قويادى ەكەن.