ءالقيسسا: ورىكتى ساي

باسىنان قار كەتپەيتىن قابانباي شوقىسى وسى اڭعاردان انىق كورىنىپ تۇرادى. اڭعاردىڭ وڭتۇستىگى جاسىل مانات جامىلعان قالىڭ جىلعا، بارقىت بەل قىراتتاردا، سالماۋ-سالماۋ ساي-سالاسىنان بۇلاقتارى سىڭعىرلاي اعىپ جاتادى. قاپتالدارى الما-ورىك، بۇتا-بۇرگەن، تال-قايىڭ، ارشا-شىرشا، قىزىل كۇرەڭ توبىلعى سىندى الۋان ءتۇرلى وسىمدىكتىڭ تىرشىلىك مەكەنى. وسى قىراتتاردى ورلەپ بارىپ بارقىتبەل جايلاۋىنا ىلىنەدى. جايلاۋعا شىعار كەزەڭگە جاقىنداعاندا، الدىڭىزدان ساپ تۇزەگەن سولداتتاي قالىڭ قاراعاي جامىراي قارسى الادى. بارقىتبەلدىڭ شىعىس تۇمسىعى ەكى ايىرىلعان وزەن. ونىڭ ءبىرى، جەر تورەسى كوركەم شاشى، ەندى ءبىرى، تابيعاتتىڭ سۇلۋلىعىن الەمگە ايگىلەپ جاتقان ءتالىم شۋىرماسى. ال، اڭعاردىڭ شىعىسى قوڭىر جون. تۋ ەڭىس جاعى تاقىرلاۋ كەلەدى دە، ورلەپ تاۋعا جاقىنداعان سايىن كۇلتەلەنىپ، شالعىنى اتتىڭ تىزەسىن قاعاتىن كۇرەڭسە. اڭعاردا جەلگە جەلبىرەگەن كوكجاسىل شالىدەي شاشى وزەنى جوڭكىلە اققان بويى بارىپ تەكەس وزەنىنە قۇيىلادى. قازىر وسى قۇيعانعا بەرىك توسپا سالىندى دا، قوڭىرقاي قوجىر تاستاردىڭ استى كوكپەڭبەك كول. ارعى جارى قاراجوننىڭ ەتەگىنەن اينالىپ ەشكىلىكتىڭ تۇمسىعىنا سۇعىنىپ جاتىر. الدا-جالدا ءزاۋ بيىكتەن قاراساڭىز، كوگارشىننىڭ كەڭ جايىپ قالىقتاعان قاناتىنان اۋماعان كوكجاسىل كول، توقتاۋسىز اعىلعان ساياحاتشىلاردىڭ كوز جانارىنا قۇيىلىپ كەتەردەي مولدىرەيدى. قازىر قىس بولعاندىقتان، بۇل دالا جازعى ءسانىن تەك كوڭىلگە ۇيالاتىپ، ءاپپاق قاردىڭ استىندا جىم-جىرت جاتىر. مىنە، وسى اڭعارعا سۇلۋ ادىر اۋىلى قونىس تەپكەن. اۋىلداعى التى قىستاقتىڭ ءبىرى ورىكتى ساي. بۇگىن ورىكتى ساي قىستاعىنىڭ بىرنەشە كادرى ەرتەلەپ قيمىلداپ بەيسەنبەكتىڭ اۋلاسىنا جيىلعان......

«ءالقيسسا» باعدارلاماسىنىڭ بۇگىنگى بەرىلىمىندە «ورىكتى ساي» اتتى پوۆەستتى نازارلارىڭىزعا ۇسىنامىز. اۆتورى: قۋانىش قاسىم ۇلى، وقىعان ديكتور: سەرىكجان نياز ۇلى. 

来源：中央广播电视总台

播音：赛力克江

备稿：海纳尔

微信制作：阿依娜