شىنجوۋ 18-ءنومىرلى ادام الىپ ۇشاتىن الەم كەمەسىن ۇشىرۋ تولىق تابىستى بولدى، ءۇش عارىشكەر جۇڭگو كەڭىستىك پۋنكتىنە ءساتتى كىردى

ءوز حابارىمىز. شىنجوۋ 18-ءنومىرلى ادام الىپ ۇشاتىن الەم كەمەسىن تيەگەن ۇزاق جورىق 2-ءنومىرلى F-تۇرپاتتى الىستان مەڭگەرىلەتىن 18-تاسىمال راكەتاسى 4-ايدىڭ 25-كۇنى جيۋچۋان جاساندى سەرىك ۇشىرۋ ورتالىعىنان ۇشىرىلدى، ۇشىرۋ مىندەتى تابىستى بولدى. راكەتا كەڭىستىككە كوتەرىلىپ 6 جارىم ساعاتتان كەيىن، شىنجوۋ 18-ءنومىرلى ادام الىپ ۇشاتىن الەم كەمەسى مەن كەڭىستىك پۋنكتىنىڭ قۇراماسى دەربەس تەز ءتۇيىلىستى. كەزەكتە شىنجوۋ 17-ءنومىرلى، شىنجوۋ 18-ءنومىرلى الەم كەمەسىنىڭ عارىشكەرلەرى جەڭىسپەن كەزدەستى.

 

4-ايدىڭ 25-كۇنى ساعات 18 دەن 9 مينۋت وتكەندە، شىنجوۋ 18-ءنومىرلى عارىشقا ادام الىپ ۇشۋ مىندەتىندەگى عارىشكەرلەر گرۋپپاسىن اتتاندىرۋ سالتى جيۋچۋان جاساندى سەرىك ۇشىرۋ ورتالىعىنىڭ ۋىنتيانگى يۋانمىڭيۋان الاڭىندا وتكىزىلدى. ساعات 18دەن 10 مينۋت وتكەندە، جۇڭگو عارىشقا ادام الىپ ۇشۋ ينجەنەرياسىنىڭ باس قولباسشىسى، كەڭىستىك پۋنكتىنەن پايدالانۋ جانە دامۋ ساتىسىنداعى ۇشۋ مىندەتىنىڭ باس قولباسشىلىق شتابىنىڭ باس قولباسشىسى شۇي شۋەچياڭ «اتتانۋ» بۇيرىعىن بەردى.

ساعات 20 دان 59 مينۋت وتكەندە، شىنجوۋ 18-ءنومىرلى ادام الىپ ۇشاتىن الەم كەمەسىن تيەگەن ۇزاق جورىق 2-ءنومىرلى F-تۇرپاتتى الىستان مەڭگەرىلەتىن 18-تاسىمال راكەتاسى جيۋچۋان جاساندى سەرىك ۇشىرۋ ورتالىعىنان كەڭىستىككە كوتەرىلدى، شامامەن 10 مينۋتتان كەيىن، شىنجوۋ 18-ءنومىرلى ادام الىپ ۇشاتىن الەم كەمەسى راكەتادان ءساتتى ءبولىنىپ، بەلگىلەنگەن وربيتاعا كىردى، عارىشكەرلەردىڭ جاعدايى جاقسى. شىنجوۋ 18-ءنومىرلى الەم كەمەسىن ۇشىرۋ مىندەتى ءساتتى ورىندالدى.

 

وسى رەتكى ۇشىرۋ مىندەتىن ۇزاق جورىق 2-ءنومىرلى F تاسىمال راكەتاسى ۇستىنە العان، شىنجوۋ 18-ءنومىرلى الەم كەمەسىن ۇشىرۋ مىندەتىنىڭ 0-ءنومىرلى قولباسشىسى جاۋ لەي ۇزاق جورىق 2-ءنومىرلى F الىستان مەڭگەرىلەتىن 18-راكەتاسىنىڭ بەينەسىن تولىق باعالادى.

 

عارىش عىلىم-تەحنيكا توبى 1-مەكەمەسىنىڭ قىزمەتكەرى ليۋ فىڭ بىلاي دەدى: وسى رەتكى مىندەت جالپى قوسىن جونىنەن العاندا، الەم كەمەسىن ۇشىرۋ جۇيەسىنىڭ سەنىمدىلىلىگىنە اناعۇرلىم جوعارى تالاپ قوياتىن مىندەت بولدى، الدا عارىشكەرلەردى بۇرىنعىداي حاۋىپسىز تۇردە عارىشقا جەتكىزۋ مىندەتىن جالعاستى ارقالايمىز.

 

شىنجوۋ 18-ءنومىرلى ادام الىپ ۇشاتىن الەم كەمەسىنىڭ جەر بەتىنە قايتاتىن كابينا جۇيەسىن ساپالاندىرىپ، دارەجەسىن جوعارىلاتتى، اسىرەسە، ەلەكتر كوزى جۇيەسىنىڭ تەحنيكالىق كۇيى ءبىرشاما جاڭالانىپ، بۇرىنعى كادمي نيكەل باتەرياسى ليتي باتەرياسىنا وزگەرتىلدى. عارىش عىلىم-تەحنيكا توبى 5-مەكەمەسىنىڭ قىزمەتكەرى چىن تۇڭشياڭنىڭ تانىستىرۋىنشا، باتەريانىڭ توك تولتىرۋ قابىلەتى بۇرىنعىدان %30 جوعارىلاعان، ال اۋىرلىعى 40 تا 50 كيلوگرام جەڭىلگەن.

 

شىنجوۋ 18-ءنومىرلى ادام الىپ ۇشاتىن الەم كەمەسى وربيتاعا كىرگەننەن كەيىن، 4-ايدىڭ 26-كۇنى ساعات 3 تەن 32 مينۋت وتكەندە كەڭىستىك پۋنكتىندەگى تيانحى وزەكتى كابيناسىمەن ءساتتى ءتۇيىلىستى، جالپى بارىسى شامامەن 6.5 ساعاتقا سوزىلدى.

 

عارىش عىلىم-تەحنيكا توبى 5-مەكەمەسىنىڭ عارىش جابدىعىن زەرتتەۋشىسى جاڭ شياڭ تانىستىرىپ بىلاي دەدى: وسى رەت ءبىرشاما پىسىپ-جەتىلگەن دەربەس تەز ءتۇيىلىسۋ جوباسى قولدانىلدى. 

وسىدان كەيىن شىنجوۋ 18-ءنومىرلى الەم كەمەسىنىڭ عارىشكەرلەر گرۋپپاسى الەم كەمەسىنىڭ قايتۋ بولمەسىنەن وربيتالىق كابيناعا كىردى. ساعات 5 تەن 4 مينۋت وتكەندە وربيتادا مىندەت اتقارىپ جاتقان شىنجوۋ 17-ءنومىرلى الەم كەمەسىنىڭ عارىشكەرلەر گرۋپپاسى، الىستان كەلگەن شىنجوۋ 18-ءنومىرلى الەم كەمەسىندەگى عارىشكەرلەردى ەسىك اشىپ قارسى الىپ الدى. ىلە-شالا، ەكى عارىشكەر گرۋپپاسىنداعىلار توپتىق سۋرەتكە ءتۇسىپ، ولارعا كوڭىل بولىپ وتىرعان بۇكىل ەل حالقىنا اماندىقتارىن ايتىپ سالەم جولدادى.

ىلە-شالا، ەكى عارىشكەرلەر گرۋپپاسىنداعىلار كەڭىستىك پۋنكتىندە وربيتادا كەزەك الماستىردى. وسى مەزگىلدە 6 عارىشكەر كەڭىستىك پۋنكتىندە شامامەن 5 كۇن بىرگە تۇرمىس كەشىرىپ قىزمەت ىستەپ، بەلگىلەنگەن ءتۇرلى قىزمەتتەردى ورىندايدى.