ءوز حابارىمىز. جۇڭگو-افريكا سەلبەستىك تالقىسىنىڭ 9-كەزەكتى مينيستر دارەجەلىلەر ءماجىلىسى 9-ايدىڭ 3-كۇنى بەيجيڭدە وتكىزىلدى. افريكاداعى 53 ەلدىڭ سىرتقى ىستەر مينيسترى، ەكونوميكا مينيسترى، سونداي-اق افريكا وداعى سياقتى وڭىرلىك حالىقارالىق ۇيىمداردىڭ ۋاكىلدەرىنەن 300 دەن استام ادام ماجىلىسكە قاتىناستى.

ماجىلىستە وسى رەتكى باسشىلار ءماجىلىسىنىڭ كەڭەستىك ءتارتىبى مەن جەتىستىك قۇجاتىنىڭ جوباسى قاراپ ماقۇلدانىپ، باسشىلار ءماجىلىسىنىڭ ءتۇرلى دايىندىق قىزمەتتەرى ءساتتى ورىندالدى.

جۇڭگو جاق مىنانى ءبىلدىردى: جۇڭگو-افريكا سەلبەستىك تالقىسىنىڭ 8-كەزەكتى مينيستر دارەجەلىلەر ءماجىلىسى اشىلعان 3 جىلدان بەرى، ەكى جاق «9 ءتۇرلى ينجەنەريا» سياقتى جەتىستىكتەر مەن شارالاردى كۇش بىرىكتىرە تياناقتاندىرىپ، جۇڭگو-افريكا قاتىناسىن ىلگەرىلەتىپ، جۇڭگو-افريكا سەلبەستىگىنىڭ تەز دامۋ ارناسىنا ءتۇسۋىن، جۇڭگو-افريكا تاعدىرلاس ورتاق تۇلعاسى قۇرىلىسىنىڭ تىڭ ساتىعا كوتەرىلۋىن ىلگەرىلەتتى. تالقىعا مۇشە ەلدەردىڭ ورتاق قۇلشىنۋىندا، وسى رەتكى باسشىلار ءماجىلىسىنىڭ، ءسوز جوق، جۇڭگو مەن افريكانىڭ ىنتىماعىن، سەلبەستىگىن كۇشەيتۋدىڭ تاعى ءبىر رەتكى تاريحي سالتاناتتى جينالىسىنا اينالاتىندىعىنا، دۇنيە ءجۇزىنىڭ وڭتۇستىگىنىڭ وسىزاماندانۋعا قول ۇستاسا قادام تاستاۋىنىڭ جاڭا بەلەسىن ورناتاتىندىعىنا سەنەمىز.

افريكا جاق مىنانى ءبىلدىردى: جۇڭگو جاقپەن تىعىز سەلبەسىپ، وسى رەتكى باسشىلار ءماجىلىسىن ويداعىداي اشىپ، افريكا وداعىنىڭ «2063-جىلعا دەيىنگى كەڭەستىك ءتارتىبىن» جۇڭگونىڭ «ءبىر بەلدەۋ، ءبىر جول» جانە جەلىلەس الەمدىك دارىپتەمەلەرىمەن ۇشتاستىرۋدى ىلگەرىلەتىپ، جان-جاقتى سەلبەستىكتى تەرەڭدەتىپ، بىرگە دامۋدى، بىرگە گۇلدەنۋدى جۇزەگە اسىرۋدى قالايمىز.