ج ك پ ورتالىق كوميتەتى، مەملەكەتتىك كەڭەس، ورتالىق اسكەري ىستەر كوميتەتى يە گۋاڭفۋعا «2-دارەجەلى عارىش ەڭبەك وردەنىن» بەرۋدى، لي سۇڭ مەن لي گۋاڭسۋعا «قاھارمان عارىشكەر» داڭقتى اتاعىن بەرۋدى ءارى «3-دارەجەلى عارىش ەڭبەك وردەنىن» بەرۋدى ۇيعاردى

ءوز حابارىمىز. جۇڭگو كوممۋنيستىك پارتياسى ورتالىق كوميتەتى، مەملەكەتتىك كەڭەس، ورتالىق اسكەري ىستەر كوميتەتى 1-ايدىڭ 23-كۇنى يە گۋاڭفۋعا «2-دارەجەلى عارىش ەڭبەك وردەنىن» بەرۋ، لي سۇڭ مەن لي گۋاڭسۋعا «قاھارمان عارىشكەر» داڭقتى اتاعىن بەرۋ ءارى «3-دارەجەلى عارىش ەڭبەك وردەنىن» بەرۋ جونىندەگى قاۋلىنى جاريالادى. قاۋلىنىڭ تولىق مازمۇنى تومەندەگىدەي:

2024-جىلى 4-ايدىڭ 25-كۇنى شىنجوۋ 18-ءنومىرلى ادام الىپ ۇشاتىن الەم كەمەسى ءساتتى ۇشىرىلدى، عارىشكەر يە گۋاڭفۋ، لي سۇڭ، لي گۋاڭسۋ الەم كەمەسىنە وتىرىپ تيانحى وزەكتى بولمەسىنە جەتىپ ءساتتى ورنالاستى، وربيتادا 6 اي تۇرىپ، ىلگەرىندى-كەيىندى 2 رەت كابينادان شىعۋ قيمىلىن جۇرگىزىپ، 6 رەت جۇك تيەيتىن گاز تيەكتى كابينادان كىرىپ-شىعۋ مىندەتىن اتقارىپ، 80 نەشە ءتۇرلى كەڭىستىك بەكەتى قۇرىلىسىنىڭ دارەجەسىن جوعارىلاتۋ، قورعاۋ، جوندەۋ مىندەتىن ورىندادى. 100 گە جۋىق كەڭىستىك عىلمي تاجىريبەسى مەن قولدانىلمالى كوتەرىمدىلىكتى وربيتادا تاجىريبە ورىستەتتى، ولار 2024-جىلى 11-ايدىڭ 4-كۇنى امان-ەسەن قايتىپ كەلدى. شىنجوۋ 18-ءنومىرلى الەم كەمەسىنىڭ ادام الىپ ۇشۋ مىندەتى ەلىمىزدىڭ عارىشقا ادام الىپ ۇشۋ ينجەنەرياسىنىڭ كەڭىستىك بەكەتىن ىستەتۋ جانە دامىتۋ كەزەڭىنە وتكەن 3-رەتكى ادام الىپ ۇشۋ مىندەتى بولىپ، جۇڭگو عارىشكەرلەرىنىڭ ءبىر رەتكى مىندەتتە وربيتادا جالعاستى ۇشۋ ۋاقىتى، ءبىر رەتكى كابينادان شىعۋ قيمىلىنىڭ ۋاقىت رەكوردىن جاڭالاپ، ەلىمىزدىڭ وربيتاداعى سۋ ەكولوگياسىن زەرتتەۋ نىسانىن تۇڭعىش رەت ءساتتى ورىنداپ، حالىقارادا تۇڭعىش رەت وسىمدىك ساباعىنىڭ ۇشىندەگى قۇرعاق كلەتكا فۋنكتسياسىن وربيتادا زەرتتەۋ مىندەتىن اتقاردى، بۇل جۇڭگونىڭ عارىش ىستەرىنىڭ جوعارى دەڭگەيدەگى عىلىم-تەحنيكاسىنىڭ ءوز كۇشىنە سۇيەنىپ ءوزىن الۋەتتەندىرۋدە تىڭ قادام تاستاعاندىعىنان دەرەك بەرەدى، سونداي-اق ەلىمىزدىڭ جالپىلىق مەملەكەت قۋاتى مەن جۇڭحۋا ۇلتىنىڭ ۇيىسۋ قۋاتىن جوعارىلاتۋدا، بارلىق جۇڭحۋا ۇلاندارىنىڭ ۇلتتىق سەنىمى مەن ماقتانىش سەزىمىن ونان ارى كۇشەيتۋدە، بۇكىل پارتيانى، بۇكىل ارميانى، بۇكىل ەلدەگى ءار ۇلت حالقىن ىنتىماقتاسا العا باسۋعا، ۇدەرە العا تارتۋعا شابىتتاندىرۋدا ماڭىزدى مانگە يە.

شىنجوۋ 18-ءنومىرلى الەم كەمەسىنىڭ عارىشقا ادام الىپ ۇشۋ مىندەتىنىڭ تولىق تابىستى بولۋىنا قالىڭ عىلىم-تەحنيكا قىزمەتكەرلەرىنىڭ، عارىشكەرلەردىڭ، كادرلار مەن جۇمىسشى-قىزمەتكەرلەردىڭ، ازاتتىق ارميا كوماندير-جاۋىنگەرلەرىنىڭ اقىل-پاراساتى مەن جۇرەك قانى سىڭگەن. يە گۋاڭفۋ، لي سۇڭ، لي گۋاڭسۋ جولداستار سولاردىڭ كورنەكتى ۋاكىلى، ولار پارتياعا ادال بولىپ، وتان ءۇمىتىن اقتاۋدى مۇرات ەتىپ، قايراتتانا العا ۇمتىلىپ، ىنتىماقتاسا سەلبەسىپ، دۇنيە جۇزىنە قۇدىرەتتى جۇڭگو رۋحىن، جۇڭگو كۇشىن ايگىلەدى. يە گۋاڭفۋ جولداس اراعا ەكى جىل سالىپ عارىشقا قايتا شىعىپ، بۇيرىق بەرۋ باستىعىندىق مىندەتتى وتەپ، ەلىمىزدەگى ۇشۋ ۋاقىتى ءبىر جىلدان اسقان تۇڭعىش عارىشكەرگە اينالدى. لي سۇڭ جولداس تىڭعىلىقتى جاتتىعىپ، جاپالى شىڭدالىپ، داڭقپەن شىنجوۋ 18-ءنومىرلى الەم كەمەسىنىڭ ۇشۋ گرۋپپاسىنا تاڭدالىپ، مىندەتتى ايتارلىقتاي ورىندادى. لي گۋاڭسۋ سالماقتى، باتىل، اۋىر مىندەتتەردى باتىلدىقپەن ارقالاپ، تۇڭعىش رەت كابينادان شىققان كەزدە كەڭىستىك بەكەتىنىڭ كەڭىستىك قيقىمدارىن قورعاۋ قۇرىلعىسىن ورناتۋ مىندەتىن تۇڭعىش رەت تابىسپەن ورىندادى. ولاردىڭ ەلىمىزدىڭ عارىشقا ادام الىپ ۇشۋ ىستەرى ءۇشىن قوسقان كورنەكتى ەڭبەگىن ماداقتاۋ ءۇشىن، ج ك پ ورتالىق كوميتەتى، مەملەكەتتىك كەڭەس، ورتالىق اسكەري ىستەر كوميتەتى يە گۋاڭفۋ جولداسقا «2-دارەجەلى عارىش ەڭبەك وردەنىن» بەرۋدى، لي سۇڭ مەن لي گۋاڭسۋ جولداسقا «قاھارمان عارىشكەر» داڭقتى اتاعىن بەرۋدى ءارى «3-دارەجەلى عارىش ەڭبەك وردەنىن» بەرۋدى ۇيعاردى.

يە گۋاڭفۋ، لي سۇڭ، لي گۋاڭسۋ جولداستار اۋەلگى ماقساتتى ۇمىتپاي، بورىشتى ەستە بەرىك ساقتاپ، وسكەلەڭ ىستەرگە ءوزىن ارناۋدىڭ ءداۋىر اتويشىسى، عارىشقا ىزدەنىس جاساۋدىڭ، عارىشقا ۇشۋ ارمانىن ورىنداۋدىڭ، عارىش ىستەرىندەگى قۇدىرەتتى ەل قۇرۋدىڭ ۇلگىلەرى دەۋگە بولادى. پارتيا ورتالىق كوميتەتى بۇكىل پارتيانى، بۇكىل ارميانى، بۇكىل ەلدەگى ءار ۇلت حالقىن شي جينپيڭ جاڭا ءداۋىر جۇڭگوشا سوتسياليزم يدەياسىن جەتەكشى ەتىپ، پارتيا 20-قۇرىلتايىنىڭ جانە 20-كەزەكتى ورتالىق كوميتەتىنىڭ ەكىنشى، ءۇشىنشى جالپى ماجىلىستەرىنىڭ رۋحىن جاپپاي دايەكتىلەندىرىپ، ماداقتالىپ-سيلانعان عارىشكەرلەردى ۇلگى ەتىپ، «ەكىنى تۇراقتاندىرۋدىڭ» شەشۋشى ءمانىن تەرەڭ ءتۇسىنىپ، «ءتورت تانىمدى» كۇشەيتىپ، «ءتورت سەنىمدى» بەكەمدەپ، «ەكىنى قورعاۋدى» ورىنداپ، شي جينپيڭ جولداستى ۇيتقى ەتكەن پارتيا ورتالىق كوميتەتىنىڭ توڭىرەگىنە اناعۇرلىم تىعىز ىنتىماقتاسىپ، «ەكى بومبى، ءبىر جاساندى سەرىك» رۋحىن جانە عارىشقا ادام الىپ ۇشۋ رۋحىن بارىنشا ساۋلەلەندىرىپ، قايراتتانا العا ۇمتىلىپ، دۇرىس جولدان تايماي، جاڭالىق اشىپ، كۇش ۇستىنە كۇش قوسىپ، ەكپىن قۋا العا ۇمتىلىپ، جۇڭگو ۇلگىسىندەگى وسىزامانداندىرۋ ارقىلى مەملەكەتتى قۇدىرەتتەندىرۋ قۇرىلىسىن، ۇلتتى گۇلدەندىرۋ ۇلى ءىسىن جاپپاي ىلگەرىلەتۋ جولىندا ىنتىماقتاسا كۇرەس جۇرگىزۋگە ۇندەدى!