تيانۋىن 1-ٴنومىرلى بارلاۋ اسپابى مارسقا ٴساتتى قوندى، شي جينپيڭ پارتيا ورتالىق كوميتەتى، مەملەكەتتىك كەڭەس جانە ورتالىق اسكەري ىستەر كوميتەتى اتىنان تەلەگرامما جولداپ قۇتتىقتادى
ٴوز حابارىمىز. 5-ايدىڭ 15-كۇنى ساعات 7 دەن 18 مينۋت وتكەندە، تيانۋىن 1-ٴنومىرلى بارلاۋ اسپابى مارستىڭ ۋتوپيا جازىعىنىڭ وڭتۇستىك بولەگىندەگى بەلگىلەنگەن قونۋ رايونىنا ٴساتتى قوندى، سونىمەن ەلىمىزدىڭ مارستى تۇڭعىش رەت بارلاۋ مىندەتىندەگى مارسقا قونۋ تابىستى بولدى. ج ك پ ورتالىق كوميتەتىنىڭ باس شۋجيى، مەملەكەت ٴتوراعاسى، ورتالىق اسكەري ىستەر كوميتەتىنىڭ ٴتوراعاسى شي جينپيڭ قۇتتىقتاۋ تەلەگرامماسىن جولداپ، پارتيا ورتالىق كوميتەتى، مەملەكەتتىك كەڭەس جانە ورتالىق اسكەري ىستەر كوميتەتى اتىنان مارستى تۇڭعىش رەت بارلاۋ مىندەتىنە قولباسشىلىق ەتۋ شتابىن جانە مىندەتكە قاتىناسقان بارلىق جولداستاردى قىزۋ قۇتتىقتادى جانە ولاردان شىنايى حال سۇرادى.
شي جينپيڭ قۇتتىقتاۋ تەلەگرامماسىندا مىنالاردى اتاپ كورسەتتى: تيانۋىن 1-ٴنومىرلى بارلاۋ اسپابى مارسقا قونىپ، ەلىمىزدىڭ پلانەتالار ارا بارلاۋ ساپارىنىڭ ماڭىزدى قادامىن باسىپ، جەر شارىنان اي شارى جۇيەسىنە، ونان پلانەتالار ارا سەكىرىستى جۇزەگە اسىرىپ، مارستا تۇڭعىش رەت جۇڭگولىقتاردىڭ ٴىزىن قالدىردى، بۇل ەلىمىزدىڭ عارىش ىستەرى دامۋىنىڭ تاعى ٴبىر بەلەستىك مانگە يە اياق الىسى. سىزدەر باتىلدىقپەن سايىس جاريالاپ، ۇزدىك بولۋعا ۇمتىلىپ، ەلىمىزدىڭ پلانەتالاردى بارلاۋ سالاسىندا دۇنيە ٴجۇزىنىڭ الدىڭعى لەگىنە وتۋىنە مۇمكىندىك جاسادىڭىزدار، وتان مەن حالىق سىزدەردىڭ كورنەكتى ەڭبەكتەرىڭىزدى ماڭگى ۇمىتپايدى!
شي جينپيڭ مىنالاردى باسا دارىپتەدى: سىزدەردىڭ كۇش ۇستىنە كۇش قوسىپ، مارستى عىلمي بارلاۋدى دەن قويا ۇيىمداستىرىپ اتقارىپ، عىلىم-تەحنيكادا ٴوز كۇشىنە سۇيەنىپ ٴوزىن الۋەتتەندىرۋگە تاباندى بولىپ، پلانەتالاردى بارلاۋ سياقتى عارىش كەلەلى ينجەنەريالارىن دەن قويا ىلگەرىلەتىپ، عارىش ىستەرىندە قۇدىرەتتى ەل قۇرۋدى جەدەلدەتىپ، الەمنىڭ سىرىن اشۋعا، ادامزاتتىڭ بەيبىتشىلىگى مەن دامۋىن جەبەۋگە تىڭ دا اناعۇرلىم زور ۇلەس قوسۋلارىڭىزدى ٴۇمىت ەتەمىن!
ج ك پ ورتالىق كوميتەتى ساياسي بيۋروسىنىڭ تۇراقتى مۇشەسى، مەملەكەتتىك كەڭەستىڭ ورىنباسار زۇڭليى حان جىڭ بەيجيڭ عارىشقا ۇشۋدى مەڭگەرۋ ورتالىعىندا تيانۋىن 1-ٴنومىرلى بارلاۋ اسپابىنىڭ مارسقا قونۋ جاعدايىن كوردى.
ج ك پ ورتالىق كوميتەتى ساياسي بيۋروسىنىڭ مۇشەسى، مەملەكەتتىك كەڭەستىڭ ورىنباسار زۇڭليى ليۋ حى شي جينپيڭنىڭ قۇتتىقتاۋ تەلەگرامماسىن ناق مايداندا وقىدى.
ەلىمىزدىڭ مارستى بارلاۋ مىندەتى 2016-جىلى جوسپارلانىپ، مارستى اينالۋ، مارسقا قونۋ جانە شارلاۋ، بارلاۋ مىندەتىن ورىنداۋ جوبالانعان بولاتىن. تيانۋىن 1-ٴنومىرلى بارلاۋ اسپابى 2020-جىلى 7-ايدىڭ 23-كۇنى حاينان ولكەسىنىڭ ۋىنچاڭ قالاسىندا ۇزاق جورىق 5-ٴنومىرلى تاسىمال راكەتاسىمەن ٴساتتى ۇشىرىلىپ، 2021-جىلى 2-ايدىڭ 10-كۇنى مارستى ٴساتتى تاۋىپ، ەلىمىزدىڭ تۇڭعىش مارس جاساندى سەرىگىنە اينالدى، 2-ايدىڭ 24-كۇنى بارلاۋ اسپابى مارستىڭ توقتاۋ وربيتاسىنا كىرىپ، شامامەن 3 اي اينالىپ بارلاۋ جۇرگىزىپ، مارسقا ٴساتتى قونۋعا نەگىز قالادى. تيانۋىن 1-ٴنومىرلى بارلاۋ اسپابىنىڭ مارسقا ٴساتتى قونۋى-ەلىمىزدىڭ جەر شارىنان تىس پلانەتادا تۇڭعىش رەت قونۋىن جۇزەگە اسىرىپ، ەلىمىزدى مارسقا ٴساتتى قونعان ەكىنشى ەلگە اينالدىردى. جۇڭگو مەملەكەتتىك عارىش مەكەمەسى ەۆروپا عارىش مەكەمەسىمەن، ارگەنتينا، فرانسيا، اۆستريا سياقتى حالىقارالىق عارىش ۇيىمدارىمەن جانە مەملەكەتتىك عارىش قۇرىلىمىمەن قاتىستى نىساندار سەلبەستىگىن ورىستەتىپ، الەمنىڭ سىرىن اشۋ، مارستىڭ وزگەرۋى جونىندەگى تانىمدى تەرەڭدەتۋ، تىرشىلىكتىڭ پايدا بولۋىن ٴتۇسىنۋ سياقتى جاقتاردا اقىل-پاراساتى مەن كۇش-قۋاتىن ارنايدى.
اۋدارعان: گۇلنۇر قابىلقاق قىزى
