شي جينپيڭ جاڭا زەللانديانىڭ جاڭادان تاعايىندالعان گۋبەرناتورى كيروعا قۇتتىقتاۋ تەلەگرامما جولدادى
ٴوز حابارىمىز. مەملەكەت ٴتوراعاسى شي جينپيڭ 10-ايدىڭ 21-كۇنى جاڭا زەللانديانىڭ جاڭادان تاعايىندالعان گۋبەرناتورى كيروعا تەلەگرامما جولداپ، ونىڭ جاڭا زەللانديانىڭ گۋبەرناتورى بولعاندىعىن قۇتتىقتادى.
شي جينپيڭ قۇتتىقتاۋ تەلەگراممادا مىنالاردى اتاپ كورسەتتى: جۇڭگو مەن جاڭا زەللانديا ماڭىزدى سەلبەستىك سەرىكتەر. ديپلوماتيالىق قاتىناس ورناتقان 49 جىلدان بەرى، جۇڭگو-جاڭا زەللانديا قاتىناسى باياندى دامىدى، ەكى جاقتىڭ سەلبەستىگىندە كوپ ٴتۇرلى «بىرىنشىلىك» جاراتىلىپ، ەكى ەل حالقىنا ناقتى پايدا جەتكىزدى. جاڭا تيپتى ايدارشا ۆيرۋس وكپە قابىنۋ ىندەتى جاعدايىندا، جۇڭگو مەن جاڭا زەللانديا جۇقپالى اۋرۋدان ساقتانۋ جانە ونى تىزگىندەۋ، ەكونوميكانى قالپىنا كەلتىرۋ سياقتى جاقتاردا اسا ءٴونىمدى سەلبەستىك ورىستەتتى. مەن جۇڭگو-جاڭا زەللانديا قاتىناسىنىڭ دامۋىنا ايرىقشا ٴمان بەرەمىن، كيرو گۋبەرناتورمەن بىرگە قۇلشىنىپ، ٴوزارا قۇرمەت ەتۋ، ٴوزارا پايدا جەتكىزىپ، تەڭ يگىلىككە كەنەلۋ پرينسيبىنەن جازباي، سويلەسۋدى، اۋىس-كۇيىستى جانە سەلبەستىكتى كۇشەيتىپ، جۇڭگو مەن جاڭا زەللانديانىڭ جان-جاقتى ستراتەگيالىق سەرىكتەستىك قاتىناسىنىڭ ۇزدىكسىز تىڭ جەتىستىكتەرگە قول جەتكىزۋىن ىلگەرىلەتىپ، ەكى ەل مەن ەكى ەل حالقىنا باقىت جاراتۋدى قالايمىن.
اۋدارعان: گۇلنۇر قابىلقاق قىزى