شي جينپيڭ مىنالاردى اتاپ كورسەتتى: ازيا-تىنىق مۇحيت ەكونوميكالىق سەلبەستىك ۇيىمى باسشىلاردىڭ مەرزىمدى ءماجىلىس مەحانيزمىن ورناتقاننان بەرى، باستان-اياق دۇنيە ءجۇزىنىڭ اشىق دامۋىنىڭ الدىڭعى لەگىندە ءجۇرىپ، وڭىرلىك ساۋدا مەن قارجى قوسۋدىڭ ەركىندەنۋىن، قولايلىلانۋىن، ەكونوميكالىق، تەحنيكالىق دامۋىن، زاتتىق ماتەريالداردىڭ، ادامداردىڭ اۋىس-كۇيىسىن پارمەندى جەبەپ، كۇللى دۇنيەنى جالت قاراتقان «ازيا-تىنىق مۇحيت كەرەمەتتەرىن» جاراتتى. قازىر دۇنيە جۇزىندە 100 جىلدىق وزگەرىس جاعدايى جەدەل دامىپ، دۇنيە ءجۇزى ەكونوميكاسى كوپ ءتۇرلى حاۋىپ-قاتەر مەن سىن-سايىستارعا ءدوپ كەلدى، دۇنيە ءجۇزىنىڭ ارتۋ قوزعالتقىشى رەتىندە، ازيا-تىنىق مۇحيت ءوڭىرى اناعۇرلىم زور داۋىرلىك جاۋاپكەرشىلىك ارقالاۋدا. ازيا-تىنىق مۇحيت وڭىرىندەگى ەلدەردىڭ باسشىلارى رەتىندە، ءبىز، ازيا-تىنىق مۇحيت ءوڭىرىن وسى عاسىردىڭ ورتا شەنىنە دەيىن قالاي دامىتۋ كەرەك؟ ازيا-تىنىق مۇحيت ءوڭىرى دامۋىنىڭ كەلەسى «التىن 30 جىلىن» قالاي تۇلعالاۋعا بولادى؟ وسى بارىستا ازيا-تىنىق مۇحيت ەكونوميكالىق سەلبەستىك ۇيىمىنىڭ رولىن قايتكەندە اناعۇرلىم ويداعىداي ساۋلەلەندىرۋگە بولادى؟ دەگەن ماسەلەلەرگە ىشكەرىلەي وي جۇگىرتۋىمىز كەرەك

    شي جينپيڭ مىنالاردى باسا دارىپتەدى: ءبىز ازيا-تىنىق مۇحيت سەلبەستىگىنىڭ اۋەلگى ماقساتىن ۇستانىپ، ءداۋىر ۇنىنە جاۋاپكەرلىكپەن جاۋاپ قايتارىپ، الەمدىك سىن-سايىستارعا قول ۇستاسا توتەپ بەرىپ، پۋتراجايا بولاشاق جوباسىن جاپپاي تياناقتاندىرىپ، اشىق، ومىرشەڭ، قايسار، بەيبىت ازيا-تىنىق مۇحيت ورتاق تۇلعاسىن قۇرىپ، ازيا-تىنىق مۇحيت وڭىرىندەگى حالىق پەن ۇرپاقتاردىڭ بىرگە گۇلدەنۋىن جۇزەگە اسىرۋىمىز كەرەك.

ء    بىرىنشى، جاڭالىق اشۋ ارقىلى دەم بەرۋگە تاباندى بولۋ. عىلىم-تەحنيكالىق اۋىس-كۇيىستى، سەلبەستىكتى اناعۇرلىم بەلسەنە ىلگەرىلەتىپ، عىلىم-تەحنيكانى دامىتۋدىڭ اشىق، ءادىل، تەپە-تەڭ، كەمسىتپەيتىن ورتاسىن قول ۇستاسا قالىپتاستىرۋ كەرەك. سيفرلانۋعا بۇرىلىس جاساۋدى جەدەلدەتىپ، سيفرلى اڭعاردى ازايتىپ، ءىرى ساندى مالىمەت، بۇلتتىق ەسەپتەۋ، جاساندى زەردە، كۆانتتىق ەسەپتەۋ سياقتى جاڭا تەحنيكالاردىڭ قولدانىلۋىن قولداپ، ازيا-تىنىق مۇحيت ءوڭىرى دامۋىنىڭ جاڭا قوزعاۋشى كۇشىن، جاڭا باسىمدىعىن ۇزدىكسىز سومداۋ كەرەك. جۇڭگو ازيا-تىنىق مۇحيت ەكونوميكالىق سەلبەستىك ۇيىمىنىڭ سيفرلى اۋىل-قىستاق قۇرىلىسى، كاسىپورىنداردىڭ سيفرلى سالاۋاتى، سيفرلى تەحنيكادان پايدالانىپ جاسىل، تومەن كومىرتەكتى تيپكە بۇرىلىس جاساۋدى جەبەۋ سياقتى دارىپتەمەلەردى العا قويىپ، ازيا-تىنىق مۇحيت ءوڭىرىنىڭ دامۋىنا اناعۇرلىم كوپ قۋات ۇستەدى.

    ەكىنشى، ەسىك اشۋ بەتالىسىنا تاباندى بولۋ. ەركىن، اشىق ساۋداعا قارجى قوسۋدى قورعاپ، دۇنيە ساۋدا ۇيىمىن وزەك ەتكەن كوپ جاقتى ساۋدا ءتۇزىلىسىن قولداپ جانە كۇشەيتىپ، الەمدىك كاسىپ تىزبەگى مەن قامداۋ تىزبەگىنىڭ ورنىقتى، ىركىلىسسىز بولۋىن قورعاپ، ەكونوميكا-ساۋدا ماسەلەسىن ساياسيلاندىرۋعا، قۇرالعا اينالدىرۋعا قارسى تۇرۋ كەرەك. وڭىرلىك ەكونوميكانىڭ ءبىر تۇلعالانۋىن تاباندىلىقپەن ىلگەرىلەتىپ، ازيا-تىنىق مۇحيت ەركىن ساۋدا رايونىنىڭ اياق الىسىن جەدەل ىلگەرىلەتۋ كەرەك. جۇڭگو 3-كەزەكتى "ءبىر بەلدەۋ، ءبىر جول" حالىقارالىق سەلبەستىك جوعارى دارەجەلى تالقىسىن ءساتتى وتكىزىپ، دۇنيە ءجۇزىنىڭ ءوزارا ۇلاسۋىن، تۇتاسۋىن جەبەۋگە، اشىق دۇنيە ءجۇزى ەكونوميكاسىن قۇرۋعا تىڭ قوزعاۋشى كۇش ۇستەدى.

    ءۇشىنشى، جاسىل دامۋعا تاباندى بولۋ. ادام مەن تابيعاتتىڭ جاراسىمدى قاتار ءومىر سۇرۋىنە تاباندى بولىپ، دامۋ ءتاسىلىنىڭ جاسىل، تومەن كومىرتەكتى تيپكە بۇرىلىس جاساۋىن جەدەل ىلگەرىلەتىپ، كومىرتەگىن تومەندەتۋدى، لاستانۋدى ازايتۋدى، جاسىل دامۋدى كەڭەيتۋدى، ارتۋدى سايكەستى ىلگەرىلەتىپ، ازيا-تىنىق مۇحيت ءوڭىرىنىڭ ارتۋىنداعى جاسىل دامۋ ەرەكشەلىگىن بەكەمدەۋ كەرەك. جۇڭگو ەكولوگيانى الدىمەن ەسكەرۋگە، جاسىل دامۋ جولىمەن جۇرۋگە تاباندى بولىپ، كومىر قىشقىل گازىنىڭ شىعارىلۋىن ەڭ جوعارى ماننەن اسىرماۋدى، كومىر قىشقىل گازىن بەيتاراپتاندىرۋدى بەلسەندى، ورنىقتى ىلگەرىلەتتى. ءبىز ازيا-تىنىق مۇحيت ەكونوميكالىق سەلبەستىك ۇيىمىنىڭ جاسىل اۋىل شارۋاشىلىعى، باياندى قالا، ەنەرگيانى تومەن كومىرتەكتى تيپكە وزگەرتۋ، تەڭىز-مۇحيتتىڭ لاستانۋىنان ساقتانۋ جانە ونى جونگە سالۋ سياقتى سەلبەستىك دارىپتەمەلەرىن العا قويىپ، تازا، كورىكتى ازيا-تىنىق مۇحيت ءوڭىرىن بىرگە قۇرۋدى ىلگەرىلەتتىك.

    ءتورتىنشى، جالپىعا ءتيىمدى بولۋعا، بىرگە يگىلىكتەنۋگە تاباندى بولۋ. ب م ۇ-نىڭ 2030-جىلعا دەيىنگى باياندى دامۋ كەڭەس ءتارتىبىن جاپپاي تياناقتاندىرىپ، دامۋ ماسەلەسىنىڭ حالىقارالىق كەڭەس ءتارتىبىنىڭ وزەكتى ورنىنا قايتا ورالۋىن ىلگەرىلەتىپ، دامۋ ستراتەگياسىن ۇشتاستىرۋدى تەرەڭدەتىپ، الەمدىك دامۋ قىزىل سيفرىن بىرگە شەشۋ كەرەك. ءار جاقتىڭ الەمدىك دامۋ دارىپتەمەسىنە بەلسەنە ات سالىسىپ، كەدەيلىكتى ازايتۋ، استىق حاۋىپسىزدىگى، ونەركاسىپتەنۋ، دامۋ سياقتى سالالارداعى سەلبەستىكتى تەرەڭدەتىپ، الەمدىك دامۋ ورتاق تۇلعاسىن قۇرىپ، ءار ەل حالقىن وسىزامانداندىرۋ قۇرىلىسىنىڭ جەتىستىكتەرىنەن بىرگە يگىلىكتەندىرۋىن قارسى الامىز. جۇڭگو ازيا-تىنىق مۇحيت ەكونوميكالىق سەلبەستىك ۇيىمىنىڭ ەكونوميكالىق-تەحنيكالىق سەلبەستىك ورىستەتۋىن ۇزدىكسىز قولداپ، ازيا-تىنىق مۇحيت ءوڭىرىنىڭ دامۋىن بىرگە جەبەيدى.

    شي جينپيڭ مىنالاردى باسا دارىپتەدى: جۇڭگو جۇڭگو ۇلگىسىندەگى وسىزامانداندىرۋ ارقىلى مەملەكەتتى قۇدىرەتتەندىرۋ قۇرىلىسىن، ۇلتتى گۇلدەندىرۋ ۇلى ءىسىن جاپپاي ىلگەرىلەتۋدە. جۇڭگو بەيبىت دامۋ جولىمەن جۇرۋگە، جوعارى ساپالى دامۋعا، جوعارى دەڭگەيدەگى سىرتقا ەسىك اشۋعا تاباندى بولىپ، جۇڭگو ۇلگىسىندەگى وسىزامانداندىرۋ ارقىلى دۇنيە جۇزىندەگى ءار ەلدىڭ وسىزاماندانۋىن جۇزەگە اسىرۋدى ىلگەرىلەتۋگە جاڭا وراي جاراتادى. جۇڭگو ءارقايسى جاقتارمەن بىرگە قۇلشىنىپ، ازيا-تىنىق مۇحيت سەلبەستىگىنىڭ اناعۇرلىم مول تابىستارعا قول جەتكىزۋىن ىلگەرىلەتىپ، ازيا-تىنىق مۇحيت ءوڭىرىنىڭ كەلەسى «التىن 30 جىلىن» بىرگە تۇلعالاۋدى قالايدى!
ءماجىلىستى ا ق ش زۇڭتۇڭى بايدەن باسقاردى، «بارلىق ادامعا يكەمدى جانە باياندى بولاشاق جاراتۋ»-ءماجىلىستىڭ نەگىزگى تاقىرىبى بولدى.

    ماجىلىستە 2023-جىلعى «ازيا-تىنىق مۇحيت ەكونوميكالىق سەلبەستىك ۇيىمى باسشىلارىنىڭ سان-فرانسيسكو مالىمدەمەسى» جاريالاندى. ۋاڭ ي ماجىلىسكە قاتىناستى.

اۋدارعان: گۇلنۇر قابىلقاق قىزى