لي چياڭ، جاۋ لىجي، ۋاڭ حۋنيڭ، ديڭ شۋەشياڭ، لي شي، حان جىڭ ماداقتاۋ-سيلاۋ سالتىنا قاتىناستى، ساي چي سالتتى باسقاردى.

 ساعات 9 مولشەرىندە مەملەكەت وردەنىنىڭ جانە مەملەكەت داڭق اتاعىنىڭ يەگەرلەرى قۇرمەتتى قوناقتار كولىگىنە توپتىق وتىرىپ، تۇرعان جەرلەرىنەن جولعا شىعىپ، قۇرمەتتى قوناقتاردى قارسى الۋ موتوتسيكل اترەتىنىڭ قورعاۋىندا حالىق سارايىنا جول الدى. حالىق سارايىنىڭ شىعىس قاقپاسىنىڭ الدىندا قۇرمەت قاراۋىلى جولدىڭ ەكى جاعىنا ءتىزىلدى، جاستار مەن ورەندەر قىزۋ مەرەيمەن قۇرمەت ءبىلدىردى. مەملەكەت وردەنى مەن مەملەكەت داڭق اتاعىنىڭ يەگەرلەرى قىزىل كىلەمدى بويلاپ باسپالداقپەن باياۋ ءجۇرىپ، حالىق سارايىنا كىردى. پارتيا مەن مەملەكەتتىڭ ەڭبەك ءسىڭىرىپ، داڭققا يە بولعانداردى ماداقتاۋ-سيلاۋ قىزمەت كوميتەتىندەگى قاتىستى باسشى جولداستار وسى ارادا ولاردى توپتىق قارسى الدى.

 حالىق سارايىنىڭ التىن ءتۇستى زالى ايبىندى دا دۋماندى بەينەگە شومدى. قىزىل ءتۇستى ۇلكەن ارتقى كورىنىس تاقتاسىندا رەسپۋبليكا وردەنىنىڭ، دوستىق وردەنىنىڭ جانە مەملەكەت داڭق اتاعى مەدالىنىڭ ورنەگى جارقىراي نۇر شاشادى. ارتقى كورىنىس تاقتاسىنىڭ الدىندا، نارتتاي جايناعان 18 بەس جۇلدىزدى قىزىل تۋ ەكى جاققا ءبولىنىپ قاتارلاي ورنالاستىرىلعان، اسقاق تۇلعالى 18 قۇرمەت قاراۋىلى مىلتىقتارىن سەرت ۇستاپ قاسقايىپ تۇردى.

 ساعات 9دان 58 مينۋت وتكەندە، كوڭىلدى مۋزيكا ءۇنى ىشىندە شي جينپيڭ مەملەكەت وردەنىنىڭ جانە مەملەكەت داڭق اتاعىنىڭ يەگەرلەرىمەن بىرگە ءماجىلىس زالىنا كىردى، بۇكىل زالداعىلار ورىندارىنان تۇرىپ، شاتىرلاتا شاپالاق سوقتى.

 ساعات 10 دا اسكەري وركەستردىڭ كەرنايشىسى سالت دابىلىن قاعىپ، ماداقتاۋ-سيلاۋ سالتى باستالدى. «ەرىكتىلەر مارشى» ورىندالىپ، بۇكىل الاڭداعىلار مەملەكەت ءانىن اسقاقتاتا شىرقادى.

 ساي چي شي جينپيڭ قول قويعان جۇڭحۋا حالىق رەسپۋبليكاسى ءتوراعاسىنىڭ بۇيرىعىن وقىدى. ءتوراعا بۇيرىعىندا مىنالار اتاپ كورسەتىلدى: جۇڭحۋا حالىق رەسپۋبليكاسى قۇرىلعاندىعىنىڭ 75 جىلدىعىن قۇتتىقتاۋ، جاڭا جۇڭگونىڭ قۇرىلىسى مەن دامۋىنا كورنەكتى ۇلەس قوسقان ەلەۋلى ەڭبەك سىڭىرگەن ۇلگىلەردى سالتاناتپەن ماداقتاۋ-سيلاۋ، ۇلت رۋحى مەن ءداۋىر رۋحىن ساۋلەلەندىرۋ ءۇشىن، 14-كەزەكتى مەملەكەتتىك حالىق قۇرىلتايى تۇراقتى كوميتەتى 11-ءماجىلىسىنىڭ ۇيعارىمىنا ساي، ۋاڭ يۇڭجى قاتارلى 4 ادامعا «رەسپۋبليكا وردەنى»، ديلما روسسەفكە «دوستىق وردەنى»، ۋاڭ شياۋمو قاتارلى 10 ادامعا مەملەكەت داڭق اتاعى بەرىلدى.

 2 تۋ ۇستاۋشى بەس جۇلدىزدى قىزىل تۋدى بيىك ۇستاپ، 3 قۇرمەت قاراۋىلى رەسپۋبليكا وردەنىن، دوستىق وردەنىن جانە مەملەكەت داڭق اتاعى مەدالىن قولدارىنا الىپ، نىق قادام تاستاپ، سالت مايدانىنا كەلدى.

 «وتان قاھارماندارىنا قۇرمەت» اتتى ايبىندى مۋزيكا ءۇنى ىشىندە شي جينپيڭ مەملەكەت وردەنىنىڭ جانە مەملەكەت داڭق اتاعىنىڭ يەگەرلەرىنە وردەن، مەدال تاراتتى ءارى ولارمەن ىقىلاسپەن قول الىسىپ، قۇتتىقتادى، بۇكىل زالدان شاتىرلاعان شاپالاق ءۇنى كوتەرىلدى. پيونەرلەر ەڭبەك سىڭىرگەن ۇلگىلەرگە گۇل ۇسىنىپ، سالەم بەرىپ، قۇرمەت ءبىلدىردى.

 بۇكىل زالداعى شاتىرلاعان شاپالاق ءۇنى ىشىندە شي جينپيڭ ماڭىزدى ءسوز سويلەدى. ول الدىمەن پارتيا ورتالىق كوميتەتى، مەملەكەتتىك حالىق قۇرىلتايى، مەملەكەتتىك كەڭەس جانە ورتالىق اسكەري ىستەر كوميتەتى اتىنان «رەسپۋبليكا وردەنىنە» جانە مەملەكەت داڭق اتاعىنا يە بولعان قاھارمان ۇلگىلەردى، «دوستىق وردەنىنە» يە بولعان حالىقارالىق دوستاردى قىزۋ قۇتتىقتادى، ولارعا وسكەلەڭ قۇرمەت ءبىلدىردى.

 شي جينپيڭ مىنالاردى اتاپ كورسەتتى: جاڭا جۇڭگو قۇرىلعان 75 جىلدان بەرى، جۇڭگو كوممۋنيستىك پارتياسى بۇكىل ەلدەگى ءار ۇلت حالقىن ىنتىماقتاستىرا باستاپ، ەكونوميكانىڭ تەز قارقىنمەن دامۋى مەن قوعامنىڭ ۇزاق ۋاقىت ورنىقتى بولۋى سىندى ەكى ۇلكەن كەرەمەتتى جاراتتى، ۇلى وتانىمىزدا وراسان زور وزگەرىستەر تۋىلدى، جۇڭحۋا ۇلتىنىڭ ۇلى گۇلدەنۋى كەرى بۇرۋعا بولمايتىن تاريحي ۇدەرىسكە قادام تاستادى. قۇلاشىن كەڭ جايعان وسى دامۋ بارىسىندا ءارقايسى شەپتە توپ-توپ قاھارمان ۇلگىلەر جارىققا شىقتى. بۇگىن ماداقتالىپ-سيلانعان جولداستار سولاردىڭ كورنەكتى ۋاكىلى. ولاردىڭ ىزگى ىستەرى مەن كورنەكتى ۇلەسى رەسپۋبليكا تاريحىنا ماڭگى جازىلادى، ولاردىڭ ادال، تاباندى، قاراپايىم تاڭداۋلى قاسيەتى بۇكىل پارتيانىڭ، بۇكىل ەلدەگى ءار ۇلت حالقىنىڭ ۇيرەنۋىنە تاتيدى.

 شي جينپيڭ مىنالاردى باسا دارىپتەدى: ەلىمىز جۇڭگو ۇلگىسىندەگى وسىزامانداندىرۋ ارقىلى مەملەكەتتى قۇدىرەتتەندىرۋ قۇرىلىسىن، ۇلتتى گۇلدەندىرۋ ۇلى ءىسىن جاپپاي ىلگەرىلەتۋدىڭ شەشۋشى كەزەڭىندە تۇر. بۇكىل پارتيا، بۇكىل ەلدەگى ءار ۇلت حالقى قاھارمان ۇلگىلەردى ۇلگى تۇتىپ، ىنتىماقتاسا العا باسىپ، ۇدەرە العا تارتىپ، مەملەكەتتى قۇدىرەتتەندىرۋ ۇلى ىسىنە بىرگە ات سالىساتىن قۋاتتى كۇش توپتاۋى كەرەك. مەملەكەتتى قۇدىرەتتەندىرۋ مۇراتىن كوكەيدە ساقتاپ، مەملەكەتتىڭ قۇدىرەتتەنۋىن، حالىقتىڭ باقىتىن نىسانا ەتىپ، وتاندى ادالدىقپەن ءسۇيىپ، وتان ءۇمىتىن اقتاۋدى مۇرات ەتىپ، جەكە باسىندىق ءىستى مەملەكەتتىڭ ۇلكەن ىسىنە توعىستىرىپ، مەملەكەت ءۇشىن جاۋاپكەرشىلىكتى ادا ەتۋ، حالىق ءۇشىن قىزمەت ىستەۋ بارىسىندا جەكە باسىنىڭ قۇنىن جۇزەگە اسىرىپ، ءومىر كەلبەتىن ايگىلەۋ كەرەك. مەملەكەتتى قۇدىرەتتەندىرۋ ونەرىن شىڭداپ، ءداۋىر دامۋىنىڭ جاڭا تالابىنا سايكەسىپ، جاڭا بىلىمدەردى ۇيرەنىپ، جاڭا شەبەرلىكتەردى يگەرىپ، شىنايى ونەرگە جاتتىعىپ، قايسى كاسىپتى ىستەسە سول كاسىپتى ءسۇيىپ، سول كاسىپتى زەرتتەپ، سول كاسىپتىڭ مامانى بولىپ، ءىس تىندىرىپ، شارۋاشىلىق قۇرۋعا شەبەر قىزمەت ورىن مايتالمانى، جۇمىسقا جەتتىك كاسىپكەر بولۋعا قۇلشىنۋ كەرەك. مەملەكەتتى قۇدىرەتتەندىرۋ بورىشىن باتىلدىقپەن ارقالاپ، ۋاقىتپەن جارىساتىن تاريحي ىرىقتىلىقپەن، قوجايىندىق جاۋاپكەرشىلىكپەن قايراتتانا العا ۇمتىلىپ، قيىندىقتان تايسالماي العا باسىپ، ۇزدىك بولۋعا تالپىنىپ، كەمەلدەندىرە ءتۇسىپ، قاراپايىم قىزمەت ورنىندا كەرەمەت ناتيجە جاراتىپ، دامۋداعى قيىن ماسەلەلەردى شەشۋ، رەفورماداعى قيىن وتكەلدەردەن قامال الۋ، قوعامنىڭ جاراسىمدىلىعىن، ورنىقتىلىعىن قورعاۋ جاعىندا ۇزدىكسىز ناتيجە جاراتۋ كەرەك.

 شي جينپيڭ بىلاي دەپ اتاپ كورسەتتى: 75 جىلدان بەرى، دۇنيە جۇزىندە جۇڭگو حالقىمەن مۇراتتاس بولعان، بوران-شاشىندى بىرگە وتكەرگەن كوپتەگەن كونە دوستار، جاقسى دوستار بارلىققا كەلدى، بۇگىن «دوستىق وردەنى» بەرىلگەن ديلما روسسەف حانىم سولاردىڭ كورنەكتى ۋاكىلى. جۇڭگو حالقى جۇڭگونىڭ دامۋىنا، جۇڭگو حالقىنىڭ ءار ەل حالقىمەن دوستىعىن كۇشەيتۋگە كورنەكتى ۇلەس قوسقان حالىقارالىق دوستاردى ماڭگى ۇمىتپايدى. جۇڭگو حالقى دۇنيە جۇزىندەگى ءار ەل حالقىمەن قول ۇستاسىپ، دۇنيە ءجۇزىنىڭ بەيبىتشىلىگىن قورعاپ، بىرگە دامۋدى جەبەپ، ادامزاتتىڭ تاعدىرلاس ورتاق تۇلعاسىن قۇرۋدى ىلگەرىلەتىپ، ادامزاتتىڭ اناعۇرلىم كوركەم بولاشاعىن اشۋدى قالايدى.

 شي جينپيڭ بىلاي دەپ باسا دارىپتەدى: جاڭا جوسپار ءبىزدىڭ بىرگە جوبالاۋىمىزدى، جاڭا تاريح ءبىزدىڭ بىرگە جاراتۋىمىزدى قاجەت ەتەدى. نىسانانى كوزدەپ، ءبىر نيەت، ءبىر تىلەكتە بولىپ، ءورىس اشا العا ىلگەرىلەپ، حالىق رەسپۋبليكاسىنىڭ اناعۇرلىم شۇعىلالى تىڭ داستانىن بىرگە جازۋ كەرەك.

 ماداقتاۋ-سيلاۋ سالتىندا «رەسپۋبليكا وردەنىنىڭ» يەگەرى حۋاڭ زۇڭدى، «دوستىق وردەنىنىڭ» يەگەرى ديلما روسسەف مەملەكەت وردەنىنىڭ جانە مەملەكەت داڭق اتاعىنىڭ يەگەرلەرى اتىنان ءسوز سويلەدى.

 ماداقتاۋ-سيلاۋ سالتىنان كەيىن، شي جينپيڭ قاتارلى باسشى جولداستار مەملەكەت وردەنىنىڭ جانە مەملەكەت داڭق اتاعىنىڭ يەگەرلەرىمەن ەستەلىك سۋرەتكە ءتۇستى.

 بەيجيڭدەگى ج ك پ ورتالىق كوميتەتى ساياسي بيۋروسىنىڭ مۇشەلەرى، ورتالىق كوميتەت شۋجيچۋىنىڭ شۋجيلارى، مەملەكەتتىك حالىق قۇرىلتايى تۇراقتى كوميتەتى باستىعىنىڭ ءبىر ءبولىم ورىنباسارلارى، مەملەكەتتىك كەڭەستىڭ مۇشەلەرى، ەڭ جوعارى حالىق سوتى مەكەمەسىنىڭ باستىعى، ەڭ جوعارى حالىق پروكۋراتۋراسىنىڭ باس پروكۋرورى، مەملەكەتتىك ساياسي كەڭەس ءتوراعاسىنىڭ ءبىر ءبولىم ورىنباسارلارى، ورتالىق اسكەري ىستەر كوميتەتىنىڭ مۇشەلەرى ماداقتاۋ-سيلاۋ سالتىنا قاتىناستى.

 ورتالىقتاعى پارتيا، ۇكىمەت، ارميا ورىندارىنىڭ، بۇقارالىق ۇيىمداردىڭ قاتىستى تاراۋلارىنداعى جانە بەيجيڭ قالاسىنداعى جاۋاپتى جولداستار، مەملەكەت وردەنىنىڭ جانە مەملەكەت داڭق اتاعى يەگەرلەرىنىڭ تۋىس-تۋعاندارىنىڭ ۋاكىلدەرى، قاراستى قىزمەت ورىندارىنىڭ ۋاكىلدەرى، بۇرىن ەلەۋلى ەڭبەك ءسىڭىرىپ، داڭققا يە بولعانداردىڭ ۋاكىلدەرى، قاتىستى ەلدەردىڭ جۇڭگودا تۇراتىن ەلشىلەرى، ءار سالاداعى كادرلار مەن بۇقارانىڭ ۋاكىلدەرى سياقتىلاردان 1000 داي ادام ماداقتاۋ-سيلاۋ سالتىنا قاتىناستى.

 

اۋدارعان: گۇلنۇر قابىلقاق قىزى