شي جينپيڭ شينجياڭ ۇيعۇر اۆتونوميالى رايونى قۇرىلعاندىعىنىڭ 70 جىلدىق تاقىرىپتىق جەتىستىكتەر كورمەسىن ەكسكۋرسيالادى

 ۋاڭ حۋنيڭ، ساي چي كورمەنى ەكسكۋرسيالادى

ءوز حابارىمىز. جۇڭگو كوممۋنيستىك پارتياسى ورتالىق كوميتەتىنىڭ باس شۋجيى، مەملەكەت ءتوراعاسى، ورتالىق اسكەري ىستەر كوميتەتىنىڭ ءتوراعاسى شي جينپيڭ 9-ايدىڭ 24-كۇنى تۇستەن بۇرىن شينجياڭ ۇيعۇر اۆتونوميالى رايونى قۇرىلعاندىعىنىڭ 70 جىلدىق تاقىرىپتىق جەتىستىكتەر كورمەسىن ەكسكۋرسيالادى. ول مىنالاردى باسا دارىپتەدى: شينجياڭداعى 70 جىلدان بەرگى وراسان زور وزگەرىستەر جۇڭحۋا ۇلتىنىڭ ۇلى گۇلدەنۋى سىندى تاريحي بارىستىڭ جاندى ىقشام كورىنىسى. اماليات پارتيامىز تۇراقتاندىرعان ۇلتتىق اۆتونوميالى رايون ءتۇزىمىنىڭ بۇكىلدەي دۇرىس ەكەندىگىن، جاڭا داۋىردەگى پارتيانىڭ شينجياڭدى باسقارۋ جالپى جوباسى عىلمي ءارى ءونىمدى ەكەندىگىن ىسپاتتادى، وعان، ءسوز جوق، ۇزاق ۋاقىت تاباندى بولۋ، جاڭا ءىس جۇزىندىك جاعدايلارمەن ۇزدىكسىز ۇشتاستىرا وتىرىپ دايەكتى تياناقتاندىرۋدى ويداعىداي يگەرۋ كەرەك. 

تۇستەن بۇرىن ساعات 10 نان 30 مينۋت وتكەندە، شي جينپيڭ قاتارلىلار ءۇرىمجى مادەنيەت ورتالىعى كورمە سارايىنا بارىپ، كورمە زالىنا كىرىپ، جەتىستىكتەر كورمەسىن ەكسكۋرسيالادى. كورمە «شار تاراپتان شاتتىق ءۇنى تارالىپ، جاڭا تاراۋ باستالدى»، «تيانشاندا ايبىندى جوبا جاسالدى»، «كورىكتى شينجياڭدا شۇعىلالى ناتيجە جاراتىلدى» سىندى 3 بولەكتەن قۇرالىپ، 70 جىلدان بەرگى جۇڭگو كوممۋنيستىك پارتياسىنىڭ پارمەندى باسشىلىعىندا، بۇكىل ەلدىڭ جەر جەرىنىڭ زور كۇشپەن قولداۋىندا، شينجياڭداعى ءار ۇلت حالقىنىڭ ءبىر نيەتپەن ىنتىماقتاسىپ، قاجىرلىلىقپەن كۇرەس جۇرگىزىپ، قايسارلىقپەن العا ۇمتىلۋدا قول جەتكىزگەن شۇعىلالى تابىستارى تولىق ايگىلەندى.

شينجياڭ ۇيعۇر اۆتونوميالى رايونى قۇرىلعان كەزدەگى تاريحي كەسكىندەر، وكتابر تراكتور زاۆودىندا وندىرىلگەن ءبىرىنشى توپتاعى تراكتورلار، تيانشان ءتۇرلى بۇيىمدار ساۋدا سارايىنىڭ ىشىندەگى قالپىنا كەلتىرىلگەن كورىنىستەر، كەدەيلىكتەن قۇتىلدىرۋدان قامال الۋ شايقاسىنىڭ جەڭىسىنە قول جەتكىزۋدەگى جاڭا، كونە سالىستىرمالى سۋرەتتەر، جۇڭحۋا ۇلتى ورتاق تۇلعا تانىمىن سومداۋداعى ۇگىت تاربيە كورمە تاقتاسى، اۆتونوميالى رايوننىڭ سىرتقا ەسىك اشۋدى كەڭەيتۋدەگى شەكارا وتكەلدەرىنىڭ ورنالاسۋ كارتاسى جونىندەگى تانىستىرۋلاردى شي جينپيڭ دەن قويا تىڭداپ، ءالسىن-ءالى كىدىرىپ، كورىپ، قاتىستى جاعدايلاردى ەگجەي-تەگجەيلى ۇعىستى. ول مىنالاردى اتاپ كورسەتتى: شينجياڭنىڭ 70 جىلدىق تاقىرىپتىق جەتىستىكتەر كورمەسى وڭ ەنەرگياعا تولى، ادامدى جەلپىندىرەدى. كورمەنى ەكسكۋرسيالاۋعا زەر سالا ۇيىمداستىرىپ، جاڭا مەن كونەنى سالىستىرا وتىرىپ، جاندى فاكتتەر ارقىلى جۇرت تىلەگىن ونان ارى ۇيىستىرىپ، كۇش-قۋاتتى شوعىرلاندىرىپ، شينجياڭداعى ءار ۇلت كادرلارى مەن بۇقاراسىن جۇڭحۋا ۇلتى ورتاق تۇلعا تانىمىن بەرىك ورناتىپ، بىرگە اۋقاتتانۋ جولىندا ۇزدىكسىز باقىتتى، تاماشا تۇرمىس جاراتۋعا شابىتتاندىرۋ كەرەك.

 ۋاڭ حۋنيڭ، ساي چي، لي گانجيە، حى ليفىڭ، ۋاڭ شياۋحۇڭ، شوكىرات زاكىر، شىن يچين، ۋاڭ دۇڭفىڭ، ليۋ جىنلي جانە ورتالىق پەن مەملەكەت ورگاندارىنىڭ قاتىستى تاراۋلارىنداعى جاۋاپتى جولداستار، ورتالىق ۋاكىلدەر ۇيىرمەسىنىڭ بارلىق مۇشەلەرى كورمەنى ەكسكۋرسيالادى.