ناچار ئۇچۇرلارنى پاش قىلىش: mzjubao@cnr.cn

ۋنيۆەرسال

نارەستە ساۋدالاعاندار سازايىن تارتتى

来源:جۇڭگو قازاق راديو تورابى     |责编:阿依娜古丽|     发布日期: 2019-09-18 10:50

 

حاباردى دايىنداعاندار: وماربەك قىزىرقان ۇلى، سۋگاڭۋي


    بەيجيڭنەن شىققان جولاۋشىلار پويەزى تاڭەرتەڭگى ساعات 7 دەن 2 مينۋت وتكەندە ءۇرىمجى ۆاگزالىنا كەلىپ باياۋ توقتادى، پويەزدان جاپا-تارماعاي ءتۇسىپ جاتقان جولاۋشىلاردىڭ سوڭىن الا قولدارىنا كوزىر سالىنعان ەر-ايەل 4 قىلمىس كۇدىكتىسى بۇقاراشا كيىنگەن حالىق ساقشىلارىنىڭ ايداۋىندا بىرگە ءتۇستى، ءبىر ايعا تاياۋ ۋاقىتتان كەيىن وسى 4 قىلمىس كۇدىكتىسىنىڭ تاعى ءبىر سىبايلاسى زاڭنىڭ تەگەرۋىنەن قورقىپ تۇرعان ورنىنداعى قوعام حاۋىپسىزدىگى تاراۋلارىنا بارىپ ءوزىن مالىمدەدى. وسىلايشا ساۋان اۋدانىندا تۋىلعان جاڭا تۋىلعان نارەستەنى ساۋدالاۋ دەلوسى ءساتتى اشكەرەلەندى. نارەستەنىڭ شەشەسى تۇتقىيىلدان قازا بولىپ، تاسباۋىر اكەسى زاڭ تورىنا ءتۇسىپ، قارايلاساتىن باسقا جاقىنى جوق تۋىلعانىنا ايعا تولماعان كىناسىز نارەستەنى حالىق ساقشىلارى حالىق ىستەرى تاراۋلارىنا تاپسىرىپ، بەرىپ قوعامدىق قۇتقارۋعا الدىردى.


    قالىپسىز ءولىم دەلوسىنان شىققان دەرەك


    2018-جىلى 2-ايدىڭ ورتا شەنىندەگى ءبىر كۇنى ساۋان اۋداندىق قوعام حاۋىپسىزدىك مەكەمەسىنىڭ حالىق ساقشىلارى جاڭا بوسانعان ءبىر ايەلدىڭ تۇتقيىل قازا بولعاندىعى جونىندەگى دەلو مالىمەتىن تاپسىرىپ العاننان كەيىن، جان-جاقتىلى تەكسەرۋ ارقىلى ونىڭ باسقالاردىڭ قاستاندىعىنان ولمەگەندىگىن تۇراقتاندىرۋمەن بىرگە، ونىڭ جۇبايىنىڭ ءبىر جارىم جاستاعى ۇلى مەن تۋىلعانىنا ايعا تولماعان قىزىمەن بىرگە اياق-استىنان جوق بولىپ كەتكەندىگىن ءارى جۇبايىنىڭ اتىنداعى بانكە كارتوچكاسىنا 15 مىڭ يۋان اقشا پايدا بولىپ قالعاندىعىن انىقتايدى. بۇل ىستەن كۇدىكتەنگەن سەزگىر ساقشىلار ىشكەرلەي تەكسەرۋ جۇرگىزۋ ارقىلى بۇنىڭ زاڭسىز تۇردە نارەستە ساتۋ دەلوسى ەكەندىگىن باستاپقى قادامدا تۇراقتاندىرۋمەن بىرگە نارەستەنىڭ اكەسى جاڭا تۋىلعان نارەستە قىزىن ساتۋ ءۇشىن شاندوڭ ولكەسىنىڭ جي نان قالاسىنا كەتكەندىگىن انىقتاپ، دەلو جاعدايىن مەكەمە باسشىلارىنا دوكلات ەتىپ نۇسقاۋ سۇرايدى. اۋداندىق پارتىكوم مەن تارباعاتاي ايماقتىق قوعام حاۋىپسىزدىگى مەكەمەسىنىڭ زور كۇشپەن قولداپ قۋاتتاۋى جانە نۇسقاۋشىلىق ەتۋىندە ولكە اتتاعان نارەستە الىپ-ساتۋ دەلوسىن اشكەرەلەۋ ارناۋلى دەلو گرۇپپاسى قۇرىلىپ، دەلونى تەز ارادا جالعاستى ىشكەرلەي تەكسەرىپ اشۋعا كىرىسەدى.


    اقشا ءۇشىن اردان بەزگەن تاسباۋىر اكە


    وسى دەلوداعى تاسباۋىر اكەنىڭ اتى چۇ شىڭ بولىپ، ول جۇمىس ىستەپ اقشا تاۋىپ، جان باعۋ ءۇشىن وتكەن جىلى كوكتەمدە ايەلى لي يۇي مەن ءبىر جاستاعى ۇلىن ەرتىپ اتا مەكەنى سىچۋان ولكەسىنەن ساۋان اۋدانىنا كەلەدى. ەڭبەكشىل دە ءتوزىمدى ول ساۋان اۋدانىنا كەلگەن العاشقى كەزدەردە ءار كۇنى دەرلىكتەي جۇمىس تاۋىپ ىستەپ، وتباسى تۇرمىسى كۇننەن-كۇنگە وڭالا باستايدى، جۇبايى لي يۇي 2- بالاسىنا جۇكتى بولىپ كۇندەرى كوڭىلدى ءوتىپ جاتادى . الايدا ولاردىڭ بۇل كوڭىلدى تىرلىگى جارىم جىلعا عانا جالعاسادى. اقشانى ادامدىق ارىنان ارتىق كورەتىن، ول اي-كۇنى تاياپ قالعان ايەلى بوسانا سالىپ بالاسىن ساتىپ جىبەرىپ، تەز ارادا اقشالى بولىپ شىعا كەلۋدەي ارام ويىن كوڭىلىنە بۇگىپ قويادى. ءدال وسىعان وراي، ءبىر كۇنى ول «اۋىلداستار» ۇنحات توبىنان لۇسان ەسىمدى ءبىر اۋىلداسىنىڭ «شاندوڭ ولكەسىندەگى بىرەۋدىڭ جاڭا تۋىلعان ءبىر بالا باعىپ الماقشى ەكەندىگىن» ايتىپ اۋىلداستارىنا قاراستىرۋدى تاپسىرعاندىعى جونىندە قالتىرعان لەبىزىن كورەدى. باۋىر ەتى بالاسىن ساتىپ اقشا تابۋ ورايى كەلدى دەپ بىلگەن ول، «بالامدى ساتامىن» دەپ توتە ايتۋدان ارلانىپ، بالا باعىپ الۋشىمەن اراداعى تانىستىرۋشى ادام بەينەسىندە «ەگەر ۇل بالا بولسا 30 مىڭ يۋان، قىز بالا بولسا 18 مىڭ يۋان، بالانى شاندوڭعا جەتكىزىپ بەرگەننەن كەيىن جول قاراجاتى ءۇشىن 2 مىڭ يۋان الاتىن» بولىپ كەلىسەدى. وسىلايشا تەلەفوندا سويلەسكەن بىرنەشە اۋىز ءسوز بەن قالتىرىلعان لەبىز، ءوىر ەسىگىن اشۋ الدىنداعى نارەستەنىڭ تاعدىرىن بۇكىلدەي وزگەرتىپ جىبەرەدى.


    قيۋادا تابىسقان بالا الىپ-ساتۋشىلار


    شاندۇڭ ولكەسى زوۋ پيڭ اۋدانىنىڭ بەلگىلى قىستاعىندا تۇراتىن جاسى 60 تان اسقان مۋدوڭنىڭ ۇلى باس قۇراعانىنا بىرنەشە جىلدىڭ ءجۇزى بولسادا بالالى بولا الماعاندىقتان، كاريا بالا باعىپ الىپ نەمەرە ءسۇيۋ بەكىمىنە كەلەدى دە وتكەن جىلى جاز ايلارىنىڭ ءبىر كۇنى بۇل ويىن كورشىلەس قىستاقتا قىستاق سەكراتارى بولىپ ىستەيتىن جاقىن دوسى ۋاڭ حايعا تابىستاپ «ۇل نەمەسە قىز بالا بولسادا بولادى، دەنى ساۋ، ۇزاق جەردىكى بولسا بولدى، باعاسىن كەلىسۋىمىزگە بولادى»،-دەيدى. بىرنەشە ايدان كەيىن ۋاڭ حاي «بالا ساتىپ الۋ جۇمىسىن» قالاشىق پەن اۋدان بازارىن ارالاپ ازىق-تۇلىك ساۋداسىمەن ايلانىساتىن جاماعايىن قارىنداسى لي نا عا تاپسىرىپ، دانەكەر بولا السا ءىس بىتكەننەن كەيىن وعان 3 مىڭ يۋان تابان اقى بەرەتىندىگى جونىندە ۋادە بەرەدى . ۇنحات توبىندا بالا باعىپ الۋ تۋرالى «جارناما» تاراتقان لۋ سان، سول كەزدەردە اتا مەكەنى سىچۋان ولكەسىنەن شاندوڭنىڭ زوۋ پيڭ اۋدانىنداعى ءبىر ازىق-تۇلىك زاۋارتىنا كەلىپ جۇمىس ىستەپ ءجۇرىپ لي نا مەن تانىسىپ قالادى. ءبىر رەتكى ورايدا الىس ولكەدەن كەلگەن لۋسان عا لي نا «بالا باعىپ الۋ» جونىندە ءسوز قوزعاپ، ءىستى ىڭعايىنا كەلتىرسە وزىندە قۇر الاقان قويمايتىندىعىن ايتادى. تەر توكپەي كەنەلەتىن اقشانىڭ ءسوزىن ەستىگەن لۋ سان سودان كەيىن اۋىلداستار ۇنحات توبىنا وسى ءىس تۋرالى اۋىق-اۋىق «جارناما» جولداپ تۇرادى. «بىتەر ىستىڭ قاسىنا .....» دەگەندەي، «جارناما» نى كورگەن چۋشىڭ وسىلايشا وزىنىڭ باۋىر ەتى بالاسىن ساتۋداي زاڭعا قايشى، ادامدىق ارعا جات تۇيىق جولعا تۇسەدى.


    بالا الىپ-ساتارلارىن قولعا ءتۇسىرۋ


    ارناۋلى دەلو گرۇپپاسىنداعى ساقشىلار تىزگىن ۇشىمەن جينان قالاسىنا بارىپ، جەرلىك قوعام حاۋىپسىزدىگى تاراۋلارىنىڭ تىعىز سايكەسۋىندە اينالاسى 5 كۇن ىشىندە شاندوڭ ولكەسىنىڭ جينان، بيڭ جوۋ قالالارىنىڭ قىستاقتارىن ارالاپ وكشەلەي ىزىنە ءتۇسۋ ارقىلى لۋسان، لي نا، مۋدوڭ، چۋشىڭ قاتارلى تورتەۋىن ارت-ارتىنان قولعا ءتۇسىرىپ ساتىلعان نارەستەنى امان-ساۋ قۇتقارىپ قالادى. ال وسى كىناسىز نارەستەنىڭ ساتىلۋىنا ەڭ الدىمەن بەل شەشە دانەكەر بولعان ۋاڭ حاي ءبىر ايعا جۋىق ۋاقىتتان كەيىن زاڭنىڭ تەگەرۋىنىنەن قورقىپ، تۇرعان ورنىنداعى قوعام حاۋىپسىزدىك تاراتلارىنا ءوزىن مالىمدەيدى. وسىلايشا ساۋان اۋدانىندا تۋىلعان ءومىر ەسىگىن اشقانىنا 14 اق كۇن بولعان بارەستەنى ولكە اتتاتىپ قولدان-قولعا وتكىزىپ ساتۋ دەلوسى ءساتتى اشكەرەلەندى. دەلو ىستەۋشى ساقشى جوۋ زىتاڭنان ۇعىسۋىمىزشا : تاسباۋىر اكە چۋشىڭ ءوز بالاسىن اۋىلداسى لۋسانعا تەك 20 مىڭ يۋانعا ساتىپ بەرگەن، ال الاياق لۋسان چۋشىڭعا مۇلدە سەزدىرمەي نارەستەنى بالا باعىپ الۋشى مۋدوڭعا 63 مىڭ يۋانعا ساتىپ بەرىپ ارادان 40 مىڭ يۋانداي ارام پايدا تۇسىرگەن . كەزەكتە مەملەكەت زاڭىن كوزگە ىلمەي، ادام تاعدىرىن اقشاعا ايىرباستاعان لۋسان، چۋشىڭ قاتارلى 4 قىلمىس كۇدىكتىسى اۋداندىق حالىق پروكۋراتۋرا مەكەمەسىنىڭ بەكىتۋىمەن زاڭ بويىنشا قولعا الىندى.


    2018-جىلى 9-ايدىڭ 10-كۇنى ساۋان اۋداندىق حالىق سوت مەكەمسى وسى دەلونى تەرگەپ انىقتاعاننان كەيىن «جۇڭحۋا حالىق رەسپۋبليكاسى قىلمىستى ىستەر زاڭى» نىڭ قاتىستى تارماقتارىنا نەگىزدەلە وتىرىپ،،ايىپكەر چۋشىڭ مەن لۋسان عا نارەستە الىپ-ساتۋ قىلمىسىن وتكىزگەندىگى سەبەپتى جەكە-جەكە 5 جىلدىق مەرزىمدى قاماۋ جازاسىن بەرۋمەن بىرگە وعان قوسا 20 مىڭ يۋان ايىپ سالۋ؛ ايىپكەر لي نا عا نارەستە الىپ-ساتۋ قىلمىسىن وتكىزگەندىگى سەبەپتى 4 جىلدىق مەرزىمدى قاماۋ جازاسىن بەرۋمەن بىرگە وعان قوسا 20 مىڭ يۋان ايىپ سالۋ؛ زاڭسىز جولمەن نارەستە ساتىپ الۋ قىلمىسىن وتكىزگەن ايىپكەر مۋدوڭعا 1 جىلدىق مەرزىمدى قاماۋ جازاسىن بەرۋ؛ زاڭسىز تۇردە نارەستە ساۋدالاۋعا دانەكەر بولعان ايىپكەر ۋاڭ حايعا 6 ايلىق قولدا ۇستاي تۇرىپ ەڭبەككە سالۋ جازاسىن بەرۋ جونىندە ۇكىم شىعاردى . ءبىرىنشى سوت ۇكىمى جاريالانعاننان كەيىن، ايىپكەر لي نا ۇكىمگە مويىنسال بولماي جوعارىلاپ ارىزدانادى؛ تارباعاتاي ايماقتىق ورتا دارەجەلى حالىق سوتى مەكەمەسى دەلونى قايتا قاراپ شىققاننان كەيىن: ءبىرىنشى سوت ۇكىمىندە تۇراقتاندىرىلعان قىلمىس فاكىتى انىق، كورسەتىلگەن دالەل-سپاتتار دۇرىس ءارى تولىق، جازا ولشەۋى ورىندى، سوتتاۋ ءتارتىبى زاڭدى بولعان دەپ قاراپ، «جۇڭحۋا حالىق رەسپۋبليكاسى قىلمىستى ىستەر ارىز-شاعىم زاڭى» نىڭ قاتىستى تارماقتارىنا نەگىزدەلىپ، ايىپكەردىڭ نارازىلىق ارىزىن تويتارىپ، ءبىرىنشى سوت ۇكىمىن كۇشكە يە ەتتى. (ەسكەرتۋ: دەلوداعى ادام اتتارى وزگەرتىلدى)

中央广播电视总台 央广网 版权所有