قىستاقتا كەڭ جول جاسالدى
كەلۋقاينارى: |جاۋاپتى رەداكتور: | جاڭالانعان ۋاقىت:2017-05-26 11:09:00

 

    حالىق گازەتىنىڭ حابارى: حۋاڭحى جاعاسىنداعى ىشكى موڭعول اۆتونوميالى رايونىنىڭ كاڭجين ايماعى بالاعۇن قالاشىعى شاڭحانباي قىستاعىندا ءبىرنەشە جىلدان بەرى وزگەرىستەر وتە زور ەدى: اۆتونوميالى رايون ەگىن-مال شارۋاشىلىق قىستاقتاردا «وندى تۇتاس جالپىلاستىرۋ» اتىنداعى نەگىزدىك الەۋمەتتىك قىزمەت وتەۋدى جالپىلاستىردى، قالالىق ۇكىمەت كەدەي قىستاقتاردى باسقا جەرلەرگە كوشىرىپ ورنالاستىرىپ سۇيەمەلدەۋ جانە قاتەرلى ۇيلەردى جاڭالاۋ ساياساتتارىن اتقاردى، قازىر قىستاقتا تام ۇيلەر قالمادى، سەمونت جول ەسىك الدارىندا سايراپ جاتىر.

 

ءۇي سالىنىپ، جول جوندەلدى،الايدا، اۋىل شارۋاشىلىق ەرەكشە ونىمدەرىنىڭ باعاسى كوتەرىلمەي باسىلىپ تۇرىپ العاندىعى قىستاقتاعىلاردى ابىرجىتتى: ەتتىڭ باعاسى ءار جىڭى 15 يۋان بولسا، شەكىلدەۋىكتىڭ ءار جىڭى 5 يۋاننان 2 يۋان اينالاسىنا ءتۇسىپ قالدى، ەرەكشە ءتاتتى ءۇزىمنىڭ ءار جىڭى 4 يۋاننان اسپاعانىمەن قويماي، كەيدە ساتىلىم توقتاپ قالادى... ەندەشە،جول جوندەلسە دە اۋقات جولى اشىلماعانى قالاي؟

 

شاڭقانباي قىستاعىندا 832 سەميادا 2218 جان سانى بار،2016-جىلى تۇتاس قىستاقتا ءالى دە كەدەيلىكتەن قۇتىلماعان 165 سەميا بار ەدى. قىستاق شۋجيى ياڭ حىڭ بىلاي دەپ قارادى: شاڭقانباي قىستاعىن كەدەيلىكتەن قۇتىلدىرىپ اۋقاتتانۋعا باستايتىن تاعى ءبىر جول سالىنباي قالعان،ول-ەلەكترلەسكەن ساۋدا جولى.

 

باستاپتا قىستاقتاعىلار ياڭ حىڭنىڭ ۇسىنىسىن ونشا ەلەپ-ەسكەرىپ كەتپەدى، ولار: حات سالىپ، حات الۋ ءۇشىن حۋاڭحىنىڭ قارسى جاعاسىنداعى بايانحور قالاسىنىڭ دىڭكوۋ اۋدانىنا بارۋعا تۋرا كەلەدى، ەلەكتر ساۋداسى بىزدەن وتە شالعاي، ونىمەن كەدەيلەردى سۇيەمەلدەۋگە بولا ما؟-دەپ كۇمانداندى.

 

قالاشىق پارتكومى مەن ۇكىمەتىنىڭ قولداۋىندا، وتكەن جىلى مەملەكەت مەرەكەسى كەزىندە شاڭقانباي قىستاق ياچەيكاسىنىڭ ەلەكترلەسكەن ساۋدا ارقىلى كەدەيلەردى سۇيەمەلدەۋ ورتالىعى قۇرىلدى، ياڭ حىڭ ءوزى باستاماشى بولىپ، ەلەكترلەستىرۋ قۇرىلىسىنا بىلەك سىبانا كىرىسىپ كەتتى.

 

ەلەكترساۋدا ساۋاتىنان حابارسىز ءبىر توپ ازامات وسىلايشا بەيتانىس كاسىپكە بەلسەنە كىرىسىپ كەتتى، ۋيچات الەۋمەتتىك نومەرىنە تىركەلىپ، قىزىل ءتۇستى اۋىل شارۋاشىلىق ەرەكشە ونىمدەر ساۋدا بازارى سالىندى. وسىلايشا، شاعىن قىستاق ءىرى قالالارمەن جالعاستى. كەدەي سەميالاردىڭ ءبىرى جيا شۋجىن بىلاي دەيدى: قىستاق باستىقتارى ءبىزدى ءۇزىم ەگۋگە جەتەكتەدى، وتكەن جىلى ەلەكتر ساۋدا دانەكەرلەرى ارقىلى ءوزىمىز اشىتقان 500 جىڭ ءۇزىم اراعىن ساتىپ 7500 يۋان تاپتىم، بۇل استىق ەككەندەگى كىرىسىمنەن الدە نەشە ەسە ارتىق.
قىستاقتاعى قۇرىلعانىنا بىرنەشە ايعا تولماعان ەلەكتر ساۋدا دانەكەرلەرىنىڭ ساتىلىمى 80 مىڭ يۋاننان استى. قازىر بارلىق كەدەي سەميالاردىڭ ورتاشا كىرىسى كەدەيلىك سىزىعىنان ءوتىپ بولدى.

 

ءبىر جاق باسى جاڭاشا ۇلگىدەگى تيجارات تۇلعاسىمەن، ەندى ءبىر جاق باسى كەدەي بۇقارامەن جالعاسىپ جاتقان مۇنداي تيجارات ءتۇرى بۇقاراعا سەنىم باعىشتادى. ياڭ حىڭ مىناعان كامىل سەنەدى: ەلەكترلەسكەن ساۋدامەن كەدەيلەردى سۇيەمەلدەۋ ورتالىعى اۋىل شارۋاشىلىق ونىمدەر ساتىلىمىن جانداندىرۋدى ۇيتقى ەتۋ ءارى سەركە كاسىپورىنداردى، سەلبەستىك كوپەراتىپتەردى باۋراپ،ولاردى كەدەي سەميالارمەن تىعىز بايلانىستىراتىن مۇدەلىك بىرلىك مەحانىزىمىن قۇرۋ ارقىلى ەگىنشىلەردى ءتىپتى مول پايداعا كەنەلتىپ، كەدەيلىكتەن ءتىپتى دە تەز قۇتىلدىرۋعا ابدەن بولادى.

 

اۋدارعان: قاناتبەك جۇماباي ۇلى