«19-قۇرىلتايعا قاتىناساتىن از ساندى ۇلت ۋاكىلدەرىنىڭ كەلبەتى» حۋنان ولكەسى تۇڭداۋ دۇڭزۋ اۆتونوميالى اۋدانى ياتۋنباۋ قالاشىعىنىڭ ۋىن پو قىستاعىنداعى پارتيا ياچەيكاسىنىڭ شۋجيى لي تيانمەي
كەلۋقاينارى:جۇڭگو قازاق راديو تورابى |جاۋاپتى رەداكتور:داۋىلبەك | جاڭالانعان ۋاقىت:2017-10-16 10:30:00


    ٴوز حابارىمىز: قوڭىر كۇزدىڭ جەلەمىك جەلى ەسكەن حۋنان ولكەسى تۇڭداۋ دۇڭزۋ اۆتونوميالى اۋدانى ياتۋنباۋ قالاشىعىنىڭ ۋىن پو قىستاعىندا جوتا-جوندار سارى تون جامىلىپ، كۇرىش ماساقتارى جەلمەن ىرعالىپ تولقىنداي تەربەلەدى. قىستاق پارتيا ياچەيكاسىنىڭ شۋجيى لي تيانمەي اپاي بويجەتكەندەرمەن بىرلىكتە كانۆاسى وزگەشە دۇڭزۋ ۇلتىنىڭ جىبەك بۇل كەستەسىن ورنەكتەۋمەن ابىگەر بولىپ جاتتى. پارتيا 19-قۇرىلتايىنىڭ ۋاكىلى بولعان ول دۇڭزۋ حالقىنىڭ جۇڭگو ارمانىن قوس قولىمەن ورنەكتەپ بەيجيڭگە الىپ كەلمەكشى.


    جىبەك بۇلعا كەستە تىگۋ-دۇڭزۋ ۇلتىنىڭ ٴداستۇرلى قولونەرى بولىپ، ەلىمىزدىڭ بەيزاتتىق مادەني مۇراعاتتارى تىزىمدىگىنە ەنگىزىلگەن. الايدا بۇل ونەر كۇردەلى، قولدانىلۋى شەكتى بولىپ قانا قالماستان جاستارى سىرت جەرلەرگە بارىپ ٴتۇرلى جۇمىسپەن شۇعىلدانعاندىقتان دۇڭزۋ ۇلتىنىڭ وسى كەستەشىلىك ونەرى قۇرۋ حاۋىپىندە قالدى. 12 جاسىنان باستاپ شەشەسىنە ىلەسىپ دۇڭزۋ كەستەشىلىگىنە ٴساپ سالعان لي تيانمەي وسى ونەردىڭ كەيىنگىلەرگە جالعانباي قالۋىنان الاڭدايتىن بولدى. سونىمەن ول وتكەن عاسىردىڭ 90-جىلدارىنان باستاپ بارلىق زەيىن-زەردەسىن دۇڭزۋ ۇلتىنىڭ ٴداستۇرلى كەستەشىلىك ونەرىن قۇتقارۋعا، ۇمىت بولىپ بارا جاتقانىن جارىققا شىعارۋعا، سونداي-اق قورعاۋعا جانە مۇراگەرلىك ەتۋگە جۇمسادى.


    لي تيانمەي كونە كوز قولونەرشىلەرگە امانداسا بارىپ، ٴداستۇرلى توقۋ ادىستەرىن يگەرگەننەن سىرت وزىنشە وزگەرىس ەنگىزىپ، ٴبىر تۇردەگى كەستەنى كولدەنەڭىنەن توقۋدان كولدەنەڭىنەن دە، تىگىنەن دە توقيتىن ەتىپ دامىتتى. ساۋدا ارناسىن كەڭەيتۋ ٴۇشىن ول حۋنان ۋنيۆەرسيتەتىمەن سەلبەسىپ جىبەك بۇل كەستەسىنە كەندىر، ماقتا سياقتى بۇلدار مەن جىپتەردى قوسىپ تىگىپ تىڭ ۇلگى جاراتىپ، سومكا-توسەك جاپقىش سياقتى بۇيىمداردى ٴوندىرىپ كوپ وتپەي بازارى كۇسەت بولىپ كەتتى. ۋىن پو قىستاعىنداعىلاردىڭ ورتاشا تازا كىرىسى دە 2011-جىلعى 500 نەشە يۋاننان بىلتىر 3500 يۋانعا كوبەيدى.


    لي تيانمەي 2011-جىلى قىستاق پارتيا ياچەيكاسىنىڭ شۋجيى بولىپ سايلاندى. ول مىندەت العاننان كەيىن قىستاقتىڭ ويلى-شۇڭقىر پورپىلداق جولىن، ىلاي وزەنىن وڭاۋعا بەل بايلاپ، نەگىزدىك قۇرىلعىلاردان باستاپ قولعا الىپ، قىستاقتىڭ بەت-بەينەسىن وزگەرتۋگە كىرىستى. الايدا قىستاققا تاسجول سالۋ ٴۇشىن 80 نەشە مىڭ يۋان قارجى جەتىسپەدى.


    لي تيانمەي قارجى توپتاۋ ٴۇشىن 6 جىلدان بەرى ويلى-قىرلى شاپقىلاپ، ٴار وتباسىنداعىلارعا ۇيىندە وتىرىپ ىستەيتىن جۇمىس تاۋىپ بەردى؛ قىستاققا 10 نەشە كيلومەتر ۇزىندىقتا سۋ قۇبىرىن ورناتىپ، قىستاق تۇرعىندارى تازا اۋىز سۋ ىشە الاتىن بولدى؛ 500 مەتردەن استام تاقتايشا تاس جاتقىزىپ، قىستاق تۇرعىندارىنىڭ اياق كيىمى مەن بالاعىنا ىلاي جابىسپايتىن بولدى. كوز الدا ول تاعى دۇڭزۋ اۋىلىنا ساياحات نىسانىن جۇرگىزۋگە كىرىسىپ اۋىلداستاردى اۋقاتتانۋعا باستادى. ول بىلاي دەدى: مەنىڭ تىلەگىم- قىستاقتا ەندىگارى كەدەي ادام بولعىزباۋ.


    اۋدارعان: امانتاي مۇسايىپ ۇلى