بەيجيڭ تيانتان

تيانتان بەيجيڭ قالاسى دۇڭچىڭ (شىعىس قالا) رايونىنىڭ وڭتۇستىگىنە ورنالاسقان، ميڭ پاتشالىعىنىڭ يۇڭلى جىلدارىنان باستاپ سالىنعان، ميڭ، چيڭ ەكى پاتشالىقتىڭ بيلەۋشىلەرى اسپان ٴتاڭىرىنە تاساتتىق بەرەتىن جانە تىلەۋ تىلەيتىن ورىن، ەلىمىزدە ساقتالعان ەڭ ۇلكەن ەجەلگى تاساتتىق بەرەتىن قۇرىلىس شوعىرى.

     

        كورىنىس رايونىنىڭ تانىستىرۋى:


        تيانتان بەيجيڭ قالاسى دۇڭچىڭ (شىعىس قالا) رايونىنىڭ وڭتۇستىگىنە ورنالاسقان، ميڭ پاتشالىعىنىڭ يۇڭلى جىلدارىنان باستاپ سالىنعان، ميڭ، چيڭ ەكى پاتشالىقتىڭ بيلەۋشىلەرى اسپان ٴتاڭىرىنە تاساتتىق بەرەتىن جانە تىلەۋ تىلەيتىن ورىن، ەلىمىزدە ساقتالعان ەڭ ۇلكەن ەجەلگى تاساتتىق بەرەتىن قۇرىلىس شوعىرى. بۇرىن پاتشالاردىڭ بارلىعى كوك پەن جەرگە تاساتتىق بەرۋ ٴوز بيلىگىن بەكەمدەۋدەگى ماڭىزدى شارانىڭ ٴبىرى دەپ قاراپ، قىرۋار ادام كۇشىن، زاتتىق كۇش، قازىنا كۇشىن سارىپ ەتەتىن بولعان، تيانتان ‐ تاساتتىق بەرەتىن كوپتەگەن قۇرىلىستاردىڭ ۋاكىلدىك سيپاتتىسى. 1998-جىلى م ب ۇ وقۋ-اعارتۋ، عىلىم-تەحنيكا، مادەنيەت ۇيىمى جاعىنان «الەمدىك مۇراعاتتار تىزىمدىگىنە» ەنگىزىلگەن.


        تيانتان ‐ دوڭگەلەك توبە مەن مولشىلىق تىلەۋ مۇناراسىنىڭ جالپى اتاۋى، دوڭگەلەك توبە وڭتۇستىكتە، مولشىلىق تىلەۋ مۇناراسى سولتۇستىكتە. مولشىلىق تىلەۋ مۇناراسىنىڭ نەگىزگى قۇرىلىسى ىرىس تىلەۋ سارايى، پاتشانىڭ تاڭىردەن مول ٴونىم تىلەيتىن ورنى، وندا «جاساعان يەگە» تابىنادى. الىستان قاراعاندا، ىرىس تىلەۋ سارايى ٴۇش قابات دوڭگەلەك ۇلگىدە، سارايدىڭ سىرتى كوك قاڭىلتاق كىرپىشپەن جابىلعان، ەڭ ۇستىڭگى قاباتىنا كوك ٴتۇپتى، التىن ٴارىپتى ماڭدايشالىق ىلىنگەن. ساراي ەرەكشە شەبەرلىكپەن جوبالانعان، ىشىندە 28 تال التىن پوبەدەن دىڭگەك ورناتىلعان، ەڭ تۇبىندەگى 4 تال دىڭگەك ٴتورت ماۋسىمعا، ورتاداعى 12 تال دىڭگەك 12 ايعا، ەڭ سىرتىنداعى 12 تال دىڭگەك تاۋلىكتىڭ 12 مەزگىلىنە، ٴىشى مەن سىرتىنداعى 24 تال دىڭگەك اۋا رايىنىڭ 24 امالىنا ۋاكىلدىك ەتەدى.


        حۋاڭزويۇي كۇمبەزى مولشىلىق تىلەۋ مۇناراسىنىڭ وڭ قاپتالىندا، دوڭگەلەك توبەگە جاقىن جەردە، قۇلشىلىق ەتەتىن ٴتاڭىردىڭ ازا تاقتاسى قويىلعان جەر. حۋاڭزويۇي كۇمبەزى اتى ايگىلى جاڭعىرىق ٴۇيى، جاڭعىرىق ٴۇيىنىڭ قابىرعاسىن قالاۋ تەحنيكاسى ەرەكشە جوعارى، قابىرعا تەگىس ٴارى مايدا، قابىرعاعا قاراپ سويلەگەندە دىبىس ٴبىر-ەكى ٴجۇز مەتر الىستاعى تاعى ٴبىر ۇشىنا دەيىن جەتەدى، وسىعان بولا جاڭعىرىق ٴۇيى ادامدى وزىنە باۋراپ وتىر.


        دوڭگەلەك توبە ەڭ وڭتۇستىك شەتتە بولىپ، پاتشانىڭ قىستا تاساتتىق بەرەتىن ورنى. ونىڭ ەرەكشەلىگى مىنادا: توبەنىڭ باسپالداعى، تەكشەسى، راشەتكەسى تۇگەلدەي توعىزدىڭ ەسەلىگى. مۇنىڭ سەبەبى نە؟ مىناداي ەكى سەبەپ بار، ٴبىرى، جۇڭگونىڭ ميفتىك اڭىزىنا نەگىزدەلگەندە، اسپان ٴتاڭىرى توعىز قابات كوكتىڭ ار جاعىندا تۇرادى، توعىزدىڭ ەسەلىگى ارقىلى توعىز قابات كوكتى بەينەلەگەن، پاتشانىڭ بيلىگىن ٴتاڭىر بەرگەن، پاتشانىڭ بيلىگى بارىنەن جوعارى دەگەندى ەمەۋرىندەيدى. ەندى ٴبىرى، توعىز سيفرى ەرتەدە «ەرەكشە سيقىرلى سان» رەتىندە ەرەكشە يگى سان دەپ ەسەپتەلەدى. مۇنداي جوبالاۋ ٴبىر جاعىنان پاتشا بيلىگىنىڭ سالتاناتىن ايگىلەسە، ەندى ٴبىر جاعىنان وسىنى سالعان شەبەرلەردىڭ ونەرىنە ەرىكسىز ٴتانتى بولاسىز.


        تيانتان باقشاسىنىڭ تاريحى ۇزاق، وندا 300 جىلدان اسقان ساۋىر اعاشىنىڭ ۇزىن سانى 1500 گە جۋىق. ۇزاق جىل بولعانىنا قاراماستان بۇل اعاشتار جاپىراق جايىپ، باقشا ىشىندە قاز قاتار بوي تۇزەۋدە. ساياحاتشىلار شارشاسا ۇزىن كاريدوردا تىنىعۋىنا بولادى، ۇزىن كاريدور 72 جالعاسقان بولمە دەپ تە اتالادى. بۇرىن تەرەزە ورناتىپ 72 بولمەگە بولىنگەن ەكەن، قازىر تەرەزەلەر الىنىپ تۇتاستىرىلعان.


        تيانتان باقشاسىن تاماشالاعان ساياحاتشىلار باقشانىڭ ماڭىن ارالاي كەتكەنى دە ٴجون، باقشا ماڭىندا بەيجيڭنىڭ ٴداستۇرلى تاعامدارىن جاسايتىن ٴدامحانالار وتە كوپ، تيانچياۋ كوركەمونەر عيماراتىندا تەاتر كورۋگە بولادى، نەمەسە بەيجيڭنىڭ ەڭ ەرتەدەگى تيانچياۋ ٴتۇرلى بۇيىمدار بازارىن ارالاۋعا بولادى، ول جەرلەردەن بەيجيڭنىڭ ەرەكشەلىگىن ابدەن اڭعارا الاسىز.


        كورىنىس رايونىنىڭ دارەجەسى: AAAAA


        ساياحاتتاۋ ۋاقىتى: جارىم كۇن


        بەلەت باعاسى:


        قاۋىرت مەزگىلدە (ساۋىردەن قازانعا دەيىن): ٴار ادام 15 يۋان، تولىق بەلەت (ەسىك بەلەتى، ىرىس تىلەۋ سارايى، دوڭگەلەك توبە، جاڭعىرىق ٴۇي قاتارلىلاردىڭ بەلەتى قامتىلادى) ٴار ادام 35 يۋان


        سايابىر مەزگىلدە (قاراشادان ناۋرىزعا دەيىن): ٴار ادام 10 يۋان، تولىق بەلەت (ەسىك بەلەتى، ىرىس تىلەۋ سارايى، دوڭگەلەك توبە، جاڭعىرىق ٴۇي قاتارلىلاردىڭ بەلەتى قامتىلادى) ٴار ادام 30 يۋان


        كورىنىس رايونىنىڭ تولىق بەلەتى (ىرىس تىلەۋ سارايى، دوڭگەلەك توبە، جاڭعىرىق ٴۇيىن قامتيدى): ٴار ادام 20 يۋان، شىنيۋەشۋدىڭ (قاسيەتتى مۋزيكا ٴۇيىنىڭ) بەلەتى: ٴار ادام 10 يۋان


        اشىلۋ ۋاقىتى:


        باقشانىڭ قاقپاسى 6:00 ‐ 22:00، ىشىندەگى كورىنىس رايوندارى: 8:00


        قاتىناسقا سىلتەمە:


        تيانتان باقشاسىنىڭ شىعىس قاقپاسى: 6، 25، 34، 35، 36، 39، 41، 43، 60، 610، 684، 685، 723، 814-جول اۆتوبۋزدارى، 5-جول مەترو.


        تيانتان باقشاسىنىڭ وڭتۇستىك قاقپاسى: 36، 120، 122-جول اۆتوبۋزدارى.


        تيانتان باقشاسىنىڭ باتىس قاقپاسى: 2، 20، 120-جول اۆتوبۋزدارى.


        تيانتان باقشاسىنىڭ سولتۇستىك قاقپاسى: 6، 34، 35، 36، 106، 111-جول اۆتوبۋزدارى.

     

    اۋدارعان: العابەك قيسىنقان ۇلى