بەيجيڭ باداليڭ – مۋتيانيۇي ۇلى قورعان ساياحات رايونى

باداليڭ ۇلى قورعانى بەيجيڭ قالاسىنىڭ يانچيڭ رايونىندا، ميڭ پاتشالىعىنىڭ ياماتوعا قارسى تۇرعان ايگىلى ساردارى چي جيگۋاڭنىڭ باسشىلىعىمەن سالىنعان، تولىق ساقتالعان ميڭ داۋىرىندەگى ۇلى قورعانداردىڭ ٴبىرى.


        كورىنىس رايونىنىڭ تانىستىرۋى:


        باداليڭ ۇلى قورعانى بەيجيڭ قالاسىنىڭ يانچيڭ رايونىندا، ميڭ پاتشالىعىنىڭ ياماتوعا قارسى تۇرعان ايگىلى ساردارى چي جيگۋاڭنىڭ باسشىلىعىمەن سالىنعان، تولىق ساقتالعان ميڭ داۋىرىندەگى ۇلى قورعانداردىڭ ٴبىرى. باداليڭ ۇلى قورعانى جۇييۇڭگۋان قامالىنىڭ كۇزەت قاراۋىلى، سانشي، ىشكى موڭعۇل، جاڭجياكوۋ قاتارلى جەرلەردى تۇتاستىرىپ تۇرادى، ەجەلدەن بەرى ماڭىزدى اسكەري ستراتەگيالىق جەر سانالادى، ۇلى قورعان اسقار شىڭداردى بويلاي سالىنعان، جەر جاعدايى ەرەكشە كۇردەلى، بىردە بيىكتەپ، بىردە تومەندەپ وتىرادى، بۇرىنعىلار «جۇييۇڭگۋاننىڭ قيىن جەرى قامالدا ەمەس، قايتا باداليڭدا» دەگەن ٴسوز قالدىرعان.
    باداليڭ ۇلى قورعانى وڭتۇستىك، سولتۇستىك ەكى باعىتقا بولىنەدى، وڭتۇستىك باعىتى جاتتىقتاۋ، 7 بەكىنىس بار. سولتۇستىگىندە 12 بەكىنىس بار، سولتۇستىكتەگى 8-بەكىنىس ەڭ بيىك جەرى، تەڭىز دەڭگەيىنەن بيىكتىگى 888 مەتر، وسى بولەك باتىرلار قيانى دەپ اتالادى، ٴتوراعا ماۋ زىدۇڭ كەزىندە «ۇلى قورعانعا شىقپاساڭ ازاماتپىن دەمە» دەگەن ولەڭ ارناعان. سولتۇستىك باعىتپەن ەتەككە تۇسكەن سوڭ ايۋلار باقشاسىنا كەلەدى، مۇندا قارا ايۋ، قوڭىر ايۋ قاتارلى 380 نەشە ايۋ بار. قامالدىڭ ماڭىندا جۇڭگو ۇلى قورعان مۇراجايى بار، مۇراجايدا ەلىمىزدىڭ جەر-جەرىندەگى ۇلى قورعان بويىنان تابىلعان مادەني مۇرالار قويىلعان، تۇسىندىرمەلەر جازىلىپ، سۋرەتتەر، مودەلدەر قويىلىپ تۇسىنىك جاسالعان، ساياحاتشىلاردى ۇلى قورعانمەن تولىق تانىستىرا الادى. باداليڭدا جان تيانيوۋدىڭ باسشىلىعىندا سالىنعان جۇڭگونىڭ تۇڭعىش تەمىر جولى ‐ بەيجيڭ-جاڭجياكوۋ تەمىر جولى بار، قىزىعاتىن ساياحاتشىلار جان تيانيوۋ مۇراجايىنا بارىپ ونىڭ تاريحىمەن تانىسۋىنا بولادى.


        مۋتيانيۇي ۇلى قورعانى بەيجيڭ قالاسىنىڭ حۋايروۋ رايونىندا، ميڭ داۋىرىنەن باستاپ سالىنعان، ۇزىندىعى 5400 مەتر، جۇڭگوداعى ەڭ ۇزىن ٴبىر بولەك ۇلى قورعان. ول «ون مىڭ شاقىرىمدىق ۇلى قورعاننىڭ ىشىندە مۋتيانيۇي ۇلى قورعانى ەڭ ايبىندى» دەگەن اتقا يە، شەتەلدىك قوناقتاردىڭ وزىنە ەرەكشە باۋرايدى، انگليانىڭ بۇرىنعى باس ٴۋازىرى مايجور، ا ق ش-تىڭ بۇرىنعى پرەزيدەنتى كلينتون قاتارلىلار وسىندا ساياحاتتاعان ەكەن.


        مۋتيانيۇي ۇلى قورعاندا جىڭگۋانتاي قامالى، داجياۋلوۋ قامالى، قىراننىڭ كولەڭكەسى قاتارلى كورىنىستەر بار. داجياۋلوۋ قامالى مۋتيانيۇي كورىنىس رايونىنىڭ شىعىس جاعىندا، ٴۇش جاعى ۇلى قورعانمەن تۇتاسادى، ٴبىرى باتىسقا قاراي باداليڭمەن، ٴبىرى شىعىسقا قاراي گوۋبەيكوۋ بەكىنىسىمەن تۇتاسادى، ەندى ٴبىرى وڭتۇستىككە سوزىلعان. قىران كولەڭكەسى مۋتيانيۇي ۇلى قورعانىنىڭ باتىسىنداعى ساداق فورمالى ۇلى قورعاندا، بۇل بولەك قورعان تۇگەلدەي جالاما جارتاسقا سالىنعان، كولبەۋلىگى 50 گرادۋستان ۇلكەن، ٴتىپتى ٴبىر بولەگى ٴتىپ-تىك بولىپ، كورگەن جاندى جۇرەگىن قوبالجىتادى. كورىنىس رايونىنداعى 14-بەكىنىستە سىزۋ سىزاتىن ارناۋلى جەر بار، ساياحاتشىلار قالاعانىنشا سىزۋىنا بولادى، ٴبىراق قورعاننىڭ وزگە جەرىن شيمايلاۋعا بولمايدى، مادەنيەتتى بولۋ كەرەك. كورىنىس رايونىندا بۇكىلدەي اشىق ۇستالاتىن سىرعاناق بار، ۇزىندىعى 1580 مەتر، تاۋدىڭ باسىنان ەتەگىنە دەيىن بارادى، ساياحاتشىلار سىرعاناي وتىرىپ كورىنىستەردى تاماشالاي الادى، ەرەكشە قىزىقتى.


        كورىنىس رايونىنىڭ دارەجەسى: AAAAA


        ساياحاتتاۋ ۋاقىتى: 3 تە 5 ساعات


        اشىلۋ ۋاقىتى:


        1. باداليڭ ۇلى قورعانى كورىنىس رايونى


        جازدا: 6:30‐19:00


        قىستا: 7:30‐18:00


        2. مۋتيانيۇي ۇلى قورعانى كورىنىس رايونى


        جازدا: 7:00‐18:30


        قىستا: 7:30‐17:30


        ادرەسى: بەيجيڭ قالاسى يانچيڭ رايونى، بەيجيڭ قالاسى حۋايروۋ رايونى


        بەلەت باعاسى:


        1. باداليڭ ۇلى قورعانى كورىنىس رايونى


        قاۋىرت مەزگىلدە (1-ساۋىردەن 31-قازانعا دەيىن): ٴار ادام 40 يۋان (وقۋشىلار 20 يۋان)


        سايابىر مەزگىلدە (1-قاراشادان 31-ناۋرىزعا دەيىن): ٴار ادام 35 يۋان (وقۋشىلار 17.5 يۋان)


        باداليڭ اسپالى ۆاگونى شىعۋ-ٴتۇسۋ اقىسى: 100يۋان، ٴبىر باعىتقا وتىرۋ اقىسى  80 يۋان


        باداليڭ ۇلى قورعانى تولىق ەكراندى كينوحاناسى 40 يۋان


        گۋيانجۇي (جارتاس ٴۇيى) جۇرتى ەرەسەك ادام 40 يۋان؛ وقۋشىلار 20 يۋان


        2. مۋتيانيۇي ۇلى قورعانى كورىنىس رايونى


        ۇلى قورعان ەرەسەكتەر بەلەتى: 45 يۋان، وقۋشىلار: 25 يۋان


        ساياحات ماشىناسى قوس باعىت: 15 يۋان، ٴبىر باعىت: 10 يۋان


        اسپالى ۆاگون قوس باعىت: 100 يۋان، ٴبىر باعىت: 80 يۋان (بالالار قوس باعىت: 50 يۋان، ٴبىر باعىت: 40 يۋان)


        اسپالى ۆاگون، سىرعاناق جول ەرەسەكتەر قوس باعىت: 100 يۋان، ٴبىر باعىت: 80 يۋان (بالالار قوس باعىت: 50 يۋان)


        قاتىناسقا سىلتەمە:


        1. باداليڭ:


        كولىك


        919-جول اۆتوبۋز


        دىشىڭمىن – يانچيڭ تۇستەن بۇرىن 6:00 دا جولعا شىعادى، اقىرعى اۆتوبۋزى 19:00 دا؛


        يانچيڭ –دىشىڭمىن تۇستەن بۇرىن 5:00 تە جولعا شىعادى، اقىرعى اۆتوبۋزى 18:30 دا؛


        پويەز


        2S تەز پويەزى، بەلەت باعاسى 6 يۋان (بەيجيڭ سولتۇستىك ۆاگزالى – يانچيڭ)


        بەيجيڭ – شيزاڭ سايراعى 6G – بەيجيڭ-شيزاڭ سايراعىنىڭ قوسالقى جولى 216S – جول بەلگىسى بويىنشا باداليڭ كورىنىس رايونىنا بارۋعا بولادى


        2. مۋتيانيۇي


        916-جول اۆتوبۋز


        دۇڭجىمىننەن 916-جول اۆتوبۋزىنا وتىرادى – حۋايروۋ سولتۇستىك كوشەسى – شايۇي تۇڭتاي كوشە اۆتوبۋزىنا الماسادى (جارىم ساعاتتا ٴبىر رەت قاتىنايدى) – مۋتيانيۇي اينالما جولى


        دۇڭجىمىننەن 916-جول اۆتوبۋزىنا وتىرادى – حۋايروۋ سولتۇستىك كوشەسى – كىرە ماشيناسىنا وتىرىپ كورىنىس رايونىنا بارۋعا بولادى


        867- جول اۆتوبۋز:


        دۇڭجىمىننەن تاڭەرتەڭ 7:00 دە جولعا شىعادى (جارىم ساعاتتا ٴبىر رەت قاتىنايدى) – حۇڭلوسى كورىنىس رايونى


        ساعات 10:00، 12:00 دە ەكى كەزەك قاتىنايدى – مۋتيانيۇي ۇلى قورعانى ۇلى قورعان اينالما جولى


        ساعات 14:00، 15:00 تە ەكى كەزەك قاتىنايدى – حۇڭلوسى كورىنىس رايونى


        ساعات 15:00 تەن كەيىن ٴار جارىم ساعاتتا ٴبىر رەت بەيجيڭگە قاتىنايدى، بەيجيڭگە قايتاتىن اقىرعى اۆتوبۋز 17:00 دە جولعا شىعادى


        ٴوز كولىگىمەن بارۋ


        بەيجيڭ-چىڭدى سايراعى – 13-اۋىز (بەيتاي اۋزى) - جول بەلگىسى بويىنشا مۋتيانيۇي كورىنىس رايونىنا بارۋعا بولادى

    اۋدارعان: العابەك قيسىنقان ۇلى