ٴانحۇي حۋاڭشان تاۋى كورىنىس رايونى

حۋاڭشان تاۋى كورىنىس رايونى ٴانحۇي ولكەسى حۋاڭشان قالاسى تاڭكوۋ قالاشىعىندا، دۇنيە جۇزىلىك مادەنيەت جانە جاراتىلىستىق مۇراعات، دۇنيە جۇزىلىك گەولوگيا باقشاسى، مەملەكەتتىك 5A دارەجەلى ساياحات كورىنىس رايونى. حۋاڭشان تاۋىندا عاجايىپ قاراعاي، جۇمباق تاس، شوككەن بۇلت، اراسان، اق قىراۋ، سارقىراما قاتارلىلار قوسىلىپ، نايزا تاستار كوككە شانشىلعان، بۋرا بۇلتتار شۋدالانعان ەرەكشە كوركەم عاجايىپ كورىنىس قالىپتاستىرىپ،


        كورىنىس رايونىنىڭ تانىستىرۋى:


        حۋاڭشان تاۋى كورىنىس رايونى ٴانحۇي ولكەسى حۋاڭشان قالاسى تاڭكوۋ قالاشىعىندا، دۇنيە جۇزىلىك مادەنيەت جانە جاراتىلىستىق مۇراعات، دۇنيە جۇزىلىك گەولوگيا باقشاسى، مەملەكەتتىك 5A دارەجەلى ساياحات كورىنىس رايونى. حۋاڭشان تاۋىندا عاجايىپ قاراعاي، جۇمباق تاس، شوككەن بۇلت، اراسان، اق قىراۋ، سارقىراما قاتارلىلار قوسىلىپ، نايزا تاستار كوككە شانشىلعان، بۋرا بۇلتتار شۋدالانعان ەرەكشە كوركەم عاجايىپ كورىنىس قالىپتاستىرىپ، ىقىلىمنان بەرى تالاي ادامدى وزىنە باۋراپ كەلەدى، ميڭ پاتشالىعى داۋىرىندە شۇي شياكى حۋاڭشانعا كەلىپ، كەيىنگىلەرگە ٴتامسىل بولعان «بەس تاۋدى ەڭ ادەمى دەگەنمەنەن، حۋاڭشانعا سول بەسەۋى استار بولماس» دەگەن تاڭدانىسىن ايتقان.


        حۋاڭشاندا جىلىنا ورتا ەسەپپەن 250 كۇن تۇمان تۇسەدى، جاڭبىردان كەيىن كۇن اشىلعاندا، اسىرەسە قىس، كوكتەم ماۋسىمدارىندا قالىڭ تۇمان تۇسەدى. جەر ٴجۇزىن تۇمان جاپقاندا، بيىكتە تۇرىپ تومەنگە كوز سالساڭىز، تاۋ شوقىلارى بەينە شاعىن ارالدار سياقتى قويۋ تۇمان ىشىندە بىردە كورىنىپ، بىردە باتىپ، حۋاڭشان تاۋى پەرىلەر مەكەنى سياقتى ادامدى وزىنە ەلىتەدى. حۋاڭشان تاۋىنىڭ بۇلت تەڭىزى شىعىس تەڭىز، باتىس تەڭىز، تۇستىك تەڭىز، تەرىستىك تەڭىز، اسپان تەڭىزى دەپ بەسكە بولىنەدى، گۋاڭميڭديڭ شوقىسىندا تۇرىپ بەس تەڭىزدىڭ كورىنىسىن الاقانداعىداي تاماشالاۋعا بولادى.


        حۋاڭشانعا كەلسەڭىز، قۇلاما قۇزدى جەر بەدەرى ٴسىزدى قايران قالدىرادى. حۋاڭشان تاۋىنىڭ ٴۇش نەگىزگى شوقىسىنىڭ تەڭىز دەڭگەيىنەن ورتاشا بيىكتىكتەرى 1800 مەتردەن جوعارى كەلەدى، تياندۋ شوقىسى حۋاڭشان تاۋىنداعى ەڭ قۇلاما قۇزدى شوقى، شوقىنىڭ ەتەگىندەگى ۇزىن ساتىمەن جوعارى ورمەلەگەندە، شىڭ باسىنا جەتۋ ٴۇشىن ەڭ قيىن جارتاس ‐ موڭكە ارقاسىنان اسۋعا تۋرا كەلەدى، بۇل ارقانىڭ ۇزىندىعى 10 مەتر، ال ەنى نەبارى 1 مەتر عانا، ەكى جاعى جالاما قۇز، ەرەكشە قورقىنىشتى، جەرگىلىكتى حالىقتا «تياندۋ شوقىسىنا شىقپاساڭ، حۋاڭشان تاۋىنا باردىم دەمە» دەگەن ٴسوز بار، وسىدان-اق ونىڭ كەرەمەتىن بىلۋگە بولادى.


        حۋاڭشان تاۋىندا سان قيلى عاجايىپ تاستار بار. ۇشپا تاس جونىندەگى اڭىزدا ايتىلۋىنشا، سۇن ۋكۇڭ بۇيرەك شاپتۋل قوناعاسىسىنىڭ استاڭ-كەستەڭىن شىعارعاندا، ٴبىر تىستەپ لاقتىرعان شاپتۋلى ادامزات اراسىنا تۇسۋدەن پايدا بولىپتى، تاعى ٴبىر اڭىزدا نيۇيۋا اسپاندى جاماعاندا اسىپ قالعان ەكى تاستىڭ ٴبىرى جيا باۋيۇيدىڭ اۋليەمەن تىلدەسەتىن قاسيەتتى قاس تاسىنا اينالىپتى، ەندى ٴبىرى وسى ۇشپا تاس ەكەن، سوندىقتان 1983-جىلعى «قىزىل ساراي ٴتۇسى» فيلمى وسى ارادان كورىنىس تۇسىرگەن. بۇدان سىرت، مايمىلدىڭ تەڭىزدى تاماشالاۋى، «قالام تاس» قاتارلى عاجايىپ تاستار ايتىلعان زاتتىڭ ٴدال وزىنەن اۋمايدى، تاماشالاۋعا ابدەن تاتيدى.


        حۋاڭشان تاۋىنداعى جاقپار-جاقپار الىپ تاستار كوپ، قۇنارلى توپىراق پەن دىمقىلدىق ەرەكشە از بولعانىمەن، مۇندا جاپ-جاسىل قاراعايلار وسەدى. قاراعاي قاراماققا جارتاسقا تامىر تارتىپ تۇرعانداي كورىنگەنىمەن، ٴىس جۇزىندە ول جارتاستىڭ جاقپارىنا تەرەڭ تامىر تارتىپ، قۇنارسىز توپىراقتان ٴنار العان. تۇسەل قاراعاي كەزىندە ٴار ٴتۇرلى ادەبي شىعارمالارعا ارقاۋ بولىپ، حۋاڭشان تاۋىنداعى عاجايىپ قاراعايلاردىڭ كوكەسى اتانعان، بيىكتىگى 10 مەتر، ٴتىپ-تىك وسكەن، تەك بەلۋارىندا ەكى بۇتاق بار بولىپ، الىستان قاراعاندا قۇشاعىن جايىپ قوناقتاردى قارسى الىپ تۇرعان وتاعاسىنان اۋمايدى.


        حۋاڭشان تاۋىندا اراساندار، سارقىرامالار وتە كوپ. مۇنداعى اراساندار ىستىق اراسان دەپ تە اتالادى دا، عاجايىپ قاراعاي، جۇمباق تاس، بۇلت تەڭىزىمەن قوسىلىپ ٴتورت كەرەمەت دەلىنەدى. اراساندار تاڭ پاتشالىعى داۋىرىندە پايدالانىلا باستاعان، قازىرگە دەيىن مىڭ جىلدان ارتىق تاريحى بار، سۋدىڭ تەمپەراتۋراسى جىل بويى 42 گرادۋستى ساقتايدى، حۋاڭشان تاۋىنا شىعىپ قايتقان ساياحاتشىلاردىڭ وسىندا كەلىپ شومىلۋىنا بولادى. كورىنىس رايونىندا تاعى جيۋلۇڭ سارقىراماسى، رىنزى سارقىراماسى، بايجاڭ سارقىراماسى قاتارلى ٴۇش سارقىراما بار، قىزىعاتىن ساياحاتشىلاردىڭ تاماشالاۋىنا بولادى.

        
        كورىنىس رايونىنىڭ دارەجەسى: AAAAA


        ساياحاتتاۋ ۋاقىتى: 2 كۇن


        بەلەت باعاسى:


        قاۋىرت مەزگىلدە (2016-جىلى 1-ناۋرىزدان 30-قاراشاعا دەيىن): ٴار ادام 230 يۋان


        قىستا (2016-جىلى قاڭتار، اقپان، جەلتوقسان ايلارى): ٴار ادام 150 يۋان


        اشىلۋ ۋاقىتى:


        سەنبىدەن باسقا كۇندە: 06:30‐16:30، سەنبىدە: 06:00‐16:30


        قىستا تياندۋ شوقىسى، شيحاي اڭعارى بۇكىلدەي جابىلادى


        قاتىناس جاعدايى:


        ٴوز كولىگىمەن بارۋشىلارعا:


        (1) شاڭحايدان كەلەتىندەر: شاڭحاي – شاڭحاي-حاڭجوۋ سايراعى – ٴانحۇي-حاڭجوۋ سايراعى – حى-ان – تۇڭليڭ-حۋاڭشان سايراعى – تاڭكوۋ اۋزىنان شىعادى


        (2) سۋجوۋدان كەلەتىندەر: سۋجوۋ – (جاجياسۋ سايراعى) – جياشيڭ – (شاڭحاي-حاڭجوۋ سايراعى) – حاڭجوۋ – (حاڭجوۋ-ٴانحۇي سايراعى) – تۋنشي - حى-ان – تۇڭليڭ-حۋاڭشان سايراعى – تاڭكوۋ اۋزىنان شىعادى


        (3) نيڭبودان كەلەتىندەر: نيڭبو – حاڭجوۋ-نيڭبو سايراعى – حاڭجوۋ – راۋچىڭ سايراعى – حاڭجوۋ-ٴانحۇي سايراعى - حى-ان – تۇڭليڭ-حۋاڭشان سايراعى – تاڭكوۋ اۋزىنان شىعادى


        (4) نانجيڭنەن كەلەتىندەر: نانجيڭ سايحۇڭچياۋ – نانجيڭ-ما-انشان سايراعى – ما-انشان – ما-انشان-ۋحۋ سايراعى – ۋحۋ\نانليڭ اۋزىنان سايراقتان شىعادى – ۋحۋدىڭ وڭتۇستىگى – 205-مەملەكەت تاسجولى – نانليڭ ايقاسپالى كوپىرى – جيڭشيان اۋدانى – سان-شي – اۋدان جولى – شيانيۋان – 103-ولكە تاسجولى – تانجياچياۋ كوپىرى – حى-ان - تۇڭليڭ سايراعى – تاڭكوۋ اۋزىنان شىعادى


        الەۋمەتتىك قاتىناس:


        تۋنشي پويەز بەكەتى، ۇزىن جولدى اۆتوبۋز بەكەتى نەمەسە جوعارى قارقىندى پويەز بەكەتىنەن كولىككە وتىرادى – تاڭكوۋ (جايشي) – حۋاڭشان تاۋى كورىنىس رايونى كولىك الماستىرۋ ورتالىعى (شينگوشيان ساياحاتشىلار ورتالىعى)


        حۋاڭشان تۋنشي اۋەجايى – 19-جول اۋتوبۋزى – ۇزىن جولدى اۆتوبۋز بەكەتىنەن كولىككە وتىرادى - تاڭكوۋ (جايشي) – حۋاڭشان تاۋى كورىنىس رايونى كولىك الماستىرۋ ورتالىعى (شينگوشيان ساياحاتشىلار ورتالىعى)

    اۋدارعان: العابەك قيسىنقان ۇلى