انحۇي ولكەسى چىجوۋ قالاسى جيۋحۋاشان كورىنىس رايونى

جيۋحۋاشان تاۋى كورىنىس رايونى انحۇي ولكەسى چىجوۋ قالاسى چيڭياڭ اۋدانىندا، «شامگۇلدى بۇددا مەكەنى» دەگەن اتى بار، سانشيدەگى ۋتايشان تاۋى، جىجياڭداعى پۋتوشان تاۋى، سىچۋانداعى ى-ميشان تاۋى قوسىلىپ جۇڭگو بۇددا ٴدىنىنىڭ ٴتورت ۇلكەن ايگىلى تاۋى دەلىنەدى، وندا جيۋحۋا كوشەسى، زۋويۋان باقشاسى، حۋاتاي، تيانتاي كورىنىستەرى بار. جيۋحۋاشان تاۋى بۇرىن ليڭياڭشان تاۋى، جيۋزىشان تاۋى دەپ اتالاتىن،


        كورىنىس رايونىنىڭ تانىستىرۋى:


        جيۋحۋاشان تاۋى كورىنىس رايونى انحۇي ولكەسى چىجوۋ قالاسى چيڭياڭ اۋدانىندا، «شامگۇلدى بۇددا مەكەنى» دەگەن اتى بار، سانشيدەگى ۋتايشان تاۋى، جىجياڭداعى پۋتوشان تاۋى، سىچۋانداعى ى-ميشان تاۋى قوسىلىپ جۇڭگو بۇددا ٴدىنىنىڭ ٴتورت ۇلكەن ايگىلى تاۋى دەلىنەدى، وندا جيۋحۋا كوشەسى، زۋويۋان باقشاسى، حۋاتاي، تيانتاي كورىنىستەرى بار. جيۋحۋاشان تاۋى بۇرىن ليڭياڭشان تاۋى، جيۋزىشان تاۋى دەپ اتالاتىن، تاڭ ٴداۋىرىنىڭ اقىنى لي باي «جيۋحۋا تاۋى پەرىلەر مەكەن ەتكەن، جۇماقتاي كوز تارتادى كوركى نەتكەن» دەگەن ولەڭ ارناپ، سودان باستاپ جيۋحۋاشان دەپ اتالىپ كەتكەن.


        جيۋحۋاشان تاۋىندا 99 بۇتحانا ساقتالعان، تاريحتا ادامنان جاسالعان 15 ٴمۇسىن تابىلعان، قازىر بەسەۋى ساقتالعان. ول وزگە بۇددا عيباداتحانالاردان حيتيگاربقاعا (جەر بۇددىنا) ٴتاۋپ ەتۋمەن پارىقتالادى. اڭىزدا ايتىلۋىنشا، تاڭ شۋانزۇڭ زامانىندا سيللانىڭ حانزاداسى جين چياۋجۋە چاۋشياننان جۇڭگوعا كەلىپ، جيۋحۋاشان تاۋىندا تاقۋالىقپەن 75 جىل ٴدىن كۇتىپ، 99 جاسىندا كوز جۇمادى، ولگەن سوڭ ٴمايتى شىرىمەيدى، ونىڭ ۇستىنە ونىڭ ٴتۇرى نوم كىتاپتارىندا جازىلعان حيتيگاربقاعا ەرەكشە ۇقسايتىندىقتان ونى جين حيتيگاربقا دەپ اتايدى.


        جيۋحۋاشان تاۋىنىڭ بوكتەرىندەگى كىسۇن ساياحاتشىلار ورتالىعىنان دايۋان مادەنيەت باقشاسىنا كىرگەن جەردەن-اق دالاعا ورناتىلعان حيتيگاربقانىڭ مىس ٴمۇسىنى كوزگە تۇسەدى، ٴمۇسىننىڭ وڭ قولىنا حاككارا (سىلدىرماقتى اساتاياق)، سول قولىنا مەرۋەرت ۇستاتىلعان، ٴمۇسىننىڭ بيىكتىگى 99 مەتر بولىپ، جيۋحۋاشان تاۋىنىڭ 99 شوقىسى، جين حيتيگاربقانىڭ 99 جاسقا كەلۋى قاتارلىلارمەن ۇندەسەدى، ٴمۇسىن كورىنىس رايونىنىڭ ورتاسىندا التىنداي جارقىراپ، ەرەكشە ساۋلەتتى كورىنەدى.


        تاۋ جولىمەن قۇلداعاندا جيۋحۋا كوشەسىنە بارادى، كوشە جيۋحۋاشان تاۋىنداعى ويپاڭداۋ جەرگە ورنالاسقان بولىپ، نەگىزگى كورىنىس رايونى ەسەپتەلەدى. 1987-جىلى جاسالعان «قىزىل ساراي ٴتۇسى» فيلمىنىڭ 19-سەرياسى «شياۋلەيينگە جاڭساق كىرۋ» وسى ارادا تۇسىرىلگەن. بۇل ارادا كوپتەگەن بۇتحانالار بار، حۋاچىڭسى بۇتحاناسى جيۋحۋاشان تاۋىنداعى ٴبىرىنشى بۇتحانا بولىپ، قازىر جيۋحۋاشان تاريحي مۇراجايىنا وزگەرتىلگەن، وندا جاپىراققا جازىلعان نوم، قانمەن جازىلعان نوم، ميڭ پاتشالىعىنىڭ ۋانلي پاتشاسىنىڭ جارلىعى جانە چيڭ پاتشالىعىنىڭ كاڭشي، چيانلۇڭ پاتشالارىنىڭ قولتاڭبالارى قاتارلى قۇندى مۇراعاتتار ساقتالعان.


        يۋەشىن عيباداتحاناسى جين حيتيگاربقانىڭ جەرلەنگەن جەرى، عيباداتحاناعا «حۋگو يۋەشىن قاسيەتتى مۇناراسى»، «شىعىس وڭتۇستىكتەگى ەڭ ايگىلى تاۋ» دەگەن ماڭدايشالىق قويىلعان، سونىمەن بىرگە، لي يۋانحۇڭ جازعان 16 ٴارىپتى جۋانشۋ ۇلگىسىندەگى جازۋ بار، عيباداتحانانىڭ ىشىندەگى اعاش مۇناراعا جين حيتيگاربقانىڭ مۇدەسى قويىلعان. بۇدان سىرت، جيۋحۋاشان تاۋىنىڭ ٴتورت ايگىلى بۇتحاناسى اتالعان بايسۇيگۇڭ بۇتحاناسى، دييۋانسى بۇتحاناسى، دۇڭياسى بۇتحاناسى وسىندا ورناسقان، ساياحاتشىلاردىڭ تاماشالاۋىنا بولادى.


        جيۋحۋاشان تاۋىندا نايزا شوقىلار، جاقپار-جاقپار تاستار وتە كوپ، جول بويى ٴار قيلى عاجايىپ كورىنىستەرگە ۇشىراساسىز. شىۋاڭ شوقىسى جيۋحۋاشان تاۋىنداعى ەڭ بيىك شوقى بولىپ، تەڭىز دەڭگەيىنەن بيىكتىگى 1342 مەتر، شوقىنىڭ باسىندا تۇرىپ جيۋحۋاشان تاۋىن الاقانداعىداي كورۋگە بولادى. وسى شوقىنىڭ باتىس وڭتۇستىگىندە «پاترا شوقىسى» بار، بەينەسى بۇددا شايحىلارىنىڭ پاترا ىدىسىنان اۋمايدى. بايسۇيگۇڭ عيباداتحاناسى كورىنىس رايونىندا جارتاس پەن ادىردان قالىپتاسقان ۇيقىداعى بۇدتىڭ بەت الپەتى قاتارلى ادامدى ٴتانتى قىلاتىن تابيعي كورىنىستەردى تاماشالاۋعا بولادى.


        جيۋحۋاشان تاۋىنىڭ تاريحي-مادەني قۇندىلىقتارى دا ەرەكشە مول، جين، تاڭ پاتشالىقتارىنان بەرى، تاۋ يۋانميڭ، لي باي، سۋ دۇڭپو قاتارلى قالامگەرلەر وسىندا ات باسىن تىرەپ، ەل اۋزىنان تۇسپەيتىن تاماشا ولەڭدەر جازعان، تاس ويما، ساباقحانا جۇرتتارى دا ٴارقايسى كورىنىس رايوندارىنان كەزدەسىپ وتىرادى. جيۋحۋاشان تاۋى ىقىلىمنان بەرى ٴدىني سالت-سانا مەن حالىقتىق سالت-سانا توعىسىپ، وزگەشە سالت-ٴداستۇر قالىپتاستىرعان جەر، ەرەكشە كۇندەردە مۇندا ايداعارا-ارىستان ٴبيى، ٴتاۋاپ تەاترى، حۋاڭمەي تەاترى قاتارلى ويىندار قويىلادى، قىزىعۋشىلىق تانىتاتىن ساياحاتشىلار الدىن-الا ۇعىسىپ العانى ابزال.


        كورىنىس رايونىنىڭ دارەجەسى: AAAAA


        ساياحاتتاۋ ۋاقىتى: 2 كۇن


        اشىق ۇستالۋ ۋاقىتى: كۇنى-ٴتۇنى اشىق بولادى


        بەلەت باعاسى:


        ادەتتەگى بەلەت: ٴار ادام 180 يۋان، ارزانداتىلعاندا: ٴار ادام 90 يۋان.


        توپتىق بەلەت: ٴار ادام 120 يۋان، ارزانداتىلعاندا: ٴار ادام 70 يۋان، 4 ادام ٴبىر توپ ەسەپتەلەدى.


        ادرەسى: انحۇي ولكەسى چىجوۋ قالاسى چيڭياڭ اۋدانى


        قاتىناس جاعدايى:


        الەۋمەتتىك قاتىناس: 7-جول اۆتوبۋزىمەن جيۋحۋاشان تاۋىنا بارۋعا بولادى


        ۇشاق: نانجيڭ، حىفەي، حۋاڭشان، ان-چيڭ، ۋ-حۋ اۋەجايىنا كەلىپ، توتە كولىكپەن جيۋحۋاشان تاۋىنا بارۋعا بولادى.


        پويەز: تۇڭليڭ، ٴان-شي، تۋنشي، نانجيڭ بەكەتتەرىنە كەلىپ، توتە كولىكپەن جيۋحۋاشان تاۋىنا بارۋعا بولادى.

     

    اۋدارعان: العابەك قيسىنقان ۇلى