جىجياڭ ولكەسى ۋىنجوۋ قالاسى يانداڭشان (قازدى تاۋ) تاۋى كورىنىس رايونى


    كورىنىس رايون تانىستىرۋى:


    يانداڭشان تاۋى جىجياڭ ولكەسى ۋىنجوۋ لىچيڭ قالاسىندا، تاۋ باسىنداعى كولدەرگە قامىس بىتىك وسەتىندىكتەن، وڭتۇستىككە اۋعان قازدار ٴارجىلى وسى اراعا كەلىپ قىستايتىندىقتان «قازدى تاۋ» اتالعان. يانداڭشان تاۋى وڭتۇستىك-سولتۇستىك پاتشالىق داۋىرىندە بايقالىپ، تاڭ-سۇڭ داۋىرىندە اشىلعان، تاۋدىڭ جالپى كولەمى تاۋ شوقىسىنا دەيىن جالعاسادى. يانداڭشان تاۋىنىڭ تۇنىق سۋى، تازا اۋاسى مەن كوركەم كورىنىسى ساياحاتشىلاردى وزىنە قاراي ەرىكسىز جەتەلەيدى، شيە ليڭيۇن، شۇي شياكى، تاڭ يۋ-ۋي قاتارلى قالامگەرلەر بۇل اراعا تالاي-تالاي جىر ارناعان. تەلەۆيزيا تەاترى «جيھانكەز قوس عاشىق» مەن «لاڭيا تىزىمدىگى» وسى ارادان كورىنىس العان. 2005-جىلى يانداڭشان تاۋى بىرلەسكەن مەمىلەكەتتەر ۇيىمىنىڭ وقۋ-اعارتۋ جانە عىلىم-تەحنيكا ۇيىمى جاعىنان دۇنيە جۇزىلىك گەولوگيالىق باقشا بولىپ بەكىتىلگەن.


    يانداڭشان تاۋى بور اعىستى بەدەرلى جانار تاۋ، ونىڭ وسىنداي وزگەشە جەر قىرتىسى ٴتۇرلى عاجايىپ تاستاردى، كوگىلدىر ۇڭگىرلەردى جانە سارقىرامالاردى قالىپتاستىرعان. كورىنىس رايون ىشىندە بەس جۇزدەن استام كورىنىس ٴتۇيىنى بار، بۇلاردىڭ ىشىندە ليڭفىڭ شوقىسى، ليڭيان، ۇلكەن لۇڭچيۋ ۇشەۋى «يانداڭشان تاۋىنىڭ ٷش كەرەمەتى» اتالعان.


    حىجاڭفىڭ شوقىسى (قوس الاقان شوقىسى) ليڭفىڭ كورىنىس رايونىنىڭ ۋاكىلدىك كورىنىس ٴتۇيىنى، بيىكتىگى 270 مەتر، ليڭفىڭ شوقىسى مەن ي-تيانفىڭ شوقىسى الىستان قاراعاندا بەتتەسكەن قوس الاقانعا ۇقسايدى، الاقاننىڭ ورتاسى تابيعي تاس ۇڭگىر___ شاپاعات ٴتاڭىرى ۇڭگىرى، ۇڭگىردىڭ جالپى ۇزىندىعى 100 مەتر، ەنى مەن بيىكتىگى 40 مەتر، ىشىندە ون قابات ٴبىر بۇتحانا بار.


    ليڭفىڭ شوقىسىنداعى عاجايىپ تاستار قاس قارايا سىرلى تۇسكە ەنسە، كۇندىز قوس الاقان شوقىسى قۇددى ٴبىر-بىرىنە قاراپ تۇرعان قوس عاشىق سپەتى كورىنسە، الىستاعى تاۋدىڭ باسى سۇيكىمدى كوجەككە ۇقسايدى.


    ليڭيان كورىنىس رايونىنان جاندى ەلتىپ، كوڭىلدى جادىراتار ارقاننان ٴوتۋ ويىنىن كورۋگە بولادى. ٴتاڭىر دىڭگەڭ شوقىسى مەن بايراق شوقىسىنىڭ ارالىعى 250 مەتر، جەر بەتىنەن ورتاشا بيىكتىگى 265 مەتر، وسى ەكى شوقى ارالىعىنا ەكى سانتيمەتر جۋاندىقتاعى بولات ارقان تارتىلعان. ونەرپازدار بىردە ارقاندا توڭقالاڭ اسسا، بىردە قۇددى جارعانات قۇساپ ارقانعا سالاقتاپ نە قيلى ونەر كورسەتەدى. بۇل ونەرپازدار بۇرىن تاۋ ىشىندە ٴدارى ٴشوپ قازاتىندار، ارناۋلى ۇستازدان وسى ونەردى ۇيرەنگەن سوڭ، بۇل ارادا كەم دەگەندە نەشە ون جىل ويىن قويادى. ليڭيانفىڭ شوقىسىنىڭ ايداعارلى سايىندا ساياحاتشىلار ٴجۇز مەتر تەرەڭ شاتقالداعى كورىنىستى انىق كورە الاتىن ۇزىندىعى ٴجۇز مەترگە تاياۋ، ەنى ٴبىر مەترلىك اينەك شارباق جول بار.


    يانداڭشان تاۋىندا جانە كوپتەگەن سارقىرامالار بار، ات قويىلعان سارقىرامانىڭ سانى ون سەگىز، بۇلاردىڭ ىشىندە ۇلكەن لۇڭچيۋ سارقىراماسى حۋكوۋ سارقىراماسىنداي كەرەمەت بولماسا دا، ۇزىندىعىمەن اتى شىققان. اسپاننان شۇباتىلىپ ٴتۇسىپ تۇرعان جىبەك تاسپا سپەتتى سارقىرامانىڭ بيىك-الاسالىق ٴتۇسۋ پارقى 197 مەتر، سارقىرامانىڭ جاقپار تاستارىنا جيىرما نەشە ورىنعا «الەمدەگى ٴبىرىنشى سارقىراما» دەپ ويىپ جازىلعان. يانداڭشاندا بۇدان باسقا جانە كىشى لۇڭچيۋ سارقىراماسى، ٷش بۇكتەمەلى سارقىراما قاتارلى ايگىلى سارقىرامالار بار.


    ساياحاتتاۋعا ۇسىنىس: 1-2 كۇن


    بەلەت: دالۇڭچيۋ 50 يۋان، شارشى ۇڭگىر 40 يۋان، كىشى لۇڭچيۋ 50 يۋان، ليڭفىڭ شوقىسى(كۇندىز-كەش جەكە-جەكە) 40 يۋان، جيڭميڭگۋ سايى 25 يۋان، ٷش بۇكتەمەلى سارقىراما 15 يۋان، تۋنەل 60 يۋان، قازدى كول 15 يۋان، قوي ٴمۇيىز ۇڭگىر 15 يۋان، شيانشىڭمىن 15 يۋان، پەرى بۇلاعى 108 يۋان.


    اشىلۋ ۋاقىتى: 5:30~18:00


    مەكەنجايى: ۋىنجوۋ لىچيڭ قالاسى يانداڭشان بايفۋشيان ماڭى


    قاتىناس باعدارلاماسى:


    اۆتوكولىكپەن: (1) حاڭجوۋدان شىققاندا: حاڭجوۋ سىرتقى ايلانبا سولتۇستىك جولى-حاڭيۇڭ سايراعى-شاڭسان سايراعى-يۇڭتايۋىن سايراعى-يانداڭشان اۋىزى


    (2) ۋىنجوۋدان شىققاندا: ۋىنجوۋ قالاسى-يۇڭتايۋىن سايراعى- G104 -يانداڭشان باعىتىنا ون كيلومەتر جۇرگەن سوڭ كورىنىس رايونىنا جەتەدى.


    الەۋمەتتىك قاتىناس: (1) ۋىنجوۋدان شىققاندا: ۋىنجوۋ ۆاگزالىنىڭ قارسىسىندا جاڭا جولاۋشىلار وڭتۇستىك بەكەتى بار، سودان يانداڭشان تاۋى كورىنىس رايون ارناۋلى اۆتوبۋزىنا شىعاسىز.


    (2) حاڭجوۋدان شىققاندا: حاڭجوۋ شىعىس جولاۋشىلار اۆتوبۋز بەكەتىنەن يانداڭشان ساياحات اۆتوبۋز بەكەتىنە كەلەسىز.


    ۇشاق: ۋىنجوۋ اۋەجايىنان يانداڭشانعا دەيىن 90 كيلومەتر؛ تايجوۋ اۋەجايىنان يانداڭشانعا دەيىن 50 كيلومەتر.