گۇيجوۋ انشۇن قالاسى حۋاڭگوشۋ سارقىراماسى كورىنىس رايونى

سارقىرامانىڭ باس جاعىندا 3 كيلومەتر جەردە وزگەشە ٴبىر ۇڭگىر بار. شىنلۇڭدۇڭ ۇڭگىرىنىڭ تاعانى 380 مىڭ شارشى مەتر، ۇزىندىعى 4640 مەتر، قازىر 1600 مەترى ساياحاتشىلارعا اشىلعان، قۇرعاق ۇڭگىر، سۋلى ۇڭگىر دەپ بولىنەدى، كوپتەگەن ستالاكتيپت (تاس) بار.


        كورىنىس رايونىنىڭ تانىستىرۋى:


        حۋاڭگوشۋ سارقىراماسى كورىنىس رايونى گۇيجوۋ ولكەسى انشۇن قالاسىندا، ولكە ورتالىعى گۇيياڭ قالاسىنان 128 كيلومەتر الىستا، حۋاڭگوشۋ سارقىراماسىن وزەك ەتكەن جوعارى جانە تومەنگى اعاردا ۇلكەندى-كىشىلى 18 سارقىراما بار، الەمدەگى ەڭ ۇلكەن سارقىرامالاردىڭ ٴبىرى، تيانشيڭچياۋ، دوۋپوتاڭ، ديشۇيتان، باليڭحى اڭعارى قاتارلى ٴبىرقانشا رايونعا بولىنەدى.


        حۋاڭگوشۋ سارقىراماسى كورىنىس رايونىنىڭ ەڭ نەگىزگى كورىنىسىنىڭ كولەمى 8.5 شارشى كيلومەتر، حۋاڭگوشۋ سارقىراماسى، شۋيلياندۇڭ ۇڭگىرى، شينيۋتان قايراڭى قاتارلى كورىنىستەر بار. حۋاڭگوشۋ سارقىراماسى كارستتى جەر بەدەرىنىڭ جەمىرىلىپ جارىلۋىنان پايدا بولعان، بيىكتىگى 77.8 مەتر، ەنى 101 مەتر، جۇڭگوداعى، سونداي-اق ازياداعى ەڭ ۇلكەن سارقىراما. سارقىراما ەرەكشە ايبىندى، وزەن سۋى وسى اراعا جەتكەندە جالاما جارتاستان تومەن قۇيىلىپ، تاۋ ىشىنە كۇمىستەي ٴاپپاق پەردە تارتىلعانداي بولادى، سۋ تومەنگە تۇسكەندە جان-جاققا جويقىن كوبىك شاشىپ، تۇماندانىپ جاتادى، قاسىنا بارماي-اق سارقىرامانىڭ سالقىنىن الىستان سەزۋگە بولادى.


        حۋاڭگوشۋ سارقىراماسىنىڭ ەرەكشەلىگى − ونى جان-جاعىنان تاماشالاۋعا بولاتىندىعىندا. سارقىرامانىڭ 40 مەتر دە 47 مەتر بيىك جەرىندە 134 مەترلىك كومەسكى تابيعي سۋ پەردە بار، ساياحاتشىلاردىڭ سۋ پەردەسىنىڭ ىشىندە تۇرىپ تاماشالاۋىنا، پەردەگە جاقىنداۋىنا بولادى.


        سارقىرامانىڭ باس جاعىندا 3 كيلومەتر جەردە وزگەشە ٴبىر ۇڭگىر بار. شىنلۇڭدۇڭ ۇڭگىرىنىڭ تاعانى 380 مىڭ شارشى مەتر، ۇزىندىعى 4640 مەتر، قازىر 1600 مەترى ساياحاتشىلارعا اشىلعان، قۇرعاق ۇڭگىر، سۋلى ۇڭگىر دەپ بولىنەدى، كوپتەگەن ستالاكتيپت (تاس) بار. ۇڭگىر كەزىندە جەرگىلىكتى از ۇلتتاردىڭ باندىلارمەن سوعىساتىن بەكىنىسى بولعان، اسكەري قۇرىلعىلار ٴالى كۇنگە ساقتاۋلى تۇر.


        تيانشيڭچياۋ كورىنىس رايونىنداعى كۇمىس القالى قۇلاما سارقىرامانىڭ ٴپىشىنى ۆورونكادان اۋمايدى، ورتا تۇسىنىڭ جەر بەدەرى الاسا بولعاندىقتان ناۋا ٴتارىزدى شۇڭەت قالىپتاستىرعان، جان-جاعىنداعى اعىن سۋلار وسىعان كەلىپ قۇيىلادى دا، سوسىن قۇلداي اعادى، سارقىراما نەبارى ون نەشە مەتر بولعانىمەن، كورىنىسى ەرەكشە كوركەم.


        حۋاڭگوشۋ سارقىراماسىنىڭ باتىسىنداعى 8 كيلومەتر جەردە سارقىرامالاردىڭ ىشىندەگى ەڭ بيىك ديشۇيتان سارقىراماسى بار، ونىڭ بيىكتىگى 410 مەتر، حۋاڭگوشۋ سارقىراماسىنىڭ بەس ەسەسىندەي.


        ماۋشۇيتاڭ كولشىگىنىڭ باس جاعىنداعى كوپىر دە ەرەكشە عاجايىپ، كوپىر تابيعي قالىپتاسقان، ٴبىراق وزگە كوپىر سياقتى ٴبىر تاستان عانا قۇرالماعان، وڭى مەن سولىندا ٴبىر-ٴبىر كەسەك تاس، ٴدال ورتاسىندا باسى ۇلكەن، اياعى جىڭىشكە ٴبىر الىپ تاس بار.


        «6-ماۋسىم» بۋي ۇلتىنىڭ ماڭىزدى مەرەكەسى، بۇل كۇنى تاساتتىق بەرەدى، ويىن قويادى، ساۋىق قۇرادى، حۋاڭگوشۋ ساياحات رايونى 2007-جىلدان باستاپ «6-ماۋسىم» بۋي مادەنيەتى مەرەكەسىن وتكىزىپ كەلەدى، سونىمەن بىرگە ٴار مەزگىلدە حۋاڭگوشۋ سارقىراماسى مەرەكەسىن وتكىزەدى، قىزىعاتىن ساياحاتشىلار نازار اۋدارۋىنا بولادى. بۇل جەردە تاعى گۇلدى كۇرىش، قىشقىل بالىق سورپاسى قاتارلى بۋي، مياۋزۋ ۇلتتارىنىڭ ۇلتتىق تاعامدارى بار. 



        كورىنىس رايونىنىڭ دارەجەسى: AAAAA


        ساياحاتتاۋ ۋاقىتى: 1 دە 2 كۇن


        بەلەت باعاسى:


        ەسىك بەلەتى: قاۋىرت مەزگىلدە (1-ناۋرىزدان 30-قاراشاعا دەيىن) 180 يۋان؛ سايابىر ماۋسىمدا (1-جەلتوقساننان كەلەسى جىلى اقپاننىڭ سوڭىنا دەيىن) 160 يۋان


        اشىلۋ ۋاقىتى: 7:00−18:00


        ادرەسى: گۇيجوۋ ولكەسى انشۇن قالاسى جىننيڭ بۋي-مياۋزۋ اۆتونوميالى اۋدانى حۋاڭگوشۋ قالاشىعى


        قاتىناسقا سىلتەمە:


        كوشە اۆتوبۋزى:


        انشۇن حۋاڭگوشۋ اۋەجايى، بەيجيڭ، چيڭداۋ، كۇنميڭ، جينان، گۋاڭجوۋ، سان-يا قاتارلى التى جەرگە باراتىن كەزەكشى ۇشاق بار.


        گۇيياڭ اۋەجايى – جينياڭ جولاۋشىلار اۆتوبۋز بەكەتى – حۋاڭگوشۋ سارقىراماسى


        گۇيياڭ اۋەجايى – انشۇن وڭتۇستىك جولاۋشىلار اۆتوبۋز بەكەتى - حۋاڭگوشۋ سارقىراماسى


        ٴوز كولىگىمەن جۇرۋشىلەرگە:


        گۇيياڭ-حۋاڭگوشۋ تاسجولى، شاڭحاي-كۇنميڭ سايراعى، 302 مەملەكەت تاسجولى، شۇيچىڭ-حۋاڭگوشۋ ەرەكشە تاسجولى، گۋانليڭ−شيڭ-ي ەرەكشە تاسجولى قاتارلى جولدارمەن كورىنىس رايونىنا بارۋعا بولادى.

     

    اۋدارعان: العابەك قيسىنقان ۇلى