گۇيجوۋ ولكەسىنىڭ انشۇن قالاسىنداعى ايگىلى لۇڭگۇڭ كورىنىس رايونى


        كورىنىس تۇيىندەردى جونىندەگى تانىستىرۋ: 


        اتاعى الىسقا ءماشھۇر لۇڭگۇڭ كورىنىس رايونى گۇيجوۋ ولكەسى انشۇن قالاسىنىڭ وڭتۇستىك بولەگىنە ورنالاسقان، حۋاڭگوشۋ كورىنىس رايونىمەن بولعان قاشىقتىعى 30 كيلومەتر، جالپى جەر اۋماعى 60 شارشى كيلومەتر، ال، وزەكتى كورىنىس تاماشالاۋ ورنىنىڭ جەر اۋماعى 18 شارشى كيلومەتر. سۋلى - قۇرعاق ۇڭگىر، سارقىراما، تاس ورمان، قادا شوقى، جالاما قۇز سياقتى كوپتەگەن كارست تاۋ جىنىستارىنان قالىپتاسقان كورىنىس رايونى ەسەپتەلەدى. بۇل جەردىڭ تابيعي بايلىعى مول، ورمانمەن كومكەرىلگەن اۋماعى زور بولىپ، «ۇڭگىر كولەمى ەڭ ۇلكەن، ۇڭگىر سانى ەڭ كوپ - لۇڭگۇڭ ۇڭگىر شوعىرى»، «تابيعي رادياتسيا اسەرى ەڭ تومەن جەر - ايگىلى لۇڭگۇڭ كورىنىس رايونى» دەيتىن ەكى تۇردەن شاڭحاي گەنيس رەكوردىن جاراتقان.


        لۇڭگۇڭ كورىنىس رايونىنىڭ جەر استى سۋ بايلىعى مول، سۋ قۇرىلىمى كۇردەلى، كەزەكتە، سۋلى ۇڭگىردىڭ جالپى ۇزىندىعى 5 مىڭ مەتر، 5 بولەك ۇڭگىر شوعىرىنان قۇرالىپ، «5 اۋىزدى ايداعدار ۇڭگىرى» دەپ اتالعان. قازىرگە دەيىن 1-، 2-اۋىزدى سۋلى ۇڭگىر جولى اشىلىپ، ۇزىندىعى مىڭ مەتردەن اسقان، بۇل ايداعار ۇڭگىرىنىڭ ەڭ كەڭ بولەگى 40 مەتر بولىپ، ەڭ تار بولەگىنەن تەك كىشكەنە قايىق قانا وتە الادى، ەڭ تەرەڭ جەرى 28 مەتر. ۇڭگىر ىشىندەگى تاس دىڭگەك، تاس شىمىلدىق، تاس شىپتالاردىڭ بەينەسى الۋان ءتۇرلى بولىپ، كەيبىرەۋى الماس قانجارعا ۇقساسا، كەيبىرەۋى ۇزىننان ۇزاققا جالعاسقان شىمىلدىققا ۇقسايدى، شامنىڭ جارىعىمەن كورەتىن بولساڭىز ولار الۋان تۇسكە ەنىپ، وزگەشە ءلاززات باعىشتايدى. ۇڭگىردىڭ قاراڭعى جەرلەرىندە ءجۇرىپ وسى كورىنىستەردى تاماشالار بولساڭىز، بەينە اڭىزداردا ايتىلاتىن «ايداعدار پاتشانىڭ كريستال ورداسىنا» بارعانداي سەزىمدە بولاسىز.

     


        لۇڭگۇڭ بۇرھان ۇڭگىرى جارتىلاي اشىلعان بولەك-بولەك قۇرعاق جانە سۋلى ۇڭگىردەن قالىپتاسقان بولىپ، ەلىمىزدەگى ەڭ ۇلكەن ۇڭگىر ىشىندەگى عيباداتحانا، ونىڭ جالپى جەر كولەمى 20 مىڭنان ارتىق شارشى مەتر، ۇڭگىردىڭ بيىكتىگى 60 مەتردەن اسادى، بۇرھان ۇڭگىرىنىڭ ەڭ زور ەرەكشەلىگى بولسا، ول ادام كۇشىمەن سالىنباعان، قايتا تابيعي قالىپتاسقان ۇڭگىر. بۇرھان ۇڭگىرىنىڭ ىشىندە بۇددا مۇسىندەرىنەن 32 سى بار، مۇنىڭ ىشىندە بۇرھان ءمۇسىنىنىڭ ۇزىندىعى 12.6 مەتر. تاۋ بۇيىرىندە بۇددا ءدىنىنىڭ ايگىلى كوسەمى، حاتكەر جاۋ پۋدىڭ كەزىندە ءوز قولىمەن جازعان «بۇرھان ۇڭگىرى» دەگەن ۇلكەن جازۋى بار.


        لۇڭگۇڭنىڭ جوعارعى جاعىنداعى شۇڭەت كولشىگى كورىنىس رايونى ءبىر بارىپ تاماشالاۋعا تاتيتىن جەر. شۇڭەت كولشىگىنىڭ فورماسى دوڭگەلەك بولىپ، جەر اۋماعى 10 مىڭ شارشى مەتردەن اسادى. كولشىك سۋى ەشقانداي جەل كۇشىن قاجەت ەتپەستەن ءبىر جىلدىڭ ءتورت ماۋسىمىندا قالىپتى باعىتى بويىنشا توقتاۋسىز اينالىپ تۇرادى، قاراساڭىز سونداي سىرلى دا حيكمەتتى. شۇڭەت كولشىگى كورىنىس رايونىنىڭ سول جاق جاعاسىنداعى اتىزدىق جەرگە جەرگىلىكتى ديقاندار قىشى گۇلى مەن اتباس بۇرشاق گۇلىن ەگىپ، بۇل ارانى ۇلكەن گۇلدىككە اينالدىرعان، گۇلدىكتىڭ ورتاسىندا كولەمى 80 مىڭ شارشى مەتردەن اساتىن «ايداعار» ءارىبى گۇلمەن ايشىقتالىپ تۇر. ءار جىلى ناۋرىز ايىندا لۇڭگۇڭ كورىنىس رايونى بۇل جەردە قىشى گۇلى ساياحات مەرەكەسىن وتكىزەدى، ول كەزدە قۇلپىرا اشىلعان گۇلدەر ادامدى وزىنە ءتانتى ەتتىرمەي قويمايدى. بۇدان تىس، كورىنىس رايونىنىڭ ىشىندە تاعى لۇڭمىن سارقىراماسى، تيانچى، شىچۇي باقشاسى سياقتى كورىنىس ورىندارىن دا تاماشالاۋعا بولادى.


        لۇڭگۇڭدا نەگىزىنەن بۋيزۋ، مياۋزۋ، بايزۋ سياقتى از ساندى ۇلتتار قونىستانعان، ول جەرگە بارساڭىز الۋان ءتۇستى ۇلتتىق كيىم-كەشەكتەردەن ءلاززات الىپ، لۇڭگۇڭ بالىعى، چاڭۋاڭ كەسپەسى، جەرلىك تاۋىق ەتى سياقتى ءدامى ءتىل ۇيىرەتىن تاعامدار اۋىز تيە الاسىز. ودان تىس جەرگىلىكتى بۇقارا كوپتەگەن ءداستۇرلى قۇتتىقتاۋ قيمىلدارىن وتكىزەدى. ايتالىق، «6-مامىر» بۋيزۋ ۇلتىنىڭ ەڭ ماڭىزدى دەپ وتكىزەتىن مەرەكەسىنىڭ ءبىرى بولىپ، تاعى ءبىر اتى «كىشى شاعان» مەرەكەسى. تاعى دا ەسكىشە كالەنداردىڭ قاڭتار ايى مەن ءساۋىردىڭ 8-كۇنى مياۋزۋ بۇقاراسى ءبىر اراعا باس قوسىپ بىرلىكتە «گۇل ءبيىن» بيلەيدى، ارينە، بۇل قيمىلداردىڭ دۋماندى بولاتىنى بارىمىزگە ايان.


        كورىنىس رايونىنىڭ دارەجەسى: AAAAA


        ساياحاتتاۋ جونىندە ۇسىنىس: 4 ساعات مولشەرىندە ساياحاتتاۋعا بولادى


        بەلەت باعاسى: ءبىر ادامعا 150 يۋان


        اشىلاتىن ۋاقىتى: تۇتاس ءبىر كۇن تولىق اشىلادى


        ءادىرىسى: گۇيجوۋ ولكەسىنىڭ انشۇن قالاسى


        قاتىناس-تاسىمال كورسەتكىشى: ۆەلەسيپەد


        اۆتوكولىككە وتىرۋ بەكەتى: گۇيياڭ قالاسىنىڭ (قاتىناس بەكەتى، دەنەتاربيە سارايى، پويەز بەكەتى) سياقتى ورىندارىنا بارىپ، ونداعى گۇيياڭنان انشۇنعا توتە قاتىنايتىن اۆتوبوزعا وتىراسىز. انشۇنعا بارعاننان كەيىن (قاتىناس باتىس، شىعىس بەكەتىنە) بارىپ، انشۇننان لۇڭگۇڭگە توتە قاتىنايتىن ارناۋلى اۆتوكولىككە وتىراسىز.


        جەكە اۆتوكولىك لەنياسى: گۇيياڭ - چيڭجىن - پيڭ بەي - انشۇن - لۇڭگۇڭ كورىنىس رايونىنىڭ شىعار اۋىزى.


        انشۇن قالاسىنان لۇڭگۇڭگە دەيىنگى جەكە اۆتوكولىك لەنياسى: انشۇن - جۇڭحۋا باتىس جولى - لۇڭجيڭ جولى - حۋاڭگوشۋ كوشەسى - قاتىناس-تاسىمال جولى - زىيۇن جولى - شاڭحاي-كۇنميڭ جوعارى قارقىندى تاس جولى - گۇيياڭ-حۋاڭگوشۋ تاس جولى - 007 اۋدان جولى - لۇڭگۇڭ شىعار اۋىزى.


        تەمىر جولى لەنياسى: چۋانچيان، شياڭچيان، چيان گۇي، گۇيياڭ - كۇنميڭ تەمىر جولى، «حۋاڭگوشۋ» ارناۋلى ساياحاتشىلار پويەزى.


        اۆياتسيا لەنياسى: انشۇن حۋاڭگوشۋ اۋەجايى، گۇيياڭ اۋەجايى.

     

    اۋدارعان: راحىمان قادەن ۇلى