يۇننان ولكەسى كۇنميڭ قالاسى شىلين (تاس ورمان) كورىنىس رايونى

تاس ورمان كورىنىس رايونى يۇننان تاس ورمانى دەپ تە اتالادى. يۇننان ولكەسى كۇنميڭ قالاسى شىلين يزۋ اۆتونوميالى اۋدانىندا، دۇنيەدەگى تابيعي مۇرا، ونىڭ دۇنيەگە ايگىلى كارست جەر بەدەرى ەكى ٴجۇز ميلليون جەتى ٴجۇز مىڭ جىلدىڭ الدىندا قالىپتاسىپ، «الەمدەگى ٴبىرىنشى تاڭقاجايىپ» اتالعان. تاس ورمانداعى كورىنىس تۇيىندەرىنەن: كىشى تاس ورمان، ۇلكەن تاس ورمان، تاس ورماندى ۇزىن كول، قاراۋىل تاۋ، الحورلى الاپ، ٷندى ۇڭگىر جانە تاس ورمان ۇڭگىرى قاتارلىلار


    كورىنىس رايون تانىستىرۋى:


    تاس ورمان كورىنىس رايونى يۇننان تاس ورمانى دەپ تە اتالادى. يۇننان ولكەسى كۇنميڭ قالاسى شىلين يزۋ اۆتونوميالى اۋدانىندا، دۇنيەدەگى تابيعي مۇرا، ونىڭ دۇنيەگە ايگىلى كارست جەر بەدەرى ەكى ٴجۇز ميلليون جەتى ٴجۇز مىڭ جىلدىڭ الدىندا قالىپتاسىپ، «الەمدەگى ٴبىرىنشى تاڭقاجايىپ» اتالعان. تاس ورمانداعى كورىنىس تۇيىندەرىنەن: كىشى تاس ورمان، ۇلكەن تاس ورمان، تاس ورماندى ۇزىن كول، قاراۋىل تاۋ، الحورلى الاپ، ٷندى ۇڭگىر جانە تاس ورمان ۇڭگىرى قاتارلىلار. كورىنىس رايونىنداعى تاۋ سۋرەتىنە جان بىتىرگەندەي جاناسقان سۋلاردىڭ سىڭعىرى، ماگما ۇڭگىرلى سارقىرامالار مەن جەر استى وزەندەرىنىڭ ەتەنە سايكەستىگى تاڭقاجايىپ كورىنىستەر قالىپتاستىرعان.


    تاس ورمان كورىنىس رايونىنىڭ كورىنىسى كوركەم، اۋاسى تۇنىق. ايگىلى ساياحات ولكەسى بولعان يۇنناندا بولعاندىقتان، ساياحاتشىلار قۇمىرسقاداي قاپتاپ جۇرسە دە، تاۋدىڭ كوركەم كورىنىسىن مۇلدە دالدالاپ قالا المايدى. كىشى تاس ورماننىڭ كورىنىسى ادەمى، ۇلكەن تاس ورمان شەكسىز كەڭ، قازديعان قادا تاستار قۇددى كينوداعىداي كوز الدىڭىزعا كەلە قالادى. تاس ورمانداعى ٴتاڭىردىڭ سىرلى بالتاسىمەن شاۋىپ جاساعانداي وزگەشە تاستاردى كورگەن ادام تاڭقالماي تۇرا المايدى. ساياحاتشىلارعا جول باستاۋشىلار ٴاربىر تاستىڭ حيكاياسىن قۇلاق قۇرىشىڭىزدى قاندىرا اڭگىمەلەپ بەرەدى. ەسكەرتەر ٴبىر جايت، ساياحات بارىسىندا باعىتتان جازىپ، اداسىپ قالۋدان ساق بولۋ كەرەك.


    الحورلى الاپتىڭ اتى الحور اعاشىنا قاتىستى ٴبىر اڭىزدان كەلگەن ەكەن، بۇل اراداعى جولدىڭ وڭتۇستىگى تاس ورماندار مول جينالعان، كەرەمەت كوركەم بولەگى. تاس ۇڭگىرلەر ۇلكەن-كىشى تاس ۇڭگىرلەر جانە اق ايداعار تاساتتىق ۇڭگىرى قاتارلى ٴىشى كەڭ، ادام ەمىن-ەركىن ايلاناتىن ۇڭگىرلەرگە بولىنەدى. ۇڭگىر ىشىندە تامشى تاس، سۇيرىك تاس جانە تاس دىڭگەك ماگمالى ۇڭگىر كورىنىستەرى شىراق ساۋلەسىمەن شەندەسىپ، اسەم كورىنىس مۇندالاتادى.


    ۇزىن كول اڭىزدارداعى اشيمانىڭ مەكەنى ەكەن، كول ورنى بىرشاما قالتقىلاۋ جەردە بولعاندىقتان «جاسىرىن كول» دەپ تە اتالادى. كول بەرتىندە عانا اشىلعاندىقتان، تازا ٴارى تۇنىق، كولدەگى بالىقتار مەن بالدىرلاردى اپ-انىق كورۋگە بولادى. كول جاعاسىنا كەلىپ، تابيعاتتى تاماشالاي جاتىپ، دەمالۋعا ابدەن ۇيلەسەدى.
    قاراۋىل تاۋ ۇلكەن تاس ورماننىڭ شىعىسى، كىشى تاس ورماننىڭ وڭتۇستىگىندە، چيڭ ٴداۋىرىنىڭ سوڭعى كەزىندە يزۋدىڭ اقيقاتشى قوسىندارىنىڭ قولباسشىسى جاۋ فا وسى تاۋعا كەلىپ، قورعانىس شەبىن جايعاندىقتان وسىلاي اتالعان. تاۋ شوقىسىنىڭ تەڭىز دەڭگەيىنەن بيىكتىگى 1796.7 مەتر، ۇلكەن تاس ورماننىڭ بيىك شوقىسىنان 50 مەتر بيىك، تاس ورمان كورىنىس رايونىنداعى ەڭ بيىك ورىن. مۇندا «قاراۋىل بەس تاس قاقپاسى»، «قاراۋىل قاراعايى» سىندى وزگەشە كورىنىس تۇيىندەرى بار. ٷندى ۇڭگىر الحورلى القاپتىڭ شىعىس تەرىستىك جاعىنان 8 كيلومەتر شالعايدا. ۇڭگىر ۇلكەن ەمەس، ديامەترى ٴبىر مەتر عانا، جاڭبىرلى ماۋسىمدار ۇڭگىرگە سۋ تولعاندا، ەنتىككەن سياقتى دىبىس شىعاتىندىقتان، تىنىس الاتىن ۇڭگىر دەپ اتالىپ، ٷندى ۇڭگىر دەپ ات قويىلعان. بۇل ۇڭگىر ٴالى اشىلماي، زاپاس ساقتاۋلى تۇرعان ورىن.


    بۇل ارادا تاريحتان بەرى تاس ورماندى ٴوڭىردى مەكەن ەتىپ كەلە جاتقان يزۋ ۇلتىنىڭ سانعۇن تۇرعىندارى «اشيما» اتىنداعى ۇلتتىق مادەنيەت قالىپتاستىرعان. بۇدان سىرت الاۋ مەرەكەسى مەن بۇتاق مەرەكەسى جەرگىلىكتى وزگەشە ٴبىر مەرەكەلەر. الاۋ مەرەكەسى يزۋ ۇلتىنىڭ ٴداستۇرلى مەرەكەسى، ٴار جىلى ديقاندار كالەندىرى بويىشا 24-ماۋسىم وتەدى. مەرەكە كۇنى ەر-ايەل، كارى-جاس تۇگەلدەي مەرەكەلىك كيىم كيىپ، الاڭعا جينالىپ، ٴداستۇرلى مەرەكەنى تويلايدى. ال «بۇتاق مەرەكەسى» ٴار جىلى ديقاندار كالەندىرى بويىنشا قىستىڭ ٴبىرىنشى تىشقان كۇنىنەن ات كۇنىنە دەيىن، ٷش تە جەتى كۇن وتكىزىلەدى. بۇل مەرەكەدە يزۋ ۇلت بۇقاراسى وزگەشە فورما ارقىلى اتا-بابالارى تىرلىك كەشكەن كونە قوعام بەينەسىن بەينەلەيتىن ٴداستۇرلى مەرەكە.


    كورىنىس دارەجەسى: AAAAA


    ساياحاتقا ۇيلەسىمدى مەزگىل: ناۋرىزدان قازانعا دەيىن


    ساياحاتتاۋعا ۇسىنىس: 5-7 ساعات


    بەلەت: 175 يۋان


    اشىلۋ ۋاقىتى: 08:00~17:00


    مەكەنجايى: كۇنميڭ قالاسى شىلين يزۋ اۆتونوميالى اۋدانى


    قاتىناس باعدارلاماسى:ۆاگزالدان، شىعىس جولاۋشى تاسىمال بەكەتىنەن ساياحات رايونىنا باراتىن اۆتوبۋز بار.