ۋاكىلدەرمەن سۇحبات   
ازىق-تۇلىك حاۋىپسىزدىگى زاڭىنىڭ اتقارىلۋىن كۇشەيتۋ قاجەت
كەلۋقاينارى:جۇڭگو قازاق راديو تورابى     |جاۋاپتى رەداكتور:ايناگۇل|    جاڭالانعان ۋاقىت: 2017-03-12 16:49

 

 

    ٴوز ٴتىلشىمىز گۇلباقشا ٴمادى قىزى حابارلايدى. جاقىنعى جىلداردان بەرى ەلىمىزدىڭ قاتىستى تاراۋلارى ازىق-تۇلىك حاۋىپسىزدىگىنە باسا ٴمان بەرىپ، بەلگىلى ونىمدىلىككە قول جەتكىزسەدە، ەلىمىزدىڭ ازىق-تۇلىك حاۋىپسىزدىگى ٴالى دە قاتاڭ سايىستارعا ٴدۇپ كەلىپ، ازىق-تۇلىك حاۋىپسىزدىگىن قامتاماسىزداندىرۋدىڭ مىندەتى ٴالى دە اۋىر.


    بيىلعى ۇكىمەت قىزمەتىنەن جاسالعان باياندامادا: «ازىق-تۇلىك، ٴدارى-دارمەك حاۋىپسىزدىگى، كىرىس ٴبولىسى جاقتارىندا حالىق بۇقاراسى رازى بولمايتىن جەرلەر ٴالى دە از ەمەس. ازىق-تۇلىك، ٴدارى-دارمەك حاۋىپسىزدىگى حالىقتىڭ دەنساۋلىعىنا سايادى، ونى، ٴسوز جوق، قاتاڭ باسقارۋ كەرەك. باقىلاۋ-باسقارۋ ٴتۇزىلىسى مەحانيزىمىن كەمەلدەندىرىپ، نەگىزگى ساتىنىڭ باقىلاۋ-باسقارۋ كۇشىن تولىقتاپ، ٴار جاقتىڭ جاۋاپكەرشىلىگىن تۇراقتاندىرىپ،ٴوندىرۋ، ساتۋ بۋىندارىن باقىلاۋ-باسقارۋدى بىردەي كۇشەيتىپ، الباتى ٴوندىرۋدى قاتاڭ جازالاپ، جونگە سالۋعا تاباندى بولىپ، حالىق بۇقاراسىنىڭ ازىق-تۇلىك، ٴدارى تۇتىنۋ حاۋىپسىزدىگىنىڭ بارلىق بۋىندارىن باتىل تۇردە قاتاڭ باسقارۋ كەرەك»،-دەگەندى ورتاعا قويدى.


 

   مەملەكەتتىك حالىق قۇرىلتايىنىڭ ۋاكىلى ابدوللا اپباس


    ەندەشە حالىقتىڭ ازىق-تۇلىك حاۋىپسىزدىگىن قايتكەندە قامتاماسىز ەتۋگە بولادى؟


    «ازىق-تۇلىك حاۋىپسىزدىگىنە قاتىستى زاڭ–ٴتۇزىمدى تولىقتاپ جانە كەمەلدەندىرىپ، زاڭنىڭ اتقارىلۋىن بارىنشا كۇشەيتۋ كەرەك» دەگەن ۇسىنىستى ورتاعا قويعان مەملەكەتتىك حالىق قۇرىلتايىنىڭ ۋاكىلى ابدوللا اپباس: «ٴبىزدىڭ قازىرگى تۇتىنىپ جاتقان ٴسۇت، ەت، جەمىس، كوگەنىس ونىمدەرىمىزدىڭ باسىم كوبىندە كومەسكى حاۋىپ ساقتالۋدا. ايتا كەتەتىن بولساق، جەمىستىڭ ٴشىرىپ كەتۋىنىڭ الدىن الۋ ٴۇشىن كەي ۇساق پايدانى كوزدەگەن ساۋداگەرلەر جەمىس سالعان جاشىكتىڭ ورتاسىنا شىرىتۋدىڭ الدىن الاتىن حيميالىق دارىگە شىلانعان قاعازدى سالادى، ال كوگەنىس ساۋداگەرلەرى جەمىستىڭ ساقتالۋ ۋاقىتىن ۇزارتۋ، جەمىستى بالعىن كۇيىندە ساقتاۋ ٴۇشىن، جەمىستىڭ تامىرىنا فورمالدەگيد (甲醛) جاعادى ەكەن. مىنە ٴدال وسىنداي جۇگەنسىزدىكتەر جۇرتشىلىقتىڭ دەنساۋلىعىنا زيان جەتىپ وتىر»،-دەدى.


    ابدوللا اپباس: «حالىق بۇقاراسىنىڭ ازىق-تۇلىك حاۋىپسىزدىگىن شىن مانىندە قامتاماسىزداندىرۋىمىز كەرەك. حالىقتىڭ دەنساۋلىعىنا زيان جەتكىزەتىن ارەكەتتەرگە باتىل قارسى تۇرىپ، ولاردى زاڭ-ٴتۇزىم ارقىلى تەجەۋىمىز قاجەت، بۇل ۇرپاقتارىمىزدىڭ بولاشاعىنا ساياتىن كەلەلى ماسەلە»،-دەدى.

    جاۋاپتى رەداكتور: سەرىك راقىم ۇلى 
    باقىلاۋشى: قاناتبەك جۇماباي ۇلى