ەكى  ٴماجىلىس حابارلارى   
ۋاكىل باعدانگۇلدىڭ ۇسىنىسى
كەلۋقاينارى:جۇڭگو قازاق راديو تورابى     |جاۋاپتى رەداكتور:داۋىلبەك|    جاڭالانعان ۋاقىت: 2017-03-10 19:44

 



    ءوز ءتىلشىمىز گۇلباقشا ءمادى قىزى حابارلايدى: قادىرمەندى توراپتاستار، ورتالىق حالىق راديوسىنىڭ جانكۇيەر تىڭدارماندارى، مەملەكەتتىك حالىق قۇرىلتايىنداعى ۇلتىمىزدان سايلانعان بىردەن-ءبىر ايەل ۋاكىل، التاي ايماعى جەمەنەي اۋدانىنداعى جەكە كاسىپكەر باعدانگۇل زات قىزى ەستەرىڭىزدە بار شىعار! بىلتىرعى مەملەكەتتىك حالىق قۇرىلتايىندا جەمەنەي اۋدانىنىڭ اۋىز سۋ ماسەلەسى مەن جول قاتىناس ماسەلەسىن شەشىپ بەرۋ ۇسىنىسىن ورتاعا قويعان ول بيىل دا جول قاتىناسىنا قاتىستى ەكى ۇسىنىس الا كەلىپتى.

 


    ءبىر بەلدەۋ، ءبىر جول ستراتەگياسى مەن باتىس بولەكتى جاپپاي اشۋ سىندى ءبىر سىپىرا كەلەلى شەشىمدەر مەن ورنالاستىرۋلاردىڭ ىشكەرلەي تياناقتانۋىنا ساي، 2011-جىلى قىركۇيەك ايىندا مەملەكەتتىك كەڭەستىڭ ماقۇلداۋىمەن جەمەنەي اۋدانى ىلۋدە ءبىر كەزىگەتىن ساياسي ورايعا يە بولىپ، جەمەنەي وتكەلى شينجياڭ ۇيعۇر اۆتونوميالى رايونىنىڭ «جىبەك جولى شارۋاشىلىق بەلدەۋى» سولتۇستىك وتكەلىنىڭ جوسپارىنا ەنگىزىلدى ءارى شەكارا وڭىردەگى حالىقتىڭ 3 كۇندىك ۆيزاسىز ساياحاتتاۋ ساياساتى دا رەسمي ىسكە قوسىلدى.


    باعدانگۇل ازات قىزى: -جەمەنەي اۋدانى قازاقستان رەسپۋبليكاسىنىڭ شىعىس قازاقستان وبلىسىمەن شەكارالاس بولۋداي جاعراپيالىق ارتىقشىلىعىن تولىق ساۋلەلەندىرۋ، «جىبەك جولى شارۋاشىلىق بەلدەۋى» سولتۇستىك وتكەلىندەگى رولىن كۇشەيتۋ ءۇشىن، جول قاتىناسى سىندى نەگىزدىك قۇرىلىستى ەڭ الدىمەن شەشۋى قاجەت، بۇل جەمەنەي اۋدانىنىڭ ەكونوميكاسى مەن قوعامىنىڭ دامۋىن ورنىقتى جەبەيتىن باستى شارتتاردىڭ ءبىرى،-دەدى.


    باعدانگۇل: مەن بيىل «التايدان بۋىرشىنعا، بۋىرشىننان جەمەنەي وتكەلىنە قاتىنايتىن جوعارى قارقىندى تاس جولدى، جەمەنەي وتكەلىنەن قۋرايتىعا قاتىنايتىن جوعارى قارقىندى تاس جولدى اۆتونوميالى رايونىمىزدىڭ قاتىناس تاسىمالى <13-بەسجىلدىق> دامۋ جوباسىنا ەنگىزسە» جانە «التاي قالاسىنان بۋىرشىن اۋدانىنا، ونان ءارى جەمەنەي كەدەنىنە قاتىنايتىن تەمىر جول قۇرىلىسىن جەدەلدەتىپ، جۇڭگو مەن قازاقستانىڭ ەنەرگيا، بايلىق جانە زات تاسىمالى اۋىس-كۇيىس وتكەلىن قۇردى مەملەكەتتىك تەمىر جول <13-بەسجىلدىق> جوباسىنا ەنگىزسە» دەگەن ۇسىنىستى الا كەلدىم،-دەدى.


    ەگەر وسى ۇسىنىستار ىسكە اسسا، جەمەنەي اۋدانى مەن قازاقستان رەسپۋبليكاسىنىڭ شارۋاشىلىق-ساۋدا سەلبەستىگىن ارتتىرىپ، ەكونوميكانىڭ دامۋىن ءونىمدى ىلگەرلەتەدى. سونىمەن قاتار جەمەنەي اۋدانىنىڭ 2017-جىلى كەدەيلىك قالپاعىن الىپ تاستاۋ سىندى كوزدەگەن نىساناسىنىڭ جۇزەگە اسۋىن جەبەپ، كەدەيلىكتى جويىپ، حالىق تۇرمىسىن جاقسارتىپ، ورتاق بايۋدى بىرتىندەپ جۇزەگە اسىرۋعا زور قوزعاۋشى كۇش بولادى.


    رەداكتور: نۇربولات ءداۋتاقىن ۇلى


    باقىلاۋشى: باقىلاۋشى قاناتبەك جۇماباي ۇلى