قازاق قولونەرىنىڭ گۇلى گۇلبار
ءدىلنارا تابيعات قىزى، بوكەن قۇمارقان ۇلى حابارلايدى. گۇلبار دالەلقان قىزى قابا اۋدانى سارتام اۋىلدىعى تايسويعان قىستاعىندا قاراپايىم مالشى سەمياسىندا دۇنيەگە كەلگەن، ءبىر سەمياسىندا 8 اعايىندى بولىپ، 7 جاسىندا اكەسىنەن 16 جاسىندا اناسىنان ايىرىلىپتى، سول كەزدە سەميالىق جاعدايى سەبەبىنەن وقۋ ناتيجەسى الدىڭعى ورىندا بولسادا جالعاستى جوعارىلاپ وقي الماعان ەكەن. ءبىراق اياۋلى اناسى كوزى تىرىسىندە قىزىنىڭ ەرتەڭى ءۇشىن بولسادا قولىنا ينە–ءجىپ ۇستاتىپ كەستە تىگۋ، سىرماق ويۋ، كيىم-كەشەك تىگۋ، توقىما توقۋ سياقتى ونەرگە جەتەلەپ تاربيەلەگەن ەكەن.
اناسىنان ايىرىلعان قارشاداي قىز ءبىر جاعىنان اعالارىنا كومەكتەسىپ ءجۇرىپ، كورشىلەرىنىڭ كەستەسىن تىگىپ، سىرماعىن ويىپ، توقىماسىن توقىپ بەرىپ سەمياسىنىڭ ەكونوميكالىق جاعدايىنا شاماسىنىڭ كەلىسىنشە سەپتىگىن تيگىزەدى. كەيىن ول تەلەۆيزوردان كيىم-كەشەك تىگۋ جارنامالارىن كورىپ قاتتى قىزىعادى. 2001-جىلى ارناۋلى ماشينامەن كەستە تىگۋدى ۇيرەنەدى. 2003-جىلى تەكتۇرماس قىستاعىنداعى ەركىن اسحات ۇلىمەن باسقۇراپ شاڭىراق كوتەرگەن گۇلبار كەلگەن جەرىنە جىبەكتەي مىنەزىمەن، ون ساۋساعىنان ونەر تامعان ىسكەرلىگىمەن بالداي باتىپ سۋداي سىڭەدى. ىسكەر كەلىنىن اتا-ەنەسى دە ولاردى قولداپ-قۋاتتاپ، جالعاستى ونەر ۇيرەنۋىنە جەبەۋشى بولادى.
گۇلباردىڭ مانەرلەپ باسىپ شىعارعان كيىزدەرى
2015-جىلعا كەلگەندە تىڭنان كاسىپ باستاۋدىڭ سارا جولىن قاراستىرعان گۇلبار قابا اۋدانىندا باسقالار ات باسىن بۇرماعان قوي ءجۇنىن مانەرلەۋ كاسىبىنە دەن قويىپ قوي ءجۇنىن مالشىلاردان ارناۋلى ساتىپ الىپ «ءتور ءجايلاۋ قوي ءجۇنىن مانەرلەۋ شاعىن زاوۆدىن» اشىپ، جولداسى ەكەۋى بىرلىكتە قوي جۇنىنەن كيىز باسىپ بازارعا سالادى. ولاردىڭ باسقان كيىزى ادەمى ساپالى بولعاندىقتان اتاعى اسپانداپ قاريدارلارى مولايىپ، باسقان كيىزدەرىن جەمەنەي اۋدانى، كوكتوعاي اۋدانى جانە باركول اۋدانى قاتارلى ت. ب اۋدان- قالادان ارناۋلى كەلىپ تاپسىرىس بەرىپ ساتىپ الادى ەكەن.
قازىر جۇبايى ەكەۋى قوي ءجۇنىن مانەرلەۋ كاسىبىن قۇلشىنا ىستەۋمەن بىرگە ءوز تۇرمىستارىن وڭاپ، ءوز قىستاعىنداعى ءبىر بولىم ادامداردى كاسىپتەندىرۋ ءۇشىن قايرات، دۇيسەن قاتارلى 7-8 اۋىلداستارىن ايىنا 5 مىڭ يۋاننان ايلىق بەرىپ كاسىپتەندىرىپ وتىر. بۇدان سىرت، گۇلبار ءوزىنىڭ قىسقى بوس ۋاقىتتارىندا بەكەر قاراپ وتىرماي توقىما ونەرىنە قىزىعاتىن جانداردى تەلەفون ارقىلى تاربيەلەپ باۋلىپ كەلەدى ەكەن.
وسىنداي ۇزدىكسىز قۇلشىنا ەڭبەكتەنۋدىڭ ارقاسىندا ءتاتتى ەڭبەگىنىڭ جەمىسىن كورگەن گۇلبار مەن جولداسىنىڭ جىلدىق تازا كىرىسى 100 مىڭ يۋاننان اسادى ەكەن.
